Кызьы нылпилы ӵош кӧлан сярысь валэктоно

ШУГ-СЕКЫТ

Трос аръёс талэсь азьло пиосмурт кышномуртэн кӧлан сярысь нылпиос нырысь ик анай-атайзылэсь тодо вал. Анай-атайёс нылпизы будэмъя пумен тупен-тупен солы со сярысь валэкто вал.

Нош али улон воштӥськиз. Кызьы верамын одӥг книгаын, али нылпиос пичи дырысенызы ик ӵош кӧлан сярысь олокытысь но кыло ини. Со сяна, отын верамын, нылпиослы передачаосын шонерак ӵош кӧлан сярысь уг верало ке но, валаны луэ, отын со сярысь вераськон мынэ шуыса (The Lolita Effect). Кызьы со шӧдӥське пиналъёс вылын? Со соослы умой каре-а, урод каре-а?

МАЕ ТОДЫНЫ КУЛЭ

Туж трос ӵош кӧлан сярысь верамын. Психолог Дебора Рофман аслаз книгаяз гожтэ: «Рекламаын, фильмъёсын, книгаосын, кырӟанъёсын, телепередачаосын, шудонъёсын — котькытын туж трос верамын ӵош кӧлан сярысь. Соин ик тросэз [быдэ вуымтэос но, пичи пиналъёс гинэ но] малпало, дыр, ӵош кӧлан улонын валтӥсез шуыса» (Talk to Me First).

Реклама аслэсьтыз ужзэ быдэстэ. Али пичиослы бадӟымъёслы кадь кильтырес дӥськут вуро. Реклама бордын ужасьёс но вузкарисьёс туж ушъяса верало со дӥськут сярысь. Озьы соос нылпиосты пичи дырысенызы ик дышето ас вылтуссылы укыр трос саклык висъяны. «Реклама бордын ужасьёс тодо, мар кельше нылпиослы, соин ик соос ӵекто сое,— верамын одӥг книгаын.— Сексуальной дӥськут ӵектыса, реклама бордын ужасьёслэн уг поты нылпиосты ӵош кӧланэ кыскемзы, нош соослэн потэ тросгес вуззэс вузамзы» (So Sexy So Soon).

Тодэм гинэ ӧжыт. Тодыны, кызьы машина ужа, но умой водитель луыны — со одӥг ӧвӧл. Озьы ик пӧртэм луэ, куке тон тодӥськод ӵош кӧлан сярысь но куке тон тодэмдэ улонэ пыртӥськод но визьмо ужпумъёс кутӥськод.

Йылпумъян лэсьтомы. Анай-атайёс, туннэ туж кулэ валэктыны пиналдылы пиосмурт кышномуртэн кӧлан сярысь. Со юрттоз солы «ӟечез но, уродэз но висъяны» (Еврейёслы 5:14).

МАР КАРЫНЫ ЛУОЗ

Асьтэос вераськыны кутске. Тӥледлы нылпиеныды ӵош кӧлан сярысь вераськыны возьыт ке но, тӥледлы кулэ со сярысь вераськыны. Со тӥляд ужды. Солэсь эн палэнске. (Библиысь визь-кенеш: Мадёнъёс 22:6.)

Вакчияк вераське. Пиналэныды одӥг пол но кема вераськытозь, тырше тупась учыр бырйыны но вакчияк вераськыны, кылсярысь, корка котырысь ужъёсты лэсьтыкуды яке кытчы ке мыныкуды. Пиналэныды сюлмысь вераськон понна, тодыны тырше, мар со малпа. Кылсярысь, «Тыныд кельше-а та реклама?» юам интые, тӥ юаны быгатысалды: «Кызьы тон малпаськод, малы та рекламаын та сярысь верамын?» Верамзэ кылзэмды бере юаны луоз: «Нош тон мар со сярысь малпаськод?» (Библиысь визь-кенеш: Кыкетӥ Закон 6:6, 7.)

Пиналдылэсь арессэ лыдэ басьтэ. Нылпиосты пичи дыръя соослы вераны луоз, кызьы нылпи кылдытон органъёс нимасько, озьы ик, кызьы эриктэмасьёслэсь утиськоно. Куке нылпиосты бадӟымгес будӥзы, соослы вераны луоз, кызьы нылпиос кылдо. Нош нылпиосты эшшо но бадӟымгес будӥзы ке, соослы вераны луоз ини, мар ӵош кӧланын умоен, нош мар уродэн лыдъяське.

Валэктэ нылпиостылы, мар ӟечез, нош мар уродэз луэ. Нылпиосты пичи дырысенызы ик тодыны кулэ, пӧяськыны уг яра шуыса, оскымон луоно но мукетъёссэ гажано шуыса. Соку, дырыз вуиз ке, тӥ соосын капчиен вераськыны быгатоды ӵош кӧлан сярысь. Озьы ик вералэ пиналдылы, мае тӥ умоен, нош мае уродэн лыдъяськоды. Кылсярысь, тӥ малпаськоды ке, адямиослы кузпалъяськемзылэсь азьло ӵош кӧланы уг яра шуыса, шонерак вералэ пиналдылы, но одно ик валэктэ, малы со урод но кыӵе со изъян вайыны быгатэ. Одӥг книгаын верамын: «Анай-атайёс кузпалъяськемлэсь азьло ӵош кӧланэз умойтэмен лыдъяло ке, соослэн пиналъёссы шергес азон-калгон сьӧлыке пыро» (Beyond the Big Talk).

Пример возьматэ. Улэ озьы, кызьы тӥ нылпиостэс дышетӥськоды. Малпаське: кин ке возьыттэмез сярысь вера ке, серекъяськоды-а тӥ? ӝикыт-а тӥ дӥсяськиськоды? Анайёс, кызьы тӥ асьтэды мурт пиосмуртъёсын возиськоды? Нош тӥ, атайёс, кызьы асьтэды мурт кышномуртъёсын возиськоды? Тӥ асьтэды умойтэм возиды ке, нылпиостэс умоезлы дышетыны тыршемды юнме луоз. (Библиысь визь-кенеш: Римъёслы 2:21, 22.)

Умой палъёсыз сярысь вералэ. Ӵош кӧланы быгатон — со Инмарлэн кузьымез. Со кузьымез шонер кутӥд ке, яке кузпалэныд гинэ кӧлад ке, со трос шумпотон ваёз (Мадёнъёс 5:18, 19). Валэктэ пиналдылы, дыр ортчыса, та кузьым солы но шумпотон ваёз шуыса, со сое шонер кутӥз ке — кузпалэныз гинэ кӧлаз ке (1 Тимофейлы 1:18, 19).