1—3. Кулон сярысь кыӵе юанъёссы кылдо адямиослэн но кыӵе валэктонъёс сёто пӧртэм религиос?

БИБЛИЫН верамын, сыӵе дыр вуоз шуыса, куке «кулон уз ни луы» (Усьтӥськон 21:4). Кызьы ми тодӥмы 5-тӥ люкетысь, ми понна дун тыремын вал, соин милям пумтэм вапумъёсы улыны луонлыкмы вань. Но али адямиос куло на (Екклесиаст 9:5). Озьыен, юан но кыле: мар луэ адямиен кулэм бераз?

² Та юан тужгес но сюлмаськытэ соосты, кинъёслэн матысь адямизы кулӥз. Соос малпаськыны быгато: «Кытын со али? Адӟе-а со монэ? Быгатэ-а со мыным юрттыны? Куке но мон сое адӟо на-а?»

³ Пӧртэм религиосын та юанъёслы пӧртэм валэктонъёс сёто. Одӥгъёсыз дышето, умой адями кулэм бераз инме тубе, нош урод адями адын курадӟе шуыса. Мукетъёсыз верало, кулэм бераз адями сопал дуннее кошке но отын мукет кулэм ӵыжы-выжыосыныз ӵош улэ шуыса. Нош куинетӥосыз малпало, адями кулэ ке, нырысь сое судъяло, нош собере со выльысь вордӥське но мукет адями яке пудо-живот луэ шуыса.

4. Мар огкадезлы дышето пӧртэм религиос кулон сярысь?

⁴ Кулон сярысь пӧртэм религиос пӧртэм сямен малпало ке но, одӥгезлы соос огкадь дышето: адями кулэм бере солэн кыӵе ке но люкетэз уг кулы, нош кытын ке но улэ на. Озьы-а со?

МАР ЛУЭ АДЯМИЕН КУЛЭМ БЕРАЗ?

5, 6. Мар луэ адямиен кулэм бераз?

⁵ Со сярысь, мар луэ адямиен кулэм бераз, тодэ Иегова. Со вераз милемлы, куке адями кулэ, солэн улонэз дугдэ шуыса. Адями кулэм бере солэн малпанъёсыз но тодэ ваёнъёсыз соин ӵош кулоa. Кулэмез бере адями адӟыны но, кылыны но, малпаськыны но уг быгаты ни.

⁶ Библиын верамын: «Кулэмъёс номыр но уг тодо». Кулэмъёс яратыны но, синазькыль карыны но уг быгато. Кулэм бере «уж но ӧвӧл, малпаськон но, тодон-валан но, визьлык но ӧвӧл». (Лыдӟе Екклесиастэз 9:5, 6, 10.) Псалтирьын 145:4 верамын, адямиен ӵош солэн малпанъёсыз но ышо-быро шуыса.

МАР ВЕРАЗ ИИСУС ХРИСТОС КУЛОН СЯРЫСЬ

7. Мар вераз Иисус Христос кулон сярысь?

⁷ Куке Иисуслэн матысь эшез Лазарь кулӥз, Иисус вераз аслаз дышетскисьёсызлы: «Асьмелэн эшмы Лазарь умме усиз». Иисуслэн дышетскисьёсыз малпазы, со изьыса шутэтскон сярысь вера шуыса. Соин Иисус ватсаз: «Лазарь кулӥз» (Иоанн 11:11—14). Кызьы адӟиське, Иисус кулонэз изёнэн ӵошатӥз. Со ӧз вера, Лазарь инме тубиз яке сопал дуннеын аслаз кулэм ӵыжы-выжыосыныз ӵош улэ шуыса. Озьы ик со ӧз вера, Лазарь адын курадӟе яке выльысь вордскиз но мукет адями яке пудо-живот луиз шуыса. Ӧз, Иисус вераз, кулэмез бере Лазарь умме усем кадь луиз шуыса. Библиын мукет кылбуръёсын но кулон изёнэн ӵошатэмын. Кылсярысь, Иаирлэсь нылзэ улӟытыкуз, Иисус шуиз: «Со кулэмын ӧвӧл, со изе гинэ» (Лука 8:52).

8. Кытысь ми тодӥськомы, Иеговалэн уг поты, адямиос мед кулозы шуыса?

⁸ Кылдытӥз вал-а Инмар Адамез но Еваез озьы, соос куке но мед кулозы шуыса? Ӧз! Иегова соосты кылдытӥз, соос пумтэм вапумъёсы мед улозы но ноку но медаз висе шуыса. Иегова адямиез кылдытӥз озьы, солэн пырак улэмез мед потоз шуыса. Малпалэ ай, анайлэн но атайлэн нылпиоссылэсь пересьмемзэс но кулэмзэс адӟемзы потысал-а? Веранэз ӧвӧл, ӧй потысал. Милям Кылдытӥсьмылэн но уг поты, ми мед куломы шуыса. Соку малы адямиос куло?

МАЛЫ АДЯМИОС КУЛО?

9. Малы Иегова Адамлы но Евалы косон сётӥз но секыт-а вал солэсь кылзӥськыны?

⁹ Адамез но Еваез Едем садэ улыны интыямез бере Иегова Адамлы вераз: «Садысь вань писпуослэсь емышсэс сиыса улод, нош ӟечез но уродэз тодон писпулэсь емышсэ эн сиы, уго со писпулэсь емышсэ сиён нуналад кулонэн кулод» (Улон-вылон 2:9, 16, 17). Та косонэз сётыса, Иегова возьматӥз, со гинэ вераны быгатэ шуыса, мар ӟечез, нош мар уродэз луэ. Со косонлэсь кылзӥськыны секыт ӧй вал. Адямиос кылзӥськысалзы ке, озьы соос возьматысалзы, Иеговалэсь кивалтэтсэ гажало шуыса. Озьы ик, соослэн кылзӥськемзы возьматысал, соос дунъяло шуыса ваньзэ, мае Иегова соослы сётӥз.

10, 11. а) Кызьы Шайтан Адамез но Еваез пӧяз? б) Малы Адамез но Еваез шонере поттыны уг луы?

¹⁰ Жаляса верано луэ, Адам но Ева Иеговалэсь ӧз кылзӥське. Куке Шайтан юаз Евалэсь: «Инмар зэмзэ ик-а вераз: „Райысь нокыӵе но писпулэсь емышсэ эн сие?“»,— Ева шуиз: «Писпуосысь емышъёсты сиыны ми быгатӥськомы, рай шорын будӥсь писпулэсь емышсэ гинэ эн сие, шуиз Инмар, соос борды эн йӧтӥське, медад кулэ» (Улон-вылон 3:1—3).

¹¹ Собере Шайтан вераз: «Уд, уд кулэ; нош Инмар тодэ, кудаз нуналэ емышез оскалтоды, со нуналэ тӥляд синъёсты усьтӥськозы, соку тӥ ӟечез но уродэз тодӥсь инмаръёс кадесь луоды» (Улон-вылон 3:4—6). Шайтанлэн Еваез оскытэмез потэ вал, со ачиз ужпум кутыны быгатэ шуыса, мар уродэз, нош мар ӟечез луэ. Но со пӧяз: со вераз, Ева Инмарлэсь ӧз кылзӥськы ке, уз кулы шуыса. Ева басьтӥз емышез но сииз сое, собере картэзлы но сётӥз, со но сииз. Адам но Ева тодо вал, со писпуысь емышъёсты сиыны уг яра шуыса. Но соос ӧз кылзӥське. Со емышез сиыса, соос возьматӥзы, яратӥсь Атайзэс чик уг гажало шуыса. Озьы соос валаса вылысь ӧз кылзӥське косонлэсь, кудӥз туж валамон вал но кудӥзлэсь кылзӥськыны секыт ӧй вал. Со понна соосты нокызьы но шонере поттыны уг луы!

12. Кыӵе шӧдонъёсыз вал Иеговалэн, куке Адам но Ева солэсь ӧз кылзӥське?

¹² Туж жаль, нырысетӥ адямиос Кылдытӥсьсэс чик ӧз гажалэ шуыса. Кыӵе тӥляд шӧдонъёсты луысалзы, пиды но нылды, кудъёсызлы тӥ сомында лэсьтӥды, кылзӥськемысь дугдысалзы но юри тӥледлы пумит лэсьтысалзы ке? Веранэз ӧвӧл, тӥляд сюлэмды вӧсь луысал.

13. Мае верамез потэ вал Иеговалэн Адамлы «сюе ик берытскод» кылъёсын?

¹³ Кылзӥськымтэенызы Адам но Ева пумтэм вапумъёсы улыны луонлыксэс ыштӥзы. Иегова вераз Адамлы: «Уго тон сюй, сюе ик берытскод». (Лыдӟе Улон-вылонэз 3:19.) Со возьматэ вал, Адам ышоз-быроз, яке кылдытэмлэсь азьвыл кадь ик сюй-тузон луоз, шуыса (Улон-вылон 2:7). Озьыен, сьӧлыкамез бере Адам кулӥз. Со нокытын но ӧз улы ни.

14. Малы адямиос куло?

¹⁴ Адам но Ева Инмарлэсь кылзӥськысалзы ке, соос али ке но улысалзы на. Но соос ӧз кылзӥське. Соос сьӧлыказы но кулӥзы. Сьӧлыкез кышкыт висёнэн ӵошатыны луоз, кудӥз милемлы Адамлэсь но Евалэсь, вашкала атаймылэсь но анаймылэсь, выжиз. Вань адямиос сьӧлыко вордӥсько, соин ик куло (Римъёслы 5:12). Но Инмарлэн сыӵе малпанэз ӧй вал. Инмарлэн ноку но уг поты вал, адямиос мед кулозы шуыса. Библия сьӧлыкез тушмон шуыса нима (1 Коринфъёслы 15:26).

МАЛЫ КУЛОН СЯРЫСЬ ЗЭМЛЫКЕЗ ТОДОНО

15. Малы кулон сярысь зэмлыкез тодыны кулэ?

¹⁵ Кулон сярысь зэмлыкез тодӥськомы ке, ми капчиен валаны быгатомы, кулэмъёс сярысь кыӵе веранъёс шонертэм луо. Библия дышетэ, кулэмъёс номыре но уг шӧдо шуыса, соослы вӧсь но уг луы, соос шум но уг пото, уг но кайгыро. Ми ум быгатӥське соосын вераськыны, нош соос — милемын. Ми соослы юрттыны ум быгатӥське, нош соос милемлы юрттыны уг быгато. Соос милемлы уродзэ но лэсьтыны уг быгато, соин ик соослэсь кышкано но ӧвӧл. Нош тросэз религиос дышето, кулэмъёс кытын ке но уло но соослы юрттыны луэ шуыса, кылсярысь, священниклы коньдон тырыса. Но ми кулон сярысь зэмлыкез тодӥськомы ке, милемыз уз пӧялэ.

16. Мар верало кулэмъёс сярысь пӧртэм религиосын?

¹⁶ Шайтан зэмос луисьтэм религиос пыр адямиосты пӧя но малпаны косэ, кулэмзы бере адямиос кытын ке уло на шуыса. Кылсярысь, куд-ог религиосын дышето, адями кулэм бере солэн лулыз кытын ке но улэ на шуыса. Нош мар верало кулэмъёс сярысь тӥляд черкады: сое ик, мар гожтэмын Библиын, яке мае ке мукетсэ? Эн вунэтэ, адямиосты Иегова дорысь палэнтон понна, Шайтан соосты ӵем пӧя шуыса.

17. Малы адямиос адын ӝуало шуыса дышетон Иеговаез сантэма?

¹⁷ Со, мар верало тросэз религиос кулэмъёс сярысь, туж кышкыт. Кылсярысь, куд-огъёсыз верало, кулэмзы бере урод адямиос пумтэм вапумъёсы адын ӝуало шуыса. Таӵе пӧяськон Иеговаез сантэма. Со ноку но адямиосты озьы ӧй курадӟытысал! (Лыдӟе 1 Иоаннлэсь 4:8.) Мар тӥ малпасалды адями сярысь, кудӥз аслэсьтыз пиналзэ кылзӥськымтэез понна, киоссэ тыл вылын возьыса, кыл кутытэ? «Макем со лек! Мынам со адямиез тодэме но уг поты». Ӵапак сое ик возьма Шайтан! Солэн потэ, ми мед оскомы, Иегова адямиосты пумтэм вапумъёсы курадӟытэ шуыса.

18. Малы кулэмъёслэсь кышкано ӧвӧл?

¹⁸ Мукет религиос дышето, кулэм бераз адями сопал дуннее кошке но отын мукет кулэм ӵыжы-выжыосыныз ӵош улэ шуыса. Соос верало, кулэмъёсты гажано но соослэсь сюлэмзэс небӟытоно шуыса, малы ке шуоно соос милемлы яке эшъёс, яке тушмонъёс луыны быгато. Жаляса верано луэ, таӵе пӧяськонлы тросэз оско но кулэмъёслы Инмарлы кадь йыбыртъяло. Нош кызьы ми тодӥмы ини, кулэмъёс номыре но уг шӧдо, соин ик кулэ ӧвӧл кышканы, ми соосты ӝоже уськытомы шуыса. Иегова — милям Кылдытӥсьмы. Со зэмос Инмар, но ми солы гинэ йыбыртъяны кулэ (Усьтӥськон 4:11).

19. Малы тодоно кулон сярысь зэмлыкез?

¹⁹ Кулон сярысь зэмлыкез тодӥськомы ке, ми ум оске пӧяськонлы, кудзэ вӧлмыто зэмос луисьтэм религиос. Со сяна, ми эшшо но юнгес дунъяны кутскомы Иеговалэсь вуоно улон сярысь кыл сётонъёссэ.

20. Мар сярысь ми тодомы вуоно люкетысь?

²⁰ Трос дауръёс талэсь азьло Инмарлэн Исаия нимо ужась-тыршисез вераз: «Тынад кулэмъёсыд улӟозы, султозы кулэм мугоръёс!» (Исаия 26:19). Нош кулэмъёс выльысь улозы-а? Со, мар вера Библия, тӥледыз паймытыны быгатоз. Та юанлы валэктон тӥ шедьтоды вуоно люкетысь.

1—3. Кыӵе «тюрьмае» ми ваньмы шедемын но кызьы Иегова милемыз мозмытоз?

ПУКТЭ син азяды: тӥледыз судъязы йыруж понна, кудзэ тӥ ӧд лэсьтэ, но пырак азелы тюрьмае пуктӥзы. Тӥ тюрьмаын пукиськоды, но тӥляд нокыӵе осконды ӧвӧл, отысь потоды шуыса. Тӥ валаськоды, номыре воштыны уд быгатӥське шуыса. Но тани, куке тӥляд нокыӵе осконды ӧз кыльы ни кадь, тӥ тодӥськоды, вань шуыса кин ке но, кин тӥледыз мозмытыны быгатэ. Со кылзэ сётэ тӥледыз мозмытыны. Мар тӥ малпасалды?

² Ми ваньмы кулыны судъямын. Мар гинэ ми медам каре, ми ум быгатэ мозмытскыны. Нош Иеговалэн кужымез вань милемыз мозмытыны. Со кылзэ сётэ, кулон быдтэмын луоз шуыса (1 Коринфъёслы 15:26).

³ Малпалэ гинэ, макем ми шумпотомы, куке кулонлэсь кышкано уз луы ни! Иегова кылзэ сётэ милемыз кулонлэсь мозмытыны. Со сяна, со кылзэ сётэ на улӟытыны соосты, кинъёс кулӥзы ини. Инмар вераз, кулэмъёс улӟозы шуыса (Исаия 26:19). Библиын со улӟыса султон шуыса нимаське.

КУКЕ МАТЫСЬ АДЯМИОСМЫ КУЛО

4. а) Мар буйгатыны быгатоз, куке милям матысь адямимы кулэ? б) Кинэн эшъяське вал Иисус?

⁴ Куке матысь эшмы яке ӵыжы-выжымы кулэ, милям сюлэммы чигиське. Милемлы потэ, номыре но тупатыны уг луы ни но нокин юрттыны уг быгаты ни шуыса, малы ке шуоно ми ум быгатӥське матысь адямимес улӟытыны. Нош Библия милемыз буйгатыны быгатэ. (Лыдӟе 2 Коринфъёслы 1:3, 4.) Эскеромы одӥг учырез, кудӥз возьматэ, Иеговалэн но Иисус Христослэн туж потэ, матысь адямиосмы мед улозы шуыса. Музъем вылын улыкуз, Иисус эшъяськиз Лазарен но солэн сузэръёсыныз, Марфаен но Марияен. Библиын верамын: «Иисус яратэ вал Марфаез но, солэсь сузэрзэ но, Лазарез но». Одӥг пол Лазарь секыт висьыны усиз но кулӥз (Иоанн 11:3—5).

5, 6. а) Мар кариз Иисус, Лазарьлэн эшъёсызлэсь но сузэръёсызлэсь куректэмзэс адӟыса? б) Малы милемыз буйгатэ со, кызьы Иисус кулон шоры учке?

⁵ Иисус мынӥз Марфа но Мария доры, соосты буйгатон понна. Марфа, Иисус лыктэ шуыса, кылӥз но солэн пумитаз потӥз. Иисусэз адӟыса, со шумпотӥз, озьы ке но вераз солы: «Тон татын луысалыд ке, мынам братэ ӧй кулысал». Марфа малпаз, Иисус туж ӝегаз шуыса. Собере Иисус Марфалэсь сузэрзэ, Марияез, адӟиз. Со туж бӧрдэ вал. Соослэсь куректэмзэс адӟыса, Иисуслэн сюлэмыз вӧсь луиз но аслаз но синкылиосыз потӥзы (Иоанн 11:21, 33, 35). Солы озьы ик вӧсь вал, кызьы вӧсь милемлы, куке ми матысь адямимес ыштӥськомы.

⁶ Иисус милемыз вала шуыса тодон туж буйгатэ. Иисус Атаез кадь (Иоанн 14:9). Ӝоген Иегова кулонэз быдтоз — солэн кужымез вань сое быдтыны.

«ЛАЗАРЬ! ПОТ ОТЫСЬ»

7, 8. Малы Марфалэн уг поты вал, шайгуэ пырон азьысь изэз мед басьтозы шуыса? Мар кариз Иисус?

⁷ Иисус шайгу доры лыктӥз, кытын Лазарь ватэмын вал. Со пещера вал, со азьын из кыллиз. Иисус куриз: «Басьтэлэ изэз». Нош Марфа пумит луиз, малы ке шуоно Лазарь шайгуын ньыль нунал кылле вал ини (Иоанн 11:39). Со уг тоды вал, кызьы Иисус Лазарьлы юрттыны малпа.

⁸ Куке изэз басьтӥзы, Иисус бадӟым куараен шуиз: «Лазарь! Пот отысь». Собере луиз со, мар сярысь Марфа но Мария малпаны но ӧз быгатэ — «кулэм мурт потӥз». «Китӥз но, пыдтӥз но кулэм мурт ватон шобырен бинямын... вал» (Иоанн 11:43, 44). Лазарь улӟиз — Иисус сое улӟытӥз! Малпалэ гинэ, макем шумпотӥзы солэн эшъёсыз но ӵыжы-выжыосыз, со выльысь соосын огазьын шуыса. Соос выльысь сое ӟыгыртыны но соин вераськыны быгато вал. Со зэмзэ ик паймымон уж вал!

«НЫЛАШ, ТЫНЫД ВЕРАСЬКО, СУЛТЫ»

9, 10. а) Кыӵе кужымен Иисус Христос адямиосты улӟытъяз? б) Малы Библиын улӟытон сярысь учыръёс гожтэмын?

⁹ Кыӵе кужымен Иисус Христос адямиосты улӟытъяз? Лазарез улӟытон азяз Иисус Иеговалы вӧсяськиз но, Иегова солы Лазарез улӟытыны кужым сётӥз. (Лыдӟе Иоаннлэсь 11:41, 42.) Лазарь сяна, вал на мукет адямиос но, кинъёс улӟытэмын вал. Библиын верамын 12 аресъем нылаш сярысь, кудӥз секыт висьыны усиз. Солэн атаез, Иаир, Иисус доры лыктӥз но пыдесъяськыса нылзэ бурмытыны куриз. Со солэн одӥг гинэ пиналыз вал. Иисусэн вераськыкуз, Иаирлы ивортӥзы, нылыз кулӥз ни шуыса. Нош Иисус Иаирлы шуиз: «Эн кышка, оскы гинэ, утемын луоз». Собере соос ӵош Иаир доры мынӥзы. Солэн корка вӧзысьтыз Иисус бӧрдӥсь адямиосты адӟиз. Со соослы шуиз: «Эн бӧрдэ, со кулэмын ӧвӧл, со изе гинэ». Нылашлэн анаез но атаез пумозяз ӧз валалэ, дыр, мае Иисуслэн верамез потэ вал. Иисус ваньзэс коркась потыны косӥз. Собере со нылашлэн анаеныз но атаеныз ӵош пыриз отчы, кытын нылмурт кылле вал. Нылашез китӥз кутыса, Иисус шуиз: «Нылаш, тыныд верасько, султы». Макем шумпотӥзы нылашлэн анаез но атаез, куке нылзы султӥз но ветлыны кутскиз! Озьы Иисус Иаирлэсь нылзэ улӟытӥз (Марк 5:22—24, 35—42; Лука 8:49—56). Со нуналысен, улэп нылзы шоры учкыса, анаез но атаез тодазы ваё вал, мар кариз соос понна Иеговаa.

¹⁰ Зэм, ваньзы, кинэ Иисус улӟытӥз вал, берлогес кулӥзы. Но вера-а со, Иисус соосты юнме улӟытӥз шуыса? Уг. Улӟытон сярысь Библиын верам учыръёс милесьтым осконмес юнмато, Иеговалэн потэ адямиосты улӟытэмез но со соосты одно ик улӟытоз шуыса.

ИЕГОВАЛЭН КУЛЭМЪЁСТЫ УЛӞЫТЭМЕЗ ПОТЭ

11. Мар верамын Екклесиастын 9:5 кулэмъёс сярысь но кызьы со юрттэ валаны, мар вал Лазарен кулэм бераз?

¹¹ Библиын верамын, «кулэмъёс номыр но уг тодо» шуыса. Озьы ик вераны луоз Лазарь сярысь но (Екклесиаст 9:5). Иисус вераз, кулэм бераз Лазарь умме усем кадь вал шуыса (Иоанн 11:11). Шайгуын кылльыкуз, Лазарь «номыр но уг тоды» вал.

12. Кытысь ми тодӥськомы, Лазарь зэмзэ ик улӟытэмын вал шуыса?

¹² Лазарьлэсь улӟыса султэмзэ трос адямиос адӟизы. Иисуслэн тушмонъёсыз но валало вал, со паймымон уж вал шуыса. Лазарь улэп вал. Со возьматэ, улӟытон зэмзэ ик вал шуыса (Иоанн 11:47). Лазарь доры трос адямиос ветлӥзы, кудъёсыз, сое улэпен адӟыса, оскыны кутско вал, Иисус Инмарен ыстэмын шуыса. Со туж уг кельшы вал Иисуслэн тушмонъёсызлы, соин ик соос Иисусэз но, Лазарез но виыны вераськизы (Иоанн 11:53; 12:9—11).

13. Малы оскыны быгатӥськомы, Иегова кулэмъёсты улӟытоз шуыса?

¹³ Иисус вераз, «ваньмыз шайгуосын кыллисьёс» улӟытэмын луозы шуыса (Иоанн 5:28). Озьыен, ваньзы, кинэ Иегова тодаз возе, выльысь улозы. Но кинэ ке улӟытон понна, Иегова со адями сярысь ваньзэ тодаз возьыны кулэ. Нош быгатэ-а со ваньзэ тодаз возьыны? Ойдолэ малпаськомы. Быдэс Дуннеын трос миллиард кизилиос. Библиын верамын, Иегова котькуд кизилиез нимызъя тодэ шуыса. (Лыдӟе Исаиялэсь 40:26.) Солы котькуд кизилилэсь нимзэ тодаз возьыны секыт ӧвӧл бере, солы секыт ӧвӧл тодаз возьыны ваньзэ соос сярысь, кинъёсты со улӟытыны малпа. Со сяна, Иегова — Кылдытӥсь. Соин ик ми оскыны быгатӥськомы, солэн адямиосты улӟытыны кужымез вань шуыса.

14, 15. Мае ми тодӥськомы улӟытон сярысь Иовлэн кылъёсысьтыз?

¹⁴ Иов нимо Инмарлы оскымон адями оске вал, улӟытон луоз шуыса. Одӥг пол со юаз: «Адями кулэм бераз нош ик улоз на-а?» Собере со, Иеговалы вазиськыса, шуиз: «Тон вазиськы вал но, мон Тыныд ответ сётысал». Зэм, Иов тодэ вал, Иегова туж возьма шуыса со дырез, ку со кулэмъёсты улӟытоз (Иов 14:13—15).

¹⁵ Кыӵе шӧдонъёсты тӥляд кылдо, куке тӥ улӟытон сярысь малпаськоды? Тӥляд матысь адямиды кулӥз ке, тӥляд юанды кылдэ, дыр: со улӟытэмын луоз-а? Иеговалэн туж потэ, кулэмъёс выльысь мед улозы шуыса. Со милемыз туж буйгатэ. Нош табере ойдолэ тодомы, мар верамын Библиын со сярысь, кинъёс улӟытэмын луозы но кытын соос улозы.

СООС «КУАРАЗЭ КЫЛОЗЫ; СОКУ... УЛӞОЗЫ»

16. Кыӵе улонзы луоз соослэн, кинъёс музъем вылын улыны улӟозы?

¹⁶ Ортчем дауръёсы улӟытэм адямиос выльысь улыны но семьяенызы но эшъёсынызы валче улонлы шумпотыны быгато вал. Озьы ик луоз вуонояз но. Но со улӟытон умойгес луоз. Малы? Малы ке шуоно соос, кинъёс вуонояз музъем вылын улыны улӟытэмын луозы, ноку кулытэк улыны быгатозы. Соосты чылкак мукет улон возьма — ожъёстэк, йыружъёстэк но висёнъёстэк.

17. Кин улӟытэмын луоз?

¹⁷ Кин улӟытэмын луоз? Иисус вераз: «Ваньмыз шайгуосын кыллисьёс Инмар Пилэсь куаразэ кылозы; соку... улӟозы» (Иоанн 5:28, 29). Усьтӥськонын 20:13 озьы ик гожтэмын: «Зарезь ас пушказ кулыса кыллисьёсты сётӥз; кулон но, ад но асьсэ дорын кулыса кыллисьёсты сётӥзы». Озьыен, трос миллиард адямиос улӟыса султозы. Апостол Павел вераз, Инмар «шонер улэмъёсты но, шонер улымтэосты но» улӟытоз шуыса (Лыдӟе Апостолъёслэсь ужъёссэс 24:15.) Кинъёс сярысь вераськон мынэ?

18. Кинъёс со «шонер улэмъёс»?

¹⁸ «Шонер улэмъёс» пӧлы пыртыны луэ Иеговалэсь оскымон ужась-тыршисьёссэ, кудъёсыз Иисус Христослэн музъем вылэ лыктэмезлэсь азьло улӥзы. Кылсярысь, со Ной, Авраам, Сарра, Моисей, Руфь но Есфирь. Мукет оскымон ужась-тыршисьёс сярысь тодыны луоз Еврейёслы гожтэтысь, 11-тӥ люкетысь. Улӟемзы бере ваньзы соос музъем вылын улозы. Нош луоз-а «шонер улэмъёс» пӧлы пыртыны Иеговалэсь оскымон ужась-тыршисьёссэ, кудъёсыз асьме нуналъёсы куло? Луоз. Озьыен, соос но улӟытэмын луозы.

19. Кинъёс со «шонер улымтэос»? Кыӵе луонлыксы соослэн кылдоз, куке соос улӟытэмын луозы?

¹⁹ «Шонер улымтэос» — со трос миллиард адямиос, кудъёсызлэн луонлыксы ӧй вал Иегова сярысь тодыны. Соос кулӥзы ке но, Иегова соосты ӧз вунэты. Со улӟытоз соосты. Соку соослэн луонлыксы кылдоз Иегова сярысь тодыны но солы ужаны-тыршыны.

20. Малы куд-ог адямиос улӟытэмын уз луэ?

²⁰ Ваньмыз-а кулэмъёс улӟытэмын луозы? Уз. Иисус вераз, вань адямиос улӟытэмын уз луэ шуыса (Лука 12:5). Кин ужпум кутэ, кинэ улӟытоно, нош кинэ ӧвӧл? Иегова — Вылӥ Судья. Соин ик со ужпум кутэ, кинэ улӟытоно, нош кинэ ӧвӧл. Озьы ик со Иисуслы но право сётӥз «улэпъёслэн но кулэмъёслэн» судьязы луыны (Апостолъёслэн ужъёссы 10:42). Иегова адӟиз ке, адямилэн воштӥськемез но сьӧлыко ужъёслэсь куштӥськемез уг поты шуыса, со сое уз улӟыты. (Учке 19-тӥ ватсам валэктонэз.)

ИНМЫН УЛОН ПОННА УЛӞЫТОН

21, 22. а) Кыӵе мугорзы луоз соослэн, кинъёс инмын улыны улӟозы? б) Кин вал нырысетӥез, кин инмын улон понна улӟытэмын вал?

²¹ Библиын озьы ик гожтэмын, куд-ог адямиос инмын улон понна улӟытэмын луозы шуыса. Соослэн мугорзы пӧртэм луоз соослэсь, кинъёс музъем вылын улыны улӟытэмын луозы. Соослэн мугоръёссы духовной луозы.

²² Иисус — нырысетӥез, кин инмын улыны улӟытэмын вал (Иоанн 3:13). Иегова Иисусэз кулэмез бере куинетӥ нуналаз улӟытӥз (Псалтирь 15:10; Апостолъёслэн ужъёссы 13:34, 35). Иисус адямилэн кадь мугорын улӟытэмын ӧй вал. Апостол Пётр валэктӥз, Иисус «мугорыныз виемын, нош духеныз улӟытэмын вал» шуыса (1 Пётр 3:18). Иисус духовной мугорын улӟытэмын вал, но солы бадӟым кужым сётэмын вал (1 Коринфъёслы 15:3—6). Нош Библия вера, со гинэ инмын улон понна улӟытэмын уз луы шуыса, со сяна, мукетъёсыз но улӟозы на.

23, 24. Кин пыре «пичи уллё» пӧлы, кудӥз сярысь вераз Иисус? Кӧня соослэн лыдӟы?

²³ Кулон азяз Иисус аслаз оскымон дышетскисьёсызлы вераз: «Мон тӥледлы инты дасяны мынӥсько» (Иоанн 14:2). Озьыен, дышетскисьёсыз пӧлысь куд-огъёсыз соин ӵош инмын улыны улӟытэмын луозы. Кӧня соослэн лыдзы луоз? Иисус вераз, соос трос уз луэ шуыса. Со соосты «пичи уллё» шуыса нимаз (Лука 12:32). Апостол Иоанн вераз, кӧня соос луозы. Со адӟон адӟиз, кытын вал Иисус но «соин ӵош сю ньыльдон ньыль сюрс мурт» (Усьтӥськон 14:1).

²⁴ Ку сю ньыльдон ньыль сюрс мурт улӟытэмын луоз? Библия вера, соос Иисус инмын кивалтыны кутскем бере улӟытэмын луозы шуыса (1 Коринфъёслы 15:23). Христос кивалтыны кутскиз ини, но тросэз 144 000 оскымон христианъёс пӧлысь инмын улон понна улӟытэмын ини. Кылемъёсыз — кудъёсыз музъем вылын уло на — кулэмзы бере соку ик инме тубо. Озьыен, улӟемъёс пӧлысь тросэз адямиос музъем вылын улозы ке но, куд-ог адямиос инмын улозы.

25. Мае ми тодомы вуоно люкетысь?

²⁵ Ӝоген Иегова адямиосты кулонлэсь мозмытоз; кулон пыраклы быдтэмын луоз! (Лыдӟе Исаиялэсь 25:8.) Нош мар карозы соос, кинъёс инме тубозы? Библиын верамын, соос Иисус Христосэн ӵош Инмарлэн Эксэйлыказ кивалтозы шуыса. Со кивалтэт сярысь ми тросгес тодомы вуоно люкетысь.