«Улон но ужан-тыршон» ужан тетрадьлы малпанъёс
© 2022 Watch Tower Bible and Tract Society of Pennsylvania
6—12-ТӤ ЮЖТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | 1 ПАРАЛИПОМЕНОН 23—26
Духовной марӟанъёс
(1 Паралипоменон 25:7, 8) Кузё-Инмар азьын кырӟаны дышетэмъёс, ваньзы та ужез тодӥсьёс агай-вынъёсынызы ӵош кык сю тямыстон тямыс мурт вал. 8 Служить карыны черод басьтон понна пус чӧлтӥзы, покчиез бадӟыменыз ӵош, дышетӥсьёс дышетскисьёсын ӵош.
Иеговалы йыбыртъян юрттоз тыныд шудогес луыны
10 Кырӟанъёсын данъян (Пс. 27:7). Вашкала Израильын кырӟанъёсты Иеговалы йыбыртъян пӧлы пырто вал. Кылсярысь, Давид эксэй 288 левитъёсты бырйиз, соос «Кузё-Инмарлэн корказ» мед кырӟалозы шуыса (1 Пар. 25:1, 6—8). Ми но Инмарлы яратэммес возьматӥськомы, кырӟанъёс кырӟаса. Эн малпалэ, тӥ чебер кырӟаны уд ке быгатӥське, кырӟано ӧвӧл шуыса. Малпаське: ми пӧлын ӧвӧл соос, «кин кылыныз уг сьӧлыка» (Иак. 3:2). Озьы ке но ми кенешлэн пумиськонъёсаз валэктонъёс сётъяськомы, тодытыкумы адямиосын вераськиськомы. Соин ик эн кышкалэ Иеговаез кырӟанъёсын данъяны.
Библиез лыдӟон
(1 Паралипоменон 23:21—32) Мерарилэн пиосыз: Махли но Муши, Махлилэн пиосыз: Елеазар но Кис. 22 Елеазар кулӥз, но солэн пиосыз ӧй вал, нылъёсыз гинэ вал; соосты Кислэн пиосыз, соослэн братъёссы, кышнолы басьтӥзы. 23 Мушилэн пиосыз: Махли, Едер но Иремоф куиньназы. 24 Тани Левийлэн пиосыз, атайёссылэн выжыоссыя, семьяослэн кузёоссы, ваньзэс, одӥгтэм, нимын-нимын лыдъяса,— соос Кузё-Инмарлэн корказ, кызь арескысен кутскыса бадӟым арескозь, службаос ортчытъязы. 25 Уго Давид шуиз: «Израильлэн Инмарез Кузё-Инмар Ас калыкезлы каньыллык сётӥз но сое Иерусалиме пумтэм вапумъёслы улыны интыяз, 26 вӧсяськон скинияез но отын служить карон понна пӧртэм арбериосты левитъёслы нуллыны кулэ ӧй ни вал». 27 Соин ик, Давидлэн берпум косонъёсызъя, левитъёс лыдъямын кызь аресысен кутскыса бадӟым арескозь, 28 соос Аарон пиос бордын мед луозы Кузё-Инмарлэн корказ служить карон понна, азбаръёсаз но, бӧльмыосаз но, быдэс вӧсяськон интыын чылкытлыкез утён понна, Кузё-Инмарлэн корказ пӧртэм службаосты ортчытъян понна, 29 курбон няньёсты чаклан понна, чабей пызез нянен курбон сётон понна, чырсатымтэ уднянез, пыжем сиёнэз, кебатэм сиёнэз чаклан понна, вань мертэтъёсты, весъёсты чакласа улон понна пуктэмын, 30 ӵукналы быдэ Кузё-Инмарез данъяны, ушъяны султытон понна, озьы ик ӝытъёсы но, 31 Кузё-Инмарлы тылын сутӥськись курбонъёс ӝутыку, субботаосы, выль толэзь потыку, праздникъёсы, кызьы соос сярысь гожтэмын, лыдзыя сомында Кузё-Инмар азьын ялан луыны кулэ вал, 32 мед утёзы сӥзён-косонэн скинияез, вӧсяськон интыез, Ааронлэсь пиоссэ, асьсэлэсь агай-вынъёссэс, Кузё-Инмарлэн корказ службаос ортчыку.
13—19-ТӤ ЮЖТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | 1 ПАРАЛИПОМЕНОН 27—29
Духовной марӟанъёс
(1 Паралипоменон 27:33) Ахитофел эксэйлэн визь-нод сётӥсез вал; Архи пи Хусий эксэйлэн эшез вал;
Тӥ быгатӥськоды агайёслы но сузэръёслы оскыны
10 Тӥледыз куке но матысь эшты вузаз-а? Озьы ке, малпаське Давид эксэй сярысь. Солэн Ахитофел нимо матысь эшез вал. Куке Давидлэн пиез Авессалом атаезлэсь кивалтэтсэ ас кияз басьтыны тыршиз, Ахитофел со пала ӧз кариськы. Соку Давидлы туж секыт вал, малы ке шуоно со огдыре пизэ но, матысь эшсэ но ыштӥз. Та шоры учкытэк, Давид мукет адямиослы оскемысь ӧз дугды. Кылсярысь, со азьланяз но оскиз Хусийлы, кудӥз Авессалом пала ӧз кариськы. Давид юнме солы ӧз оскы. Берлогес Хусий возьматӥз, со оскымон эш шуыса. Давид понна со улонзэ но сётыны дась вал (2 Экс. 17:1—16).
Библиез лыдӟон
(1 Паралипоменон 27:1—15) Тани лыдзыя Израиль пиос, семьяослэн йыръёссы, сюрс ожгарчиосын кивалтӥсьёс, сю ожгарчиосын кивалтӥсьёс, мукет кивалтӥсьёс. Соос армиялэн оглюкетэныз, толэзьлы быдэ лыктыса, эксэйлэсь вань ужъёссэ быдэсъязы, солы ужаса-тыршыса улӥзы, собере кошкылӥзы. Быдэс ар ӵоже, вань толэзьёсы соос озьы карылӥзы. Котькуд люкетын (отрядын) быдэн кызь ньыль сюрс мурт вал. 2 Нырысетӥ толэзе нырысетӥ люкетэн кивалтӥз Завдииллэн Иашовам пиез; солэн люкетаз (отрядаз) кызь ньыль сюрс мурт; 3 со Фарес пиос пӧлысь потэмын, нырысетӥ толэзе ожен вань кивалтӥсьёслы со йыр вал. 4 Кыкетӥ отрядэн кыкетӥ толэзе кивалтӥз Ахохи выжыысь Додай; солэн отрядаз Миклоф покчи эксэй вал, солэн люкетаз кызь ньыль сюрс мурт. 5 Куинетӥ толэзьлы куинетӥ отрядэн кивалтӥсь йыр луиз Иодай священниклэн Ванея пиез, солэн отрядаз кызь ньыль сюрс мурт; 6 та Ванея куамын кышкасьтэмъёс пӧлысь одӥгез, соослэн йырзы, солэн отрядаз Аммизавад пиез вал. 7 Ньылетӥ толэзьлы ньылетӥ отрядэн кивалтӥсе пуксиз Иоавлэн братэз Асаил, со бере кивалтӥсе пуксиз солэн Завадия пиез, солэн отрядаз кызь ньыль сюрс мурт. 8 Витетӥ толэзьлы витетӥ отрядэн кивалтӥсе пуксиз Израх пи Шамгуф — покчи эксэй, солэн отрядаз кызь ньыль сюрс мурт вал. 9 Куатетӥ толэзьлы куатетӥ отрядэн кивалтӥсе пуксиз Иккешлэн пиез Ира, Фекоя пи, солэн отрядаз кызь ньыль сюрс мурт. 10 Сизьыметӥ толэзьлы сизьыметӥ отрядэн кивалтӥсе пуксиз Пелон пи Хелец, Ефрем пиос пӧлысь потэм мурт, солэн отрядаз кызь ньыль сюрс мурт. 11 Тямысэтӥ толэзьлы тямысэтӥ отрядэн кивалтӥсе пуксиз Зара выжыысь Хуша пи Совохай, солэн отрядаз кызь ньыль сюрс мурт. 12 Укмысэтӥ толэзьлы укмысэтӥ отрядэн кивалтӥсе пуксиз Вениамин пиос пӧлысь потэм Анафоф пи Евиезер, солэн отрядаз кызь ньыль сюрс мурт. 13 Дасэтӥ толэзьлы дасэтӥ отрядэн кивалтӥсе пуксиз Нетофаф пи Магарай, Зара выжыысь мурт, солэн отрядаз кызь ньыль сюрс мурт. 14 Дас одӥгетӥ толэзьлы дас одӥгетӥ отрядэн кивалтӥсе пуксиз Пирафон пи Ванея, со Ефрем пиос пӧлысь, солэн отрядаз кызь ньыль сюрс мурт. 15 Дас кыкетӥ толэзьлы дас кыкетӥ отрядэн кивалтӥсе пуксиз Нетофаф пи Хелдай, со Гофониил пиос пӧлысь, солэн отрядаз кызь ньыль сюрс мурт.
20—26-ТӤ ЮЖТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | 2 ПАРАЛИПОМЕНОН 1—4
Духовной марӟанъёс
(2 Паралипоменон 1:11, 12) Инмар Соломонлы шуиз: «Тынад сюлмад та луэм понна — тон аслыд ваньбур, узырлык но, данлык но, тушмонъёсыдлэсь лулзэс но ӧд куры, трос улон нуналъёс но ӧд куры,— курид аслыд визьлык но тодонлык, Мынам калыкеным кивалтыны мед быгатод шуыса, Мон тонэ соослы эксэе пуктӥ, 12 визьлык но тодонлык тыныд сётӥське, нош узырлык, ваньбур но данлык Мон тыныд сыӵезэ сёто, кудъёсыз тынэсьтыд азьвыл но, берло но улоно эксэйёслэн ӧй вал, уз но луы».
w05 1/12 19 б., 6 абз.
Кыкетӥ Паралипоменон книгаысь тунсыко малпанъёс
1:11, 12. Соломонлэн куронэз Иеговалы возьматӥз, мар солэн сюлмаз. Эксэйлэн туж потэ вал «визьлык но тодонлык» басьтэмез. Милям но вӧсяськонъёсмы возьмато, мар милям сюлмамы. Соин ик туж кулэ малпаськыны, мар сярысь вӧсяськиськомы.
Библиез лыдӟон
(2 Паралипоменон 4:7—22) Дас зарни лампадаос лэсьтӥз, кызьы луыны кулэ; соосты храме пуктӥз: витьсэ бурпала, витьсэ — паллян пала. 8 Дас ӝӧк лэсьтӥз но соосты храме пуктӥз: витьсэ бурпала, витьсэ — паллян пала, сю зарни чашаос лэсьтӥз. 9 Вӧсяськон азбар лэсьтӥз, эшшо одӥг бадӟым азбар, азбаре пырон ӧсъёс лэсьтӥз, тунгонъёссэ ыргонэн шобыртӥз. 10 Зарезез бурпала пуктӥз, лымшорен шундыӝужан вискы. 11 Тазъёс, сускичъёс, чашаос Хирам лэсьтӥз. Инмар коркан Соломон эксэйлы лэсьтоно ужъёссэ Хирам йылпумъяз: 12 кык юбо но соос вылысь чашалы укшась кык венецъёс лэсьтӥз, кык сетка юбоос йылысь венецъёсты шобыртыны; 13 кык сеткаос бордысь ньыль сю гранат улмоос; котькуд сеткалы кык радэн гранат улмоос; юбоос йылысь кык венецъёсты шобыртон понна лэсьтӥз. 14 Пуктонъёс лэсьтӥз, пуктонъёс вылэ мисьтӥськон-гылтӥськон арбериос лэсьтӥз; 15 одӥг зарезь но со улэ дас кык ош, 16 тазъёс, лопаткаос, вилкаос,— Хирам-Авий Соломон эксэйлы, Кузё-Инмар коркалы кулэ вань арбериосты чилясь ыргонлэсь лэсьтӥз. 17 Иордан ёросын, горд сюё музъемын, Сокхофен Цереда вискын, эксэй ыргонзэ ӵыжатӥз. 18 Вань та арбериосты Соломон туж трос лэсьтӥз, ыргонлэсь мертэтсэ ик ӧз тодэ. 19 Инмар коркалы вань арбериосты озьы ик Соломон лэсьтӥз. Зарнилэсь курбон сётон ӝӧк, курбон нянь тырон ӝӧкъёс, 20 чылкыт зарнилэсь светильникъёс, лампадаоссэс пуктон-косонъя давир азьын ӝуатъян понна лэсьтӥз. 21 Сяськаос, лампадаос, чепыльтон кортъёс зарнилэсь, самой чылкыт зарнилэсь, лэсьтӥз, 22 пуртъёс но, вуэн пазянъёс но, эгыр тырон но, чашаос но чылкыт зарнилэсь, Святойлэсь но Святой интыысь ӧсъёсты, храмлэсь вӧсяськон интые нуись ӧсъёссэ зарнилэсь лэсьтӥз.
27-ТӤ ЮЖТОЛЭЗЬ — 2-ТӤ ОШТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | 2 ПАРАЛИПОМЕНОН 5—7
Духовной марӟанъёс
(2 Паралипоменон 6:29, 30) вань вӧсяськемез, вань куриськемез — одӥг адямилэсь-а со луоз яке вань израиль калыкедлэсь-а, куке соос котькудзы, асьсэлэсь шуге-леке сюронзэс, куректон-кайгузэс шӧдыса, киоссэс храм пала вӧлъязы ке, 30 Инмысен — Аслад улон интыысеныд — кыл но простить кар, котькудӥзлы пунэмзэ берыкты, лэсьты солэн улэм сюресэзъя, кызьы Тон солэсь сюлэмзэ тодӥськод,— уго Тон одӥгнад гинэ адями пиослэсь сюлэмзэс тодӥськод,—
Мукетъёслэн шӧдонъёссы сярысь сюлмаське
7 Со, кызьы Иегова ассэ ас калыкеныз возиз, оскытэ милемыз, ужась-тыршисьёсыз сярысь со сюлмаське шуыса. Со адӟе, кыӵе шуг-секытъёсын но вӧсь луонъёсын ми пумиськиськомы. Иегова «адями пиослэсь сюлэмзэс» тодэ (2 Пар. 6:30). Солы тодмо пуш малпанъёсмы но шӧдонъёсмы. Иегова тодэ, мае ми быгатӥськомы лэсьтыны, нош мае — ум, но со милемлы «чиданы луонтэм визь сынаськон уз лэзьы» (1 Кор. 10:13). Макем буйгато милемыз та кылъёс!
Библиез лыдӟон
(2 Паралипоменон 6:28—42) Музъем вылын сютэм улон луиз ке, яке сьӧдчер, ӵушкась тӧл яке мӧль усиз ке, саранча яке нумыръёс алязы ке, асьсэ музъем вылын ик тушмонъёс ӝикатыса-ёртыса возьыны кутскизы ке, кыӵе ке шугадӟонъёс, кыӵе ке висёнъёс луизы ке, 29 вань вӧсяськемез, вань куриськемез — одӥг адямилэсь-а со луоз яке вань израиль калыкедлэсь-а, куке соос котькудзы, асьсэлэсь шуге-леке сюронзэс, куректон-кайгузэс шӧдыса, киоссэс храм пала вӧлъязы ке, 30 Инмысен — Аслад улон интыысеныд — кыл но простить кар, котькудӥзлы пунэмзэ берыкты, лэсьты солэн улэм сюресэзъя, кызьы Тон солэсь сюлэмзэ тодӥськод,— уго Тон одӥгнад гинэ адями пиослэсь сюлэмзэс тодӥськод,— 31 мед кышкалозы Тынэсьтыд, атайёсмылы сётэм музъем вылын улыкузы, вань улон нуналъёсазы Тынад сюрес вылтӥд мед ветлозы. 32 Тынад израиль калыкед бордысь потымтэ мукет выжыысь адями гинэ но, Тынад быдӟым нимыдлы луыса, Тынад кужмо киыдлы луыса, вӧлъям суйбыгытэдлы луыса кыдёкысь музъемысь лыктоз но та храм азьын вӧсяськиз ке, 33 Инмысен, Аслад улон интыысеныд, кыл, мурт выжыысь адями Тынэсьтыд сюлворыса куриз ке, ваньзэ быдэсты,— быдэс дунне вылысь вань калыкъёс Тынэсьтыд нимдэ мед тодозы, израиль калыкед кадь Тынэсьтыд мед кышкалозы, та мынам пуктэм коркае Тынад нимыдлы сӥземын шуыса мед тодозы. 34 Тынад возьматэм сюрестӥд калыкед тушмонэзлы пумит оже потӥз ке, Тынад быръем городэд пала берыктӥськыса, Тынад нимыдлы сӥзьыса мынам пуктэм храме пала берыктӥськыса вӧсяськиз ке, 35 соку Инмысен кыл соослэсь вӧсяськемзэс, соослэсь куриськемзэс, мар соослы кулэ, сое лэсьты. 36 Тон азьын сьӧлыказы ке,— уго сьӧлыкасьтэм одӥг адями но ӧвӧл,— соослы вождэ поттӥд ке, соосты тушмон киулэ сётӥд ке, соосты пленэ басьтэмъёс сьӧразы кыдёкысь музъеме нуизы ке, яке матысь музъеме, 37 пленэ нуэм музъемын соос валатскизы ке, Тыныд вазиськизы, вӧсяськизы ке, пленэ сюрыса улоно музъемазы тазьы шуизы ке: „Ми сьӧлыкамы, законлы пумит уж лэсьтӥмы, ми янгышоесь“,— 38 пленэ нуэм, пленын улоно музъемазы вань сюлмынызы, вань лулынызы Тыныд вазиськизы ке, дор музъемзы пала берытскыса, кудзэ Тон соослэн атайёссылы сётӥд, вӧсяськизы ке, Тынад быръем городэд пала, Тынад нимыдлы сӥзьыса мынам пуктэм храм пала берытскыса вӧсяськизы ке, 39 соку Инмысен, Аслад улон интыысеныд, соослэсь вӧсяськемзэс, куриськемзэс кыл, мар соослы лэсьтыны кулэ — лэсьты, Ас калыкедлэсь сьӧлыкъёссэ кушты, маин соос Тон азьын сьӧлыказы, 40 Инмаре! Тынад синъёсыд усьтэмын мед луозы, пельёсыд сак мед улозы, та интыын вӧсяськыку. 41 Нош али, Инмаре Кузё-Инмаре, Аслад шутэтскон интыяд султы, Тон Ачид но Тынад кужымедлэн ковчегез. Инмаре Кузё-Инмаре, священникъёсыд утиськонэн мед дӥсяськозы, шонер улӥсьёсыд ӟечлыкен тыр мед луозы. 42 Инмаре Кузё-Инмаре! Вӧйын зырӟемдэ бордысьтыд эн палэнты, Давид ляльчиедлы гажан-жаляндэ возьматыны эн вунэты».
10—16-ТӤ ОШТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | 2 ПАРАЛИПОМЕНОН 8, 9
Духовной марӟанъёс
(2 Паралипоменон 9:19) эшшо куать тубатъёслэн мыд-мыд палазы дас кык левъёс пуктэмын. Таӵе престол одӥг эксэйлыкын но ӧй вал.
it «Престол», 3 абз.
Престол
Израильысь эксэйёслэн престолъёссы сярысь Библиын трос ик уг вераськы, Соломонлэн престолэз сярысь гинэ тупен-тупен вераське (3Эк 10:18—20; 2Пр 9:17—19). Соломонлэн престолэз Иерусалимысь Мориа гурезь вылысь одӥгаз коркан сылӥз, вылды (3Эк 7:7). Со престол слон лылэсь лэсьтэмын но зарниен шобыртэмын вал. Мыд-мыд палаз гырпумен пыкъяськон вал. Эксэйлэн пуконэз быдэсак слон лылэсь луыны быгатэ вал. Нош храмез пуктон понна кутэм амалъёсты лыдэ басьтоно ке, сое пулэсь лэсьтӥзы, дыр, нош собере зарниен но слон лыэн чеберъязы. Престол доры ӝутскыны куать тубат лэсьтэмын вал. Озьы ик Библиын верамын: «Пукон вӧзын мыд-мыд палаз гырпумен пыкъяськон, гырпумен пыкъяськыса пукон вӧзын киын лэсьтэм кык левъёс сыло вал; эшшо куать тубатъёслэн мыд-мыд палазы дас кык левъёс пуктэмын» (2Пр 9:17—19). Со паймымон ӧвӧл, малы ке шуоно Библиын лев кивалтӥсьёсты возьматэ (Ул 49:9, 10; Усьт 5:5). 12 левъёс возьматӥзы, луоз, Израильлэн 12 выжыосыз та престол вылын пукись кивалтӥсьлэсь кылзӥсько шуыса. Престол борды зарнилэсь лёгиськон инты тупатэмын вал. Слон лылэсь но зарнилэсь та престол паймымон чебер вал. Со дыръёсы солэсь чеберез ӧй вал. Со сярысь верало археологъёслэн шедьтэмъёссы, вашкала синпелетъёс вылысь суредъёс но вашкала кигожтэмъёс. Библиын но гожтэмын: «Таӵе престол одӥг эксэйлыкын но ӧй вал» (2Пр 9:19).
Библиез лыдӟон
(2 Паралипоменон 8:1—16) Кызь ар ӵоже Кузё-Инмарлы но, аслыз но корказэ пуктыса вуттэм бере 2 Соломон Хирамлэсь солы сётэм городъёсты выльдӥз но отчы израиль пиосты улыны интыяз. 3 Соломон ожен Емаф-Сувае мынӥз но сое киултӥз. 4 Луоё кыре Фадмор кар пуктӥз, Емафе пуктэм городъёсты запас возён инты кариз. 5 Вылӥ Веф-Орон карез выльдӥз, Улӥ Веф-Оронэз но — юнматэм городъёсты, борддоръёсын, капкаосын, тунгонъёсын юнматӥз, 6 Соломон киысь Ваалафез но, запас возён мукет городъёсты но, ожмаськон уробо возён городъёсты но, вал вылын ожмаськисьёслэсь но городъёссэс, Соломонлэн мар потэ вал лэсьтэмез Иерусалиме, Ливанэ, киулаз возиськись быдэс музъем вылаз, ваньзэ лэсьтӥз. 7 Израиль калык пӧлысь потымтэ, вань мукет калыкъёслэсь — хеттейёслэсь, аморрейёслэсь, ферезейёслэсь, евейёслэсь, иевусейёслэсь — кылем люкетсэс, 8 соослэсь та музъеме улыны кылем нылпиоссэс, кудъёссэ израиль пиос виылыса ӧз быдтэ,— та дырозьлы Соломон выт тырись калык кариз. 9 Нош Соломон израиль пиосты аслыз ужась ляльчи ӧз кары, соос ожгарчиос, эксэез утись-чакласьёслэн кивалтӥсьёссы, ожмаськон уробоослэн, вал вылын ожмаськисьёслэн азьветлӥсьёссы луизы. 10 Соломон эксэйлэн калыкен кивалтӥсь кык сю витьтон чаклась-эскерись кузёйыръёсыз вал. 11 Нош фараонлэсь нылзэ Соломон Давидлэн городысьтыз солы юри пуктэм корка улыны келяз, уго со шуэ вал, Израильлэн эксэезлэн, Давидлэн, корказ кышноелы улыны уг яра, уго со дун-чылкыт — отчы Кузё-Инмарлэн ковчегез пыриз. 12 Соку Соломон храмлэн пырон азяз лэсьтэм Кузё-Инмарлы курбон сётон ӝӧк вылын Кузё-Инмарлы тылын сутӥськись курбонъёс сётъяны кутскиз, 13 котькуд нуналлэн пуктон-косонэзъя, Моисейлэн курон-косонъёсызъя, субботаосы, выль толэзь ӝужан нуналъёсы, праздникъёсы арлы куинь пол — Юмал Нянь Сиён, Арняослэн но Тылыс Пуктонлэн праздникъёсазы — тылын сутӥськись курбонъёс сётылӥз. 14 Атаезлэн, Давидлэн, косонэзъя священникъёслэсь служить карон черодзэс, левитъёслэсь черодзэс юнматӥз — соос священникъёс бордын мед ужалозы-тыршозы котькуд нуналлы юнматэм пуктон-косонъя, Инмарез мед данъялозы, озьы ик капка возьмасьёслэсь черодзэс юнматӥз, котькуд капка дорын аслаз черодэз, уго таӵе вал Инмар адямилэн, Давидлэн, курон-косонэз. 15 Священникъёс, левитъёс пумысен эксэйлэсь косонзэ быдэсъянын номыр ласянь но палэнэ ӧз кожылэ, ваньбур пумысен но. 16 Кузё-Инмарлы корка пуктыны кутскем дырысен Кузё-Инмарлэсь корказэ пуктонэз быдэсак йылпумъятозь тазьы тупатэмын вал Соломонлэн ужъёсыз.
17—23-ТӤ ОШТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | 2 ПАРАЛИПОМЕНОН 10—12
Духовной марӟанъёс
(2 Паралипоменон 11:16, 17) Нош соос бӧрсьы Израильлэн вань выжыосысьтыз чылкыт сюлэмоос Иерусалиме лыктылӥзы Израильлэсь Инмарзэ Кузё-Инмарез утчаны но атайёссылэн Инмарзылы Кузё-Инмарлы курбонъёс сётон понна. 17 Соос Иудалэсь эксэйлыксэ юнматӥзы но Соломонлэсь пизэ, Ровоамез, санэ поныса, куинь ар ӵоже улӥзы, вань та куинь аръёс ӵоже соос Давидлэн но Соломонлэн сюрессы кузя ветлӥзы.
Со быгатысал Инмарлы ярамон луыны
Малпалэ ай, макем Ровоамлэн мылкыдыз куашказ, куке кылӥз, бугыръяськисьёсын ожмаськыны солы уг яра шуыса! Мар со сярысь малпалозы адямиос? Кемалась ӧвӧл со кышкатӥз соосты, «скорпионъёсын» жугоз шуыса, нош али солы верам кылъёсызлэсь куштӥськоно! (Ӵошатэ 2 Паралипоменонэз 13:7.) Озьы ке но эксэй но солэн ожгарчиосыз «кылзӥськизы но Кузё-Инмарлэн верам кылъёсызъя котькудӥз аслаз дораз кошкиз».
Малы со милемыз дышетэ? Инмарлэсь кылзӥськоно, со понна кин ке но милемыз серекъя ке но. Ми солэсь кылзӥськиськомы ке, со милемыз бакель кароз (К. Зак. 28:2).
Кыӵе емыш вайиз Ровоамлэн сыӵе ужпум кутэмез? Солэн киулаз кык выжыос кылизы — Иуда но Вениамин. Со выль городъёс пуктыны кутскиз но вужъёссэ «зол-зол юнматӥз» (2 Пар. 11:5—12). Нош тужгес но кулэез — кӧня ке дыр ӵоже Ровоам Иеговалэн законъёсызъя улӥз. Иеровоам кивалтыку, дас израиль выжыослэн Израиль шуыса нимаськись эксэйлыксы сульдэръёслы-идолъёслы йыбыртъян пӧлы выйиз. Нош тросэз отын улӥсьёс, «Ровоамез санэ поныса», Иерусалиме лыктӥзы, азьланяз но зэмос Инмарлы йыбыртъян вылысь (2 Пар. 11:16, 17). Озьыен, Инмарлэсь кылзӥськеменыз, Ровоамлэн эксэйлыкез юнмаз.
Библиез лыдӟон
(2 Паралипоменон 10:1—15) Соку Ровоам Сӥхем каре мынӥз, малы ке шуоно Сӥхеме вань израиль калык сое эксэе пуктон понна люкаськиз. 2 Наватлэн Иеровоам пиез та сярысь кылэм бераз Египетысь берытскиз. Соку со Египетын Соломон эксэйлэсь пегӟыса улэ вал. 3 Сое ӧтьыны ыстӥзы; Иеровоам но, вань израиль калык но лыктӥзы, соос Ровоамлы шуизы: 4 «Тынад атаед ми вылэ секыт зӥбет понӥз; нош тон атаедлэсь лек ужзэ капчияты, ми вылэ понэм секыт зӥбетсэ но, соку ми тыныд ужаса-тыршыса уломы». 5 Ровоам соослы шуиз: «Куинь нунал ортчыса, нош ик мон доры лыктэ». Собере калык дораз кошкиз. 6 Ровоам эксэй ас атаезлэн, Соломонлэн, улон дыръяз солэн азяз сылӥсь тӧроосын кенешиз но шуиз: «Та калыклы кыӵе ответ вераны визь-кенеш сётоды?» 7 Соос солы шуизы: «Та калыклы лякыт сямо кариськид ке, соослы ярад ке, соосын небытэн вераськид ке, соку соос тыныд вань улон нуналъёсыд ӵожелы ляльчи кариськозы». 8 Нош со тӧроослэн сётэм визь-кенешсылэсь палэнскиз но асэныз ӵош будэм, солэн азяз сылӥсь егит пиослэсь визь-кенеш юаса улыны кутскиз; 9 соослы шуиз: «Мыным „атаедлэсь ми вылэ понэм зӥбетсэ капчияты“ шуись калыклы кыӵе ответ сётыны ӵектоды?» 10 Соку соин ӵош будэм егит пиос солы шуизы: «Тыныд тазьы верась калыклы: „Тынад атаед ми вылэ секыт зӥбет понӥз, нош тон сое капчияты“, тон шу: „Мынам чӧльые атаелэн макесъёсызлэсь зӧкгес. 11 Мынам атае тӥ вылэ секыт зӥбет понӥз, нош мон тӥлесьтыд зӥбеттэс йылэто; атае тӥледыз сюлоен вӧсь кариз, нош мон тӥледыз скорпионъёсын вӧсь каро“». 12 Эксэйлэсь «куинь нунал ортчыса, мон доры лыктэ» косонзэ кылзӥськыса, Иеровоам но, вань калык но куинетӥ нуналэ Ровоам доры лыктӥзы. 13 Соку Ровоам эксэй соослы чурыт кылын ответ сётӥз, тӧроослэн визь-кенешсылэсь палэнскыса, егит муртъёслэсь ӵектэмзэс санэ поныса, соослы со тазьы вераз: 14 «Мынам атае тӥ вылэ секыт зӥбет понӥз, нош мон сое бадӟымато; атае тӥледыз сюлоен вӧсь карылӥз, нош мон тӥледыз скорпионъёсын жуго». 15 Эксэй калыклэсь ӧз кылзӥськы, уго тазьы малпамын вал Инмар дорын,— Наватлэн Иеровоам пиезлы Сӥломысь Ахия пыр Кузё-Инмарлы Аслэсьтыз верамзэ быдэстон понна.
24—30-ТӤ ОШТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | 2 ПАРАЛИПОМЕНОН 13—16
Духовной марӟанъёс
(2 Паралипоменон 15:16) Нош Аса эксэй аслэсьтыз анайзэ, Маахаез, тыпы сурдлы сульдэр-идол лэсьтэм понназ эксэй кышно луон данлыктэк кельтӥз. Анаезлэсь сульдэрзэ-идолзэ Аса погыртӥз но юдэсэн-юдэсэн кораз, Кедрон нёжалын сое сутӥз.
Вань сюлмыныды Иеговалы ужалэ-тырше
7 Котькуд адями аслэсьтыз сюлэмзэ эскерыны быгатэ, тодон понна, со быдэсак Инмарлы оскымон-а яке ӧвӧл-а. Юалэ асьтэлэсь: «Потэ-а мынам лэсьтэме сое, мар Инмарлы ярамон луэ? Потэ-а зэмос оскон пала кариськеме но Инмарлэн кенешезлэсь чылкытлыксэ утеме?» Малпалэ гинэ, макем кышкасьтэм луоно вал Асалы, пумит мынон понна Маахалы, кудӥз Иуда музъемын эксэй кышномурт вал! Тодмоосты пӧлын ӧвӧл, дыр, сыӵе адями, кудӥз Мааха кадь ужъёс лэсьтэ. Нош озьы ке но, куддыръя тӥледлы Аса кадь кышкасьтэм сямдэс возьматоно луоз. Кылсярысь, ӵыжы-выжыосты яке матысь эшъёсты пӧлысь кин ке сьӧлыказ, ӧз ӧпкельы но сое кенешысь поттӥзы. Дугдоды-а тӥ соин вераськемысь? Мар карыны косысал тӥледыз сюлэмды?
Библиез лыдӟон
(2 Паралипоменон 14:1—15) Авия кулӥз но, атайёссэ кадь ик сое Давидлэн городаз ватӥзы. Солэн интыяз Аса пиез эксэе пуксиз. Солэн кивалтон нуналъёсаз дас ар ӵоже музъем шутэтскиз. 2 Ас Инмарезлэн Кузё-Инмарлэн азяз Аса ӟеч, ярамон ужъёс лэсьтыса улӥз: 3 мурт инмаръёслэсь курбон сётон интыоссэс, гурезь йылъёсын вӧсяськонъёсты кулэтэм кариз, сульдэръёсты-статуяосты сузмытъяз, вӧсяськон сурдъёссэс кораз; 4 иудей калыкез атайёссылэсь Инмарзэс Кузё-Инмарез сӥлы карыса улыны косӥз, Солэсь законъёссэ, курон-косонъёссэ быдэсъяса улыны косӥз; 5 Иудеялэн вань городъёсысьтыз гурезьёсын вӧсяськонъёсты, шундылы сӥзем сульдэръёсты-статуяосты кулэтэм кариз. Со дыръя эксэйлык каньылэн улӥз. 6 Иудеяе юнматэм городъёс пуктылӥз, уго музъем каньыллыко улӥз, со аръёсы со дорын ожмаськонъёс ӧй вал, Кузё-Инмар солы каньыллык сётӥз. 7 Со иудей калыклы шуиз: «Та городъёсты пуктом, борддорен котыртом, каланчаосын, капкаосын, тунгонъёсын юнматомы. Музъем асьмелэн на, уго Инмармес Кузё-Инмарез утчаса улӥмы: асьмеос Сое утчаса улӥмы,— нош Со асьмелы котыр ласянь каньыллык сётӥз». Лэсьтӥськыны кутскизы но азинлыксы луиз. 8 Асалэн таӵе вал ожмаськон кужымез: Иуда выжыысь потэм щитэн, шибодыосын ожмаськисьёсыз куинь сю сюрс мурт, Вениамин выжыысь потэм щитэн но пукыӵен ыбылӥськисьёсыз кык сю тямыстон сюрс кузя, соос кышканэз тодӥсьтэм муртъёс вал. 9 Соослы пумит эфиоп пи Зарай ожен лыктӥз, солэн сюрс пол сюрс ожгарчиосыз вал, куинь сю ожмаськон уробоосыз, Мареша кар дорозь со вуиз. 10 Аса солэн пумитаз султӥз, Мареша дорысь Цефата нёжалэ радэн-радэн ожмаськыны султӥзы. 11 Аса Инмарезлы Кузё-Инмарлы вазиськиз, со шуиз: «Кузё-Инмаре! Кужмоослы но, кужымтэмъёслы но Тон юрттӥськыны уд быгатӥськы шат? Инмармы Кузё-Инмар, юртты ук милемлы: уго ми Тыныд оскиськиськомы но Тынад нимыдлы оскиськыса та туж трослэн пумитаз потӥмы. Кузё-Инмаре! Тон милям Инмармы: Тонэ адями медаз вормы». 12 Асалэн азяз, Иудалэн азяз Кузё-Инмар эфиоп ожгарчиосты погыртӥз, эфиоп ожгарчиос пегӟыса кошкыны кутскизы. 13 Аса сьӧразы уйиськиз, соин огазьысь калык но Герарозь уйиськизы, эфиоп ожгарчиос погразы, одӥг муртсы но улэп ӧз кыльы, уго соос Кузё-Инмар азьын, Солэн ожгарчиосыз азьын погыртэмын вал. Туж трос ож бервылысь ваньбур люказы 14 Герар котырысь вань городъёсты куашкатӥзы, уго соос доры Кузё-Инмар дорысь кышкан вуиз; вань городъёссэс тарказы, отысь трос ваньбур поттӥзы. 15 Пудо возьмасьёслэсь балаганъёссэс тарказы, трос уллё ыжъёссэс, кечъёссэс, верблюдъёссэс улляса нуизы, собере Иерусалиме берытскизы.