Сюлмысь каньыллыктэс уте, улонысь воштӥськонъёс шоры учкытэк
«Аслэсьтым лулме мон ӧй востэммытылы-а, ӧй буйгатылы-а?» (ПС. 130:2).
1, 2. а) Кызьы шӧдӥськыны быгато христиан мурт вылын шӧдтэк шорысь ортчем воштӥськонъёс? (Учке статья кутсконысь туспуктэмез.) б) 130-тӥ Псалом верамъя, мар юрттоз милемлы сюлмысь каньыллыкмес утьыны?
ЛЛОЙД НО АЛЕКСАНДРА туж ӝоже усизы, куке тодӥзы, соослы Вефильысь кошконо луоз шуыса, кытын соос 25 арлэсь кемагес ужазы-тыршизы. Ллойд вера: «Мыным туж кельше вал Вефильын ужаны-тыршыны, но мон уг тодӥськы вал, кызьы мон сотэк уло. Визьмыным мон валасько вал, малы сыӵе ужпум кутӥзы, но трос арняос но толэзьёс ӵоже йырысьтым ӧз кошкы малпан, монэ кулэтэм каризы шуыса. Мылкыды туж ӝог вошъяськылӥз: ӝамдэ куспын ик умой но, урод но луэ вал».
2 Улонын шӧдтэк шорысь воштӥськонъёсын сэрен, ми туж сюлэмшугъяськыны быгатомы (Мад. 12:25). Ми малпаны но быгатомы, со воштӥськонъёслы нокызьы но ум дыше шуыса. Мар юрттоз милемлы сыӵе вакытэ буйгатскон шедьтыны? (Лыдӟе Псалтирез 130:1—3.) Ойдолэ вераськомы со сярысь, кызьы Иеговалэн куд-ог ужась-тыршисьёсыз — вашкала дыръя но, асьме вакытэ но — сюлмысьтызы каньыллыксэс утьыны быгатӥзы, улонысь воштӥськонъёс шоры учкытэк.
«ИНМАРЛЭН КАНЬЫЛЛЫКЕЗ»
3. Кыӵе секыт югдуре шедиз Иосиф?
3 Куке Иосифлы 17 арес котыр вал, вожъяськеменызы сэрен агайёсыз сое ляльчие вузазы. Атаез Иосифез, мукет пиоссэ сярысь, юнгес яратӥз (Ул.-выл. 37:2—4, 23—28). Египетын ог 13 аръёс ӵоже Иосиф троссэ чидано луиз. Нырысь со ляльчиын вал, нош собере пытсэтын пукиз. Со туж кыдёкын вал аслаз яратоно атаезлэсь. Мар юрттӥз Иосифлы куашкам мылкыдлы но лекъяськонлы сётскытэк улыны?
4. а) Мар сярысь Иосиф малпаськиз, вылды, пытсэтын пукыкуз? б) Кызьы Иегова возьматӥз, Иосифлэсь вӧсяськемзэ кылӥз шуыса?
4 Пытсэтын пукыкуз, Иосиф малпаськиз, вылды, со сярысь, кызьы Иегова солы юрттэ (Ул.-выл. 39:21; Пс. 104:17—19). Азьпалэз сярысь уйвӧтъёс но, кудъёссэ со егитгес дыръяз адӟиз, озьы ик оскытӥзы сое, Инмар солы юрттэ шуыса (Ул.-выл. 37:5—11). Иосиф одӥг пол гинэ ӧз вӧсяськы, дыр, Иеговалы вань сюлэмзэ усьтыса (Пс. 144:18). Иегова кылӥз Иосифлэсь сюлмысь вӧсяськемзэ но оскытӥз сое, шуг-секытъёсын пумиськыкуз, солы юрттоз шуыса (Ап. уж. 7:9, 10)a.
5. Кызьы «Инмарлэн каньыллыкез» Иеговалы ужан-тыршонмы вылын шӧдӥськыны быгатэ?
5 Шуг-секытъёсын пумиськыса но, ми ас выламы шӧдыны быгатӥськомы «Инмарлэсь каньыллыксэ», кудӥз буйгатэ но визьёсмес уте. (Лыдӟе Филиппыослы 4:6, 7.) Соин ик, урод малпанъёс сюлэмшугъяськыто ке, милемлы Иеговалэсь юрттэтсэ куроно. Соку со сюлэммес каньыл кароз но, ми азьланяз но, шуг-секытъёслы сётскытэк, Иеговалы мылысь-кыдысь ужаны-тыршыны быгатомы. Ойдолэ эскеромы асьме вакытысь вын-агайёслэсь но сузэр-апайёслэсь примеръёссэс, кудъёсыз сое ас вылазы шӧдӥзы.
ИЕГОВАЛЭСЬ КАНЬЫЛЛЫКСЭ КУРЕ
6, 7. Кызьы вӧсяськон юрттэ сюлмысь каньыллыкез утьыны? Вералэ пример.
6 Райан но Джульетт огдырлы нимысьтыз пионеръёс вал. Куке соослы веразы, нимысьтыз пионер луыса ужамысь-тыршемысь дугдоно луоз шуыса, соослэн мылкыдзы туж куашказ. Райан вера: «Ми Иеговалы вӧсяськимы но солы вань сюлэммес кисьтӥмы. Ми валаськомы вал, милям быдэсак Иеговалы оскиськыны луонлыкмы кылдӥз шуыса. Кенешамы тросэз кемалась ӧвӧл пылатӥськизы. Соин ик ми Иеговалэсь куримы юрттыны милемлы юн осконмес возьматыны но соос понна адӟем карымон луыны».
7 Кызьы Иегова возьматӥз, кузпалъёслэсь вӧсяськемзэс кылӥз шуыса? Райан тодаз вае: «Вӧсяськеммы бере ик милям вань сюлэмшугъяськонъёсмы быризы но сюлэмъёсмы каньыл луизы. „Инмарлэн каньыллыкез“ милесьтым визьмес но сюлэммес утиз. Ми валамы, мылкыдмы шонер луиз ке, азьланяз но Иеговалы ужаны-тыршыны быгатомы шуыса».
8—10. а) Кызьы Инмарлэн духез юрттэ милемлы сюлэмшугъяськонъёсмес вормыны? б) Кызьы Иегова юрттэ милемлы, солы ужан-тыршон улонамы валтӥсез луэ ке?
8 Инмарлэн святой духез сюлмысь каньыллыкез утьыны юрттэм сяна, озьы ик Библиысь кылбуръёсыз тодамы вайытэ на, кудъёсыз мылкыдмес ӝуто Инмарлы ужан-тыршонэз нырысетӥ интые пуктыны. (Лыдӟе Иоаннлэсь 14:26, 27.) Тани мар луиз Филипен но Мэриен, кузпалъёсын, кудъёсыз 25 ар пала Вефильын ужазы-тыршизы. Вефильысь кошкемзы бере соос шуг-секытъёсын пумиськизы. Ньыль толэзь куспын гинэ соослэн кыксылэн ик анайёссы кулӥзы но эшшо одӥг ӵыжы-выжызы. Со сяна, соослы утялтоно луиз Мэрилэсь атайзэ, кудӥзлэн визьмыз сураськиз.
9 Филип тодаз вае: «Мон малпасько вал, та шуг-секытэз чиданы быгатӥсько шуыса, но маиз ке но умойтэм вал. „Возьмаськон башняысь“ эскерон понна статьяез лыдӟыкум, син шорам йӧтӥз Колоссыослы 1:11, кытын гожтэмын: „Аслаз данлыко кужыменыз тӥледыз мед юнматоз, куасаськыны сётскисьтэмесь, ваньзэ чидасесь [«кема чидасесь но шумпотӥсесь», ВД] мед луоды“. Мынам чиданэ вал, но мыным уг тырмы вал кема чидан но шумпотон. Та кылбур тодам вайытӥз, шумпотон улонысь югдуръёсын герӟаськемын ӧвӧл шуыса, со герӟаськемын соин, лэзисько-а мон святой духлы асме валтыса нуыны, уг-а».
10 Иеговалы ужан-тыршон Филип но Мэри понна валтӥсез вал, но Иегова соосты бакель кариз. Ӝоген Вефильысь кошкемзы бере соос Библиез дышетыны кутскизы адямиосын, кудъёсызлэн арняяз одӥг поллэсь тросгес дышетэмзы потэ вал. Азьвылзэ тодаз вайыса, Мэри вера: «Со адямиослы Библиез дышетыны юрттыса, ми бадӟым шумпотон басьтӥмы. Озьы Иегова оскытӥз милемыз, ваньмыз умой луоз шуыса».
СЁТЭ ИЕГОВАЛЫ ЛУОНЛЫК ТӤЛЕДЫЗ БАКЕЛЬ КАРЫНЫ
Кызьы ми Иосифлэсь адӟем карыны быгатомы, выль югдуръёсы сюрыса? (Учке 11—13-тӥ абзацъёсты.)
11, 12. а) Кызьы Иосиф Иеговалы луонлык сётӥз сое бакель карыны? б) Кызьы Иегова Иосифез чидамез понна бакель кариз?
11 Улонын шӧдтэк шорысь воштӥськонъёс ортчемен сэрен, ми вуоноез сярысь ортчыт сюлмаськыны быгатомы. Иосифен но озьы луыны быгатэ вал. Но со ужпум кутӥз, шӧдске, аслаз югдураз карыны ваньзэ, мае со быгатэ. Озьы со Иеговалы луонлык сётӥз сое бакель карыны. Пытсэтын пукыкуз, Иосиф кивалтӥсезлэсь сётэм котькуд ужзэ, вань кужымзэ поныса, быдэстыны тыршиз, озьы ик, кызьы со тыршиз Потифар дорын ужакуз (Ул.-выл. 39:21—23).
12 Одӥг пол Иосифез косӥзы кык пытсэтын пукисьёсты утялтыны, кудъёсыз азьло фараонлэн юртаз кузёйыръёс вал. Иосиф соосын туж лякыт вал, соин ик соос солы аспӧртэмлыко вӧтъёссы сярысь веразы, кудъёсыз соосты туж сюлмаськытӥзы (Ул.-выл. 40:5—8). Иосиф малпаны но уг быгаты вал, кытчы вуттоз та вераськон. Пытсэтын солы эшшо кык ар пуконо луиз на ке но, пытсэтысь потон нуналаз Египетын со фараон бере кыкетӥ адями луиз (Ул.-выл. 41:1, 14—16, 39—41).
13. Кызьы Иеговалы луонлык сётоно милемыз бакель карыны, кыӵе гинэ югдуръёсы медам сюре?
13 Иосиф сямен ик, ми сюрыны быгатомы сыӵе югдуръёсы, кудъёссэ воштыны ум быгатэ. Нош чиданмес возьматӥмы ке но каримы ке ваньзэ, мае быгатӥськомы, ми Иеговалы луонлык сётомы милемыз бакель карыны (Пс. 36:5). Зэм, куддыръя ми мар карыны ик ум тодӥське, но, кызьы гожтӥз апостол Павел, ми ӝикатэмын ӧвӧл (2 Кор. 4:8). Иегова милемыз ноку но уз кушты, тужгес но соку, куке ми вань саклыкмес висъяськомы солы ужан-тыршонлы.
ВАНЬ САКЛЫКТЭС УЖАН-ТЫРШОНЛЫ ВИСЪЯЛЭ
14—16. Кытысь адӟиське, Филипплэн улоназ воштӥськонъёс ортчизы ке но, ужан-тыршон со понна азьвыл сямен ик нырысетӥ интыын вал шуыса?
14 Ӟеч ивор тодытӥсь Филипп милемлы умой пример возьматӥз, кызьы ужан-тыршонэз нырысетӥ интые пуктоно, улонысь воштӥськонъёс шоры учкытэк. Солы нимысьтыз уж сётэмын вал (Ап. уж. 6:1—6). Но шӧдтэк шорысь ваньмыз воштӥськиз. Стефанэз вием бере Иерусалимын христианъёсты уйылыны-улляны кутскизы. Уйылон-уллянъёсын сэрен Христос сьӧры мынӥсьёс пазьгиськизы, нош Филипп тэк пукыны ӧз быгаты. Со мынӥз Самарияе ӟеч иворез вераны, каре, кудаз тросэз улӥсьёс со дыре ӟеч иворез уг тодо на вал (Матф. 10:5; Ап. уж. 8:1, 5).
15 Филипп дась вал ӟеч иворез вераны котькытын, кытчы гинэ сое святой дух медаз ысты. Соин ик Иегова сое Самарияе ыстӥз. Со, макем лякыт ассэ возиз Филипп Самарияын улӥсьёсын, соослэсь сюлэмзэс вырӟытӥз, малы ке шуоно соос дышемын вал ини, иудейёс соосты ултӥяло шуыса. Соин ик паймымон ӧвӧл, «трос калык солэсь верамзэ кабыл басьтӥз» шуыса (Ап. уж. 8:6—8).
16 Собере Инмарлэн духез Филиппез ыстӥз Азотэ но Кесарияе, кытын трос еврей луисьтэм калык улӥз (Ап. уж. 8:39, 40). Филипплэн Самарияын нырысетӥзэ ӟеч иворез верамез бере 20 ар пала ортчиз, но солэн улоназ нош ик воштӥськонъёс луизы. Табере солэн семьяез вань ини, но со улэ отын, кытын ӟеч иворез вера. Филипплэн югдуръёсыз воштӥськизы ке но, солэн улоназ ужан-тыршон азьвыл сямен ик нырысетӥ интыын вал. Иегова сое но солэсь семьязэ бакель кариз (Ап. уж. 21:8, 9).
17, 18. Кызьы тодытон уже пыриськон воштӥськонъёс дыръя сюлмысь каньыллыкез утьыны юрттэ?
17 Тросэз вань дырзэс сётыса ужась-тыршисьёс верало, ужан-тыршонэ мылысь-кыдысь пыриськон сюлмысь каньыллыкез утьыны юрттэ шуыса, улонын воштӥськонъёс ортчо ке но. Куке Лымшор Африкаысь Озборн но Полайт кузпалъёс Вефильын ужамысь-тыршемысь дугдӥзы, соос малпало вал, капчиен шедьтозы шуыса улон инты но уж, кудӥз соослы пионер луыса ужаны-тыршыны ӧй люкетысал. «Жаляса верано луэ,— тодаз вае Озборн,— уж шедьтыны сокем капчи ӧй вал». Солэн кышноез Полайт ватса: «Куинь толэзь ортчиз, нош ужмы ӧй вал на, коньдонмы но. Милемлы туж секыт вал».
18 Мар юрттӥз соослы шуг-секытсэс вормыны? Озборн валэктэ: «Ми кенешен ӵош тодытон уже пыриськимы. Со юрттӥз милемлы шонер мылкыдын улыны. Ми ужпум кутӥмы: куректыса улытозь, вань кужыммес тодытон ужлы сётомы. Со милемлы бадӟым шумпотон вайиз. Ми уж утчамысь ӧм дугдэ но — шедьтӥмы».
БЫДЭСАК ИЕГОВАЛЫ ОСКИСЬКЕ
19—21. а) Мар юрттоз милемлы сюлмысь каньыллыкмес утьыны? б) Кыӵе пайда ваёз выль югдуръёслы дышеммы?
19 Кызьы возьмато эскерем примеръёс, ас югдурамы каримы ке ваньзэ, мае быгатӥськомы, но Иеговалы оскиськимы ке, сюлмамы каньыллык луоз. (Лыдӟе Михейлэсь 7:7.) Кӧня ке дыр ортчем бере ми адӟомы, вылды, выль югдуръёслы дышыса, милям Иеговаен кусыпъёсмы юнмазы шуыса. Тани мар вера Полайт, кудӥз сярысь вылӥынгес верамын вал: «Вефильысь кошкем бере мон валай, кызьы со Иеговалы оскиськыны, ваньмыз мыным пумит кадь потэ ке но. Мынам Иеговаен кусыпъёсы эшшо но юнгес луизы».
20 Мэри, кудӥз сярысь верамын вал ини, азьвыл сямен ик арлыдо атайзэ утялтэ но пионер луыса ужа-тырше. Тани солэн кылъёсыз: «Мон валай: куке мон сюлэмшугъяськисько, кулэ дугдыны, вӧсяськыны но тыршыны сюлмаськытэк улыны. Валтӥсез, малы мон дышетски,— ваньзэ Иеговалэн кияз сётыны кулэ. Азьланяз со мыным пайда ваёз».
21 Ллойд но Александра, кудъёсыз сярысь вераськиз статьялэн кутсконаз, верало, улонысь воштӥськонъёс соослэсь осконзэс возьмамтэ амалэн эскеризы шуыса. Озьы ке но соос шуо: «Шуг-секытъёс эскеро, макем юн милям осконмы, но возьмато, быгатоз-а осконмы юрттыны но буйгатыны милемыз секыт дыръёсы. Шуг-секытъёс милемыз умойгес каро».
Улонын шӧдтэк шорысь ортчем воштӥськонъёс возьмамтэ бакель каронъёс вайыны быгато (Учке 19—21-тӥ абзацъёсты.)
22. Малы ми оскыны быгатомы, ас югдуръёсамы каримы ке ваньзэ, мае быгатӥськомы?
22 Улонын шӧдтэк шорысь воштӥськонъёс ортчо ке, кылсярысь, Иеговалы ужан-тыршонын выль уж сёто, семьяямы югдур воштӥське яке тазалыкмы лябӟе, тодамы возёно, Иегова сюлмаськоз но кулэ дыръяз юрттоз шуыса (1 Пётр 5:6, 7; Евр. 4:16). Нош али лэсьтэ ваньзэ, мае быгатӥськоды ас югдуръёсады. Инмысь Атайлы вӧсяське, соин кусыпъёстэс юнматон вылысь, но ваньзэ солэн кияз сётыны дышетске. Озьы но тӥ быгатоды сюлмысьтыды каньыллыктэс утьыны, улонын воштӥськонъёс шоры учкытэк.
a Пытсэтысь потэмез бере Иосиф кышнояськиз но солэн пиез вордӥськиз. Со пиезлы Манассия ним понӥз, кудӥз возьматэ «Вунэтытӥсь; Со, кин вунэтыны косэ» шуэмез. Иосиф валэктӥз: «Инмар монэ вунэтытӥз вань шугадӟон нуналъёсме» (Ул.-выл. 41:51). Озьы со возьматӥз, Иегова солэсь сюлэмзэ каньыл кариз шуыса.