Лыдӟисьёслэн юанъёссы

Кин ужпум кутэ, кинэ кенешын синйылтыса возёно: тӧроослэн кенешсы яке котькуд христиан мурт ачиз? (2 Фессалоникаослы 3:14).

Апостол Павел Фессалоникаысь христианъёслы гожтӥз: «Кин ке тӥледлы ыстэм гожтэтысь милесьтым верам кылмес ӧз ке кылзӥськы, сое синйылтыса возе» (2 Фес. 3:14). Азьвыл ми вераськомы вал, та кылбурысь курон-косон тӧроослы гожтэмын шуыса. Кинлы ке визь-кенешъёс сётъязы ке, нош со азьвыл сямен ик Библиысь возетъёсъя уг улы вал ке, тӧроос быгато вал кенеш азьын речь вераны, сыӵе муртэ синйылтыса возёно шуыса. Собере ивортӥсьёс кенешлэн пумиськонъёсаз но тодытон ужын гинэ соин дырзэс ортчытъяны быгато вал.

Нош али ми мукет сямен валаськомы возетэз, кудӥз гожтэмын 2 Фессалоникаослы 3:14. Павел вераз, вылды, котькуд агай но сузэр ачиз ужпум кутыны быгатэ шуыса. Соин ик тӧроослы сыӵе речь верано ӧвӧл ини. Малы лэсьтэмын вал сыӵе воштӥськон? Эскеромы Павеллэсь кылъёссэ пыр-почгес.

Павел гожтӥз, Фессалоника кенешысь куд-огъёсыз «азьтэмъяськыса уло, номыр но кулэзэ уг лэсьто, пайдатэм ужъёсын выро» шуыса. Павел соослы, Инмарлэн Кылыз вылэ пыкиськыса, визь-кенеш сётӥз ке но, соос солэсь ӧз кылзӥське. Фессалоникае кылемаз ветлыкуз, Павел соослы шуиз: «Кин уг ужа, со уг сиы». Но куд-огъёсызлэн, соос ужаны быгато вал ке но, азьвыл сямен ик ужамзы уг поты вал. Озьы ик соос мукетъёсызлэн ужъёсазы нырзэс чуртнало вал. Кызьы агайёслы но сузэръёслы учконо вал соос шоры, кинъёс асьсэды озьы возизы? (2 Фес. 3:6, 10—12).

Павел шуиз: «Сое синйылтыса возе». Грек кыл, кудӥз татын «синйылтыса возе» шуыса берыктэмын, возьматэ вал, сыӵе адямиен астэ чакласькыса возёно шуыса. Павел та курон-косонэз быдэс кенешлы сётӥз, тӧроослы гинэ ӧз сёты (2 Фес. 1:1; 3:6). Соин ик, агайёс но сузэръёс адӟо вал ке, кин ке но Библиысь возетъя уг улы но ассэ шонертэм возе шуыса, соос быгато вал асьсэос ужпум кутыны сыӵе адямиен кусып воземысь дугдыны.

Возьмато вал-а Павеллэн кылъёсыз, сыӵе мурт шоры кенешлэсь палэнтэм шоры кадь учконо шуыса? (1 Кор. 5:13). Уг, уг возьмато вал. Малы ке шуоно Павел ватсаз: «Агай-вындэс музэн визьмалэ-нодъялэ сое». Соин ик агайёс но сузэръёс быгато вал соин дырзэс ортчытъяны кенешлэн пумиськонъёсаз но тодытон ужын, но соин ӵош шутэтскыны уг быгато вал ини. Малы? Павел шуиз: «Возьытэз валатон понна». Ассэ шонертэм возись мурт адӟысал ке, соин ӵош уг шутэтско ини шуыса, солы возьыт луысал но со воштӥськысал (2 Фес. 3:14, 15).

Кызьы христианъёслы туннэ та курон-косонэз уже кутоно? Нырысь валаны тыршоно, зэм ик-а адями, кызьы гожтӥз Павел, азьтэмъяськыса улэ, номыр но кулэзэ уг лэсьты но пайдатэм ужъёсын выре шуыса. Павел ӧз вера соос сярысь, кинъёс куто сыӵе ужпумъёс, кудъёсыз милям возьытлыкмылы пумит мыно, нош Библиысь возетъёслы пумит уг луо. Озьы ик со ӧз вера соос сярысь, кинъёс милемыз вӧсь каризы. Павел вераз соос сярысь, кинъёс Библиысь валамон курон-косонъёслэсь уг кылзӥсько.

Ми адӟимы ке, кин ке но уг кылзӥськыa шуыса, возьмано ӧвӧл кинлэсь ке верамзэ, милемлы соин ӵош шутэтскон дырмес ортчытъяно ӧвӧл ини шуыса. Ми асьмеос сыӵе ужпум кутӥськомы. Соин ик кутэм ужпуммы сярысь ми мукетъёсыныз ум вераське, семьяенымы гинэ. Ми быгатомы сыӵе адямиен дырмес ортчытъяны кенешлэн пумиськонъёсаз но тодытон ужын. Нош куке со воштӥськоз, ми быгатомы азьвыл кадь ик соин кусып возьыны.