Лякытлык кылъёсысь но ужъёсысь адӟиське

ЛЯКЫТ кылъёс но ужъёс юнматыны но буйгатыны быгато. Ваньмызлы кельше, куке соос сярысь сюлмасько но соосын лякытэн верасько. Соку сюлэм тау каронэн тырме. Мар юрттоз милемлы лякыт сямо луыны?

Лякыт адями сюлмаське мукетъёсыз сярысь но сюлмаськемзэ кылъёсыныз но ужъёсыныз возьматэ. Зэмзэ ик лякыт адями умой сямъёссэ возьматон понна гинэ озьы уг кары — со яратэ адямиосты, но солэн потэ мукетъёсызлэсь шӧдонъёссэс валамез. Но тужгес но кулэез — лякытлык Инмарлэн святой духезлэн емышез пӧлы пыре, но со сямез вань христианъёслы будэтыны кулэ (Гал. 5:22, 23). Ойдолэ эскеромы, кызьы со сямез возьмато Иегова но солэн Пиез но кызьы ми соослэсь адӟем карыны быгатӥськомы.

ИЕГОВА КОТЬКИНЭН АССЭ ЛЯКЫТ ВОЗЕ

Иегова лякыт сямзэ возьматэ но саклыксэ висъя вань адямиослы, «тау карисьтэмъёслы но, лекъёслы но» (Лука 6:35). Со «шундызэ уродъёс но, ӟечъёс но вылэ ӝужаны косэ, зорзэ шонер улӥсьёслы но, шонер улӥсьтэмъёслы но лэзе» (Матф. 5:45). Соин ик соос но, кинъёс уг оско, ваньмыз Иеговаен кылдытэмын шуыса, солэн ӟеч кузьымъёсызлэсь пайда басьтыны но шумпотыса улыны быгато.

Малпаськомы со сярысь, кыӵе паймымон амалэн Иегова лякытлыксэ возьматӥз Адамлы но Евалы. Сьӧлыкамзы бере ӝоген Адам но Ева «смоквапулэсь куаръёссэ огазе вуризы но соин кус котырзэс шобыртӥзы». Но Иегова вала вал, соослы тупасьгес дӥськут кулэ луоз шуыса, малы ке шуоно со Едем сад сьӧрысь музъемез каргаз, но табере отын бышкись будосъёс но кыйбодыос будо. Соин ик Инмар лякытэн сюлмаськиз Адам но Ева сярысь: со соослы кулэсь кузь дӥськут лэсьтӥз (Ул.-выл. 3:7, 17, 18, 21).

Иегова вань адямиослы, лекъёсызлы но, лякыт сямзэ возьматэ ке но, солы тужгес но кельше лякыт сямзэ возьматыны оскымон ужась-тыршисьёсызлы. Кылсярысь, Захария пророк улон нуналъёсы Инмарлэн кылчинэз ӝоже усиз, иудейёс Иерусалимысь храмез выльысь ӝутэмысь дугдӥзы шуыса. Иегова кылчинлэсь сюлмаськемзэ кылзӥз но солы «ӟеч кылъёс, буйгатӥсь кылъёс» вераз (Зах. 1:12, 13). Со выллем амалэн ик Иегова сюлмаськиз Илия пророк сярысь но. Одӥг пол со сокем ӝоже усемын вал, Иеговалэсь кулон ик курыны кутскиз. Инмар пророкез шӧдӥз-валаз но со доры кылчинэз ыстӥз, со сое мед юнматоз шуыса. Илия малпа вал, Инмарлэн пророкъёсыз пӧлысь со одӥгназ гинэ улэп кылиз шуыса, но Инмар сое оскытӥз, со озьы ӧвӧл шуыса. Лякыт кылъёс но Иеговалэн юрттэмез Илиялы ужан-тыршонзэ азьланьтыны юрттӥзы (3 Экс. 19:1—18). Нош кин Иеговалэн оскымон ужась-тыршисьёсыз пӧлысь Иегова выллем ик лякыт сямзэ возьматӥз?

ИИСУС ТУЖ ЛЯКЫТ АДЯМИ ВАЛ

Музъем вылын улыкуз, Иисус лякыт сямо но адямиосты шӧдӥсь-валась вал. Со ноку но ассэ лек ӧз возьы но мукетъёсыныз кузёяськыса ӧз улы. Иисус адямиосты жаляса вераз: «Ваньды курадӟыса, шугадӟыса улӥсьёс, лыктэлэ Мон доры, Мон тӥледыз буйгато. [...] Мынам зӥбетэ ӟеч» (Матф. 11:28—30). Солэсь лякыт сямзэ адӟыса, адямиос котькытчы со сьӧры ветлӥзы. Жаляменыз Иисус соослы сиён сётылӥз, бурмытъяз соосты но аслаз Атаез сярысь зэмлыклы дышетылӥз (Матф. 14:14; 15:32—38; Марк 6:34).

Иисус адямиослэсь шӧдонъёссэс вала вал но соосын ассэ лякыт возе вал. Со лякытэн юрттэ вал ваньмызлы, кин солы юрттэт курыса вазиське, ачиз жадемын луэ ке но (Лука 9:10, 11). Иисус ӧз куареты кышкам кышномуртэз, кудӥз вирыз виямысь мед дугдоз шуыса солэн дӥськут бордаз йӧтӥськиз, Моисейлэн законэзъя со кышномурт кырсь шуыса лыдъяське вал ке но (Лев. 15:25—28). Иисус гажаз-жаляз со кышномуртэз, малы ке шуоно со 12 ар ӵоже со висёнэн курадӟе вал ини, но шуиз солы: «Нылмурт! Тынад осконэд тонэ утиз. Каньылэн берт, та висёнэныд эн ни висьы» (Марк 5:25—34). Иисус зэмзэ ик лякыт сямо вал!

ЛЯКЫТ СЯМДЭС ВОЗЬМАТЭ

Вылӥынгес верам примеръёсысь ми адӟимы, зэмос лякытлык ужъёсысь адӟиське шуыса. Ӟеч сямо Самария мурт сярысь мадён вераса, Иисус возьматӥз, макем кулэ лякыт сямо луыны. Самария мурт жаляз иудей пиосмуртэз, кудӥзлэсь ваньбурзэ талазы, жугизы но кулоно кадь муртэ сюрес вылэ кельтӥзы. Лякыт луэменыз Самария мурт солы юрттӥз, соослэн калыкъёссы тупаса уг уло вал ке но. Со пиосмуртлэсь яраоссэ зыраса, гылтыса биниз, сое кунокуае вайиз, кунокуа кузёлы коньдон сётӥз, жугем адями сярысь со мед сюлмаськоз шуыса, но шуиз: «Талэсь тросгес коньдон быдтӥд ке, берен вуи ке, тыныд тыро» (Лука 10:29—37).

Лякытлык ӵем дыръя адӟиське ужъёсысь, но сое озьы ик возьматыны луэ малпаса верам юнматӥсь кылъёсын но. Библиын гожтэмын: «Сюлмын улӥсь ӝожлык адямиез зӥбыса возе, нош ӟеч кыл сое шулдыртэ» (Мад. 12:25). Лякытлык но ӟечлыкa милесьтым мылкыдмес ӝуто вераны адямиослы сое, мар соосты лӧпкытоз но юнматоз. Лякыт кылъёс вераса, ми возьматомы, соос сярысь сюлмаськиськомы шуыса, но соослы капчигес луоз нюръяськыны шуг-секытъёсынызы (Мад. 16:24).

КЫЗЬЫ ЛЯКЫТ СЯМО ЛУОНО

Адямиос «Инмарлы укшатыса» кылдытэмын бере, соос но Инмар кадь ик лякыт сямо луыны быгато (Ул.-выл. 1:27). Кылсярысь, Римысь Юлий нимо сю солдатэн кивалтӥсь, кудӥз Павелэз Риме нуиз, соин ассэ лякыт возиз — со Павелэз Сӥдон карын «эшъёсыз доры ветлыны лэзиз, соос мед юрттӥськысалзы солэн кыӵе ке кулэяськонъёсыз вань ке шуыса» (Ап. уж. 27:3). Кӧня ке дыр ортчыса, Павеллэн но соин ӵош мынӥсьёслэн корабльзы Мелит шормуӵлэн ярдураз пазьгиськиз. Соку со шормуӵын улӥсьёс асьсэлэсь лякыт луэмзэс возьматӥзы. Соос тылскизы но, шимучыре сюремъёс шунскыны мед быгатозы шуыса (Ап. уж. 28:1, 2). Соос туж ӟеч уж лэсьтӥзы. Нош зэмзэ ик лякыт сямо луон понна, милемлы куд-ог дыръя гинэ мукетъёсыз понна лякыт луыны тырмыт ӧвӧл.

Милям котьку Инмарез шумпоттэмы потэ, соин ик милемлы котьку лякыт сямо луоно. Иегова ӧте милемыз: «Дӥсяське-шобырске... лякыт сямо» луонлэн дӥськутэныз (Кол. 3:12). Зэм, со туж ик капчи ӧвӧл. Малы? Милемлы люкетыны быгатэ возьдаськон, куддыръя астэ гинэ яратон сяммы потылэ, яке асьмеос асьмелы ум оскиське. Озьы ик, лякыт сямо луыны милемлы мукет адямиос люкетыны быгато. Озьы ке но ми со шуг-секытъёсты вормыны быгатӥськомы, святой духлэн кужымезлы ке оскиськиськомы но Иеговалэсь адӟем кариськомы, кызьы лякыт сямо луоно (1 Кор. 2:12).

Кызьы ми мукетъёсыныз эшшо но лякытгес луыны быгатысалмы? Аслэсьтыд юаны луоз: «Тыршисько-а мон мукетъёссэ кылзыны но соослэсь шӧдонъёссэс валаны? Адӟисько-а мон, мар соослы кулэ? Ку мон берпуметӥзэ лякыт сямо луэмме возьматӥ эше яке ӵыжы-выжые луисьтэм адямилы?» Та юанъёслы валэктонъёс сётыса, аслыд ужпум пуктыны луоз — кылсярысь, умойгес тодыны котырысьтыд адямиосты, тужгес но христиан кенешысь вын-агайёсты но сузэр-апайёсты. Озьы асьмеос валаломы, кыӵе соослэн югдуръёссы но кыӵе кулэяськонъёссы. Собере тыршоно мукетъёсызлы лякыт сяммес возьматыны но малпаськыны, соослэн кадь югдуръёсы сюрысалмы ке, адямиослэсь кыӵе сямо луэмзэс ми возьмасалмы (Матф. 7:12). Нош Иегова милесьтым лякыт сямо луыны тыршеммес бакель кароз, ми солы юрттэт курыса вазиськиськомы ке (Лука 11:13).

ЛЯКЫТ СЯМ АДЯМИОСЛЫ КЕЛЬШЕ

Куке апостол Павел вераз со сярысь, мар юрттӥз солы умой ужась-тыршись луыны, со вераз лякытлык сярысь но (2 Кор. 6:3—6). Адямиос кыстӥсько вал Павел доры, малы ке шуоно соос кыло но адӟо вал солэсь лякыт кылъёссэ но ужъёссэ но шӧдо вал, со соосын зэмзэ ик тунсыкъяське шуыса (Ап. уж. 28:30, 31). Лякыт сямо луыса ми но адямиосты зэмлыкен тунсыкъяськытыны быгатомы. Куке ми асьмеды вань адямиосын лякытэн возиськомы, милемын тушмонъяськись адямиосын но, со соослэсь сюлэмзэс небӟытыны но ми сярысь малпанъёссэс воштыны быгатоз (Рим. 12:20). Нош дыр ортчыса, кин ке но Библиысь иворен тунсыкъяськыны но быгатоз.

Куке музъем вылын рай луоз, туж-туж трос улӟытэм адямиос ас вылазы зэмос лякытлыкез шӧдозы, куд-огез нырысьсэ, вылды. Сюлэмзы тау каронэн тырмыса, соос но мукетъёсыныз асьсэды лякытэн возёзы. Соослэн, кинъёслэн лякыт сямо луэмзы но мукетъёсызлы юрттэмзы уз поты, Инмарлэн кивалтэмез улсын пырак дауръёс ӵоже улыны луонлыксэс ыштозы. Нош соос, кинъёслы Инмар пырак улон кузьмалоз, ог-огзэс яратозы но ог-огенызы асьсэды лякытэн возёзы (Пс. 36:9—11). Соку адямиос зэмзэ ик тупаса улозы, но соослы номыр кышкытлык уз вайы! Нош кыӵе пайда вае лякытлык али ик ини?

ЛЯКЫТЛЫКЛЭН ПАЙДАЕЗ

Библиын верамын: «Гажась-жалясь сюлэмо адями аслаз лулызлы ӟеч уж лэсьтэ, нош чурыт сюлэмо адями лулмугорзэ куашкатэ» (Мад. 11:17). Адямиослы кельшо лякыт сямо муртъёс, но соос асьсэос но лякыт сямо луыны тыршо. Иисус вераз: «Кыӵе мертэтэн мерталоды, сыӵеен ик тӥледлы но мертаськоз» (Лука 6:38). Озьыен, лякыт адямилы капчигес эшъёс шедьтыны но эшъяськонзэс утьыны.

Ефесысь христианъёслы вазиськыса, Павел ӧтиз соосты: «Ог-огеныды лякытэсь, гажась-жалясесь луэ, огдылэсь огды сьӧлыкъёстэс куштэ» (Еф. 4:32). Вын-агайёс но сузэр-апайёс гажась-жалясь, лякыт сямо луыны но ог-огзылы юрттыны тыршизы ке, со кенешлы пайда гинэ ваёз. Сыӵе христианъёслэсь ноку но уд кылы вӧсь карись кылъёссэс, тэргамзэс яке мыскыллямзэс. Соос лек кыл уг вӧлдо, нош ас кылъёсынызы мукет адямиосты юнмато (Мад. 12:18). Солы луыса кенешысь вын-агайёслэн но сузэр-апайёслэн кусыпъёссы юнмало, но соос шумпотыса Иеговалы ужало-тыршо.

Кызьы ми адӟимы, лякытлык кылъёсысь но ужъёсысь адӟиське. Лякыт сямо луыны тыршыса, ми адӟем кариськомы шӧдӥсь-валась но шырыт сямо Иегова Инмармылэсь (Еф. 5:1). Солы луыса милям кенешъёсмы юнэсь луо, озьы ик мукет адямиослэн но мылкыдзы ӝутске Иеговалы ужаны-тыршыны. Ойдолэ котьку но котькытын лякыт сямо луомы!