Ми быгатӥськомы пырак улыны

1. Мае ми шӧдӥськомы, Иеговалэн кузьымез сярысь малпаськыса?

ИЕГОВА кылзӥськись адямиослы пырак улон кузьманы малпа (Рим. 6:23). Куке ми малпаськиськомы та кузьым сярысь, Инмарез яратонмы эшшо но юнма. Малпалэ гинэ: инмысь Атаймы милемыз сокем яратэ, солэн потэ, ми соин огазьын пырак дауръёс ӵоже мед луомы шуыса.

2. Кызьы милемлы юрттэ Инмарлэн кылсётонэз, со милемлы пырак улон кузьмалоз шуыса?

² Инмарлэн кылсётонэз, со милемлы пырак улон кузьмалоз шуыса, юрттэ милемлы шуг-секытъёс пыр потыны. Тушмонъёсмы милемыз кулонэн кышкато ке но, ми ум сётскиське. Мар юрттэ милемлы кышкасьтэмесь луыны? Иеговалы оскымон луыса, ми кулӥмы ке но, со милемыз улӟытоз но пырак улон кузьмалоз (Иоанн 5:28, 29; 1 Кор. 15:55—58; Евр. 2:15). Кытысь ми тодӥськомы, пырак улыны луэ шуыса? Ойдолэ эскеромы куд-ог малпанъёсты.

ИЕГОВА ПУМТЭМ ВАПУМЪЁС УЛЭ

3. Кытысь ми тодӥськомы, Иегова милемлы пырак улон сётыны быгатэ шуыса? (Псалтирь 101:13, 25, 28).

³ Иегова быгатэ милемлы пырак улон сётыны, малы ке шуоно со улонлэн Ошмесэз, озьы ик со ачиз но пумтэм вапумъёс улэ (Пс. 35:10). Тани Библиысь куд-ог кылбуръёс, кудъёсыз возьмато, Иегова котьку вал но котьку луоз шуыса. Псалтирьын 89:3 вераське, Иегова «даурысь дауре» улэ шуыса. Таӵе ик малпан вань 101-тӥ Псаломын но. (Лыдӟе Псалтирез 101:13, 25, 28.) Нош тани мар гожтӥз Аввакум пророк инмысь Атаймы сярысь: «Иегова, тон пумтэм вапумъёс улӥськод. Мынам Святой Инмаре, тон уд кулӥськы» (Авв. 1:12).

4. Кулэ-а сюлмаськыны, милемлы секыт ке валаны, Иегова котьку вал но котьку луоз шуыса? Валэктэ.

⁴ Секыт-а тӥледлы валаны, Иегова котьку вал шуыса? (Ис. 40:28). Секыт ке, тӥ огнады ӧвӧл. Тани мар вераз Елиуй Инмар сярысь: «Солэсь улоно аръёссэ лыдъяны-тодыны уг луы» (Иов 36:26). Тӥ соглаш луоды, дыр: ми мае ке ум ке валаське, уг луы вераны, со шонертэм шуыса. Кылсярысь, милемлы секыт валаны, мар со тӧл. Но луэ-а вераны, тӧл ӧвӧл шуыса? Уг луы. Ӵапак озьы ик ми пумозяз ноку ум валалэ, дыр, Иегова котьку вал но котьку луоз шуыса. Но та уг возьматы, со шонертэм шуыса. Валаськомы-а ми тае, ум-а, Кылдытӥсь сярысь зэмлык уг воштӥськы (Рим. 11:33—36). Планетаосты, шундыез но кизилиосты кылдытэмлэсь азьло Инмар вал ини. Иегова оскытэ милемыз, со ваньзэ «аслаз кужыменыз кылдытӥз» шуыса. Озьыен, ваньмыз кылдэмлэсь азьло Инмар вал ини (Иер. 51:15; Ап. уж. 17:24). Мар эшшо возьматэ на, ми пырак улыны быгатӥськомы шуыса?

МИ ПЫРАК УЛЫНЫ КЫЛДЫТЭМЫН ВАЛ

5. Маин пӧртэм вал Адамен Ева но музъем вылысь мукет улэп макеос?

⁵ Музъем вылысь вань улэп макеос, кудъёссэ Иегова кылдытӥз, куке но куло. Адямиос гинэ пырак улыны быгато. Но Иегова Адамлы азьло ик вераз: «Ӟечез но уродэз тодон писпулэсь емышсэ эн сиы, уго со писпулэсь емышсэ сиён нуналад кулонэн кулод» (Ул.-выл. 2:17). Адам но Ева Иеговалэсь кылзӥськысалзы ке, соос ноку ӧз кулысалзы. Озьыен, валаны луэ: дыр ортчыса, Иегова Адамлы но Евалы улон писпулэсь емышсэ сиыны лэзьысал. Та соослы валаны юрттысал, соос пумтэм вапумъёс улозы шуыса (Ул.-выл. 3:22)b.

6, 7. а) Мар эшшо возьматэ на, адямиос кулоно ӧй вал шуыса? б) Учке суредэз. Мар тӥляд каремды потэ выль дуннеын?

⁶ Куд-ог эскеронъёсъя милям йырвиыммы возьыны быгатэ сокем трос информация, кудзэ ми вань улытозямы но люканы ум быгатэ. 2010-тӥ арын одӥг журналын вераськиз, милям йырвиымамы тэрытыны луэ ваньзэ, мае ми тодысалмы, куинь миллион час (яке 300 ар) ӵоже телевизорез учкыса. Куд-огъёсыз лыдъяло, милям йырвиыммы талэсь но тросгес тэрытыны быгатэ шуыса. Со, кызьы йырвиыммы кылдытэмын, возьматэ, ми 70—80 ар гинэ улыны кылдытэмын ӧй вал шуыса (Пс. 89:10).

⁷ Милям улыны юн мылкыдмы вань. Озьы милемыз Иегова кылдытӥз. Библия вера, Инмар адямиослэн сюлмазы пумтэм вапумъёс улыны мылкыд понӥз шуыса (Екк. 3:11, ВД). Та одӥгез муг, малы ми кулонэз тушмонэнымы лыдъяськомы (1 Кор. 15:26). Ми секыт висьыны усимы ке, ми номыр карытэк ум пуке ук? Ми эмъясьёс доры мыномы, эмъюмъёс юомы, дыр. Ми туж тыршомы бурмыны. Нош матысь адямиосмы куло ке — кӧня гинэ арес соослы медам луы,— кема дыр ӵоже милям сюлэммы куректыса улэ (Иоанн 11:32, 33). Улыны мылкыдмы но паймымон быгатонлыкъёсмы возьмато, Кылдытӥсьмылэн потэ, ми пырак мед уломы шуыса. Но вань на мукет малпанъёс, кудъёсыз возьмато, ми пырак улыны быгатӥськомы шуыса. Ойдолэ эскеромы, мар Иегова лэсьтӥз азьвыл но мар лэсьтэ али, аслэсьтыз эриксэ быдэстон понна.

ИЕГОВАЛЭН ЭРИКЕЗ ӦЗ ВОШТӤСЬКЫ

8. Мар вера Исаия 55:11 Иеговалэн эрикез сярысь, кудӥз милемын герӟаськемын?

⁸ Адамен Ева сьӧлыказы но соин сэрен нылпиоссы кулыны кутскизы ке но, Иегова аслэсьтыз эриксэ ӧз вошты. (Лыдӟе Исаиялэсь 55:11.) Азьло сямен ик солэн потэ оскымон адямиосызлы пырак улон кузьмамез. Кытысь ми сое тодӥськомы? Ойдолэ эскеромы, мар Иегова вераз но лэсьтӥз, аслэсьтыз эриксэ быдэстон понна.

9. Мар карыны Инмар кылзэ сётӥз? (Даниил 12:2, 13).

⁹ Иегова кылзэ сётӥз кулэмъёсты улӟытыны но соослы пырак улон сётыны (Ап. уж. 24:15; Тит. 1:1, 2). Шонерлыко улӥсь Иов оскиз, Инмарлэн кулэмъёсты улӟытэмез потэ шуыса (Иов 14:14, 15). Даниил пророк тодӥз, адямиос улӟыны но пырак улыны быгато шуыса (Пс. 36:29; лыдӟе Данииллэсь 12:2, 13). Иисус улон дыръя еврей калык но тодӥз, Иеговалэн оскымон ужась-тыршисьёсызлы пырак улон кузьмамез луэ шуыса (Лука 10:25; 18:18). Иисус та кылсётон сярысь трос пол вералляз. Со сяна, Иисус ачиз но улӟытэмын вал (Матф. 19:29; 22:31, 32; Лука 18:30; Иоанн 11:25).

10. Мае возьмато улӟытон сярысь учыръёс? (Учке суредэз.)

¹⁰ Иегова ваньмызлы улон сётэ. Соин ик солэн кужымез вань кулэмъёсты улӟытыны. Тодады вае, кызьы со Илия пророклы кужым сётӥз Сарептаысь палкышнолэсь пизэ улӟытыны (3 Экс. 17:21—23). Берлогес Елисей пророк Инмарлэн юрттэменыз Сонамысь кышномуртлэсь пизэ улӟытӥз (4 Экс. 4:18—20, 34—37). Та но мукет учыръёс возьмато, Иеговалэн адямиосты улӟытыны кужымез вань шуыса. Куке Иисус музъем вылын вал, со возьматӥз, Инмар солы адямиосты улӟытыны кужым сётӥз шуыса (Иоанн 11:23—25, 43, 44). Али Иисус инмын. Солы «инмын но, музъем вылын но котькыӵе кужым сётэмын». Соин ик со быгатоз быдэстыны аслэсьтыз сётэм кылзэ — «ваньмыз шайгуосын кыллисьёс... улӟозы» но пырак улыны быгатозы (Матф. 28:18; Иоанн 5:25—29).

11. Кызьы Иисуслэн кулэмез милемлы луонлык сётӥз пырак улыны?

¹¹ Малы Иегова лэзиз, яратоно Пиез курадӟыса мед кулоз шуыса? Иисус валэктӥз: «Инмар сокем дуннеез яратӥз, Аслэсьтыз одӥг вордӥськем Пизэ сётӥз, котькудӥз но Солы оскись мурт медаз быры, солэн быронтэм улонэз мед луоз шуыса» (Иоанн 3:16). Сьӧлыкъёсмылэсь мозмытон понна, Иегова аслэсьтыз Пизэ курбонлы сётӥз. Солы луыса милям пырак улыны луонлыкмы вань (Матф. 20:28). Нош тани кызьы тае валэктӥз апостол Павел: «Уго кызьы кулон адями пыр лыктӥз, озьы ик кулэмъёслэн улӟыса султонзы но адями пыр лыктӥз. Адам пыр ваньмыз кулылӥзы, нош Христос пыр ваньмыз улӟыса султозы» (1 Кор. 15:21, 22).

12. Кызьы Эксэйлык быдэстоз Иеговалэсь эриксэ, кудӥз милемын герӟаськемын?

¹² Иисус дышетскисьёссэ дышетӥз вӧсяськыны, Инмарлэн Эксэйлыкез мед лыктоз но Инмарлэн эрикез музъем вылын мед быдэсмоз шуыса (Матф. 6:9, 10). Инмарлэн потэ, адямиос пырак дауръёс ӵоже музъем вылын мед улозы шуыса. Тае быдэстон понна, Иегова аслаз Эксэйлыказ Пизэ Эксэй карыса пуктӥз. Иисуслэн луозы 144 000 юрттӥсьёсыз, кудъёсыз адямиос пӧлысь быръемын. Христосэн ӵош соос инмысен Инмарлэсь эриксэ быдэстозы (Усьт. 5:9, 10).

13. Мар Иегова каре туннэ, нош мар кароно тӥледлы?

¹³ Со сяна, Иегова «туж-туж трос калыкез» люка но соосты Эксэйлыклэн кивалтэмез улсын улыны дышетэ (Усьт. 7:9, 10; Иак. 2:8). Туннэ та дуннеысь адямиос ог-огзэс адӟемпотостэм карыса, ожмаськыса уло ке но, туж-туж трос калык пӧлысь адямиос тупаса но огкылысь уло. Вераны луоз, соос мечъёссэс усы-геры лэсьтыны ӵыжато (Мих. 4:3). Туж-туж трос калык пӧлысь адямиос ожъёсы уг пырисько. Со интые, соос тыршо, матысь адямиоссы но пырак улыны мед быгатозы шуыса. Со понна туж-туж трос калык Иегова сярысь но солэн эрикез сярысь тодытэ (1 Тим. 6:19). Инмарлэн Эксэйлыкезлы дурбасьтэмзы понна соослэсь ӵыжы-выжыоссы палэнскыны быгато, соослэн коньдонэн герӟаськем шуг-секытъёссы кылдыны быгато. Но Иегова соослы ваньзэ кулэзэ сётэ (Матф. 6:25, 30—33; Лука 18:29, 30). Ваньмыз та оскытэ милемыз: Инмарлэн Эксэйлыкез зэм но вань, озьы ик со Иеговалэсь эриксэ одно ик быдэстоз.

АЗЬПАЛАН ТУЖ УМОЙ УЛОН!

14, 15. Кызьы Иегова быдэстоз кулонэз быдтыны кылсётонзэ?

¹⁴ Туннэ Иисус Эксэй луыса кивалтэ. Со Иеговалэсь вань кылсётонъёссэ быдэстоз (2 Кор. 1:20). 1914-тӥ арысен Иисус «тушмонъёсыз пӧлын кузёяськыса улэ» (Пс. 109:1, 2). Ӝоген со но соин ӵош кивалтӥсьёс вань лек адямиосты быдтозы (Усьт. 6:2).

¹⁵ Сюрс ар ӵоже кивалтонэз дыръя Иисус кулэмъёсты улӟытоз но Иеговалэсь кылзӥськись адямиослы тырбыдэс луыны юрттоз. Берпуметӥез эскерон бере соос, кинъёсты Иегова шонерлыко адямиосын лыдъялоз, «музъем басьтозы но со вылын пумтэм вапумъёс улозы» (Пс. 36:10, 11, 29). Ми шумпотомы, куке быдтэмын луоз берпуметӥез тушмонмы — кулон (1 Кор. 15:26).

16. Кыӵе валтӥсез муг, малы ми Иеговалы ужаськомы-тыршиськомы?

¹⁶ Кызьы ми адӟимы, вуоноезлы осконмы юн пыкиське Инмарлэн Кылыз вылэ. Та оскон юрттоз милемлы секыт берпум нуналъёсы зэмлыклэн сюрес вылтӥз мыныны, озьы ик Иеговалы но Иисуслы оскымон кыльыны. Но ми, улэп кылён понна, Иеговалы но Иисуслы оскымон луыны ум тыршиське. Ми Иеговалы ужаськомы-тыршиськомы, малы ке шуоно сое но солэсь Пизэ туж яратӥськомы. Соку гинэ ми Иеговаез шумпоттыны быгатомы (2 Кор. 5:14, 15). Яратон милесьтым мылкыдмес ӝутэ Иеговалэсь но Иисуслэсь адӟем карыны, озьы ик мукетъёсызлы вуоноезлы осконмы сярысь вераны (Рим. 10:13—15). Ми дышетскимы ке, асьмеды жалятэк, мукетъёсызлы юрттыны, соку Иеговалэн милемын пырак дауръёс ӵоже эшъяськемез потоз (Евр. 13:16).

17. Мар кароно ми пӧлысь котькудӥзлы? (Матфей 7:13, 14).

¹⁷ Луомы-а ми соос пӧлын, кинъёс пырак улозы? Иегова лэсьтӥз ваньзэ, ми пырак улыны мед быгатомы шуыса. Табере милемлы асьмелы тыршоно мыныны сюрес вылтӥ, кудӥз пырак улонэ нуэ. (Лыдӟе Матфейлэсь 7:13, 14.) Нош кыӵе луоз пырак улон? Тае ми эскеромы вуоно статьяын.