17-ТӤ УРОК

Иисус Христос. Кыӵе со?

Печатлам вариант

Куке ми тодӥськомы, мар кариз но малы дышетӥз Иисус музъем вылын, ми тросгес тодӥськомы, макем умой сямъёсыз вал солэн. Соин ик милям матэгес тодматскеммы потэ Иисусэн но солэн Атаеныз, Иеговаен. Кыӵе сямъёсыз вал Иисуслэн? Кызьы ми солэсь адӟем карыны быгатомы?

1. Маин Иисус Атаезлы тупа?

Инмын Иисус трос миллиард аръёс ӵоже Атаезлэсь дышетскыны быгатӥз. Со адӟиз, кызьы Атаез яратэмзэ возьматэ. Соин ик Иисус малпа но, шӧдэ но, лэсьтэ но ӵапак Атаез кадь. (Лыдӟе Иоаннлэсь 5:19.) Иисус сокем умой дышетскиз Иеговалэсь адӟем карыны, со вераны ик быгатӥз: «Монэ адӟись мурт Атаез адӟиз» (Иоанн 14:9). Макем тросгес тӥ Иисус сярысь тододы, сокем умойгес тододы Иеговалэсь сямъёссэ. Кылсярысь, Иисуслэн гажась-жалясь луэмез сярысь тодыса, тӥ валалоды, макем юн яратэ тӥледыз Иегова.

2. Кытысь адӟиське, Иисус Иеговаез яратэ шуыса?

Иисус вераз: «Дунне мед тодоз, Мон Атайме яратӥсько шуыса, кызьы куриз-косӥз Монэ Атае, озьы ик лэсьтӥсько» (Иоанн 14:31). Иисус котьку Атаезлэсь кылзӥськиз, туж секыт дыръёсы но. Озьы со возьматӥз, макем яратэ со Атайзэ. Иисус яратэ вал вераны аслаз Атаез сярысь. Озьы ик со яратэ вал валэктыны адямиослы, кызьы Инмарлэн эшъёсыз луоно (Иоанн 14:23).

3. Кытысь адӟиське, Иисус адямиосты яратэ шуыса?

Библиысь адӟиське, Иисус адямиосты яратэ шуыса. Соослы юрттон понна, Иисус ӧз жаля аслэсьтыз дырзэ но, кужымзэ но. Со паймымон ужъёс лэсьтӥз. Озьы со Инмарен сётэм кужымзэ гинэ ӧз возьматы, нош возьматӥз, со адямиосты зэмзэ ик яратэ но жаля шуыса (Марк 1:40—42). Иисус ассэ туж лякыт возиз но адямиослэн вылтуссы шоры ӧз учкы. Солэн кылъёсыз адямиосты буйгато но оскон сёто вал. Иисус адямиосты туж яратӥз, соос понна со курадӟыны но кулыны дась вал. Тужгес но Иисус яратэ соосты, кинъёс солэн дышетэмезъя улыны тыршо. (Лыдӟе Иоаннлэсь 15:13, 14.)

МУРГЕС ЭСКЕРЕ

Тросгес тодэ, кыӵе сямо Иисус. Малпаське, кызьы тӥ яратэмдэс но шырыт сямо луэмдэс возьматыны быгатысалды.

4. Иисус аслэсьтыз Атайзэ яратэ

Ми Иисуслэсь дышетскыны быгатӥськомы, кызьы Инмарлы яратэммес возьматоно. Лыдӟе Лукалэсь 6:12 но Иоаннлэсь 15:10; 17:26. Котькуд кылбурез лыдӟемды бере та юанлы валэктон сётэ:

Кызьы ми, Иисуслэсь адӟем карыса, Иеговалы яратэммес возьматыны быгатомы?

Иисус вӧсяське. — Иисус инмысь Атайзэ яратӥз но ӵемысь вӧсяськыса соин вераськиз

5. Иисус адямиос сярысь сюлмаське

Иисус ачиз сярысь сокем ӧз сюлмаськы, макем сюлмаськиз мукет адямиос сярысь. Туж жадем дыръяз но, аслэсьтыз дырзэ жалятэк, со адямиослы юрттӥз. Лыдӟе Марклэсь 6:30—44 но та юанъёслы валэктонъёс сётэ:

Та учырын кытысь адӟиськиз Иисуслэн адямиос сярысь сюлмаськемез? (Учке 31-тӥ, 34-тӥ, 41-тӥ но 42-тӥ кылбуръёсты.)
Малы Иисус адямиослы юрттӥз? (Учке 34-тӥ кылбурез.)
Иисус ӵапак Атаез кадь бере, мар вера та учыр Иегова сярысь?
Кызьы ми, Иисус сямен, адямиос сярысь сюлмаськыны быгатӥськомы?

Иисус, вить нянез но кык чорыгез люкылыса, паймымон амалэн трос сюрс адямиосты сюдэ. Дышетскисьёсыз пиосмуртъёслы, кышномуртъёслы но нылпиослы сиён сётъяло.

6. Иисус шырыт сямо

Иисуслэн ваньбурез трос ӧй вал ке но, со дась вал сётыны аслэсьтыз ваньзэ, маиз вань. Со дышетэ милемыз но шырыт сямо луыны. Лыдӟе Апостолъёслэсь ужъёссэс 20:35 но та юанлы валэктон сётэ:

Иисуслэн кылъёсызъя, мар кулэ, шудо луон понна?

Учке ВИДЕОРОЛИКЕЗ но та юанлы валэктон сётэ:

ВИДЕОРОЛИК: «Басьтон сярысь, сётыны умойгес» (люкетэз) (4:00)

Кызьы шырыт сяммес возьматыны луоз, ми узыресь ӧвӧл ке но?

Тодӥськоды-а тӥ?

Библия дышетэ милемыз Иеговалы вӧсяськыны Иисуслэн нимыныз, яке Иисус пыр. (Лыдӟе Иоаннлэсь 16:23, 24.) Иисус пыр вӧсяськыса, ми тау кареммес возьматӥськомы, Иисус милемлы Иеговаен эшъяськыны луонлык сётӥз шуыса.

КИН КЕ НО ВЕРАНЫ БЫГАТОЗ: «Инмарлы милям курадӟеммы нокыӵе ик уг поты».