Тӥ быгатӥськоды шонертэм мылпотонъёсты вормыны

1. Маин нюръясько вань тырбыдэстэм адямиос?

ВАЛ-А тӥляд куке но юн мылкыдды лэсьтыны сое, мар Иеговалы уг яра? Вал ке, эн сюлмаське, мукет адямиослэн но сыӵе мылкыдзы кылдылэ. Библия вера, визь сынаськонъёсын, кудъёсыныз ми пумиськылӥськомы, вань адямиос пумиськыло шуыса (1 Кор. 10:13, ВД). Соин ик, тӥ кыӵе ке шонертэм мылпотонэн нюръяськиськоды ке, эн вунэтэ, мукет адямиос но сыӵе мылпотонъёсын нюръясько шуыса. Но Иеговалэн юрттэменыз тӥ быгатоды вормыны.

2. Кыӵе шуг-секытъёсын нюръясько куд-ог христианъёс но дышетскисьёс? (Озьы ик учке суредъёсты.)

² Озьы ик Библиын верамын: «Котькин но, аслаз кырсь малпанъёсызлы сётӥськыса, мылкыдзэ отчы понэ ке, соин со ассэ визь сынаськон улэ сётэ» (Иак. 1:14). Та кылбурысь адӟиське, котькудӥз аслаз мылпотонъёсыныз нюръяське шуыса. Кылсярысь, куд-ог христианъёслэн мылкыдзы ӝутске азон-калгон сьӧлыке пырыны, озьы ик куд-ог пиосмуртъёсты пиосмуртъёс борды кыске, нош кышномуртъёсты — кышномуртъёс борды. Соослэн, кинъёс азьвыл порнография учкизы, мылкыдзы ӝутскыны быгатэ нош ик сое учкыны. Сыӵе ик мылкыдзы ӝутскыны быгатэ соослэн но, кинъёс азьвыл наркотикъёсын выризы яке мултэс вина юизы. Вань на трос мукет шонертэм мылпотонъёс, кудъёсыныз нюръясько куд-ог христианъёс но дышетскисьёс. Ваньмы ми огпол ке но асьмеды апостол Павел кадь шӧдӥмы, дыр, кудӥз шуиз: «Ӟечез лэсьтэме потыку, мон борды урод думиське» (Рим. 7:21).

3. Кыӵе малпанъёсыз кылдыны быгато адямилэн, кудӥз ялан одӥг шонертэм мылпотонэн нюръяське?

³ Тӥ ялан одӥг шонертэм мылпотонэн нюръяськиськоды ке, тӥляд малпанды кылдыны быгатэ, соин нюръяськыны кужымды ӧвӧл ни шуыса. Озьы ик тӥ малпаны быгатӥськоды, сыӵе мылпотонды кылдылэ бере, тӥ Иеговалы ярантэм но со тӥледлы выль дуннеын улыны уз лэзьы шуыса. Кыкез ик малпанъёс шонертэмесь. Та статьяын ми эскеромы кык юанъёсты: 1) Малы милям сыӵе малпанъёсмы кылдылыны быгато? 2) Мар милемлы юрттоз шонертэм мылпотонъёсмес вормыны?

КЫӴЕ МАЛПАНЪЁС ШАЙТАН МИЛЕМЛЫ ПЫӴАТЫНЫ ТЫРШЕ

4. а) Малы Шайтанлэн потэ, ми мед малпаломы, визь сынаськонъёсмес вормыны ум быгатэ шуыса? б) Кытысь ми тодӥськомы, шонертэм мылпотонъёсмес вормеммы луэ шуыса?

⁴ Шайтанлэн потэ, ми мед малпаломы, визь сынаськонъёсмес вормыны ум быгатэ шуыса. Соин ик Иисус дышетскисьёссэ тазьы вӧсяськыны дышетӥз: «Милемыз визь сынаськонлэсь но утьы, уродлэсь но [«Шайтанлэсь», ВД] мозмыты милемыз» (Матф. 6:13). Шайтан вера, визь сынаськонэн пумиськыса, адями Иеговалэсь палэнскоз шуыса (Иов 2:4, 5). Малы Шайтан озьы малпа? Зэмзэ вераса, со ачиз, аслаз мылпотонэзлы сётскыса, Иеговалы оскымон ӧз кыльы. Шайтан малпа, дыр, ми но, со кадь ик, визь сынаськонэн пумиськимы ке, Иеговаез кельтомы шуыса. Шайтан малпаз, Инмарлэн Пиез но визь сынаськонлы сётскоз шуыса (Матф. 4:8, 9). Но малпаське: зэм ик-а шонертэм мылпотонъёсмы милесьтым кужмогес но ми соосты вормыны ум быгатӥське? Со озьы ӧвӧл. Ми соглаш апостол Павелэн, кудӥз шуиз: «Мертантэм бадӟым кужым асьме бордысь уг, Инмар бордысь потэ» (2 Кор. 4:7).

5. Малы вераны луэ, Иегова тодэ, ми шонертэм мылпотонъёсмес вормыны быгатӥськомы шуыса?

⁵ Иегова Шайтан кадь уг малпа. Инмар тодэ, ми шонертэм мылпотонъёсмес вормыны быгатӥськомы шуыса. Кытысь ми сое тодӥськомы? Иегова вераз, туж-туж трос адямиос солы оскымонэсь кылёзы но бадӟым куректон пыр потозы шуыса. Малпалэ гинэ, Инмар, кудӥз пӧяськыны уг быгаты, вера, кӧня ке адями гинэ ӧвӧл, нош туж-туж трос калык, «тӧдьы дӥськутэн» дӥсяськыса, выль дуннее пыроз шуыса. Та возьматэ, соос Инмарлэн син азяз чылкытэсь луозы шуыса (Усьт. 7:9, 13, 14). Адӟиське, Иегова уг малпа, ми шонертэм мылпотонъёсмес вормыны ум быгатӥське шуыса.

6, 7. Кыӵе эшшо малпан Шайтан милемлы пыӵатыны тырше?

⁶ Озьы ик Шайтанлэн потэ, ми мед малпаломы, шонертэм мылпотонъёсынымы сэрен Иегова милемлы пырак улыны уз лэзьы шуыса. Но зэмзэ верано ке, Шайтан ачиз Иеговалы ярамон ӧвӧл но солэн вуоноезлы нокыӵе осконэз ӧвӧл (Ул.-выл. 3:15; Усьт. 20:10). Нош милям вуоноезлы осконмы вань. Соин ик Шайтан милемлы туж лекъяське но солэн потэ, милям но вуоноезлы осконмы медаз луы шуыса. Но Иегова ми шоры мукет сямен учке. Солэн потэ, ми пырак мед уломы шуыса. Инмарлэн потэ, «нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса» (2 Пётр 3:9).

⁷ Шайтанлэн потэ, шонертэм мылпотонъёсмы кылдыку, ми мед малпаломы, милям соосты вормыны кужыммы ӧвӧл яке ми Инмарлы ярамонэсь ӧвӧл ни шуыса. Милям Шайтанлы сётскеммы уг поты бере, ми шонертэм мылпотонъёсынымы нюръяськыны тыршомы (1 Пётр 5:8, 9).

КЫӴЕ ШӦДОНЪЁСМЫ КЫЛДЫНЫ БЫГАТО, ТЫРБЫДЭСТЭМ ЛУЭМЕНЭМЫ СЭРЕН

8. Малы эшшо милемлы секыт шонертэм мылпотонъёсынымы нюръяськыны? (Псалтирь 50:7). (Озьы ик учке «Валэктонэз».)

⁸ Шонертэм мылпотонъёсынымы нюръяськыку, ми малпаськомы ке, кужыммы ӧвӧл ни но ми Иеговалы ярамонэсь ӧвӧл шуыса, Шайтан котьку ик янгыш ӧвӧл. Малы эшшо милям сыӵе малпанъёсмы кылдыны быгато? Тырбыдэстэм луэменымы сэрен — сьӧлыкa сэрен, кудӥз милемлы Адамлэсь но Евалэсь выжиз (Иов 14:4; лыдӟе Псалтирез 50:7).

9, 10. а) Мар шӧдӥзы Адам но Ева, куке сьӧлыказы? (Озьы ик учке суредэз.) б) Кызьы ми вылын шӧдӥське Адамлэсь но Евалэсь выжем сьӧлык?

⁹ Тодамы ваёмы, мар шӧдӥзы Адам но Ева, куке сьӧлыказы. Иеговалэсь курон-косонзэ тӥямзы бере соос солэсь пегӟизы но мугоръёссэс маин ке шобыртыны малпазы. Сьӧлыкаменызы сэрен соос асьсэды янгышен лыдъязы, кышказы но соослы возьыт луиз. Вераны луоз, Адамез но Еваез пытсазы корка, кудаз куинь гинэ комната вал. Соос одӥг комнатаысь мукетаз потаны быгато вал, но кыре потыны уг быгато вал, яке тырбыдэстэм луэмзылэсь мозмытскыны уг быгато вал.

¹⁰ Но милям югдурмы Адамлэн но Евалэн югдурзылэсь пӧртэм. Дун тырон милемыз сьӧлыклэсь чылкытатыны но милемлы чылкыт возьытлык сётыны быгатэ, нош Адамлы но Евалы дун тырон сое уг сёты (1 Кор. 6:11). Озьы ке но милемлы сьӧлык но тырбыдэстэм луон выжизы. Соин ик ми но асьмеды янгышен лыдъяськомы, кышкаськомы но асьмелы возьыт луэ. Библия верамъя, сьӧлык адямиос вылын туж зол шӧдӥське — «Адамлэн йыружезлы тупась сьӧлык лэсьтымтэос вылын но» (Рим. 5:14). Но малпано ӧвӧл, ми тырбыдэстэмесь вордӥськимы бере, ми асьмеды шонер возьыны ум быгатӥське но милям вуоноезлы нокыӵе осконмы ӧвӧл шуыса. Сыӵе малпанъёсын нюръяськыны кулэ. Мар милемлы юрттоз?

11. Ми шӧдӥськомы ке, шонертэм мылпотонъёсынымы нюръяськыны ум быгатӥське ни шуыса, мар милемлы кароно, Римъёслы 6:12 лыдэ басьтыса?

¹¹ Милям малпанмы кылдэ ке, шонертэм мылпотонъёсынымы нюръяськыны ум быгатӥське ни шуыса, озьы милемын тырбыдэстэм луэммы «вераське», вылды. Милемлы сое кылзоно ӧвӧл. Малы? Малы ке шуоно Библиын гожтэмын, милемын «сьӧлык кузёяськыса медаз улы» шуыса. (Лыдӟе Римъёслы 6:12.) Озьыен, милемлы шонертэм мылпотонъёслэсь кылзӥськоно ӧвӧл (Гал. 5:16). Иегова милемыз визь сынаськонъёсын нюръяськыны куре бере, со тодэ, ми соосты вормыны быгатӥськомы шуыса (К. Зак. 30:11—14; Рим. 6:6; 1 Фес. 4:3). Адӟиське, ми быгатӥськомы шонертэм мылпотонъёсынымы нюръяськыны.

12. Ми малпаськомы ке, Инмарлы ярамонэсь ӧвӧл ни шуыса, мар милемлы кароно но малы?

¹² Нош мар кароно, ми малпаськомы ке, шонертэм мылпотонъёсынымы сэрен Иеговалы ярамонэсь ӧвӧл ни шуыса? Озьы но милемын тырбыдэстэм луэммы «вераське». Милемлы сое кылзоно ӧвӧл. Малы? Малы ке шуоно Библиын гожтэмын, Иегова ми сярысь ваньзэ тодэ но умой вала шуыса, кызьы котькудмы вылын сьӧлык шӧдӥське (Пс. 102:13, 14; 1 Иоанн 3:19, 20). Ми шонертэм мылпотонъёсын нюръяськиськомы ке но соослэсь ум ке кылзӥськиське, Иегова милемыз чылкыт адямиосын лыдъя. Малы милям талы оскеммы луэ?

13, 14. Милям шонертэм мылпотонъёсмы кылдыло ке, возьматэ-а со, ми Иеговалы ярамонэсь ӧвӧл ни шуыса? Валэктэ.

¹³ Библия висъя шонертэм ужъёсты (кудъёссэ милям чакламмы луэ) но шонертэм мылпотонъёсты (кудъёсыз асьсэ понна кылдыны быгато). Кылсярысь, коринф кенешысь куд-огъёсыз христианъёс луэмзылэсь азьвыл гомосексуалистъёс вал. Павел гожтӥз: «Тӥ пӧлын но куд-огез сыӵеесь ик вал». Возьматэ-а та, пылатӥськемзы бере соослэн шонертэм мылпотонъёссы ноку ӧз кылдылэ ни шуыса? Кылдылӥзы, дыр, малы ке шуоно сыӵе сямъёс туж мур пыӵало но соослэсь мозмытскыны туж секыт. Но христиан мурт ассэ кияз кутыны тыршиз ке но шонертэм мылпотонъёсызлэсь ӧз кылзӥськы ке, со Иеговалы ярамон вал. Инмар сое чылкыт адямиен лыдъяз (1 Кор. 6:9—11). Туннэ но озьы ик.

¹⁴ Кыӵе гинэ шонертэм мылпотонъёсын тӥ медад нюръяське, тӥ быгатоды соосты вормыны! Тӥ соослэсь быдэсак мозмытскыны уд быгатэ ке но, тӥ быгатӥськоды асьтэды кияды кутыны но сьӧлыко мылпотонъёстылэсь но малпанъёстылэсь кылзӥськытэк улыны (Еф. 2:3). Азьланяз ми эскеромы пайдаё визь-кенешъёсты, кудъёсыз милемлы юрттозы шонертэм мылпотонъёсмес вормыны.

МАР ЮРТТОЗ ВОРМЫНЫ

15. Малы шонертэм мылпотонъёсты вормон понна, аслэсьтыд ляб палъёстэ тодоно?

¹⁵ Нырысетӥез, мар кароно шонертэм мылпотонъёсты вормон понна,— аслэсьтыд ляб палъёстэ тодоно. «Асьтэдыз асьтэос эн ӧрекчалэ» (Иак. 1:22). Кызьы озьы луыны быгатэ? Кылсярысь, куд-огъёсыз, кинъёслэн азьвыл мултэс вина юонэн шуг-секытъёссы вал, малпаны быгато, шуг-секытсы сокем бадӟым ӧвӧл но мукетъёсыз соослэсь тросгес юо шуыса. Яке куд-огъёсыз, кинъёс азьвыл порнография учкизы, быгато мукетъёсты янгыше уськытыны но вераны: «Кышное монэ золгес яратысал ке, мон порнография ӧй учкысал». Но озьы малпаськон, визь сынаськонэз палэнтыны юрттэм интые, шонертэм мылпотонъёсты пуромытыны быгатэ. Соин ик асьтэды шонере эн поттэ, малпанъёсады гинэ но. Ужъёсты понна асьтэос кыл кутэ (Гал. 6:7).

16. Мар эшшо юрттоз на асьмеды шонер возьыны?

¹⁶ Озьыен, тӥ асьтэлэсь ляб палъёстэс тодӥды. Мар кароно собере? Юн мылкыдды мед луоз соослы сётскытэк улыны (1 Пётр 1:15, 16; 1 Кор. 9:26, 27; 1 Фес. 4:4). Валаны тырше, ку но кытын тӥ сьӧлтэтэ сюрыны быгатӥськоды. Оло нош, тӥледлы секыт кыӵе ке удысын асьтэды кияды кутыны. Оло нош, тӥледлы секыт шонертэм мылпотонъёсыныды нюръяськыны, куке тӥ жадемын яке бер ӝыт. Малпаське, кызьы тӥ асьтэды возёды, сыӵе учыр кылдӥз ке. Умой луоз, тӥ визь сынаськон кылдэмлэсь азьло сыӵе ужпум кутӥды ке (Мад. 22:3).

17. Малы ми дышетскиськомы Иосифлэсь? (Улон-вылон 39:7—9). (Озьы ик учке суредъёсты.)

¹⁷ Тодамы ваёмы, кызьы ассэ возиз Иосиф, куке Потифарлэн кышноез сое азон-калгон сьӧлыке кыскыны тыршиз. Иосиф соку ик но юн мылкыдын солэсь ӵектонзэ палэнтӥз. (Лыдӟе Улон-вылонэз 39:7—9.) Мае та возьматэ? Со учыр кылдэмлэсь азьло ик Иосиф ужпум кутӥз вал ини, кызьы ассэ мурт кышноен возёз. Ӵапак озьы ик тӥ но визь сынаськон кылдэмлэсь азьло ик ужпум кутыны быгатӥськоды, кызьы асьтэды возёды. Соку, сыӵе учыр кылдӥз ке, тӥ уд пайме но тӥледлы асьтэды шонер возьыны капчигес луоз.

«АСЬТЭДЫЗ АСЬТЭОС ЭСКЕРЕ»

18. Мар эшшо милемлы юрттоз на шонертэм мылпотонъёсты вормыны? (2 Коринфъёслы 13:5).

¹⁸ Мар эшшо юрттоз на шонертэм мылпотонъёсты вормыны? Милемлы ялан асьмеды эскероно. (Лыдӟе 2 Коринфъёслы 13:5.) Дырын-дырын малпанъёстэс но ужъёстэс эскере но малпаське, мае тупатыны кулэ. Кылсярысь, тӥ визь сынаськонлы ӧд сётске ке но, юалэ асьтэлэсь: «Кӧня мыным дыр кулэ луиз, сое палэнтон понна?» Тӥ малпаськоды ке, сое соку ик ӧд палэнтэ шуыса, асьтэды эн тышкаське. Со интые асьтэды юнматэ. Малпаське: «Макем ӝог мон шонертэм малпанъёсты палэнтӥсько? Быгатӥсько-а мон соосты ӝоггес палэнтыны? Оло нош, мон шонертэм шутэтскон амалъёсты бырйисько, соин ик мыным секыт визь сынаськонъёслы сётскытэк улыны? Соку ик-а мон синъёсме палэнтӥсько азон-калгонэн герӟаськем суредъёслэсь? Соглаш-а мон, Иеговалэн куронъёсыз самой умоесь шуыса, соослэсь кылзӥськон понна, мыным асме киям кутыны кулэ ке но?» (Пс. 100:3).

19. Малы пичи янгышъёсын сэрен шонертэм мылпотонъёсын нюръяськыны секытгес луэ?

¹⁹ Озьыен, асьтэды шонере поттыны эн турттэ. Библиын гожтэмын: «Адями сюлэм кадь кескич номыр ӧвӧл, со укыр сӧриськемын» (Иер. 17:9). Иисус вераз, «сюлмысь... уродэсь-лекесь малпанъёс» пото шуыса (Матф. 15:19). Кылсярысь, адями, кудӥз азьвыл порнография учкиз, дыр ортчыса, малпаны быгатэ, со сыӵе сьӧлтэтэ уз сюры ни шуыса. Со малпамъя, со учкиз ке туспуктэмъёсты, кудъёсаз быдэсак гольыкесь адямиос возьматэмын ӧвӧл, номыр уродэз уз луы. Яке со малпаны быгатэ: «Мон сое учкисько гинэ ук, мон сое уг лэсьтӥськы. Со урод ӧвӧл». Но вераны луоз, сыӵе адями малпа ини, кызьы сьӧлыко мылпотонъёссэ быдэстыны (Рим. 13:14). Со сярысь эн вунэтэ. Пичи янгышъёслэсь но палэнске. Малы ке шуоно пичи янгышъёс бадӟым сьӧлыке вуттыны быгатоb. Палэнтэ котькуд кырсь малпанэз.

20. Кыӵе улон дасяз милемлы Иегова азьланяз но кызьы со милемлы али ик юрттэ ини?

²⁰ Кызьы ми тодӥмы, Иеговалэн юрттэменыз ми быгатӥськомы визь сынаськонъёсты вормыны. Дун тырон милемлы выль дуннеын пырак улыны оскон сётэ. Азьланяз ми быгатомы чылкыт малпанъёсын но чылкыт сюлмын Иеговалы ужаны-тыршыны. Макем умой соку луоз! Нош со дырозь милемлы азьланяз но шонертэм мылпотонъёсынымы нюръяськоно. Ми тодӥськомы, Иеговаен ми одно ик вормомы шуыса!