Кызьы утиськоно адямиослэн визьзы понна нюръяськонын

Апостол Павел вала вал, макем кышкытэсь Шайтанлэн пӧяса веранъёсыз. Нош нырысетӥ даурысь христианъёс ваньзы сое уг валало вал. Кылсярысь, Коринф карысь христианъёс асьсэ вылэ оскиськыны кутскизы, луоз: соос, зэмлыкын юн сыло но ноку уз усе шуыса, малпало вал (1 Кор. 10:12). Со пумысен сюлмаськеменыз сэрен, Павел гожтӥз: «Кышкасько, кызьы кескич амалэн кый Еваез ӧрекчаз, озьы ик тӥляд но визьёсты медаз тугаське вал, Христослы дун-чылкыт оскон бордысь медад палэнске вал» (2 Кор. 11:3).

Павеллэн кылъёсыз возьмато, милемлы ас выламы ортчыт трос оскиськыны уг яра шуыса. Адямиослэн визьзы понна нюръяськонын утиськон понна, валаны кулэ, макем кышкыт луо пӧяса веранъёс, но астэ утьыны быгатоно.

МАКЕМ КЫШКЫТ ЛУО ПӦЯСА ВЕРАНЪЁС?

Ӵем дыръя пӧяса веранъёсты уже куто, адямиосты пӧян яке соослэсь малпанъёссэс но ужъёссэс чакласа возён понна. «Пропаганда но оскытон» книгаын верамъя, пӧяса веранъёс «кырсь, кышкыт но шонертэм» луо. Мар со сыӵе пӧяса веранъёс шуыса валэктон понна, адямиос таӵе кылъёсты быръё: «ӧрекчан, киултыса возён но малпанъёсты чакласа возён» (Propaganda and Persuasion).

Маин кышкыт луо пӧяса веранъёс? Соос кышкыт газ кадь луо, кудзэ адями адӟытэк но шӧдытэк кыле. Пӧяса веранъёс визьме пумен пыӵало. Тодосчи Вэнс Паккард, кудӥз адямиослэсь асьсэды воземзэс эскере, гожтӥз: «Тросэныз асьмеос пӧлысь кивалто озьы, кызьы асьсэлы кулэ. Но сыӵе учыръёс туж ӵем пумисько». Одӥг тодосчи верамъя, пӧяса веранъёслы сётӥськыса, адямиос «капчиен кышкыт ужъёс лэсьтылӥзы, кудъёсыз йыре ик уг тэро» — быдэс калыкез быдтонэ, ожъёсы пыриськизы но адямиосты, мукет калыкысь яке религиысь луэмзы понна, уйылӥзы-уллязы (Easily Led—A History of Propaganda).

Огшоры адямиос гинэ но милемыз асьсэ сямен малпаськытыны быгато бере, соку мар веранэз Шайтан сярысь? Адямиосты кылдытэм дырысен ик ини со эскере, кызьы соос асьсэды возё. Али «та дунне» Шайтанлэн киулаз возиське. Со, аслэсьтыз пӧяса веранъёссэ вӧлмытон понна, та дуннеысь котьмае но уже кутыны быгатэ (1 Иоанн 5:19; Иоанн 8:44). Со туж быгатыса адямиослэсь «визьзэс пеймытэн ӵоксаз», соин ик али «быдэс дуннелэсь визьзэ» тугаса возе (2 Кор. 4:4; Усьт. 12:9). Мар кароно, солэн пӧяса веранъёсызлы медам сётӥське шуыса?

ОСКОНДЭС ЮНМАТЭ

Библиын огшоры возет гожтэмын, кудӥз юрттэ, ми пӧяса веранъёслы медам сётӥське шуыса. Иисус вераз: «Зэмлыкез тододы, нош зэмлык тӥледыз эрико кароз» (Иоанн 8:31, 32). Передовойын котькуд ожгарчилы тодыны кулэ, кытысь зэмос но оскымон информациез шедьтоно, тушмон сое пӧяны медаз быгаты шуыса. Нош кытысь милемлы сыӵе информациез шедьтоно? Иегова возьматэ, со Библиын гожтэмын шуыса. Отысь ми шедьтыны быгатомы ваньзэ, мар кулэ, Шайтанлэн пӧяса веранъёсызлы пумит сылон понна (2 Тим. 3:16, 17).

Шайтан туж умой тодэ сое. Соин ик, ми Библиез медам лыдӟе но сое медам дышетэ шуыса, со уже кутэ солэн киулаз возиськись дуннеез. Эн сюре солэн кескич сьӧлтэтаз! (Еф. 6:11). Зэмлыкез быдэсак валаны быгатӥсесь луэ (Еф. 3:18). Со понна тӥледлы туж тыршоно луоз. Но тани мар вера тодосчи Ноам Хомский: «Зэмлыкез тӥледлы йырады нокин уз поны. Тӥледлы асьтэлы сое шедьтоно». Соин ик утчалэ сое, «нуналлы быдэ Священной Гожтэмъёсты эскерыса» (Ап. уж. 17:11).

Тодады возе: Шайтанлэн уг поты, тӥ малпаськыны но шонер малпанэ вуыны мед быгатоды шуыса. Малы? Кызьы гожтэмын вал одӥг книгаын, «пӧяса веранъёс тужгес но азинлыко луо, вылды, куке адямиослы... асьсэлы малпаськыны уг сёто» (Media and Society in the Twentieth Century). Соин ик эскерытэк эн оске солы, мар тӥледлы верало (Мад. 14:15). Инмарен сётэм малпаськыны быгатонлыкъёстэс уже кутэ но визьдэс ужатэ, оскондэс юнматыса, асьтэос адӟыны мед быгатоды, мар зэмлык, нош мар ӧвӧл (Мад. 2:10—15; Рим. 12:1, 2).

КЕСКИЧ АМАЛ — «НИМАЗ КАР НО КИВАЛТЫ»

Куддыръя тушмонъёс пӧяса веранъёсты уже куто, соослы пумит ожмаськисьёслэсь мылкыдзэс быдтон понна. Озьы соос тыршо, ожгарчиос ог-огенызы ожмаськыны мед кутскозы яке эшъёссылэсь мед люкиськозы шуыса. Германиысь одӥг генераллэн верамезъя, одӥгез муг, малы Германия Нырысетӥ дунневыл ожын вормемын вал,— со тушмонъёслэн пӧяса веранъёссы, кудъёсыныз сэрен адямиос гипноз улэ сюрем кадь луизы. Шайтан но уже кутэ сыӵе кескич амалэз — «нимаз кар но кивалты». Солэн потэ, христианъёс мед малпалозы, кенешын соосты кин ке но ӝоже уськытӥз яке соослы пумит шонертэм уж лэсьтӥз шуыса. Озьы со тырше христианъёс пӧлысь тупаса улонэз быдтыны яке соосты Иеговалэн организациезлэсь палэнскыны косыны.

Асьтэды пӧяны эн лэзе! Инмарлэн Кылысьтыз визь-кенешъёслэсь кылзӥське но вын-агайёсын но сузэр-апайёсын тупаса улыны тырше. Библия ӧте милемыз ог-огмес сюлмысь простить карылыны но кусыпъёсмес ӝоггес тупатыны (Кол. 3:13, 14; Матф. 5:23, 24). Отын верамын, милемлы кенешлэсь палэнтӥськыны уг яра шуыса (Мад. 18:1). Эскере, дась-а тӥ утиськыны Шайтанлэн пӧяса веранъёсызлэсь. Юалэ асьтэлэсь: «Кызьы мон асме вози берпуметӥяз учырын, куке кенешысь кин ке но монэ ӝоже уськытӥз? Мон Инмар палан яке Шайтан палан луэмме возьматӥ?» (Гал. 5:16—26; Еф. 2:2, 3).

ЭН ЛЭЗЕ ШАЙТАНЛЫ ИНМАРЛЭН ОРГАНИЗАЦИЕЗЛЫ ОСКОНДЭС БЫДТЫНЫ

Ожгарчи, кудӥз командирезлы уг оскы, умой уз ожмаськы. Соин ик пӧяса верасьёслэн ужпумзы — ожгарчиослэсь командиръёссылы осконзэс быдтыны. Соос вераны быгато: «Тӥляд командиръёстылы оскыны уг луы!» яке «Соос тӥледыз кулонэ нуо!» Верам кылъёссылы оскытон понна, соос вераны быгато командиръёссылэн азьло лэсьтэм янгышъёссы сярысь. Шайтан но озьы ик лэсьтэ. Со ялан тырше милесьтым осконмес быдтыны соослы, кинъёслы Иегова аслаз калыкеныз кивалтыны оскиз.

Кызьы утёно астэ? Юн возиське Иеговалэн организациез бордын но огкылысь тырше вын-агайёсын, кудъёссэ Иегова кивалтыны пуктӥз, соослэсь тырмымтэоссэс адӟиськоды ке но (1 Фес. 5:12, 13). Зэмос йыбырттонлэсь палэнскемъёс но мукет кескич адямиос тыршозы тӥлесьтыд со вын-агайёслы оскондэс лябӟытыны. Соослэн кылъёссы оскымонэсь кадь потозы, но «куалектыса визьдэс эн ыштэ» (2 Фес. 2:2; Тит. 1:10). Кылзӥське визь-кенешлэсь, кудзэ апостол Павел Тимофейлы сётӥз: «Уть сое... малы тон дышетэмын. Тон тодӥськод уго аслэсьтыд дышетӥсьтэ» (2 Тим. 3:14, 15). Милям трос мугъёсмы вань оскыны оскиськымон ляльчилы, кудзэ Иегова сю ар пала ини уже кутэ, милемлы зэмлыклэн сюрестӥз мыныны юрттон понна (Матф. 24:45—47; Евр. 13:7, 17).

ЭН СЁТЭ АСЬТЭДЫ КЫШКАТЫНЫ

Тодамы возёно, Шайтан котьку лушкемен уг пӧя шуыса. Куддыръя со кышкатэ. Кышкатон — со «одӥгез вашкала амал, кызьы пӧяса веранэз вӧлмыто» (Easily Led—A History of Propaganda). Кылсярысь, Британиысь Филип Тейлор нимо профессорлэн верамезъя, ассир ожгарчиос, тушмонъёссэс вормон понна, соосты кышкатъязы но пӧяллязы. Тӥледыз зӥбон но Иеговалы ужамысь-тыршемысь дугдытон понна, Шайтан тыршоз, тӥ адямиослэсь, уйылон-уллянъёслэсь но кулонлэсь мед кышкалоды шуыса (Ис. 8:12; Иер. 42:11; Евр. 2:15).

Эн лэзе Шайтанлы тӥледыз кышкатыны, малы ке шуоно солэн потэ, тӥляд мылкыдды мед быроз но тӥ Иеговалы оскымон медад луэ ни шуыса. Иисус вераз: «Эн кышкалэ мугорез виисьёслэсь, нош бӧрысь номыр но мукетсэ лэсьтыны быгатымтэослэсь» (Лука 12:4). Оске, Иегова аслэсьтыз сётэм кылзэ быдэстоз шуыса: со тӥ сьӧры учкоз, тӥледлы «мертантэм бадӟым кужым» сётоз но юрттоз, тӥ кышканлы медад сётске шуыса (2 Кор. 4:7—9; 1 Пётр 3:14).

Улонын куддыръя сыӵе югдуръёс кылдо, кудъёсыныз сэрен мылкыд куашка но сюлме кышкан каръяське. Но котьку тодады возе, мар Иегова вераз Иисус Навинлы: «Тани Мон тыныд косон сётӥсько: юн сыл, кышкасьтэм лу, эн курда, эн куалекъя; уго кытчы гинэ тон уд мыны, котьку но тонэн огазьын луоз Инмаред Кузё-Инмар» (Иис. Н. 1:9). Тӥледыз мар ке туж сюлмаськытэ ке, соку ик Иеговалы вӧсяське. Оске, «Инмарлэн каньыллыкез... тӥлесьтыд сюлэмдэс но, малпанъёстэс но... утьыса возёз» шуыса но тӥляд кужымды луоз шуыса Шайтанлэн пӧяса веранъёсызлы пумитъяськыны (Флп. 4:6, 7, 13).

Тодӥськоды на-а, кызьы Ассирия эксэен ыстэм Рабсак пӧяса веранъёсын Инмарлэсь калыксэ кышкатыны выриз? Аслаз кылъёсыныз солэн верамез потэ вал: «Номыр но тӥледыз ассир ожгарчиослэсь уз утьы. Иегова Инмарды но тӥледлы юрттыны уз быгаты». Со ватсаз на: «Кузё-Инмар мыным шуиз: „Со музъем вылэ мыныса куашкаты сое“». Солы пумит Иегова вераз: «Ассирия эксэйлэн медоосызлэсь Монэ сантэм кылъёссылэсь, кудъёссэ тон кылӥд, эн кышка» (4 Экс. 18:22—25; 19:6). Собере со кылчинэз ыстӥз, кудӥз одӥг уй куспын 185 000 ассир ожгарчиосты быдтӥз (4 Экс. 19:35).

ВИЗЬМО ЛУЭ НО КОТЬКУ ИЕГОВАЛЭСЬ КЫЛЗӤСЬКЕ

Тӥ учкиды, луоз, сыӵе киноез, кудаз валтӥсь героез пӧязы но кивалтӥзы соин озьы, кызьы асьсэлы кулэ вал. Сое учкыса, тӥ валаськоды вал, сое пӧяло шуыса, но тӥляд кеськемды ик потэ вал: «Эн оскы солы! Соос тонэ пӧяло!» Нош табере пуктэ син азяды, кызьы кылчинъёс но тӥледлы кеськыса верало: «Эн сёт Шайтанлы астэ пӧяны!»

Эн кылзэ Шайтанлэсь пӧяса верам кылъёссэ (Мад. 26:24, 25). Санэ понэ сое, мае вера Иегова, но вань ужъёсады оскиське солы (Мад. 3:5—7). Сюлмады пыртэ солэсь яратыса верам кылъёссэ: «Пие, визьлыко лу, сюлэмме шумпотты» (Мад. 27:11). Соку тӥ Шайтанлы визь понна нюръяськонын вормыны уд сётэ.