Кулэ-а святойёслы вӧсяськыны?

Библиысь валэктон

Кулэ ӧвӧл. Библиын гожтэмъя, вӧсяськыны кулэ Инмарлы гинэ, Иисус Христос пыр. Иисус аслаз дышетскисьёсызлы вераз: «Тӥ тазьы вӧсяськелэ: Инмысь Атаймы! Тынад нимыд дано мед луоз» (Матфей 6:9). Иисус ноку ӧз дышеты, Инмарлы сяна, святойёслы, кылчинъёслы яке кинлы ке эшшо вӧсяськоно на шуыса.

Озьы ик Иисус аслаз дышетскисьёсызлы шуиз: «Мон — сюрес но, зэмлык но, улон но; Мон пыр сяна нокин но Атай доры уг лыкты» (Иоанн 14:6). Ми понна дурбасьтыны Инмар пуктӥз Иисусэз гинэ (Еврейёслы 7:25).

Нош мон Инмарлы но, святойёслы но вӧсяськисько ке?

Дас курон-косонъёс пӧлысь одӥгаз Инмар вераз: «Мон тынад Инмаред Кузё-Инмар, кылэз юн юась Инмар» (Потон 20:5). Кызьы валано «кылэз юн юась Инмар» шуыса верамез? Одӥг ӟуч Библиын, кудзэ А. П. Лопухин берыктӥз, та кылбурлы валэктон вань. Отын гожтэмын: «Инмар уте правозэ, адямиос солы гинэ мед йыбыртъялозы шуыса». Инмар куре, ми солы гинэ мед йыбыртъяломы шуыса. Та возьматэ, ми солы гинэ вӧсяськыны кулэ шуыса (Исаия 48:11).

Кинлы ке эшшо вӧсяськиськыса, святойёслы яке кылчинъёслы ке но, ми Инмарез сантэмаськомы. Куке апостол Иоанн кылчинлы йыбырттыны турттӥз, кылчин сое дугдытӥз но шуиз: «Эн, тазьы эн лэсьты; мон тонэн ӵош, тынад агай-вынъёсыныд ӵош — Иисус сярысь шара ивортӥсьёсын ӵош — ужась луисько. Инмарлы йыбыртты» (Усьтӥськон 19:10).