Шумпотон. Инмарлэн кузьымез

ВАНЬ адямиослэн шумпотыса улэмзы потэ. Но ми улӥськомы берпум нуналъёсы, кудъёсыз Библиын «секыт дыръёс» шуыса нимамын (2 Тим. 3:1). Шонерлыктэм ужъёс, ляб тазалык, ужтэк кылён, матысь адямиосмес ыштон, сюлэмшугъяськонъёс, кышкан — ваньмыз со пумен шумпотонмес быдтэ. Куддыръя Инмарлэн ужась-тыршисьёсыз но, шумпотонзэс ыштыса, мур кайгыронэ усё. Тӥ но шумпотондэс ыштӥды ке, кызьы выльысь шумпотон басьтоно?

Нырысь ойдолэ учкомы, мар со сыӵе зэмос шумпотон, но эскеромы соослэсь примеръёссэс, кинъёс шумпотонзэс утьыны быгатӥзы, шуг-секытъёс шоры учкытэк. Озьы ик, ми вераськомы со сярысь, мар юрттоз милемлы шумпотонмес утьыны но эшшо тросгес шумпотон басьтыны.

МАР СО СЫӴЕ ЗЭМОС ШУМПОТОН?

Зэмос шумпотон со огшоры умой мылкыд гинэ ӧвӧл. Кылсярысь, трос вина юыса, адямилэн мылкыдыз ӝутске. Нош куке со сазьтӥське, солэн серемез уг поты ни, малы ке шуоно со вала, шуг-секытъёсыз ӧз быре шуыса. Сыӵе ӝамдэлы ӝутскем мылкыд со зэмос шумпотон ӧвӧл (Мад. 14:13).

Шумпотон мур сюлмысь потэ. Со сыӵе шӧдон, кудӥз кылдэ, мае ке умойзэ возьмаку, яке мар ке умоез луэм бере. Шумпотӥсь адями кылдэм югдуръёс шоры уг учкы, со котьку шумпотэ (1 Фес. 1:6). Сое мар ке но сюлэмшугъяськытэ ке но, со шумпотонзэ уг ышты. Кылсярысь, одӥг пол апостолъёсты ньӧрен жугизы, малы ке шуоно соос Христос сярысь тодытӥзы. Озьы ке но, соос, «Кузё-Инмарлэн Иисуслэн нимыз понна сантэманэз ас вылазы чидано луизы шуыса, сӥнедрионысь шумпотыса кошкизы» (Ап. уж. 5:41). Апостолъёс жугемзылы шум ӧз потэ, соос Инмарлы оскымон кыльыны быгатэмзылы шумпотӥзы.

Сыӵе шумпотонэн адями уг вордӥськы, но со ачиз уг кылды. Малы? Малы ке шуоно шумпотон Инмарлэн святой духезлэн емышез пӧлы пыре. Святой духлэн юрттэменыз, ми «выль адями» луыны быгатӥськомы, кудӥзлэн, озьы ик, шумпотонэз но вань (Еф. 4:24; Гал. 5:22). Зэмос шумпотонмы луиз ке, милемлы капчигес луоз улонысь шуг-секытъёсмес вормыны.

АДӞЕМ КАРЫМОН ПРИМЕРЪЁС

Иеговалэн потэ вал, музъем вылын ваньзы шумпотыса мед улозы шуыса. Но туннэ дуннеын сьӧлыклэсь кышкатэк улон вӧлмемын. Соин сэрен Инмар шумпотонзэ ыштӥз-а? Ӧз. Библиын верамын: «Солэн интыяз кужымлык но шумпотон уло» (1 Пар. 16:27). Со сяна, Иеговаез шумпотто ужась-тыршисьёсызлэн ӟеч ужъёссы (Мад. 27:11).

Ми Иеговалэсь адӟем карыны быгатӥськомы. Кулэ ӧвӧл ортчыт трос сюлмаськыны, ужъёсмы малпаммыя уг мыно ке. Умойгес луоз шумпотыны солы, мармы милям вань, но умойзэ чидаса возьманыa.

Библиын Инмарлэн ужась-тыршисьёсызлэн трос примеръёссы гожтэмын, кудъёсыз секыт югдуръёсын но шумпотонзэс ӧз ыштэ. Одӥгез соос пӧлысь — Авраам. Мукет адямиослэн янгышъёссы понна со трос курадӟоно луиз но сыӵе югдуръёсы шедьылӥз, ку сое виыны быгатысалзы (Ул.-выл. 12:10—20; 14:8—16; 16:4, 5; 20:1—18; 21:8, 9). Но, номыр шоры учкытэк, Авраам шумпотонзэ ӧз ышты. Мар солы юрттӥз? Со котьку оскиз, Мессиялэн кивалтэмез улсын выль дуннеын улыны быгатоз шуыса (Ул.-выл. 22:15—18; Евр. 11:10). Иисус со сярысь вераз: «Атайды Авраам Мынэсьтым нуналме адӟо шуыса шумпотэмын вал» (Иоанн 8:56). Вуоно бакель каронъёс сярысь малпаськыса, ми Авраамлэсь адӟем карыны быгатӥськомы (Рим. 8:21).

Апостол Павел но соин ӵош ужась-тыршись Сӥла озьы ик Инмарлэсь кыл сётонъёссэ тодазы возизы. Соослэн осконзы юн вал, но нокыӵе шуг-секытъёс соослэсь шумпотонзэс ӧз быдтэ. Кылсярысь, одӥг пол соосты ньӧрен трос жугизы но пытсэтэ ворсазы. Нош «Павелэн Сӥла вӧсяськизы, Инмарез кырӟаса данъязы» (Ап. уж. 16:23—25). Соосты осконзы юнматӥз, но соос валазы, Христослэн нимыз понна курадӟо шуыса. Ми соослэсь адӟем карыны быгатӥськомы но тодамы возьыны, Инмарлы оскымон ужамы-тыршимы ке, бакель каремын луомы шуыса (Флп. 1:12—14).

Туннэ Инмарлэн калыкез пӧлын трос вын-агайёс но сузэр-апайёс, кудъёсыз, шуг-секытъёс шоры учкытэк, шумпотонзэс уг ышто. Тани одӥг пример. 2013-тӥ арын шуркынмонэ Филиппинылэн шор люкеттӥз туж кужмо «Хайян» сильтӧл ортчиз. Сюрслэсь трос Иеговалэн Адӟись-Ивортӥсьёсызлэн семьяоссы улон интытэк кылизы. Таклобан карысь Джордж, кудӥзлэн коркаез быдэсак куашкатэмын вал, вераз: «Номыр шоры учкытэк, вын-агайёс шумпото. Шумпотэммес кылъёсын вераны уг луы». Тау карыса малпаськимы ке со сярысь, мар каре милемлы Иегова, шуг-секытъёсын пумиськыса но, ми шумпотонмес ум ыштэ. Кыӵе эшшо милям мугъёсмы вань шумпотыны?

ШУМПОТОН ПОННА МУГЪЁС

Самой бадӟым муг, малы ми шумпотыны быгатӥськомы,— со Инмарен матысь кусыпъёсмы. Малпалэ ай: ми Дунне Кутӥсез тодӥськомы! Со милям Атаймы, Инмармы но Эшмы (Пс. 70:17, 18).

Со сяна, ми туж дунъяськомы улонэз но шумпотонэз, кудзэ со милемлы вае (Екк. 3:12, 13). Иегова милемыз ас дораз вайиз бере, ми тодӥськомы, мар со милесьтым возьма-куре (Кол. 1:9, 10). Соин ик ми умой валаськомы, малы ми улӥськомы но мар улонамы валтӥсез луэ. Нош тросэз адямиос сое уг валало. Сыӵе пӧртэмлык сярысь апостол Павел тазьы вераз: «„Мае син но ӧз адӟы, пель но ӧз кылы, адямилэн сюлмаз-визьмаз но ӧз пырылы, мае Инмар Сое яратӥсьёслы дасяз“. Нош милемлы тае Инмар Аслаз Духеныз усьтӥз» (1 Кор. 2:9, 10). Иеговалэсь эриксэ тодӥськомы ке, со милемлы шумпотон вае.

Малпалэ, мар эшшо кариз на ми понна Иегова. Кылсярысь, милям сьӧлыкъёсмы куштэмын луыны быгато (1 Иоанн 2:12). Со сяна, Инмар милемлы оскиськон сётӥз, ӝоген выль дунне луоз шуыса (Рим. 12:12). Озьы ик, Инмарлы луыса, милям дунневыл вынлыкмы вань (Пс. 132:1). Инмарлэсь Кылзэ лыдӟыса, ми тодӥськомы, Иегова аслэсьтыз калыксэ Шайтанлэсь но периослэсь уте шуыса (Пс. 90:11). Со сярысь малпаськыса, ми адӟомы, кызьы милям шумпотонмы будэ (Флп. 4:4).

КЫЗЬЫ ТРОСГЕС ШУМПОТОН БАСЬТОНО

Шумпотӥсь христиан мурт эшшо но тросгес шумпотон басьтыны быгатэ-а? Иисус вераз: «Тае Мон тӥледлы соин верай: Мынам шумпотонэ тӥ бордын мед улоз, тӥляд шумпотонды пачыласа мед улоз» (Иоанн 15:11). Озьыен, ми быгатомы тросгес шумпотон басьтыны. Эскеромы таӵе примерез. Тылскем бадӟымгес мед ӝуалоз шуыса, отчы пу тыроно. Со выллем ик, шумпотонмы бадӟымгес мед луоз шуыса, святой дух кулэ. Со возьматэ, милям шумпотонмы бадӟымгес луоз, ми ялан Иеговалэсь святой духсэ куримы но солэн Кылыз вылын малпаськимы ке, кудӥз святой духлэн кивалтэмез улсын гожтэмын (Пс. 1:1, 2; Лука 11:13).

Тросгес шумпотон басьтыны луэ, мылысь-кыдысь пыриськыса ужъёсы, кудъёсыз Инмарлы ярало (Пс. 34:27; 111:1). Малы? Ми кылдытэмын Инмарлэсь кышканэн улыны но солэсь курон-косонъёссэ быдэсъяны, малы ке шуоно, кызьы вера Библия, «та бордын адямилэн вань улонэз возиське» (Екк. 12:13). Мукет сямен вераса, ми Инмарлэсь эриксэ быдэсъян понна вордӥськемын. Соин ик Инмарлы ужан-тыршон милемлы туж бадӟым шумпотон ваеb.

ШУМПОТОН УМОЙ ЕМЫШЪЁС ВАЕ

Зэмос шумпотон улонмылэн пӧртэм удысъёсаз умой емышъёс вае. Кылсярысь, инмысь Атаймы шумпотоз, ми солы шумпотыса ужамы-тыршимы ке, нокыӵе шуг-секытъёс шоры учкытэк (К. Зак. 16:15; 1 Фес. 5:16—18). Со сяна, ми тодӥськомы бере, мар милемлы зэмос шумпотон вае, кужыммес ум быдтэ ваньбур люканлы, нош дась луомы Эксэйлык понна малэсь ке куштӥськыны (Матф. 13:44). Адӟыса, кыӵе умой емышъёс со вае, милям эшшо тросгес шумпотонмы луоз, сюлэммы каньыл улоз но ми каромы ваньзэ, мае быгатӥськомы, мукетъёсыз но шумпотон мед басьтозы шуыса (Ап. уж. 20:35; Флп. 1:3—5).

«Туннэ нуналэ тӥ, улондылы шумпотыса, улӥськоды ке, азьланяз тазалыкты юнгес луоз, вылды»,— сыӵе йылпумъян лэсьтӥз Небраска штатлэн университетысьтыз (США) одӥг тодосчи, тазалыкез утёнъя удысын эскеронъёс ортчытъяса. Библиын но со сярысь ик верамын: «Шулдыр сюлэм ӟеч эмъюм кадь» (Мад. 17:22). Зэм, тӥ тросгес шумпотон басьтыны тыршиды ке, тазалыкты умойгес луоз, вылды.

Ми огыр-бугыр дыре улӥськомы. Озьы ке но, святой духлы луыса, кудзэ ми басьтыны быгатӥськомы Инмарлы вӧсяськыса, Библиез дышетыса но со вылын малпаськыса, ми зэмзэ ик шумпотыны быгатӥськомы. Со шумпотон ноку но уз быры. Ми тросгес шумпотон басьтомы, малпаськыса со сярысь, кызьы Иегова милемыз бакель кариз ини, мукет ужась-тыршисьёслэсь оскемзэс адӟем карыса но Инмарлэсь эриксэ быдэсъяны тыршыса. Соку ми адӟыны быгатомы, Псалтирьын 63:11 гожтэм кылъёс зэм луо шуыса: «Шонер улӥсь Кузё-Инмар бордын шумпотоз, Солы оскиськыса улоз».