Оскон милемлы кужым сётэ

ОСКОНЛЭНa туж бадӟым кужымез вань. Кылсярысь, Шайтан Иеговаен кусыпъёсмес сӧрыны тырше ке но, оскон юрттэ милемлы «кескичлэсь ӟырдатыса лэзьям вань ньӧлъёссэ кысыны» (Еф. 6:16). Милям осконмы вань ке, ми быгатомы шуг-секытъёс пыр потыны, кудъёсыз гурезь кадь бадӟым адӟисько. Иисус дышетскисьёсызлы вераз: «Зэм ик тӥледлы верасько: горчица кидыс быдӟа гинэ осконды луиз ке, та гурезьлы „татысь выж отчы“ шуиды ке, со выжоз; тӥледлы номыр но луонтэмез уз луы» (Матф. 17:20). Ми тодӥськомы бере, оскон Иеговаен кусыпъёсмес юнматыны быгатэ шуыса, милемлы малпаськоно таӵе юанъёс вылын: мар со сыӵе оскон? Кызьы герӟаськемын оскон но сюлэм? Кызьы осконэз юнматоно? Кинлы ми оскыны кулэ? (Рим. 4:3).

МАР СО СЫӴЕ ОСКОН

Оскон — со зэмлыкез тодон гинэ ӧвӧл, малы ке шуоно «периос но Инмар вань шуыса оско, куалекъяло» (Иак. 2:19). Соку мар со сыӵе оскон?

Библия верамъя, осконлэн кык люкетэз вань. Нырысетӥез, «оскон — со азьпал возьманмылэн быдэсмонэз» (Евр. 11:1а). Тӥляд осконды вань ке, тӥ юн оскиськоды: Иеговалэн вань верамъёсыз зэм луо, но соос одно ик быдэсмозы. Кылсярысь, Иегова израиль калыклы шуиз: «Нунал но, уй но ас дыраз медаз вуылэ шуыса, Мынэсьтым нунал сярысь сӥзён-косонме, уй сярысь сӥзён-косонме сӧрыны быгатӥськоды ке, соку Давид ляльчиелы сётэм сӥзён-косонэ но куашкатэмын луыны быгатоз» (Иер. 33:20, 21). Кышкады-а тӥ куке но, шунды уз ӝужа но уй бере нунал ноку но уз вуы ини шуыса? Оскиськоды-а тӥ, инкуазен герӟаськем катъёс азьланяз но ужалозы шуыса, озьы ик Музъем ас котыртӥз но Шунды котыртӥ азьланяз но бергалоз шуыса? Соку уката ик осконо ӧвӧл-а, та катъёсты Кылдытӥсь сётэм кылзэ быдэстоз шуыса? Одно ик осконо! (Ис. 55:10, 11; Матф. 5:18).

Кыкетӥез, оскон — со «адскисьтэмезлы юн оскиськон» яке оскытыса веран, кудӥз возьматэ, со, мае ми ум адӟиське, зэм но вань шуыса (Евр. 11:1б). Тае валаны луэ таӵе пример вылын. Шуом, нылпиды тӥлесьтыд юа: «Кытысь тон тодӥськод, ми котырын омыр вань шуыса?» Тӥляд омырез ноку но адӟемды ӧвӧл ке но, тӥ нылпиеныды малпаськыны быгатоды, дыр, со сярысь, мар возьматэ, омыр зэм но вань шуыса. Кылсярысь, ваньмы ми шокаськомы, тӧллэсь пельтэмзэ шӧдӥськомы но мукет. Куке нылпиды та малпанъёсын соглаш кариськоз, со валалоз, адскисьтэмезлы оскыны луэ шуыса. Озьы ик милям осконмы но юн инъет вылэ пыкиське (Рим. 1:20).

КЫӴЕ ЛУЫНЫ КУЛЭ МИЛЯМ СЮЛЭММЫ

Оскон юн инъет вылэ пыкиське бере, осконмы мед луоз шуыса, зэмлыкез умой тодыны кулэ (1 Тим. 2:4). Но со гинэ ӧжыт. Апостол Павел гожтӥз, сюлмын оскыны кулэ шуыса (Рим. 10:10). Адями зэмлыклы оскыны гинэ кулэ ӧвӧл, сое дунъяны но кулэ. Соку гинэ адямилэн мылкыдыз луоз осконзэ возьматыны, яке зэмлыкъя улыны (Иак. 2:20). Со, кинлэн сюлмаз тау каронэз ӧвӧл, валамон оскытыса веранъёсты но палэнтыны быгатэ, малы ке шуоно солэн мукет дышетонъёслы оскемез уг поты но ас тодэмъяз улэмез потэ (2 Пётр 3:3, 4; Иуда 18). Тӥни малы вашкала дыръёсы куд-ог адямиос, паймымон ужъёсты адӟыса но, ӧз оске (Лыд. 14:11; Иоанн 12:37). Инмарлэн святой духез осконэз будэтэ со адямиослэн сюлэмъёсазы гинэ, кудъёсыз зэмзэ ик зэмлыкез ярато но пӧяськонлы уг оско (Гал. 5:22; 2 Фес. 2:10, 11).

КЫЗЬЫ ДАВИДЛЭН ОСКОНЭЗ ЮН ЛУИЗ

Соос пӧлы, кинъёслэн юн осконзы вал, Давид эксэй пыре (Евр. 11:32, 33). Нош солэн семьяяз ваньмызлэн сыӵе осконзы ӧй вал. Кылсярысь, солэн Елиав агаез ӧз оскы, Давидлэн, Голиафлэсь мыскыл каронъёссэ кылыкуз, шонер мылпотонъёсыз вал шуыса. Та учыр возьматӥз, Елиавлэн Иеговалы осконэз уг тырмы вал шуыса (1 Экс. 17:26—28). Нокин но осконэн уг вордӥськы, озьы ик со анай-атайлэсь уг выжы. Озьыен вераны луоз: Давид осконзэ будэтыны быгатӥз, малы ке шуоно солэн Инмарен матысь кусыпъёсыз вал.

26-тӥ Псалтирьын Давид валэктэ, мар юрттӥз солы осконзэ юнматыны (1-тӥ кылбур). Давид малпаськиз, кызьы Иегова сое тушмонъёсызлэсь утьылӥз (2-тӥ но 3-тӥ кылбуръёс). Со Иеговалы йыбыртъян интыез дунъяз (4-тӥ кылбур). Давид Инмарлы йыбыртъяз солэн мукет ужась-тыршисьёсыныз ӵош (6-тӥ кылбур). Со вань сюлмысьтыз Иеговалы вӧсяськиз (7-тӥ но 8-тӥ кылбуръёс). Озьы ик солэн Иеговалэсь дышетскемез потэ вал (11-тӥ кылбур). Давид осконэз сокем кулэен лыдъяз, со гожтӥз но: «Кытын мон луысал, ӧй оскысал ке?» (13-тӥ кылбур, Выль дуннелэн берыктэмез, 2013-тӥ ар, англи).

КЫЗЬЫ ОСКОНЭЗ ЮНМАТОНО

Тӥ но быгатоды, Давид кадь ик, юн оскыны, тӥляд духовной сямъёсты но малпаськон амалды луиз ке, кудъёсыз сярысь вераське 26-тӥ Псалтирьын. Оскон мед луоз шуыса, зэмлыкез умой тодыны кулэ. Соин ик, макем тросгес ми Инмарлэсь Кылзэ но со вылэ пыкиськыса гожтэм публикациосты эскериськомы, сокем капчигес луоз будэтыны та сямез, кудӥз Инмарлэн духезлэн емышез пӧлы пыре (Пс. 1:2, 3). Эскерыкуды малпаськон понна дыр висъялэ. Малпаськонэз ӵошатыны луэ умой музъемен, кудаз тау карон сям будэ. Сюлмамы Иеговалы тау карон мылкыдмы будэмъя, милям мылкыдмы юнма осконмес возьматыны: кенешлэн пумиськонъёсаз солы йыбыртъяны но осконмы сярысь мукетъёсызлы вераны (Евр. 10:23—25). Озьы ик ми возьматӥськомы, милям осконмы вань шуыса, куке «усем мылкыдын улытэк, ялан вӧсяськыса» улӥськомы (Лука 18:1—8). Соин ик Иеговалы «дугдылытэк вӧсяське» но оске, «Со тӥ сярысь сюлмаське» шуыса (1 Фес. 5:17; 1 Пётр 5:7). Оскон мылкыдмес ӝутэ шонер ужъёс лэсьтыны, нош куке ми шонер ужъёс лэсьтӥськомы, милям осконмы юнма (Иак. 2:22).

ИИСУСЛЫ ОСКЕМДЭС ВОЗЬМАТЭ

Кулон азяз ӝытазе Иисус дышетскисьёсызлы вераз: «Инмарлы оскыса, Мыным оскыса улэ» (Иоанн 14:1). Озьыен, ми Иеговалы гинэ оскыны кулэ ӧвӧл, озьы ик Иисуслы но. Кызьы ми солы оскыны быгатӥськомы? Эскеромы куинь амалъёсты.

Нырысетӥез, курбон шоры учке кузьым шоры кадь, кудзэ Инмар тӥледлы кузьмаз. Апостол Павел гожтӥз: «Улӥсько Инмар Пилы осконэн, Кудӥз монэ яратӥз но Ассэ мон понна курбонлы сётӥз» (Гал. 2:20). Куке тӥ Иисуслы оскемдэс возьматӥськоды, тӥ юн оскиськоды: курбон тӥ понна но сётэмын вал, солы луыса сьӧлыкъёсты простить каремын луозы, со тӥледлы пырак улыны оскон сётэ, озьы ик со тужгес но умой оскытон, Инмар тӥледыз яратэ шуыса (Рим. 8:32, 38, 39; Еф. 1:7). Со тӥледлы кужым сётоз асьтэды номырлы ярасьтэм шӧдонэн нюръяськыны (2 Фес. 2:16, 17).

Кыкетӥез, Иеговалы вӧсяськыкуды, эн вунэтэ: милям сыӵе луонлыкмы Христослэн курбонэзлы луыса вань. Солы луыса ми быгатӥськомы Иеговалы кышкатэк вӧсяськыны но «кулэ дыръя... гажан-жалян, дэлет басьтыны» (Евр. 4:15, 16; 10:19—22). Вӧсяськон милесьтым мылкыдмес юнматэ сьӧлыко мылпотонъёсынымы нюръяськыны (Лука 22:40).

Куинетӥез, Иисуслэсь кылзӥське. Апостол Иоанн гожтӥз: «Пилы оскись муртлэн быронтэм улонэз вань, нош Пилы оскисьтэм [Пилэсь кылзӥськисьтэм, ВД] мурт улонэз уз адӟы. Инмарлэн вожпотонэз со вылын улэ» (Иоанн 3:36). Висъялэ саклыктэс: Иоанн осконэз ваче пумит пуктэ кылзӥськытэк улонлы. Соин ик, Иисуслэсь кылзӥськыса, тӥ солы оскемдэс возьматӥськоды. Тӥ Иисуслэсь кылзӥськиськоды, куке быдэсъяськоды «Христослэсь законзэ», яке ваньзэ, малы со дышетӥз но мае карыны куриз (Гал. 6:2). Со сяна, тӥ Иисуслэсь кылзӥськиськоды, куке быдэсъяськоды курон-косонъёсты, кудъёссэ со сётэ милемлы «оскиськымон, визьмо ляльчи» пыр (Матф. 24:45). Иисуслэсь кылзӥськыса, тӥляд кужымды луоз сильтӧл выллем шуг-секытъёс пыр потыны (Лука 6:47, 48).

«АСЬТЭДЫЗ СВЯТОЙЛЭСЬ НО СВЯТОЙ ОСКОНДЫ БОРДЫН ЮНМАТЫСА ВОЗЕ»

Огпол, Иисуслы вазиськыса, одӥг адями вераз: «Оскисько, Кузёе! Юртты, ӧжыт ке мынам осконэ» (Марк 9:24). Та адямилэн кӧня ке осконэз вал, но со, востэм луыса, валаз, солы тросгес оскон кулэ шуыса. Улонамы котькудмылэн луозы сыӵе учыръёс, куке милемлы тросгес оскон кулэ луоз. Но сое али ик ини юнматыны кулэ. Кызьы ми адӟимы, со понна Инмарлэсь Кылзэ эскероно но со вылын малпаськоно. Со юрттоз милемлы эшшо но золгес дунъяны ваньзэ, мар каре ми понна Иегова. Озьы ик осконмы юнгес луэ, куке ми вын-агайёсынымы но сузэр-апайёсынымы ӵош Иеговалы йыбыртъяськомы, выль дуннелы осконмы сярысь мукетъёсызлы вераськомы но ялан вӧсяськиськомы. Инмарлэн Кылаз гожтэмын: «Асьтэдыз святойлэсь но святой осконды бордын юнматыса возе» (Иуда 20, 21). Озьы лэсьтыса, ми тужгес но бадӟым бакель карон басьтӥськомы — Инмарлэн яратоназ улӥськомы.