«Улон но ужан-тыршон» ужан тетрадьлы малпанъёс

5—11-ТӤ ПӦСЬТОЛЭЗЬ

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 11, 12

Духовной марӟанъёс

(Кыкетӥ Закон 11:29) Киултыны мыноно музъемад Инмаред Кузё-Инмар тонэ пыртӥз ке, соку тон Гаризим гурезь йылысен бакель карон кылъёсты вера, нош Гевал гурезьысен карган кылъёсты вера;

it «Гаризим, гора», 4 абз.

Гаризим, гурезь

Гаез киултэм бере, кызьы Моисей косӥз, Израильлэн выжыосыз Иисус Навинлэн кивалтэмез улсын Гаризим но Гевал гурезьёс доры люкаськизы. Отын калык кылзӥз, кызьы со бакель каремын луоз, Иеговалэсь кылзӥськиз ке, но кызьы со каргамын луоз, Инмарлэсь ӧз кылзӥськы ке. Симеон, Левий, Иуда, Иссахар, Иосиф но Вениамин выжыос Гаризим гурезь дорын сылӥзы. Левитъёс но сӥзён-косонэн ковчег нёжалын сылӥзы, нош кылем куать выжыос — Гевал гурезь дорын (КЗк 11:29, 30; 27:11—13; ИсН 8:28—35). Гаризим гурезь дорын сылӥсь выжыос вазисько вал, вылды, бакель карон кылъёслы, кудъёсыз соос пала верамын вал. Нош мукет выжыос вазисько вал карган кылъёслы, кудъёсыз Гевал гурезь пала верамын вал. Лыдъяло, бакель карон кылъёсты Гаризим гурезь пала веразы шуыса, малы ке шуоно со чебер но отын ӟеч музъем. Нош Гевал гурезьын музъем изо, отын будосъёс урод будо. Озьы ке но Библиын со сярысь номыр но уг вераськы. Законэз шара лыдӟизы «вань люкаськем израиль калык азьын — пиосмуртъёс, кышномуртъёс, нылпиос, израиль калык пӧлын сылӥсь лыктэм калык азьын» (ИсН 8:35). Та кылъёсты вань калык кылыны быгатӥз, малы ке шуоно со интыын куара туж умой чузъяське. (Учке ГЕВАЛ, ГОРА.)

Библиез лыдӟон

(Кыкетӥ Закон 11:1—12) Яраты аслэсьтыд Инмардэ Кузё-Инмарез, мае Со утьыны косӥз — Солэсь пуктон-косонъёссэ но, Солэсь законъёссэ но, Солэсь курон-косонъёссэ но — вань нуналъёс ӵоже утьыса ул. ² Туннэ тодады возе,— али мон тӥляд пиосыныды уг вераськиськы, кудъёсыз Инмардылэсь Кузё-Инмарлэсь вӧсь каремзэ уг тодо, ӧз но адӟе сое,— тодады возе Солэсь быдӟымлыксэ, Солэсь кужмо кизэ, юн суйбыгытсэ, ³ Солэсь Египетын, Египетлэн эксэеныз, фараонэн, солэн быдэс музъем вылаз лэсьтэм Солэсь паймымонэсь тодметъёссэ, Солэсь ужъёссэ, ⁴ мар Со кариз Египетлэн ожгарчиосыныз, валъёсыныз, ожмаськон уробоосыныз, кызьы Со соосты Горд Кам зарезьлэн вуосаз выйытӥз соослэн тӥ сьӧры уйиськон дыръязы,— Кузё-Инмар соосты туннэ нуналозьлы быдтӥз; ⁵ та интые вуытозяды, мар Со луоё кыр дуннеын тӥледлы лэсьтӥз, ⁶ мар Со кариз Рувимлэн Елиав пиезлэн Дафан но Авирон пиосыныз,— музъем ымзэ усьтӥз но израиль калык пушкысь соосты, соослэсь семьяоссэс, соослэсь балаганъёссэс, кыӵе гинэ ваньбурзы вал,— ваньзэ ньылӥз; ⁷ тӥ уго Кузё-Инмарлэсь лэсьтэм вань быдӟым ужъёссэ ас синмыныды адӟиды. ⁸ Соин ик вань курон-косонъёссэ утелэ-быдэсъялэ, соосты мон мед юнмалоды но мыныса, Иордан сьӧры потыса, отысь музъемез киулады мед басьтоды шуыса, туннэ тӥледлы ивортӥсько; ⁹ Кузё-Инмарлэн тӥляд атайёстылы, соослэн кидыссылы-выжызылы сётыны сӥзем йӧлын чечыен бызись музъем вылэ пырыса, тӥ кема аръёс-вапумъёс отын мед улоды. ¹⁰ Тынад киултыны пыроно музъемед Египет музъемлы уг укша, кытысь тӥ потӥды, отын тон кидыстэ кизиськод но, бакчаез кадь, пыдъёсыд вылэ пыкиськыса, ву киськаськод вал; ¹¹ али киултыса улыны интыяськоно музъемды нёжало, гурезё, со инмысь виясь вуэн мускыта,— ¹² со музъем сярысь Инмаред Кузё-Инмар сюлмаське: Инмаред Кузё-Инмар со шоры арлэн кутсконысеныз арлэн пумозяз, синзэ кыньылытэк, учкыса улэ.

12—18-ТӤ ПӦСЬТОЛЭЗЬ

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 13—15

Духовной марӟанъёс

(Кыкетӥ Закон 14:21) Нокыӵе но кулэм пудоез эн сие; мурт музъемысь вуэм, тӥляд улон интыосады учырам муртлы сое сёт, мед сиёз, яке солы вуза, уго тон Инмаредлэн Кузё-Инмарлэн святой калыкез. Кечпиез анаезлэн йӧлыз пӧлын эн пӧзьты.

w06 1/4 31 б.

Лыдӟисьёслэн юанъёссы

Малы дышетэ милемыз Потонын 23:19 гожтэм косон: «Кечпиез анаезлэн йӧл пӧлаз эн пӧзьты»?

Моисейлэн законысьтыз та косон Библиын куинь пол пумиське. Та косон милемлы валаны юрттэ, мар Иеговалэн син азяз ярамон луэ. Со вера, Инмар гажась-жалясь шуыса. Озьы ик со возьматэ, макем юрӟым потэ Иеговалы зэмос луисьтэм религия (Потон 34:26; Кыкетӥ Закон 14:21).

Иеговалэн малпанэзъя, анайлэн йӧлыз кылдытэмын пизэ сюдон но будэтон понна. Нош кин ке но кечпиез яке мукет пудо-животэз анаезлэн йӧл пӧлаз пӧзьтэ ке, со Инмарлэн малпанэзлы пумит мынэ. Библиез эскерись тодосчилэн верамезъя, со, кин кечпиез анаезлэн йӧл пӧлаз пӧзьтэ, «уг гажа Инмарлэсь косонзэ, кызьы анай-атайёс но нылпиос асьсэды ог-огенызы возьыны кулэ».

Озьы ик тазьы малпало: мукет инмаръёслы йыбыртъясьёс кечпиез анаезлэн йӧлаз пӧзьто вал, куазь мед зороз шуыса. Со озьы ке, Потонын 23:19 гожтэм косон израиль калыкез утьысал лек но кулэтэм сям-йылолъёслэсь, кудъёсызъя улӥзы котырысьтызы калыкъёс. Моисейлэн законэз со калыкъёслэн сям-йылолъёссыя улыны уг лэзьы вал (Левит 20:23).

Со сяна, та закон туж умой возьматэ, Иегова гажась-жалясь шуыса. Законын мукет косонъёс но вал, кудъёсыз ӧз лэзе пудо-животъёсты курадӟытыны но соос пумысен Инмарлэн малпанэзлы пумит мыныны. Кылсярысь, Законъя пудо-животлэсь пизэ анаез бордын сизьым нунал ӵоже возёно вал. Собере гинэ сое курбонлы вайыны луэ вал. Пудо-животэз пиеныз ӵош одӥг нуналэ вандыны уг яра вал. Тылобурдоез но пиосыныз яке пузъёсыныз валче карысьтыз басьтыны уг яра вал (Левит 22:27, 28; Кыкетӥ Закон 22:6, 7).

Кызьы адӟиське, возетъёс, кудъёсыз вылэ пыкиськыса Закон гожтэмын, юртто милемлы Иеговалэсь адӟем карыны но вылӥ эсэпъёсызъя улыны (Псалтирь 18:8—12).

Библиез лыдӟон

(Кыкетӥ Закон 13:1—18) Тӥ пӧлысь ӧрекчи пророк яке уйвӧтъёсты валэкъясь потӥз ке, паймымон тодмет яке паймымон уж возьматӥз ке, ² нош со паймымон тодмет, паймымон уж быдэсмоно луиз ке, кудъёсыз сярысь со тыныд вераз, эшшо ке со тазьы шуиз ке: «Ойдо мукет инмаръёс бӧрсьы мыном, кудъёсыз сярысь тон уд тодӥськы, соослы йыбыртъяса улом»,— ³ соку тон та пророклэсь яке уйвӧтъёсты валэкъясьлэсь верамзэс эн кылзы; уго та пыр Инмарды Кузё-Инмар тӥледыз эскере, тодыны турттэ: Инмардэс Кузё-Инмарез вань сюлмысьтыды, лулыныды-мылкыдыныды яратӥськоды-а, уд-а; ⁴ Инмарды Кузё-Инмар сьӧры мынэ но Солэсь кышкалэ, Солэсь курон-косонъёссэ быдэсъялэ, верам кылзэ санэ понэ, Солы ужалэ-тырше, Со борды думиське; ⁵ нош Египет музъемысь тонэ поттӥсь, ляльчиын улон юртысь мозмытӥсь Инмаредлэсь Кузё-Инмарлэсь палэнскыны либатэм ӧрекчи пророкез яке уйвӧтъёсты валэкъясез виыны кулэ, со малпаз уго тонэ Инмаредлэн Кузё-Инмарлэн сӥзем сюрес вылтӥ ветлонлэсь палэнэ кожытыны; озьы ас пӧлысьтыд уродэз-лекез быдты. ⁶ Тонэ братэд, анаедлэн пиез, яке аслад пиед, яке аслад нылыд, яке яратоно кышноед, яке эшед, кудзэ тон аслэсьтыд лулдэ кадь ик яратӥськод, лушкемен либатыса тыныд тазьы шуиз ке: «Ойдо мыном но мукет инмаръёслы йыбыртъяса уломы», кудъёссэ тон но, атайёсыд но уг тодо вал, ⁷ тынад котырад, матад яке кыдёкын, музъемлэн огпал пумысеныз мукет палозяз улӥсь калыкъёслэн инмаръёссылы йыбыртъяны либатӥз ке, ⁸ соин соглаш эн луы, солэсь верамзэ санэ эн пон; синмыд сое медаз жаля, эн дурбасьты солы, ватыса эн возьы сое, ⁹ тон сое ви; ваньмызлэсь азьло тон сое виыны кидэ ӝут, тон бӧрсьы вань мукетъёс но кизэс мед ӝутозы; ¹⁰ виытозяд со вылэ изъёс зӥръя, уго со Египет музъемысь, ляльчиын улон юртысь, поттӥсь Инмаредлэсь Кузё-Инмарлэсь тонэ палэнтыны ӝутскемын вал; ¹¹ та сярысь быдэс Израиль кылоз но кышкатскоз, азьло-берло тон пушкын таӵе уродэсь-лекесь ужъёс уз ни лэсьтэ. ¹² Тон таӵе ивор кылӥд ке: Инмаредлэн Кузё-Инмарлэн тыныд улыны сётэм кудаз ке но городад ¹³ тынад пӧлысьтыд сьӧлыклэсь кышкасьтэм кыӵе ке но муртъёс вуиллям но «Ойдолэ мыноме, тӥледлы тодмотэм инмаръёслы йыбыртъяса уломе» шуыса городын улӥсьёслэсь визьзэс тугаллям,— ¹⁴ соку тон эскеры-чакла, ӟеч-ӟеч юалляськы; та зэмзэ но озьы ке, та юрӟым уж зэмзэ ик тон пӧлын ортчемын ке, ¹⁵ соку со городын улӥсьёсты лэчыт меч йылыныд виылы, карган улэ сое сёт, со бордысь вань макеосты но, солэсь пудо-животсэ но мечен виылы; ¹⁶ вань люкам ваньбурез кар падвожлэн шораз вай но городэз, солэсь вань ваньбурзэ, Инмаредлы Кузё-Инмарлы сӥзьыса, тылын сут, пумтэм вапумъёс ӵоже куашкаса со мед улоз, ноку но сое выльдыса ӝутыны кулэ ӧвӧл ини; ¹⁷ каргам макеос пӧлысь номыр но тӥляд ки бордады медаз лякиськы, Кузё-Инмар Аслэсьтыз ӝуась вожпотонзэ мед кысоз, тонэ мед жалялоз, сьӧлыкъёстэ мед куштоз но тонэ мед йылэтоз, кызьы атайёсыдлы кыл сётыса вералля вал, ¹⁸ Инмаредлэсь Кузё-Инмарлэсь верам кылъёссэ санэ поныса улӥд ке, Солэсь вань курон-косонъёссэ быдэсъяд ке, кудъёссэ мон али тыныд быдэсъяса улыны сӥзисько: Инмаред Кузё-Инмар азьын ярамонэсь ужъёс лэсьтыса мед улод.

19—25-ТӤ ПӦСЬТОЛЭЗЬ

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 16—18

Духовной марӟанъёс

(Кыкетӥ Закон 17:7) Адӟись муртъёс виёно мурт вылэ нырысь кизэс вуттыны кулэ, нош мукетъёсыз — таос бере кизэс мед вуттозы; озьы ас пӧлысьтыд уродэз-лекез быдты.

it «Изгнание, исключение», 4 абз.

Уллян, поттон

Моисейлэн законэзъя адямиез виыны быгатӥзы соку гинэ, куке кык яке куинь адӟисьёс вал (КЗк 19:15). Янгышам мурт вылэ изъёс зӥръяны нырысь ик адӟисьёс кулэ вал (КЗк 17:7). Озьы соос возьматысалзы, Инмарлэсь законзэ ярато но Израиль калыкез саптамлэсь утё шуыса. Со сяна, со уте вал шонертэм янгыше уськытонъёслэсь.

Библиез лыдӟон

(Кыкетӥ Закон 16:9—22) Сюрлоен араны кутскон дырысен сизьым арня ортчиз ке, ¹⁰ Арняослэсь праздниксэс Инмаредлы Кузё-Инмарлы сӥзьыса ортчыты, Инмаред Кузё-Инмар мае тыныд бакель карыса сётӥз, со пӧлысь, ӟеч мылкыдын кияд кӧня тэре, сомында саламъёс-кузьымъёс вай. ¹¹ Инмаред Кузё-Инмар азьын тон ачид но, пиед но, нылыд но, ляльчи пимуртэд но, ляльчи кышномуртэд но, тон пӧлын улӥсь левит но, сьӧрлось вуэм мурт но, анай-атайтэм нылпи но, палкышно но — ваньды огазьын Инмаредлэн Кузё-Инмарлэн Аслаз нимызлы улыны быръем интыяз шулдыръяське. ¹² Тодад возь: Египетын тон ляльчи-вар вал, та пуктон-косонъёсты быдэсъяса ул. ¹³ Итымысьтыд, вина лёган гуысьтыд ужъёстэ быдэстэм берад Тылыс Пуктон праздниктэ сизьым нунал ӵоже ортчыты. ¹⁴ Тон ачид но, пиед но, нылыд но, ляльчи пимуртэд но, ляльчи кышномуртэд но, тӥ пӧлын улӥсь левит но, сьӧрлось лыктэм мурт но, анай-атайтэм нылпи но, палкышно но та праздник нуналъёсы шумпотэ, шулдыръяське. ¹⁵ Инмаредлэн Кузё-Инмарлэн быръем интыяз сизьым нунал ӵоже Инмаредлы Кузё-Инмарлы сӥзьыса праздник ортчыты, уго Инмаред Кузё-Инмар вань ужрадъёсад, вань быдэсъяно ужъёсад тонэ бакель кароз, соку тон шулдыръяськыса гинэ улод. ¹⁶ Инмаредлэн Кузё-Инмарлэн быръем интыяз, Солэн азяз, вань пимуртъёс арлы быдэ куинь пол султыны кулэ: Юмал Нянь Сиён празднике, Арняослэн праздниказы, Тылыс Пуктон празднике; одӥг адями но Кузё-Инмар азе буш киын лыктыны кулэ ӧвӧл, ¹⁷ котькуд адямилэн кияз саламез-кузьымез луыны кулэ, маин Инмаред Кузё-Инмар тонэ бакель кариз, мае Со тыныд сётӥз. ¹⁸ Инмаредлэн Кузё-Инмарлэн тыныд сётэм вань улон интыосад, калыкез шонер судэн судить мед карозы шуыса, ас выжыысьтыд судьяосты, эскерись-чакласьёсты пукты. ¹⁹ Законэз мыдланьтыса эн улы, ымнырызъя адямиез эн дунъя, саламъёс-кузьымъёс эн окты, саламъёс-кузьымъёс визьлыко муртъёслэсь синъёссэс адӟисьтэм каро, шонер улӥсьёслэсь ужъёссэс судын мыдланьто уго; ²⁰ зэмлыкез, зэмлыкез утча, соку тон кема улод, Инмаредлэсь Кузё-Инмарлэсь сётоно музъемзэ ас киулад басьтод. ²¹ Инмаредлэн Кузё-Инмарлэн курбон сётон ӝӧк вӧзаз нокыӵе но писпуосты эн мерттылы, вӧсяськон сад эн лэсьты, ²² йыбыртъян юбо но эн пукты, соосты Инмаред Кузё-Инмар адӟемпотостэм каре.

26-ТӤ ПӦСЬТОЛЭЗЬ — 1-ТӤ ГУДЫРИКОШКОН

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 19—21

Духовной марӟанъёс

(Кыкетӥ Закон 21:19) соку талэн атаеныз анаез сое мед кутозы но асьсэ городзылэн тӧрооссы доры мед ваёзы, улон городзылэн капкаез доры,

it «Суд», «Когда действовал Закон» подзаг., 7 абз.

Суд

Судьяос городлэн капкаез дорын пукизы (КЗк 16:18; 21:19; 22:15, 24; 25:7; Рф 4:1). «Капка» кыл возьматэ вал капка дорысь город пушкысь кыр интыез. Отын калыклы Законэз но косонъёсты лыдӟизы (Не 8:1—3). Нунал куспын капка пыр трос калык ортчылӥз. Соин ик отысь адӟисез шедьтыны капчи вал, кылсярысь, мае ке вузан-басьтон понна. Со сяна, суд капка дорын калык азьын ортчытӥське вал бере, судьяос тыршизы шонер судъяны. Капка дорын судьяослы судъян понна умой инты висъямын вал, дыр (Иов 29:7). Самуил «Вефиль пыр, Галгал пыр, Массифа пыр... ветлылӥз но вань интыосын израиль калыклэсь улон-вылонзэ тупатъяз-радъяз»; озьы ик со адямиосты судъяз Рама карын, кытын солэн дорез вал (1Эк 7:16, 17).

Библиез лыдӟон

(Кыкетӥ Закон 19:1—14) Инмаредлэн Кузё-Инмарлэн тыныд сётоно музъем вылаз улӥсь калыкъёсты Инмаред Кузё-Инмар быдтӥз ке, соос бере со музъемез киулад басьтӥд ке, соослэн городъёсазы, коркаосазы улыны интыяськид ке, ² соку Инмаредлэн Кузё-Инмарлэн тынад киулад сётэм музъем вылысьтыз аслыд куинь городъёсты висъя; ³ аслыд сюрес лэсьты но Инмаредлэсь Кузё-Инмарлэсь тынад киулад сётоно музъемез быдэсаксэ куинь люкетлы люк; адями виисьёслы соос ватӥськон-пегӟон инты луозы. ⁴ Тани адями виисьёс пӧлысь кыӵеез отчы ватӥськыса улэп кыльыны быгатоз: кин матысьсэ янгышен вииз ке, кин солы толон но, толон валлян но тушмон ӧй ке вал; ⁵ кин матысь муртэныз нюлэскы пу кораны мыноз но, тӥрзэ вылэ ӝутыса, сэзъялскоз писпуэз погыртон вылысь, соку тӥр ныдысь корт палдыса матысез вылэ усёз,— соиз кулӥз ке, соку та мурт улэп кыльыны мед быгатоз шуыса, та городъёс пӧлысь одӥгаз мед ватскоз, ⁶ вир понна пунэмзэ берыктӥсь пӧсекъяса со сьӧры медаз уйиськы но, пегӟон-ватӥськон интые мынон сюрес кузь ке, та адями виисез сутыса медаз виы, нош та адями виисез виыны кулэ ӧвӧл, уго та кулэм муртлы со толон но, толон валлян но тушмон ӧй вал; ⁷ со понна ик уго мон тыныд таӵе косон сётыса шуи: «Аслыд куинь городъёсты висъя». ⁸ Нош куке Инмаред Кузё-Инмар улоно музъемдэ паськытатӥз ке, кызьы Со атайёсыдлы кыл сётыса вераз, атайёсыдлы сӥзем музъемез быдэссэ тыныд сётӥз ке, ⁹ туннэ тыныд сётэм вань та курон-косонъёсты быдэсъяса улыны тыршид ке, Инмардэ Кузё-Инмарез яратыса улӥд ке, вань улоно нуналъёсыд ӵоже Солэн возьматэм сюрес вылтӥз ветлӥд ке,— соку та куинь городъёс борды эшшо куинь городъёсты ватса на, ¹⁰ Инмаредлэн Кузё-Инмарлэн тыныд люкетлы сётэм музъем вылаз янгыштэм муртлэн вирыз медаз кисьтӥськы, вир кисьтон сьӧлыкез вылад басьтоно медад луы. ¹¹ Нош кин ке но матысезлы тушмон луиз ке, сое лушкемен возьмаса улыны кутскиз ке, со вылэ урдскыса вииз ке, собере та городъёс пӧлысь одӥгаз пегӟиз ке, ¹² соку со муртлэн городысьтыз тӧроос сое кутыса вайыны адямиосты мед ыстозы но вир понна пунэм берыктӥсьлэн киулаз мед сётозы, со мед кулоз; ¹³ синмыд сое медаз жаля; янгыштэм муртлэсь кисьтӥськем вирзэ Израиль вылысь ӵуш, соку тыныд умой луоз. ¹⁴ Инмаредлэн Кузё-Инмарлэн тынад киулад сётэм музъемысьтыз тыныд люкетлы сюрем музъемлэсь но матыседлэн музъемез вискы вашкала атайёслэсь пуктэм межазэс-йыранзэс эн сӧры.

2—8-ТӤ ГУДЫРИКОШКОН

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 22, 23

Духовной марӟанъёс

(Кыкетӥ Закон 23:19, 20) Барыш поттон вылысь, бадӟымгес дун басьтыны малпаса, азвесьтэ но, няньдэ но, мукет мадэ ке но агай-выныдлы пунэмен эн сёты; ²⁰ мурт музъемысь вуэм муртлы пунэмдэ барыш поттон вылысь сётыны быгатӥськод, нош агай-выныдлы пунэмен сётыкуд, барыш поттыны малпаса эн сёты, Инмаред Кузё-Инмар тонэ бакель мед кароз, киулады басьтыны мыноно музъемад киыныд лэсьтӥськись вань ужъёсты бакель мед кароз.

it «Долг, должник», 3 абз.

Пунэм, пунэмаськись

Нош вашкала Израильын мукет сямен вал. Израиль калыкысь адямиос коньдонэз яке сиён-юонэз пунэмен басьто вал ӵем дыръя куанер улэменызы сэрен. Пунэмаськыса израиль калыкысь адями шуге-леке сюре вал; со пунэмен сётӥсьлэн ляльчиез луэ вал (Мд 22:7). Соин ик Инмар израиль калыкез косӥз шырыт сямо луыны но куанермем агай-вынъёссылы жалятэк пунэмен сётыны. Барыш поттон вылысь пунэмен сётоно ӧй вал (Пот 22:25; Лв 25:35—37; КЗк 15:7, 8; 23:19; Пс 36:26; 111:5). Нош мукет калыкысь адямиослы барыш поттон вылысь пунэмен сётыны яра вал (КЗк 23:20). Куд-ог тодосчиос верамъя, та косонын уг вераськы куанермем адямиос сярысь, нош вераське соос сярысь, кинъёс коньдонзэс будэтон понна пунэмаськизы. Ӵем дыръя сьӧрлось лыктэмъёс Израильын вакчи дыр ӵоже улӥзы. Тросэз соос пӧлысь вузаськыса улӥзы, соин ик соос мултэссэ сётыны быгато вал. Со сяна, соос асьсэос но барыш поттон вылысь мукетъёсызлы пунэмен сётъязы.

Библиез лыдӟон

(Кыкетӥ Закон 23:1—14) Пузэз паньгатэм яке кизянэз вандэм пиосмурт Кузё-Инмарлэн калыкез пӧлы пырыны уг быгаты. ² Азыса-калгыса улӥсь кышномуртлэн пиез Кузё-Инмарлэн калыкез пӧлы пырыны уг быгаты, дасэтӥ ёзэз-выжыез но Кузё-Инмарлэн калыкез пӧлы пырыны уг быгаты. ³ Аммон калык, моав калык пӧлысь адями Кузё-Инмарлэн калыкез пӧлы пырыны уг быгаты, дасэтӥ ёзэз-выжыез но пумтэм вапумъёс ӵоже Кузё-Инмарлэн калыкез пӧлы пырыны уг быгаты, ⁴ малы ке шуоно, Египетысь лыктыкуды, соос тӥледыз сюрес вылысен нянен, вуэн ӧз пумиталэ, тонэ карган понна, тыныд пумит мыныны Месопотамияысь Пефор городысь Веорлэсь Валаам пизэ уксё тырыса вайизы; ⁵ нош Инмаред Кузё-Инмар Валаамлэсь верамзэ санэ ӧз поны, тынад Инмаред Кузё-Инмар Валаамлэсь карганзэ тонэ бакель каронлы пӧрмытӥз, уго Инмаред Кузё-Инмар тонэ яратэ. ⁶ Вань улон нуналъёсыд ӵоже, пумтэм вапумъёсы соослы каньыллык, ӟечлык эн сӥзьы. ⁷ Идумей калыкез кулэтэм эн кары, уго соос тынад агай-вынъёсыд; эн палэнскы египет калыклэсь, уго тон соослэн музъемазы мыныса улӥд; ⁸ куинетӥ ёзысен-выжыысен кутскыса соослэн вордскем нылпиоссы Кузё-Инмарлэн калыкез пӧлы пырыны быгато. ⁹ Тушмонъёсыдлы пумит ожен мыныкуд, вань аламалэсь-уродлэсь утиськы. ¹⁰ Кинэд ке уйин кидысэз кисьтӥськыса саптаськиз ке, со мурт станлэн сьӧраз кошкыны кулэ, станэ пырыны уг яра, ¹¹ нош ӝыт вуыку, мугорзэ вуэн миськыны кулэ, шунды пуксем бере со станэ пырыны быгатэ ини. ¹² Педло потаны ветлон интыды станлэн сьӧраз луыны кулэ; ¹³ ожмаськон тӥрлыкед сяна, лопаткаед луыны кулэ, педло потан интыяд гоп гудӟы, педло потад ке, со гоптэ сюен ӵокса; ¹⁴ уго Инмаред Кузё-Инмар тонэ мозмытон но тушмонъёстэ тынад киулад сётон вылысь станэд пушкытӥ ветлэ, соин ик тынад станэд дун-чылкыт луыны кулэ, тон дорысь Со нокыӵе но юрӟым макеосты медаз адӟы но тон дорысь медаз палэнскы.

9—15-ТӤ ГУДЫРИКОШКОН

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 24—26

Духовной марӟанъёс

(Кыкетӥ Закон 24:1) Кышно басьтэм мурт кышноезлы карт луэ, нош кышномурт картэзлы уг ке кельшы,— со кышно луонэзлэсь урод палъёссэ шедьтэ ке,— соку со кышноеныз люкиськон сярысь гожтэт гожтэ но солэн кияз сое сётэ, дорысьтыз кошкыны лэзе,

w19.02 21 б., 6 абз.

Яратон но шонерлык вашкала Израильын

⁶ Иегова адӟе, кызьы кузпалъёс асьсэды ог-огенызы возё. Солэн туж потэ вал, Израиль калыкысь пиосмуртъёс кышноосынызы асьсэды умой мед возёзы шуыса. Законэз гажась карт кышнозэ яратэ вал но огшоры муген соин уг люкиськы вал (К. Зак. 24:1—4; Матф. 19:3, 8). Кузпалъёс куспын секыт югдур кылдыку, пиосмурт люкиськыны ужпум кутэ вал ке, солы кышноезлы люкиськон сярысь гожтэт сётоно вал. Та гожтэт кышномуртэз утиз шонертэм янгыше уськытонъёслэсь, со азон-калгон сьӧлыке пыриськиз шуыса. Со сяна, гожтэтэз кышноезлы сётэмезлэсь азьло картлы карлэн тӧроосызлы вазиськоно вал, вылды. Солы луыса тӧроослэн луонлыксы кылдэ вал, кузпалъёслы семьязэс утьыны юрттон понна. Израиль калыкысь пиосмурт аслыз пайда утчаса люкиське вал ке, Иегова сое та ужлэсь котьку ик ӧз куты. Озьы ке но Иегова кышномуртлэсь синкылизэ адӟе вал но вӧсь луэмзэ шӧдэ вал (Мал. 2:13—16).

Библиез лыдӟон

(Кыкетӥ Закон 26:4—19) Священник тынад киысьтыд мушкоез басьтоз но Инмаредлэн Кузё-Инмарлэн курбон сётон ӝӧк азяз сое пуктоз. ⁵ Нош тон Инмаред Кузё-Инмар азьын тазьы шу: «Мынам атае пыдйылчи арамей пи вал, Египетэ мыныса, отчы улыны интыяськиз, бордаз трос ик калыкез ӧй вал, нош отысен со бордысь быдӟым, кужмо, трос лыдо калык потӥз; ⁶ нош египет калык милемын ассэ урод возиз, ӝикатыса-ёртыса возизы, секытэсь ужъёсты ужатыса возизы; ⁷ соку ми атайёсмылэн Инмарзылы Кузё-Инмарлы тэльмырыса вазиськимы но, Кузё-Инмар кылӥз милесьтым тэльмырыса вазиськеммес, адӟиз шугадӟонъёсмес, ужам-тыршеммес, милемыз ултӥяса возёнэз; ⁸ соку Кузё-Инмар милемыз Египетысь поттӥз кужмо киыныз, юн суйбыгытэныз, быдӟымесь кышкатонъёсын, паймымон тодметъёсын, ужъёсын, ⁹ Со милемыз вайиз та интые, та музъемез — йӧлын, чечыен бызись музъемез — милемлы сётӥз; ¹⁰ тани, мон табере, Кузё-Инмаре, мыным сётэм музъемысьтыд нырысь вуэм-кисьмам емышъёсме Тыныд вайи». Тае тон Инмаред Кузё-Инмар азе пукты но Инмаред Кузё-Инмар азе йыбыртты, ¹¹ Инмаредлэн Кузё-Инмарлэн тыныд, тынад юртэдлы-семьяедлы сётэм вань ӟечлыкъёсыз понна левитэн ӵош, дорады улӥсь сьӧрлось вуэм муртэн ӵош шумпот-шулдыръяськы. ¹² Куинетӥ аре, дасэтӥ люкетэз сётон аре, вань будэтэм емышед пӧлысь дасэтӥ люкетсэ левитлы, сьӧрлось вуэм муртлы, анайтэм-атайтэм нылпилы, палкышнолы висъяд ке, соос тынад улон интыяд кӧтсэс тырытозь сиыса мед улозы, ¹³ соку Инмаред Кузё-Инмар азьын тазьы шу: «Коркасьтым сётоно святой люкетме басьтӥ но сое левитлы сётӥ, сьӧрлось лыктэм муртлы, анайтэм-атайтэм нылпилы, палкышнолы сётӥ — ваньзэ Тынад косонъёсыдъя, Тынад монэ быдэстыны сӥземедъя лэсьтӥ: Тынад курон-косонъёсыдлэн сьӧразы ӧй поты, соосты ӧй вунэты; ¹⁴ бӧрдыса улыкум, святынялэсь люкетсэ ӧй сиы, кырсь дыръям сое ӧй люкылы, кулэм муртлы солэсь люкетсэ ӧй сётылы; Инмарелэсь Кузё-Инмарлэсь верам кылзэ кабыл басьтылӥ, мае Тон монэ быдэсъяны косӥд, ваньзэ сое мон быдэсъяй; ¹⁵ Аслад святой улон интыысеныд, инмысен, учкы но Аслэсьтыд калыктэ, Израилез, милемлы сётэм музъемдэ но бакель кар, уго Тон йӧлын чечыен бызись музъемез милемлы сётыны атайёсмы азьын кыл сётӥд». ¹⁶ Туннэ Инмарды Кузё-Инмар та пуктон-косонъёсты но законъёсты быдэсъяны косэ: вань сюлэмдэ поныса, вань лулдэ поныса чакла-уть, быдэсъя соосты. ¹⁷ Кузё-Инмарлы тон туннэ шуид, Со тынад Инмаред луоз, Солэн возьматэм сюресъёсыз кузя ветлод, Солэсь пуктон-косонъёссэ быдэсъялод, Солэсь курон-косонъёссэ, законъёссэ утьыса улод, Солэсь верам кылъёссэ санэ поныса улод, тон шуид; ¹⁸ Кузё-Инмарлэсь вань курон-косонъёссэ быдэсъяд ке, тон Солэн калыкез луод шуыса, туннэ Со тыныд кыл сётӥз — кызьы Со тыныд азьвыл ик вераз вал, ¹⁹ вань кылдытэм калыкъёсызлэсь Со тонэ вылӥе пуктоз, шуиз, сӥё-сано, данлыко, быдӟымлыко кароз, Инмаред Кузё-Инмар азьын, кызьы Со вераз, тон святой калык луод.

16—22-ТӤ ГУДЫРИКОШКОН

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 27, 28

Духовной марӟанъёс

(Кыкетӥ Закон 27:17) „Матысь муртэзлэсь йыранзэ-межазэ интыысьтыз вырӟытӥсь мурт каргамын!“ Соку вань калык мед шуоз: „Аминь“.

it «Межевой знак», 2 абз.

Межа пус

Иеговалэн законэз межаосты вырӟытъяны уг лэзьы вал (КЗк 19:14; озьы ик учкы Мд 22:28). «Матысь муртэзлэсь йыранзэ-межазэ интыысьтыз вырӟытӥсь муртэз» каргало вал (КЗк 27:17). Музъем вылын ужасьёс музъемзылэн сётэм емышъёсыныз улӥзы-вылӥзы. Соин ик межаез вырӟытӥсь мурт мукет адямилэсь улон понна кулэ емышсэ талась кадь луэ вал. Вашкала дыръёсы сыӵе адями шоры лушкаськись шоры кадь учкизы (Иов 24:2). Озьы ке но вал Инмарлэсь кышкасьтэм адямиос, кудъёсыз озьы лэсьтылӥзы. Кылсярысь, Осия улон нуналъёсы Иудалэн азьветлӥсьёсыз межаосты интыысьтызы вошъясьёслы укшаны кутскизы (Ос 5:10).

Библиез лыдӟон

(Кыкетӥ Закон 28:1—14) Инмаредлэсь Кузё-Инмарлэсь верам кылзэ тон санэ поныса улӥд ке, Солэсь вань курон-косонъёссэ, кудъёссэ мон туннэ тыныд верасько, быдэсъяса улӥд ке, соку Инмаред Кузё-Инмар тонэ музъем вылысь вань калыкъёслэсь вылӥе пуктоз; ² тон вылэ вань та бакель каронъёс вуозы, тон вылын соос быдэсмозы, Инмаредлэсь Кузё-Инмарлэсь верам кылзэ кабыл басьтыса улӥд ке. ³ Городын тон бакель каремын луод, бусыын но бакель каремын луод. ⁴ Бакель каремын пушкысьтыд потэм емышед, музъем вылад будэм емышед, пудоедлэн вордосъёсыз — ошедлэсь-скалэдлэсь вордскем кунянъёс, ыжъёсыдлэсь вордскем ыжпиос. ⁵ Бакель каремын тынад ю кеносъёсыд, сиён возён интыосыд. ⁶ Коркад пырыкуд, тон бакель каремын, коркасьтыд потыкуд но, тон бакель каремын. ⁷ Тон вылэ урдскись тушмонъёстэ Кузё-Инмар тон азе погыртоз; одӥг сюрес вылтӥ лыктыса, соос тон вылэ урдскозы, нош сизьым сюрес кузя тон дорысь пегӟыса кошкозы. ⁸ Кузё-Инмар бакель каронзэ ыстоз ю кеносъёсыд вылэ, ас киыныд вань ужано ужъёсыд вылэ; Аслаз тыныд улыны сётэм музъем вылаз Инмаред Кузё-Инмар тонэ бакель кароз. ⁹ Кузё-Инмар тонэ Аслаз святой калыкез кароз, кызьы Со тыныд но, тынад атайёсыдлы но кыл сётӥз, Инмаредлэсь Кузё-Инмарлэсь курон-косонъёссэ быдэсъяса улӥд ке, Солэн возьматэм сюресъёсыз кузя ветлӥд ке; ¹⁰ музъем вылысь вань калыкъёс адӟозы, Кузё-Инмарлэн нимыз тынад вылад возиське шуыса, соку соос тынэсьтыд кышкаса улозы. ¹¹ Соку Кузё-Инмар тыныд пачыл ваньбур сётоз: трос нылпиосыд вордскозы, трос пудо-животэд вордскоз, Кузё-Инмарлэн атайёсыд азьын тыныд сётыны сӥзем музъем вылысьтыд бусыос трос емыш, ю-нянь сётозы. ¹² Кузё-Инмар ваньбур возён ӟеч шыкыссэ тыныд усьтоз, инэз усьтоз ас дыраз бусыосыдлы зор вуоссэ сётыны, киыныд ужано вань ужъёстэ бакель карыны: трос калыкъёслы пунэмен сётъялод, нош ачид пунэмен уд окты. ¹³ Кузё-Инмар тонэ йыр кароз, быж уз кары, вылӥын гинэ луод, улӥын уд луы, туннэ тыныд утьыны, быдэсъяны сётэм Инмаредлэн Кузё-Инмарлэн курон-косонъёсызлы тэрытскыса улӥд ке, ¹⁴ туннэ тӥледлы быдэсъяны косыса сётэм кылъёсылэсь бурпала но, паллян пала но ӧд ке кожылы, мурт инмаръёс бӧрсьы ӧд ке мыны, соослы йыбыртъяса ӧд ке улы.

23—29-ТӤ ГУДЫРИКОШКОН

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 29, 30

Духовной марӟанъёс

(Кыкетӥ Закон 29:4) но туннэ нуналозь Кузё-Инмар тӥледлы валаны сюлэм ӧз сёты, адӟыны син ӧз сёты, кылыны пель ӧз сёты.

it «Ухо», «Переносное значение» подзаг., 4 абз.

Пель

Аслаз ужась-тыршисьёсыз пыр Иегова вераз, кылзӥськисьтэм, ваменэс израиль калыклэн пельзы ӵоксаськемын шуыса. Соос «пельынызы вандӥськымтэ» адямиос вал (Иер 6:10; Ап 7:51). Пельёссы маин ке но ӵоксамын кадь вал, соин соос номыре ӧз кылэ. Иегова сое утчась адямиослы валась но кылзӥськись пель сётэ, нош кылзӥськисьтэм адямиослы со уг юртты но соослэсь пельзэс уг усьты (КЗк 29:4; Рм 11:8). Апостол Павел вераз: вуоз дыр, куке куд-ог адямиос, кудъёсыз асьсэды христианъёс шуо, зэмос осконлэсь куштӥськозы. Соослэн Инмарлэн Кылысьтыз зэмлыкез кылзэмзы уз поты. Соос кылзозы ӧрекчи дышетӥсьёсты, кудъёсыз «мылкыдзылы тупась чебересь кылъёс вералозы» (2Тм 4:3, 4; 1Тм 4:1). Озьы ик адямилэн «пельыз жонгетыны» быгатэ, куке со кышкыт ивор кылэ, кылсярысь, кыӵе ке шугадӟон сярысь (1Эк 3:11; 4Эк 21:12; Иер 19:3).

Библиез лыдӟон

(Кыкетӥ Закон 29:1—18) Хорив гурезьын Кузё-Инмарлэн сётэм сӥзён-косонэз сяна, тани таиз Кузё-Инмарлэн Моисей пыр израиль пиосын кусып кылдытон понна Моав музъемын сётэм сӥзён-косонэзлэн кылъёсыз луо. ² Соку Моисей вань израиль пиосты котыраз люкатӥз но соослы шуиз: «Тӥ ваньзэ адӟиды, тӥляд син азяды Египет музъемысен Кузё-Инмар фараонэн но солэн вань ляльчиосыныз, солэн быдэс музъеменыз мар кариз: ³ тон ас синмыныд адӟид со быдӟымесь вӧсь каронъёсты, со быдӟымесь паймымон тодметъёсты, паймымон ужъёсты; ⁴ но туннэ нуналозь Кузё-Инмар тӥледлы валаны сюлэм ӧз сёты, адӟыны син ӧз сёты, кылыны пель ӧз сёты. ⁵ Ньыльдон ар ӵоже Со тӥледыз луоё кыр дуннеетӥ нуллӥз, вылысьтыды дӥськутты но ӧз пӧсьты, пыдкукты но ӧз сурыкмы; ⁶ тӥ нянь ӧд сие, вина но, сӥкера но ӧд юэ, мед тододы, Мон тӥляд Инмарды Кузё-Инмар луисько шуыса. ⁷ Та интые вуэм берады Есевонлэн Сӥгон эксэез, Васанлэн Ог эксэез асьме вылэ ожмаськыны урдскизы, но асьмеос соосты погыртӥмы; ⁸ соослэсь музъемзэс кутӥмы но Рувим выжылы, Гад выжылы, Манассиялэн ӝыны выжыезлы люкетлы сётӥмы. ⁹ Та сӥзён-косонысь кылъёсты уте, соосты вань лэсьтоно ужъёсады азинлыкез мед луоз шуыса быдэсъялэ. ¹⁰ Туннэ тӥ ваньды Инмардылэн Кузё-Инмарлэн син азяз сылӥськоды — выжыостылэн кивалтӥсьёссы, тӧроосты, эскерись-чакласьёсты — вань израиль воргоронъёс, ¹¹ нылпиосты но, кышноосты но, сьӧрлось лыктэм муртъёсыд но станын улӥсьёс — пу корась бордысен кутскыса вудэ омыръясь дорозь, ¹² татын сылӥськод Инмареныд Кузё-Инмарен сӥзён-косон пыр кусып кылдытон понна, туннэ Инмареныд Кузё-Инмарен сётэм сӥзён-косонэз утьыса-быдэсъяса улыны кыл сётон понна, ¹³ озьы Со туннэ тонэ Аслыз калык кароз, нош Со тыныд Инмар луоз, кызьы Со тыныд азьвыл ик вераз, кызьы Со тынад атайёсыдлы Авраамлы, Исааклы, Иаковлы кыл сётӥз. ^14-15 Тӥледлы, Инмармы Кузё-Инмар азьын али сылӥсьёслы гинэ, та сӥзён-косонэз, кыл сётоно договорез уг сётӥськы, сое сётӥсько соослы но, кинъёс али асьме пӧлын ӧвӧл. ¹⁶ Тӥ тодӥськоды ук, кызьы ми Египет музъемын улӥмы, кызьы мукет калыкъёс пӧлтӥ потыса кошкимы, ¹⁷ соослэсь юрӟым макеоссэс адӟимы, соос дорын возиськись пулэсь, излэсь, азвесьлэсь, зарнилэсь лэсьтэм сульдэръёссэс-идолъёссэс адӟимы. ¹⁸ Тӥ пӧлын медаз луэ Инмармылэсь Кузё-Инмарлэсь сюлмынызы палэнскемъёс, мурт калыкъёслэн инмаръёссылы йыбыртъяны кутскем пиосмуртъёс, кышномуртъёс, выжыос, улыос-бечеос, тӥляд пӧлады медаз луы ядэн курытпот будэтӥсь будос выжы,

30-ТӤ ГУДЫРИКОШКОН — 5-ТӤ КУАРУСЁН

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 31, 32

Духовной марӟанъёс

(Кыкетӥ Закон 31:12) калыкез люка, пиосмуртъёсты но, кышномуртъёсты но, нылпиосты но, сьӧрлось дорад лыктэм калыктэ но, кинъёс тынад улон интыосад луозы, мед кылзӥськозы, мед дышетскозы, Инмардылэсь Кузё-Инмарлэсь мед кышкалозы но та законысь вань кылъёсты быдэсъяны мед дышетскозы;

w04 15/9 27 б., 11 абз.

Кыкетӥ Закон книгаысь тунсыко малпанъёс

31:12. Кенешлэн пумиськонъёсаз нылпиослы анай-атаенызы ӵош пуконо, сак кылзоно но дышетсконо.

Библиез лыдӟон

(Кыкетӥ Закон 32:36—52) Но Кузё-Инмар Аслэсьтыз калыксэ судить кароз, Аслэсьтыз ляльчиоссэ Со жалялоз, соослэн киоссы лябӟемын шуыса адӟиз ке, пытсэтэ сюремъёс но, сюрымтэос но кылиллямтэ ни шуыса адӟиз ке. ³⁷ Соку Кузё-Инмар шуоз: „Кытын соослэн инмаръёссы, кытын юнматскон интызы, кудӥз вылэ соос оскиськыса уло вал; ³⁸ кытын курбон пудозылэсь кӧйзэ сиисьёс, курбон-салам виназэс юисьёс? Соос султыса тӥледлы мед юрттозы, тӥ понна соос утиськон шобрет мед луозы! ³⁹ Адӟиськоды туннэ, та — Мон шуыса, Мон сяна, мукет Инмар ӧвӧл: Мон виисько но, улӟытӥсько но, Мон яраё карисько, Мон ик бурмытӥсько но, Мынам киулысьтым нокин но мозмытыны уз быгаты. ⁴⁰ Мон киме ин пала ӝутӥсько но шуисько: „Пумтэм вапумъёс Мон улӥсько! ⁴¹ Пиштӥсь-чилясь мечме йылсо каро, суд лэсьтыны кутско, киыным тушмонъёсме вӧсь каро, Монэ синазькыль карисьёслы пунэмзэ берыкто; ⁴² пукыӵ ньӧлъёсме вирен кудӟыто, мече-пуртэ виылэмъёслэн, пленэ шедемъёслэн мугоръёсынызы, вирынызы кӧтсэ тыроз, тушмонъёслэн кузёйыръёссылэн йыръёсынызы кӧтсэ тыроз“. ⁴³ Вань выжыос, Инмарлэн калыкеныз ӵош шумпотэ-шулдыръяське! Уго Со пунэмзэ берыктоз Аслаз ляльчиосызлэн вирзы понна, Аслаз тушмонъёсызлы пунэмзэ берыктоз, чылкытатоз-сузялоз Аслэсьтыз музъемзэ, Аслэсьтыз калыксэ!» ⁴⁴ Моисей Навинлэн Иисус пиеныз ӵош лыктӥз но та кырӟанлэсь вань кылъёссэ калыклы кылӥськымон шара лыдӟиз. ⁴⁵ Вань израиль калыклы вань та кылъёсты верамез бере Моисей ⁴⁶ соослы шуиз: «Туннэ тӥледлы верам кылъёсме ваньзэ сюлмады понэ, соосты нылпиостылы быдэстыны сӥзе, соос но та законлэсь вань кылъёссэ быдэстыны мед тыршозы; ⁴⁷ уго та юнме гинэ верам кылъёс ӧвӧл, та тӥляд улонды, та кылъёсты быдэсъяды ке, тӥ со музъем вылын кема улоды, кудзэ тӥ али Иордан сьӧры киултыны мынӥськоды». ⁴⁸ Со нуналэ ик Кузё-Инмар Моисеен вераськиз но солы Со тазьы шуиз: ⁴⁹ «Моав музъемысь Иерихонлы ваче беринэ интыяськем Аварим гурезе, Нево гурезе, тубыса, Ханаан музъем шоры учкы, сое Мон израиль пиослы асьсэлы карыны сётӥсько; ⁵⁰ гурезь йылэ туб но отчы кул, ас калыкед пӧлысь кулэмъёс доры пыр, кызьы Ор гурезь йылэ Аарон агаед кулӥз но ас калыкез пӧлы пыриз, ⁵¹ озьы луоз та понна: тӥ израиль пиос пӧлын, Сӥн луоё кыр дуннеын, Кадесысь Мерива вуос дорын, Мыным пумит сьӧлыкады, Мынэсьтым дун-сьӧлыктэм луэмме израиль пиос пӧлын ӧд возьматэ; ⁵² азьпалысьтыд музъемез адӟод, но тон отчы, израиль пиослы сётоно музъемам, уд пыры».