ЭСКЕРОН ПОННА 43-ТӤ СТАТЬЯ
90-ТӤ КЫРӞАН Юнматэ ог-огдэс
Дунъя-а монэ Иегова?
«Ваньзэ чаклалэ-эскере» (1 ФЕС. 5:21).
МИ ТОДОМЫ
Мар кароно, милям кылдо ке малпанъёсмы, кудъёсыз Иеговалы ужаны-тыршыны мылкыдмес лябӟыто.
1, 2. а) Кыӵе юанъёссы кылдыны быгато Иеговалэн ужась-тыршисьёсызлэн? б) Мае ми эскеромы та статьяын?
КӦНЯ ГИНЭ арес милемлы медам луы, ваньмылэн таӵе юанъёсмы кылдыны быгато: «Дунъя-а монэ Иегова? Шонер-а мон ужпумъёс кутӥ егит дыръям?» Пуктэ син азяды егит Адӟись-Ивортӥсез, кудӥзлы секыт оскыны, Иегова сое дунъя шуыса. Соин ик со малпаське, солы пылатӥськон-а, ӧвӧл-а шуыса. Яке малпаське агай сярысь, кудӥз егит дыръяз, трос коньдон поттыны тыршем интые, Иеговалы ужан-тыршонэз нырысетӥ интые пуктӥз. Нош табере, куке семьяезлы коньдон уг тырмы, со малпаське, шонер-а со ужпум кутӥз егит дыръяз. Нош арлыдо сузэр, кудӥзлэн тазалыкез лябӟемын ини, сюлмаське, азьвыл мында ужаны-тыршы уг быгаты ини шуыса. Кылдылӥзы-а тӥляд но таӵе юанъёсты: «Зэм-а мон Иеговалы дуно потӥсько? Кулэ-а вал сомындазэ кельтыны, Иеговалы ужан-тыршонэз нырысетӥ интые пуктон понна? Мон Иеговалы кыӵе ке пайда вайыны быгатӥсько на-а?»
2 Сыӵе юанъёс кылдо ке, мар ке но карыны кулэ. Малы ке шуоно, номыр карытэк, Иеговалы осконмы лябӟыны быгатэ, озьы ик ми солы ужамысь-тыршемысь дугдыны быгатӥськомы. Та статьяын ми эскеромы, кызьы Библия милемлы юрттоз, милемлы секыт ке оскыны: 1) Иегова милемыз дунъя, 2) ми шонер ужпумъёс кутӥмы но 3) ми Иеговалы пайда вайыны быгатӥськомы на шуыса.
МАР КАРОНО, ЮАНЪЁСМЫ КЫЛДО КЕ
3. Мар кароно, юанъёсмы кылдо ке?
3 Юанъёсмы кылдо ке, Инмарлэн Кылысьтыз визь-кенеш утчано. Озьы ми Иеговаен кусыпъёсмес юнматомы но осконын юн сыломы (1 Кор. 16:13).
4. Мар кароно, ваньзэ чаклан-эскерон понна? (1 Фессалоникаослы 5:21).
4 Лыдӟе 1 Фессалоникаослы 5:21. Библия милемыз ӧте: «Ваньзэ чаклалэ-эскере». Кызьы сое кароно? Малы ке оскемлэсь азьло эскере, мар со сярысь вера Библия. Шуом, пияшлы секыт оскыны, Инмар со сярысь сюлмаське шуыса. Валан понна, солэн малпанэз шонер-а, ӧвӧл-а, солы Библиез усьтоно но тодоно, кызьы Иегова со шоры зэмзэ ик учке.
5. Мар кароно, юанмылы Иеговалэсь валэктонзэ шедьтон понна?
5 Вераны луоз, Библиез лыдӟыкумы, Иегова милемын вераське шуыса. Нош юанмылы солэсь валэктонзэ шедьтон понна, эшшо мар ке но кароно на. Со понна утчалэ Библиысь сыӵе кылбуръёсты, кудъёсыз тӥляд юанэныды герӟаськемын, но публикациосмыя эскерон ортчытэ (Мад. 2:3—6). Нырысь Иеговалы вӧсяське но солэсь юрттэтсэ куре валаны, мар со малпа тӥляд юанды пумысен. Собере утчалэ Библиысь возетъёсты но публикациосысьтымы визь-кенешъёсты, кудъёсыз тӥледлы юрттозы. Озьы ик пайдаё луоз эскерыны, мар вераське Библиын Инмарлэн ужась-тыршисьёсыз сярысь, кудъёсыз вашкала дыръя улӥзы но тӥляд кадь учырен пумиськизы.
6. Кыӵе пайда вайыны быгато кенешлэн пумиськонъёсыз?
6 Со сяна, Иегова милемын вераське кенешлэн пумиськонъёсаз. Ми соосты ум ке кельтылӥське, речьёсысь яке агайёслэн но сузэръёслэн валэктонъёсысьтызы ми юанмылы валэктон кылыны быгатӥськомы (Мад. 27:17). Нош али ойдолэ эскеромы, кыӵе юанъёссы кылдыны быгато Инмарлэн ужась-тыршисьёсызлэн.
ДУНЪЯ-А МОНЭ ИЕГОВА?
7. Кыӵе юанзы куддыръя кылдылэ адямиослэн?
7 Кылдылӥз-а тынад куке но таӵе юанэд: «Дунъя-а монэ Иегова?» Тон астэ номырлы ярантэм адямиен лыдъяськод ке, тыныд осконтэм потэ, вылды, быдэс дуннеез Кылдытӥсен эшъяськыны луэ шуыса. Сыӵе шӧдонъёсыз вал, дыр, Давид эксэйлэн но. Солы паймымон потэ вал, Иегова адямиослы саклыксэ висъя шуыса. Соин ик со юаз: «Кузё-Инмаре! Адями мар со, кудзэ Тон тодӥськод? Яке адями пи, кудӥз сярысь Тон сюлмаськиськод?» (Пс. 143:3). Кызьы тодыны луэ, Иегова тонэ дунъя шуыса?
8. Мае адӟе Иегова, адямиос шоры учкыкуз? (1 Эксэйлыкъёслэн 16:6, 7, 10—12).
8 Библиез лыдӟыса, валаны луэ, Иегова адӟе шуыса соосты но, кинъёсты мукет адямиос огшоры адямиосын лыдъяло. Кылсярысь, огпол Иегова Самуил пророкез ыстӥз Иессей доры, кудӥзлэн тямыс пиосыз вал. Инмар косӥз Самуилэз солэсь одӥг пизэ вӧйын зырӟыны, со Израильлы эксэй мед луоз шуыса. Иессей вань пиоссэ ӧтиз. Нош самой пичизэ, Давидэзa, ӧз ӧтьы. Но Иегова ӵапак сое бырйиз. (Лыдӟе 1 Эксэйлыкъёслэсь 16:6, 7, 10—12.) Иегова адӟе вал Давидлэсь сое, мае мукетъёсыз ӧз адӟе,— со Инмарез туж яратэ вал.
9. Кытысь адӟиське, Иегова тонэ умой тодэ шуыса? (Озьы ик учке суредэз.)
9 Малпаськы, кызьы Иегова возьматэ, тонэ дунъя шуыса. Со самой умой визь-кенеш сётэ, кудӥз ӵапак тынад учырад тыныд юрттыны быгатэ (Пс. 31:8). Со возьматэ, Иегова тонэ туж умой тодэ шуыса (Пс. 138:1). Иеговалэсь визь-кенешъёссэ улонад пыртыса но соослэсь пайдазэс адӟыса, тон валалод, Иегова тыныд юрттэ шуыса (1 Пар. 28:9; Ап. уж. 17:26, 27). Инмар адӟе, тон солэсь кылзӥськыны тыршиськод шуыса. Озьы ик со адӟе тынэсьтыд умой сямъёстэ. Солэн тонэныд эшъяськемез потэ (Иер. 17:10). Со туж шумпотоз, тынад но соин эшъяськемед потӥз ке (1 Иоанн 4:19).
«Утчад ке... [Иеговаез], шедьтод Сое» (1 Пар. 28:9). (Учке 9-тӥ абзацез.)b
ШОНЕР-А МОН УЖПУМ КУТӤ?
10. Кыӵе малпанъёс кылдыны быгато, егит дыръямы кутэм ужпумъёсмы сярысь малпаськыса?
10 Куд-ог христианъёс малпасько, егит дыръязы соос шонер ужпумъёс кутӥзы-а шуыса. Оло нош, Иеговалы тросгес ужан-тыршон понна, соос умой ужзэс кельтӥзы. Нош аръёс ортчыса, соос адӟизы, адямиос, кудъёсыз тросгес коньдон поттыны тыршизы, али туж умой уло шуыса. Соин ик соослэн таӵе малпанзы кылдыны быгатэ: «Шонер-а мон быръён лэсьтӥ, Иеговалы ужан-тыршонэз нырысетӥ интые пуктыса?»
11. Мар курадӟытэ вал 72-тӥ псаломез гожъясез?
11 Тӥляд но таӵе ик малпанъёсты кылдыло ке, эскере 72-тӥ псаломез. Та псаломез гожъясьлэн тӥляд кадь ик югдурез вал. Со адӟиз, адямиослэн, кудъёсыз Инмарлы ужатэк-тыршытэк уло, юн тазалыксы, трос коньдонзы но майбыр улонзы шуыса (Пс. 72:3—5, 12). Соосын ӵошатыса, псаломез гожъясьлы потэ вал, Иеговалы ужан-тыршонэз нокыӵе пайда уг вайы шуыса. Сыӵе малпанъёс сое котькуд нунал курадӟытӥзы (Пс. 72:13, 14). Мар со кариз урод шӧдонъёсыныз?
12. Мар юрттӥз псаломез гожъясьлы урод шӧдонъёссэ вормыны? (Псалтирь 72:16—18).
12 Лыдӟе Псалтирез 72:16—18. Псаломез гожъясь Инмарлы вӧсяськон интые пыриз. Отын, Инмарлэн ужась-тыршисьёсыз пӧлын, со ваньмыз шоры шонер учкыны быгатӥз. Со валаз, адямиосты, кудъёсыз али туж умой уло, азьпалан номыр уг возьма шуыса. Озьы ик со валаз, Иеговалы ужан-тыршонэз нырысетӥ интые пуктыса, со шонер лэсьтӥз шуыса. Та сое буйгатӥз но солы кужым сётӥз азьланяз но Иеговалы оскымон ужаны-тыршыны (Пс. 72:23—28).
13. Мар карыны луэ, урод шӧдонъёсмес вормон понна? (Озьы ик учке суредэз.)
13 Псаломъёсты гожъясь сямен, тӥ но быгатӥськоды урод шӧдонъёстэс вормыны. Кызьы? Малпаське ваньмыз умоез сярысь, марды тӥляд вань. Тӥ туж узыресь, малы ке шуоно тӥледыз Иегова бакель каре! Нош та дуннеысь адямиослэн, ваньбурзы сяна, номырзы ӧвӧл. Соослэн азьпал улонлы нокыӵе осконзы ӧвӧл. Нош милемлы Иегова дася сыӵе улон, кудзэ ми али син азямы пуктыны но ум быгатӥське (Пс. 144:16). Со сяна, нокин уг тоды, кызьы ми улысалмы, мукет быръён лэсьтысалмы ке. Но ми тодӥськомы, Инмарез но матысь адямиосмес яратыса, ми азинлыкоесь но шудоесь луомы шуыса.
Ӵемгес малпаське туж умой азьпал улон сярысь, кудзэ дасяз тӥледлы Иегова. (Учке 13-тӥ абзацез.)c
БЫГАТӤСЬКО НА-А МОН ИЕГОВАЛЫ ПАЙДА ВАЙЫНЫ?
14. Кыӵе шуг-секытъёссы вань куд-ог христианъёслэн но кыӵе юанзы соослэн кылдыны быгатэ?
14 Бадӟым арлыдзы, висеменызы яке сӧсыр луэменызы сэрен, Иеговалэн куд-ог ужась-тыршисьёсыз азьвыл мында лэсьтыны уг быгато ни. Оло нош, соослэн таӵе юанзы кылдэ: «Быгатӥсько на-а мон Иеговалы кыӵе ке пайда вайыны?»
15. Малы юн оскиз 70-тӥ псаломез гожъясь?
15 Та выллем сюлмаськонъёсыз вал 70-тӥ псаломез гожъясьлэн но. Со Иеговалы вӧсяськиз: «Кынары бырыны ӧдъяку, эн кушты монэ» (Пс. 70:9, 18). Псаломез гожъясь лябӟемын вал ке но, со юн оскиз, Инмарлы оскымон ужаз-тыршиз ке, со сое юнматоз шуыса. Туннэ но Иегова шумпотэ, милям кужыммы ӧвӧл ке но, ми солы ваньзэ умойзэ сётыны тыршиськомы шуыса (Пс. 36:23—25).
16. Мае лэсьтыны быгато арлыдоос Иегова понна но мукетъёсыз понна? (Псалтирь 91:13—16).
16 Дуно арлыдоосмы! Тырше ас шорады Иегова сямен учкыны. Эн вунэтэ: тӥ мае ке лэсьтыны уд ке быгатӥське, Иегова тӥледлы юрттыны быгатэ. (Лыдӟе Псалтирез 91:13—16.) Эн малпаське со сярысь, мае тӥ лэсьтыны уд быгатӥське ини. Нош малпаське со сярысь, мае лэсьтыны быгатӥськоды на. Номыр шоры учкытэк оскымон ужамды-тыршемды агайёсты но сузэръёсты туж юнматэ. Озьы ик тӥ быгатӥськоды соосты юнматыны, соосын тунсыкъяськыса. Вералэ соослы со сярысь, кызьы Иегова тӥледлы быдэс улонды ӵоже юрттӥськиз но мае тӥ туж возьмаськоды выль дуннелэсь. Со сяна, агайёс но сузэръёс тӥледлы туж тау карозы, тӥ соос понна вӧсяськиды ке! (1 Пётр 3:12). Кыӵе гинэ югдуръёсмы медам луэ, ми пӧлысь котькудӥз Иегова понна но мукетъёсыз понна мар ке но лэсьтыны быгатэ.
17. Малы астэ мукетъёсыныз ӵошатоно ӧвӧл?
17 Эн сюлмаське, тӥледлы потэ ке, Иеговалы туж ӧжыт сётӥськоды шуыса. Со ваньзэ дунъя. Асьтэды мукетъёсыныз эн ӵошатэ, малы ке шуоно Иегова тӥледыз нокинэн уг ӵошаты (Гал. 6:4). Малпаське: Мария Иисуслы туж дуно вӧй кузьмаз (Иоанн 12:3—5). Нош куанер палкышно храме кык векчи коньдон гинэ вайиз (Лука 21:1—4). Но Иисус та кышномуртъёсты ӧз ӵошаты. Со адӟиз, кыксы ик озьы осконзэс возьматӥзы шуыса. Иегова но ужась-тыршисьёсыз шоры озьы ик учке. Со адӟе, тӥ сое яратӥськоды но солы оскиськоды шуыса. Тӥледлы потэ ке но, тӥ туж ӧжыт лэсьтӥськоды шуыса, Иегова тыршемдэс туж дунъя!
18. Мар кароно, юанъёсмы кылдыло ке? (Озьы ик учке «Иеговалэн кылъёсыз тонэ юнматыны быгато» рамкаез.)
18 Ваньмылэн куддыръя юанъёсмы кылдыло. Но кызьы ми адӟимы, Библия милемлы юрттыны быгатэ. Утчалэ отысь юанъёстылы валэктонъёс. Соку тӥ эшшо но юнгес оскоды, Иегова тӥледыз дунъя, ужам-тыршемдэс адӟе но тӥледыз одно ик бакель кароз шуыса. Эн вунэтэ: Иегова вань оскымон ужась-таршисьёссэ туж яратэ но соос сярысь сюлмаське.
111-ТӤ КЫРӞАН Шумпотон мугъёс
a Библиын уг вераськы, кӧня арес вал Давидлы, куке Иегова сое бырйиз, озьы ке но со быдэ вуэмын ӧй вал на, дыр. (Учке 2011-тӥ арын 1-тӥ куарусён понна поттэм «Возьмаськон башняез», 29-тӥ бамез, 2-тӥ абзацез.)
b СУРЕДЫН. Егит сузэр Библиез эскере, юанэзлы Иеговалэсь валэктонзэ шедьтон понна.
c СУРЕДЫН. Агай укноосты миське, семьяезлэн ваньмыз кулэез мед луоз шуыса. Ужакуз со рай музъем вылын улонэз син азяз пуктэ.