Дась луэ Иеговалэн нуналэзлы

1. Мар милемлы кароно, Иеговалэн нуналыз дыръя утиськон понна?

КУКЕ Библиын гожтэмын «Иеговалэн нуналыз» сярысь, отын вераське дыр сярысь, куке Инмар аслэсьтыз тушмонъёссэ судъя но ужась-тыршисьёссэ уте. Азьвыл Иегова куд-ог калыкъёсты кыл кутытылӥз (Ис. 13:1, 6; Иез. 13:5; Соф. 1:8). Асьме нуналъёсы «Иеговалэн нуналыз» кутскоз Быдӟым Вавилон вылэ урдсконысен но йылпумъяськоз Армагеддон ожмаськонэн. Со «нуналэ» утиськон понна, али ик ини дасяськыны кулэ. Малы ке шуоно Иисус дышетӥз, ми бадӟым куректонлы котьку но дась луыны кулэ шуыса (Матф. 24:21; Лука 12:40).

2. Кыӵе пайда ваёз Фессалоникаослы 1-тӥ гожтэтэз эскерон?

² Фессалоникаослы 1-тӥ гожтэтын апостол Павел куд-ог примеръёсты вера, христианъёс Иеговалэн бадӟым судъян нуналэзлы дась мед луозы шуыса. Павел тодӥз, Иеговалэн нуналыз берлогес вуоз шуыса (2 Фес. 2:1—3). Озьы ке но вын-агайёсызлэсь со мылкыдзэс ӝутӥз Иеговалэн нуналэзлы дась луыны, со ӵуказе ик вуоз кадь шуыса. Ми но быгатӥськомы апостол Павеллэсь визь-кенешсэ уже кутыны. Ойдолэ эскеромы: 1) кызьы Иеговалэн нуналыз лыктоз, 2) кин со нуналэ утиськыны уз быгаты, 3) кызьы ми быгатӥськомы со нуналлы дасяськыны.

КЫЗЬЫ ЛЫКТОЗ ИЕГОВАЛЭН НУНАЛЫЗ?

3. Малы Иеговалэсь нуналзэ лушкаськисен ӵошатыны луэ? (Озьы ик учке суредэз.)

³ «Уйин лушкаськись кадь» (1 Фес. 5:2). Куинь примеръёс пӧлысь та нырысетӥез, кудзэ апостол Павел уже кутэ, Иеговалэн нуналэзлэн лыктонэз сярысь веракуз. Лушкаськисьёс ӵем дыръя асьсэлэсь ужъёссэс ӝог но пеймыт дыръя лэсьто, куке адямиос соосты уг возьмало. Иеговалэн нуналыз но тросэз адямиос понна малпамтэ шорысь лыктоз. Зэмос христианъёс но паймозы, вылды, макем ӝог югдур воштӥськоз. Но, лек адямиосын ӵошатоно ке, ми утиськыны быгатомы.

4. Малы Иеговалэсь нуналзэ ӵошатыны луэ нуны вайись кышномуртлэн курадӟонэныз?

⁴ «Нуны вайись кышномурт доры» ӝог вуись курадӟон кадь (1 Фес. 5:3). Нуны вайись кышномурт пыр-поч уг тоды, ку со нунызэ ваёз. Но со тодэ, сыӵе дыр вуоз шуыса. Ӵем дыръя со малпамтэ шорысь вуэ, вӧсь каре но сое дугдытыны уг луы. Ӵапак озьы ик ми но ум тодӥське нуналэз но часэз, ку Иеговалэн нуналыз кутскоз. Но ми тодӥськомы: со одно ик лыктоз но Инмар лек адямиосты судъялоз соку, куке соос уз но возьмалэ.

5. Малы бадӟым куректонэз ӟардонэн ӵошатыны луэ?

⁵ Ӟардон кадь. Куинетӥ примераз Павел нош ик вера уйин лушкаськисьёс сярысь. Но таяз учырын Иеговалэсь нуналзэ со ӟардонэн ӵошатэ, вылды (1 Фес. 5:4). Куддыръя лушкаськисьёс, кырсь ужъёссэс лэсьтыкузы, дырез чакланы но вунэто. Выль нунал соос понна шӧдтэк шорысь лыктыны быгатэ. Соку соосты ваньзы адӟыны быгатозы. Ӵапак озьы ик бадӟым куректон дыръя адӟиськозы «емыш сётӥсьтэм пеймытлыклэн ужъёсыз», кудъёсыныз лек адямиос выро. Но ми быгатӥськомы Иеговалэн нуналэзлы дасяськыны. Со понна ми палэнтӥськомы ужъёсты, кудъёсыз Иеговалы уг кельшо, но кыстӥськиськомы «ӟеч сямо луон, шонерлыко, зэмлыко улон» пала (Еф. 5:8—12). Собере Павел, кык примеръёсты кутыса, возьматэ, кинъёс Иеговалэн нуналыз дыръя уз утиське.

КИНЪЁС УЗ УТИСЬКЕ ИЕГОВАЛЭН НУНАЛЫЗ ДЫРЪЯ?

6. Малы вераны луоз, тросэз адямиос изё шуыса? (1 Фессалоникаослы 5:6, 7).

⁶ «Изисьёс». (Лыдӟе 1 Фессалоникаослы 5:6, 7.) Соосты, кинъёс Иеговалэн нуналыз дыръя уз утиське, Павел ӵошатӥз изисьёсын. Соос котырысьтызы югдурез но дырлэсь ортчемзэ уг валало. Соин ик соос кулэ луись югдуръёсты уг адӟо яке асьсэды шонертэм возё. Туннэ тросэз изись адямиослы кельшо (Рим. 11:8). Соос уг валало, ми «берпум нуналъёсы» улӥськомы но ӝоген бадӟым куректон вуоз шуыса. Куке дуннеын бадӟым воштӥськонъёс кылдо, соос сайкало но Эксэйлык сярысь иворен кӧня ке тунсыкъяськыны кутско. Озьы ке но, азьланяз но сак луэм интые, соос нош ик умме усё. Вань соосыз но, кинъёс оско, судъян нунал вуоз шуыса, но соослэн малпамзыя, со ӝоген уз вуы на (2 Пётр 3:3, 4). Но ми валаськомы, нуналысь нуналэ сак луыны туж кулэ шуыса.

7. Малы соосты, кинъёсты Инмар быдтоз, кудӟытозь юисьёсын ӵошатыны луэ?

⁷ «Кудӟытозь юисьёс». Соосты, кинъёсты Инмар быдтоз, апостол Павел ӵошатӥз кудӟытозь юисьёсын. Кудӟем адями котырысьтыз югдурез соку ик уг вала но шонер ужпумъёс кутыны уг быгаты. Тае ик вераны луэ лек адямиос сярысь но. Соос Инмарлэсь алонъёссэ пелязы уг поно. Сыӵе адямиос мыно сюрес вылтӥ, кудӥз быронэ нуэ. Но Библия христианъёслэсь мылкыдзэс ӝутэ сазь улыны (1 Фес. 5:6). Библиез эскерисьлэн верамезъя, сазь улон возьматэ, адями, сюлмаськонъёс шоры учкытэк, каньыл сюлмын улэ но малпаськыса шонер ужпумъёс кутэ шуыса. Малы милемлы каньыл сюлмын улоно но шонер малпаськоно? Та дуннеысь адямиос сямен асьмеды медам возе шуыса. Милемыз кужмысь косыны быгато политикаен герӟаськем яке мукет юанъёсын кин ке пала кариськыны. Иеговалэн нуналыз матэктэмъя, ми вылэ эшшо но золгес зӥбозы. Озьы ке но сюлмаськоно ӧвӧл, мар верано. Инмарлэн духез юрттоз милемлы каньыл сюлмын улыны но малпаськыса визьмо ужпумъёс кутыны (Лука 12:11, 12).

КЫЗЬЫ ДАСЯСЬКОНО ИЕГОВАЛЭН НУНАЛЭЗЛЫ?

8. Лыдэ басьтоно ке 1 Фессалоникаослы 5:8, маин ӵошатӥсько сямъёс, кудъёсыз юрттозы милемлы сак луыны? (Озьы ик учке суредэз.)

⁸ «Осконлэсь, яратонлэсь корт дӥсьсэс дӥсяломе... оскиськонлэсь корт изьызэ изьыяломе». Павел милемыз ӵошатӥз ожгарчиосын, кудъёсыз вань ожмаськон дӥсьсэс дӥсязы но котьку сак уло. (Лыдӟе 1 Фессалоникаослы 5:8.) Ожгарчи ожмаськонлы котьку но дась луыны кулэ вал. Тае ик вераны луэ ми сярысь но. Ми Иеговалэн нуналэзлы дась луомы, ми вылын луизы ке осконлэн но яратонлэн корт дӥсьсы, озьы ик оскиськонлэн, яке вуоноезлы осконлэн, изьыез. Та сямъёс утиськон понна туж кулэ.

9. Кызьы милемыз уте оскон?

⁹ Корт дӥсь ожгарчилэсь сюлэмзэ утьылӥз. Ӵапак озьы ик оскон но яратон милесьтым «сюлэммес» утё. Та сямъёс юртто милемлы Иеговалы ялан ужаны-тыршыны но Иисус сьӧры мыныны. Осконмы вань ке, ми тодӥськомы, Иегова вань сюлмысьтымы ужаммес-тыршеммес бакель кароз шуыса (Евр. 11:6). Оскон мылкыдмес ӝутоз, шуг-секытъёс шоры учкытэк, Иисус Эксэймылы оскымон луыны. Оскон юрттоз милемлы улонысьтымы шуг-секытъёсмес чиданы. Ми быгатӥськомы адӟем карыны вын-агайёслэсь но сузэр-апайёслэсь, кудъёсыз, уйылон-уллянъёс яке коньдонэн герӟаськем шуг-секытъёссы шоры учкытэк, Инмарлы оскымон кылизы. Со сяна, юн оскон юрттоз милемлы ваньбур люкан сьӧлтэтлэсь палэнскыны. Соин ик милемлы адӟем кароно соослэсь, кинъёс огшоры уло но Эксэйлыкез улоназы нырысетӥ интые пуктоb.

10. Кызьы Инмарез но матысьёсмес яратон юрттэ милемлы юн мылкыдын тодытыны?

¹⁰ Со сяна, сак луон понна, яратон туж кулэ (Матф. 22:37—39). Инмарез яратон юрттэ милемлы, пӧртэм шуг-секытъёс шоры учкытэк, юн мылкыдын тодытыны (2 Тим. 1:7, 8). Ми Адӟись-Ивортӥсь луисьтэм адямиосты яратӥськомы бере, ми коркась корка ветлыса, телефон пыр но гожтэтъёс гожъяса тодытэмысь ум дугдӥське. Ми оскиськомы, матысь адямиосмы куке но Инмарлы ужаны-тыршыны кутскозы шуыса (Иез. 18:27, 28).

11. Кызьы милемлы юрттэ вын-агайёсты но сузэр-апайёсты яратон? (1 Фессалоникаослы 5:11).

¹¹ Огъя оскисьёсмы но матысь адямиосмы пӧлы пыро. Соослы яратонмес возьматыса, ми уже кутӥськомы апостол Павеллэсь таӵе визь-кенешсэ: «Ог-огдылэсь мылкыддэс ӝутэ, ог-огдэс юнматэ». (Лыдӟе 1 Фессалоникаослы 5:11.) Ожгарчиос ӵош ожмаськизы но ог-огзылы юрттыны котьку дась вал. Ми но тыршиськомы ог-огмылэсь мылкыдмес юнматыны но ог-огмылы юрттыны. Валамон, ожмаськон дыръя ожгарчи аслэсьтыз эшсэ янгышен вӧсь карыны быгатэ вал. Но со эшсэ ноку юри вӧсь ӧй карысал. Ӵапак озьы ик ми но вын-агайёсмес но сузэр-апайёсмес юри вӧсь ум каре яке уродэзлы пумит уродэн пунэмзэ ум берыктэ (1 Фес. 5:13, 15). Озьы ик ми яратонмес возьматомы, гажамы ке вын-агайёсты, кудъёсызлы кенешын кивалтон уж сётэмын (1 Фес. 5:12). Павел Фессалоникаослы гожтэтсэ гожтыкуз, та карысь кенешлы ар но ӧй вал на. Та кенешысь тӧроос трос ужаса-тыршыса ӧз вуэ на. Соос янгышъёс лэсьтылӥзы. Озьы ке но соосты гажано вал. Бадӟым куректон матэктэ бере, азьланяз тӧроос пыр сётэм кивалтэт милемлы эшшо но кулэ луоз, дыр. Оло нош, ми ум быгатэ валтӥсь кивалтонниен яке филиалэн герӟаськыны. Соин ик туж кулэ али ик дышетскыны дуно тӧроосмес яратыны но гажаны! Мар гинэ медам луы, ойдолэ сак луомы но тӧроослэн тырмымтэоссылы саклыкмес ум висъялэ. Со интые, тодамы возёмы, Иегова та оскымон пиосмуртъёсын Иисус Христос пыр кивалтэ шуыса.

12. Кызьы вуоноезлы оскон йырвизьмес уте?

¹² Корт изьы ожгарчилэсь йырзэ утьылӥз. Нош вуоноезлы оскон милесьтым йырвизьмес уте. Вуоноезлы юн оскон юрттэ милемлы валаны, та дуннеын солэсь но дуноез номыр ӧвӧл шуыса (Флп. 3:8). Вуоноезлы оскон юрттэ милемлы котькыӵе югдурын каньыл сюлмын улыны но асьмеды киямы кутыны. Тае ас вылазы шӧдӥзы Уо́ллис агай но Лори́нда сузэр, кудъёсыз Африкаын ужало-тыршо. Куинь арня куспын Уоллис агайлэн атаез кулӥз, нош Лоринда сузэрлэн — анаез. Но COVID-19 пандемия сэрен соос ӧз быгатэ доразы берытскыны но ӵыжы-выжыоссэс юнматыны. Уоллис гожтӥз: «Улӟытонлы оскон юрттэ мыным малпаськыны со сярысь, кызьы соос выль дуннеын нырысетӥ нуналъёссэс ортчытозы. Соин ик мон уг малпаськиськы, вуж дуннеын берпуметӥ нуналъёссы сярысь. Сюлмы туж куректыку, та оскон монэ буйгатэ».

13. Мар милям кареммы луэ, святой духез басьтон понна?

¹³ «[Инмарлэсь] духсэ эн кысэ» (1 Фес. 5:19). Святой духез Павел ӵошатӥз пушкысьтымы тылын. Инмарлэн духез юрттэ милемлы юн мылкыдын асьмеды шонер возьыны но вань кужмысьтымы Иеговалы ужаны-тыршыны (Рим. 12:11). Мар кароно, святой духез басьтон понна? Ми быгатӥськомы со сярысь вӧсяськыны, лыдӟыны Библиез, кудӥз Инмарлэн духезлэн валтэмез улсын гожтэмын вал, но кылзӥськыны организацилэсь, кудӥныз Инмарлэн духез кивалтэ. Та юрттоз милемлы духлэсь емышсэ уж вылын возьматыны (Гал. 5:22, 23).

14. Малэсь милемлы палэнсконо, азьланяз но Инмарлэсь духсэ басьтон понна? (Озьы ик учке суредэз.)

¹⁴ Инмарлэсь святой духсэ басьтыса, милемлы сое кысоно ӧвӧл. Инмар сётэ сое соослы гинэ, кинъёс малпанъёссэс но ужъёссэс чылкыт возё. Иегова уз сёты аслэсьтыз духсэ, милям кырсь малпанъёсмы луизы но ми соослы сётскимы ке (1 Фес. 4:7, 8). Со сяна, святой духез басьтон понна, милемлы кылзӥськоно таӵе визь-кенешлэсь: «Инмарлэсь дэлето кузьымзэ, кудӥз луэ Солэсь кылзэ ивортон, кулэтэм эн каре» (1 Фес. 5:20). «Ивортон» пӧлы пыро иворъёс, кудъёссэ Инмар святой духез пыр сётэ. Отчы пыро Иеговалэн нуналыз но асьме дырмы сярысь иворъёс. Ми ум малпаське, Иеговалэн нуналыз уз вуы на но ми Армагеддонозь ум улэ шуыса. Со интые, ми котьку но тодамы возиськомы, та нунал матын шуыса. Кытысь со адӟиське? Ми асьмеды шонер возиськомы но ӟырдыт мылкыдын Иеговалы ужаськомы-тыршиськомы (2 Пётр 3:11, 12).

«ВАНЬЗЭ ЧАКЛАЛЭ-ЭСКЕРЕ»

15. Мар кароно, шонертэм иворъёслы но периослэн дышетонъёссылы медам оске шуыса? (1 Фессалоникаослы 5:21).

¹⁵ Ӝоген Инмарлэн тушмонъёсыз кызьы ке но ялозы: «Тупаса улон, кышкатэк улон!» (1 Фес. 5:3). Дунне вылын вӧлмозы периос дорысь потэм дышетонъёс. Тросэз адямиос соослы оскозы (Усьт. 16:13, 14). Но ми соослы ум оске, уже кутӥмы ке Павеллэсь визь-кенешсэ: «Ваньзэ чаклалэ-эскере». (Лыдӟе 1 Фессалоникаослы 5:21.) Грек кыл, кудӥз татын «чаклалэ-эскере» шуыса берыктэмын, кутӥськиз, куке вераськон мынӥз дуно кортъёсты эскерон сярысь. Озьыен, эскерыны кулэ, со, мае ми кылӥмы яке лыдӟимы, зэм-а шуыса. Тае ик карыны кулэ вал Фессалоникаысь вын-агайёслы но сузэр-апайёслы. Нош бадӟым куректон матэктэмъя, милемлы эшшо но кулэ ваньзэ чакланы-эскерыны. Котькинлы оскем интые, чакласькись луоно. Ӵошатыны кулэ сое, мае ми лыдӟиськомы но кылӥськомы, соин, мае вера Библия но Иеговалэн организациез. Соку ми периослэн дышетонъёссылы ум оске (Мад. 14:15; 1 Тим. 4:1).

16. Кыӵе осконмы милям вань но мар карыны со мылкыдмес ӝутэ?

¹⁶ Инмарлэн калыкез бадӟым куректон пыр потоз. Нош котькудмы сярысь нимаз верано ке, ми ум тодӥське, мар милемын ӵуказе луоз (Иак. 4:14). Армагеддон дырозь ми кулӥмы ке но, ми тодӥськомы, Инмарлы оскымон кылимы ке, со милемлы пырак улон сётоз шуыса. Зырӟем христианъёс Христосэн ӵош инмын улозы, нош мукет ыжъёс — рай музъем вылын. Ойдолэ тодамы возёмы вуоноезлы паймымон осконмес но Иеговалэн нуналэзлы дась луомы!