«Быръе, кинлы ужалоды-тыршоды»

1. Мар милемлы кароно, зэмзэ ик шудоесь луон понна, но малы? (Исаия 48:17, 18).

ИЕГОВА милемыз туж яратэ. Солэн потэ, али но, азьланяз но улон милемлы шумпотон мед ваёз шуыса (Екк. 3:12, 13). Инмар адямиосты туж трос быгатонлыкъёсын кылдытӥз. Озьы ке но ми ум быгатӥське мукет адямиосын кивалтыны но ужпум кутыны, мар ӟеч, нош мар урод луэ (Екк. 8:9; Иер. 10:23). Иегова тодэ: зэмзэ ик шудоесь луон понна, ми солы ужаны-тыршыны но солэсь кылзӥськыны кулэ. (Лыдӟе Исаиялэсь 48:17, 18.)

2. Кыӵе малпан Шайтан милемлы пыӵатыны турттэ но кызьы Иегова возьматӥз, со пӧяське шуыса?

² Шайтан милемыз оскытыны турттэ, ми Инмартэк шудоесь луомы но асьмеос кивалтыны быгатомы шуыса (Ул.-выл. 3:4, 5). Шайтан пӧяське шуыса возьматон понна, Иегова адямиослы лэзиз пӧртэм пумо кивалтон амалъёсты эскерыны. Ми адӟиськомы, адямиослэн кивалтэмзы номыр умойзэ ӧз вайы шуыса. Со дыре ик Библиын вераське трос пиосмуртъёс но кышномуртъёс сярысь, кудъёсызлы Инмарлы ужан-тыршон зэмос шумпотон вайиз. Соос пӧлысь самой шудоез — Иисус Христос. Ойдолэ тодомы, малы со ужпум кутӥз Иеговалы ужаны-тыршыны. Собере ми тодомы, малы Иеговалы йыбыртъяны кулэ. Озьы ик тодамы ваёмы, малы ми ужпум кутӥмы Иеговалы ужаны-тыршыны.

МАЛЫ ИИСУС УЖПУМ КУТӤЗ ИЕГОВАЛЫ УЖАНЫ-ТЫРШЫНЫ

3. Мар ӵектӥз Шайтан Иисуслы но мае бырйиз Иисус?

³ Музъем вылын улыкуз, Иисуслы ужпум кутоно вал, кинлы со ужалоз-тыршоз. Иисуслэн пылатӥськемез бере кема ик дыр ӧз ортчы, Шайтан солы быдэс дунне вылысь эксэйлыкъёсты ӵектӥз. Со понна Иисус Шайтанлы огпол йыбырттыны кулэ вал. Но Иисус шуиз: «Кошкы Мон дорысь, шайтан; гожтэмын ук: „Инмаредлы Кузё-Инмарлы йыбыртъя, Солы Огназлы гинэ ужаса-тыршыса ул“» (Матф. 4:8—10). Малы Иисус ужпум кутӥз Инмарлы йыбыртъяны? Эскеромы куд-ог мугъёсты.

4, 5. Малы Иисус Иеговалы ужан-тыршонэз бырйиз?

⁴ Валтӥсез муг, малы Иисус Иеговалы ужан-тыршонэз бырйиз,— со туж юн аслэсьтыз Атайзэ яратӥз (Иоанн 14:31). Озьы ик Иисус тодэ, Иеговалы йыбыртъян — самой шонер сюрес шуыса (Иоанн 8:28, 29; Усьт. 4:11). Малы ке шуоно Иегова улонэз кылдытӥз, со оскиськымон но шырыт сямо Инмар (Пс. 32:4; 35:10; Иак. 1:17). Инмар Иисусэз ноку ӧз пӧя но солы трос кузьымъёс кузьмаз (Иоанн 1:14). Иеговаен ӵошатыса, Шайтан чылкак мукет. Со адямиослы сьӧлык но кулон «кузьмаз». Со пӧяськись, кӧттырмостэм но ассэ гинэ яратӥсь (Иоанн 8:44). Соин ик Иисуслэн уг поты вал Шайтан кадь луэмез но Иеговалы пумит мынэмез (Флп. 2:5—8).

⁵ Малы эшшо Иисус Иеговалы ужан-тыршонэз бырйиз? Со малпаськиз, кыӵе пайда ваёз оскымон луэмез (Евр. 12:2). Иисус тодэ вал, ваньзэ чидаз ке, Атаезлэн нимыз чылкытатэмын луоз, нош сьӧлык но кулон быдтэмын луозы шуыса.

МАЛЫ ИЕГОВАЛЫ ЙЫБЫРТЪЯНЫ КУЛЭ

6, 7. Малы туннэ тросэз Иеговалы ужатэк-тыршытэк уло но малы вань адямиос солы гинэ йыбыртъяны кулэ?

⁶ Туннэ тросэз Иеговалы ужатэк-тыршытэк уло, малы ке шуоно уг тодо, макем Инмар умой но кӧня ӟеч ужъёс со соослы лэсьтӥз. Соос тупало адямиослы, кудъёсызлы апостол Павел Афины карын тодытӥз (Ап. уж. 17:19, 20, 30, 34).

⁷ Павеллэн верамезъя, зэмос Инмар «ваньмызлы сётэ: улон но, шокан но — ваньзэ, мар кулэ». Собере Павел ватсаз: «Ваньмы асьмеос Со бордын улӥськомы, азьлань мынӥськомы, улӥськомы-вылӥськомы». Инмар, Кылдытӥсь, «одӥг адями бордысь... вань калыкъёсты поттӥз» (Ап. уж. 17:25, 26, 28). Соин ик вань адямиос солы гинэ йыбыртъяны кулэ.

8. Мае Иегова ноку уз лэсьты но кызьы со возьматэ, милемыз туж яратэ шуыса?

⁸ Иегова — Кылдытӥсь но быдэс дуннеен Кивалтӥсь бере, со быгатэ вал вань адямиосты косыны солы йыбыртъяны. Но со озьы ноку уз лэсьты. Со интые Инмар пӧртэм амалъёсын возьматэ, со зэм но вань но милемыз туж яратэ шуыса. Иеговалэн потэ, тросгес адямиос котьку но солэн эшъёсыз мед луозы шуыса (1 Тим. 2:3, 4). Соин ик Иегова милемыз дышетэ тодытыны но вераны, мар со лэсьтоз азьланяз адямиос понна (Матф. 10:11—13; 28:19, 20). Со милемыз христиан кенеше люказ но яратӥсь, сюлмаськись тӧроосты кузьмаз (Ап. уж. 20:28).

9. Кытысь адӟиське, Иегова вань адямиосты яратэ шуыса?

⁹ Иегова яратэ соосты но, кинъёс солы уг оско. Малпалэ гинэ: нырысетӥ адямиосты кылдытэм дырысен трос миллиард адямиос Иеговалэсь кылзӥськытэк улӥзы но асьсэос ужпум кутӥзы, мар ӟеч, нош мар урод луэ. Со шоры учкытэк, Иегова соослы сётӥз ваньзэ, мар кулэ, соос шумпотыса улыны мед быгатозы шуыса (Матф. 5:44, 45; Ап. уж. 14:16, 17). Иеговалы луыса соос быгато кинэн ке эшъяськыны, семья кылдытыны, нылпиос будэтыны, ужаны но ваньмызлэсь талэсь шумпотон басьтыны (Пс. 126:3; Екк. 2:24). Та возьматэ, инмысь Атаймы вань адямиосты яратэ шуыса (Пот. 34:6). Нош али ойдолэ тодамы ваёмы, малы ми ужпум кутӥмы Иеговалы ужаны-тыршыны но кызьы со милемыз бакель каре.

МАЛЫ МИ УЖПУМ КУТӤМЫ ИЕГОВАЛЫ УЖАНЫ-ТЫРШЫНЫ

10. а) Кыӵе валтӥсез муг, малы ми Иеговалы ужаськомы-тыршиськомы? (Матфей 22:37). б) Вералэ, кызьы Иегова тӥледлы чидась луэмзэ возьматӥз (Псалтирь 102:13, 14).

¹⁰ Ми Иеговалы ужаськомы-тыршиськомы, малы ке шуоно, Иисус сямен, сое юн яратӥськомы. Та валтӥсез муг. (Лыдӟе Матфейлэсь 22:37.) Милемыз туж паймыто Иеговалэн сямъёсыз. Кылсярысь, Иегова туж чидась. Куке израиль калык солэсь ӧз кылзӥськы, со соосты куриз: «Ваньды урод сюрес вылысьтыды шонер сюрес вылэ потэ» (Иер. 18:11). Иегова тодэ, ми сьӧлыкоесь, тузон гинэ луиськомы шуыса. (Лыдӟе Псалтирез 102:13, 14.) Куке тӥ малпаськиськоды Иеговалэн чидась луэмез но мукет паймымон сямъёсыз сярысь, уг поты-а тӥляд солы пырак дауръёс ӵоже ужамды-тыршемды?

11. Малы эшшо ми инмысь Атаймылы ужаськомы-тыршиськомы?

¹¹ Со сяна, ми Иеговалы ужаськомы-тыршиськомы, малы ке шуоно со шонер сюрес луэ (Матф. 4:10). Озьы ик ми тодӥськомы, ужан-тыршонмы трос пайда ваёз шуыса. Кылсярысь, Иеговалы оскымон кыльыса, ми солэсь нимзэ чылкытатӥськомы, возьматӥськомы, Шайтан пӧяське шуыса, но инмысь Атаймылэсь сюлэмзэ шумпоттӥськомы. Иеговалы ужаса-тыршыса, ми пырак улонэ нуись сюрес вылтӥ мынӥськомы! (Иоанн 17:3).

12, 13. Малы милемыз дышетэ Джейн но Пэм сузэръёслэн учырзы?

¹² Нылпиос но быгато Иеговаез юн яратыны но будэмзыя яратонзэс юнматыны. Тани Джейн но Пэмa сузэръёслэн учырзы. Библиез дышетыны кутскыкузы, соослы 11 но 10 арес вал. Анай-атайзы лэзизы соослы Адӟись-Ивортӥсьёсын Библиез дышетыны, со дыре ик соос шутэтскон нуналъёсы быдэс семьяенызы черке но ветлӥзы ке. Джейн вера: «Школаын тросэз нылпиос наркотикъёсын выро но азон-калгон сьӧлыке пыремын вал. Нош со, мае мон тодӥсько вал, Адӟись-Ивортӥсьёсын Библиез дышетыкум, юрттэ вал мыным сыӵе ужъёслэсь палэнскыны».

¹³ Кӧня ке ар ортчыса, нылашъёс пылатӥськизы. Берлогес соос пионеръёс луизы, озьы ик арлыдо анай-атайзы сярысь но сюлмаськизы. Ортчемез шоры учкыса, Джейн вера: «Мон валай, Иегова эшъёссэ ноку уг кельты шуыса. 2 Тимофейлы 2:19 верамъя, „аслэсьтызъёссэ Кузё-Инмар тодма“». Зэм но, Инмар сюлмаське соос сярысь, кинъёс сое ярато но солы ужало-тыршо.

14. Кызьы ми быгатӥськомы Иеговалэсь нимзэ чылкытатыны кылъёсынымы но ужъёсынымы? (Озьы ик учке суредъёсты.)

¹⁴ Милям потэ Иеговалэсь нимзэ чылкытатэммы. Эскеромы таӵе учырез: тӥляд матысь эшты вань. Со ӟеч, шырыт сямо но простить карись. Но тӥ тодӥды, кин ке но эштэс янгыше уськытэ, со лек но пӧяськись шуыса. Мар тӥ кароды? Тӥ эшты пала кариськоды. Ӵапак озьы ик Шайтан но со сьӧры мынӥсьёс, Иегова сярысь шонертэмзэ вераса, солэсь ӟеч нимзэ саптаны туртто. Нош ми Инмарлэсь нимзэ утиськомы, мукетъёсызлы со сярысь зэмлыкез вераса (Пс. 33:2; Ис. 43:10). Кылъёсынымы но ужъёсынымы ми возьматӥськомы, вань сюлмысьтымы Иеговалы ужаммы-тыршеммы потэ шуыса.

15. Кызьы бакель каремын вал апостол Павел улонзэ воштэмез бере? (Филиппыослы 3:7, 8).

¹⁵ Ми дась улонмес воштыны, Иеговаез шумпоттон понна но солы тросгес ужан-тыршон понна. Кылсярысь, апостол Павел иудаизм осконын бадӟым инты басьтэ вал. Но со ваньзэ кельтӥз, Христослэн дышетскисез луон понна но Иеговалы ужан-тыршон понна (Гал. 1:14). Солы луыса со оскыны быгатӥз, инмын Христосэн ӵош кивалтоз шуыса. Павел ноку уг жаля вал, сыӵе улон сюрес бырйиз шуыса. Ми но ноку ум жалялэ, Иеговалэн ужась-тыршисьёсыз луимы шуыса. (Лыдӟе Филиппыослы 3:7, 8.)

16. Малы милемыз дышетэ Джулия сузэрлэн учырез? (Озьы ик учке суредъёсты.)

¹⁶ Ми Иеговалы ужан-тыршонэз нырысетӥ интые пуктӥмы ке, со милемыз али но, азьланяз но жалятэк бакель кароз. Эскеромы Джу́лия сузэрлэсь учырзэ. Пичи дыръяз со черкын кырӟа вал. Одӥг тодмо кырӟась адӟиз быгатӥсь нылашез но сое дышетыны кутскиз. Ӝоген Джулия нимо-дано луиз но трос адямиос азьын кырӟаз. Крезьгуръя академиын дышетскыкуз, ӵош дышетскисез солы вераз, Инмарлэн нимыз — Иегова шуыса. Ӝоген Джулия арняяз кык пол Библиез дышетэ вал ини. Дыр ортчыса, со ужпум кутӥз улонзэ Иеговалы сӥзьыны. Сыӵе ужпум кутыны капчи ӧй вал. Со вера: «Тросэз верало вал, мон быгатонлыкме музъеме согисько шуыса. Нош мынам, вань кужымме поныса, Иеговалы ужаме-тыршеме потэ вал». Мар Джулия малпа кутэм ужпумез сярысь али, 30 арлэсь тросгес ортчыса? Со шуэ: «Мон каньыл сюлмын улӥсько но оскисько, азьланяз Иегова вань сюлэм малпанъёсме быдэстоз шуыса» (Пс. 144:16).

АЗЬЛАНЯЗ НО ИЕГОВАЛЫ УЖАЛЭ-ТЫРШЕ

17. Дыр туж ӧжыт кылемын бере, мар кароно соослы, кинъёс Иеговалэн ужась-тыршисьёсыз ӧвӧл на, но соослы, кинъёс Иеговалы ужало-тыршо ини?

¹⁷ Ми улӥськомы та дуннелэн берпум нуналъёсаз. Апостол Павел гожтӥз: «Эшшо ӧжытак, туж ӧжыт гинэ, Лыктӥсь вуоз, уз ӝега» (Евр. 10:37). Мае возьмато та кылъёс? Адямиослы, кудъёсыз Иеговалэн ужась-тыршисьёсыз ӧвӧл на, со пала султоно, малы ке шуоно дыр туж ӧжыт кылемын (1 Кор. 7:29). Нош Иеговалэн калыкезлэсь та кылъёс мылкыдзэс ӝуто чиданы, малы ке шуоно вань курадӟонъёссы ӝоген бырозы ини.

18. Мае возьмало милесьтым Иисус но Иегова?

¹⁸ Иисус адямиосты ӧтиз солэн дышетскисьёсыз луыны но со сьӧры мыныны (Матф. 16:24). Оло нош, тӥ Иеговалы трос аръёс ӵоже ужаськоды-тыршиськоды ини. Со туж умой! Иеговалэн потэ, тӥ азьланяз но солэн сюрес вылтӥз мед мыноды шуыса. Со сюрес капчи ӧвӧл ке но, со вылтӥ мыныса, тӥ трос шумпотон но бакель каронъёс басьтоды (Пс. 34:27).

19. Малы милемыз дышетэ Джин агайлэн учырез?

¹⁹ Куд-огъёсыз малпало, Иеговалы ужан-тыршон нокыӵе шумпотон уг вайы шуыса. Тон егит ке, оло нош, тынад но сыӵе малпанъёсыд кылдыло. Джин нимо егит агай вера: «Мон малпасько вал, улонэ юнме ортче шуыса. Огъёзъёсы шулдыръясько, пумиськыло но лек видео шудонъёсын шудо вал. Нош мон кенеше ветлӥсько но тодытӥсько гинэ вал». Кытчы вуттӥзы агаймес сыӵе малпанъёсыз? Со азьланьтэ: «Мон асме огъёзъёсы кадь возьыны кутски. Нырысь со мыным шумпотон вае вал, но зэмзэ ик шудо мон ӧй луы. Соку мон мукет сямен учкыны кутски Библиысь зэмлыкъёс шоры но ужпум кутӥ вань сюлмысьтым Иеговалы ужаны-тыршыны. Со дырысен Иегова вань вӧсяськонъёсылы ответ сётӥз».

20. Мар карыны тӥляд мылкыдды вань?

²⁰ Давид эксэй Иеговалы кырӟаз: «Тынад быръем, матад карем адями шудо — со Тынад азбаръёсад улоз» (Пс. 64:5). Ойдолэ азьланяз но Иеговалы ужаломы-тыршомы но тодамы возёмы Иисус Навинлэсь кылъёссэ: «Мон но мынам семьяосы Кузё-Инмарлы ужаса-тыршыса уломы» (Иис. Н. 24:15).