ЭСКЕРОН ПОННА 20-ТӤ СТАТЬЯ
7-ТӤ КЫРӞАН Иегова — милям кужыммы
Иегова дорысь буйгатскон утчалэ
«Дан... гажан-жалянлэн Атаезлы, котькыӵе буйгатсконлэн Инмарезлы» (2 КОР. 1:3).
МИ ТОДОМЫ
Кызьы Иегова буйгатылӥз вавилон пленэ сюрем еврейёсты но кызьы со буйгатэ туннэ милемыз.
1. Вералэ, кызьы улӥзы еврейёс вавилон пленын.
ТРОС аръёс ӵоже еврейёс Иеговалэсь кылзӥськытэк улӥзы. Соин ик, куке вавилон калык соослэсь музъемзэс киултӥз, нош асьсэды пленэ нуиз, Иегова соослы ӧз юртты (2 Пар. 36:15, 16, 20, 21). Еврейёс мурт музъемын туж ик урод ӧз улэ (Иер. 29:4—7). Озьы ке но соослэн отын улэмзы уг поты вал. Учке, мар вераз пленэ сюрем еврейёс пӧлысь одӥгез: «Вавилонысь шуръёс дурын, отын ми пукимы но, Сӥонэз тодамы вайыкумы, бӧрдылӥмы» (Пс. 136:1). Адӟиське, еврейёслы буйгатскон туж кулэ вал. Нош кин соосты буйгатыны быгатысал?
2, 3. а) Кызьы Иегова буйгатылӥз пленэ сюрем еврейёсты? б) Мае ми эскеромы та статьяын?
2 Иегова — «буйгатсконлэн Инмарез» (2 Кор. 1:3). Со аслэсьтыз ужась-тыршисьёссэ яратэ. Солэн соосты буйгатэмез потэ. Иегова тодэ вал, вавилон пленэ сюрем еврейёс пӧлысь куд-огъёсыз ӧпкелёзы но выльысь солы ужалозы-тыршозы шуыса (Ис. 59:20). Соин ик пленэ сюремзылэсь 100 арлы азьлогес Иегова Исаиялэсь мылкыдзэ ӝутӥз азьпалзэ ивортонъёсын книга гожтыны. Малы? Отын гожтэмын: «Буйгатэ, буйгатэ Мынэсьтым калыкме,— шуэ Инмарды» (Ис. 40:1). Исаиялэн книгаяз гожтэмын вал трос малпанъёс, кудъёсыз пленэ сюрем еврейёсты буйгатыны быгато вал.
3 Милемлы но куддыръя буйгатскон кулэ. Та статьяын ми эскеромы, кызьы Иегова еврейёсты буйгатылӥз. Со: 1) ӧпкелисьёсты простить карыны кылзэ сётӥз; 2) ужась-тыршисьёсызлы вуоноезлы оскон сётӥз но 3) азьпал улонлэсь кышкатэк улыны юрттӥз. Озьы ик ми эскеромы, кызьы Иегова буйгатэ милемыз.
ИЕГОВА МИЛЕМЫЗ ПРОСТИТЬ КАРЕ
4. Кызьы Иегова пленэ сюрем еврейёслы гажан-жалянзэ возьматӥз? (Исаия 55:7).
4 Исаия пыр Иегова еврейёслы кылзэ сётӥз, соосты простить кароз шуыса. (Лыдӟе Исаиялэсь 55:7.) Инмар аслаз калыкезлы шуиз: «Мон тонэ пумтэм вапумъёс ӵоже гажаса-жаляса возё» (Ис. 54:8). Кызьы Иегова гажан-жалянзэ возьматӥз? Сьӧлыкаменызы сэрен еврейёс пленэ сюризы ке но, Иегова соосты оскытӥз, соос Вавилонын котьку уз улэ шуыса (Ис. 40:2). Та кылъёс ӧпкелись еврейёсты туж буйгатӥзы, луоз.
5. Малы ми оскиськомы, Иегова ужась-тыршисьёссэ быдэсак простить карыны дась шуыса?
5 Малы ми дышетскиськомы? Иегова аслэсьтыз ужась-тыршисьёссэ быдэсак простить карыны дась. Пленэ сюрем еврейёсын ӵошатыса, милям талы оскыны эшшо но трос мугъёсмы вань. Малы ке шуоно ми тодӥськомы, мар кариз Иегова, милемыз сьӧлыклэсь мозмытон понна. Исаиялэн ужамез-тыршемез бере сю аръёс ортчыса, Иегова музъем вылэ яратоно Пизэ ыстӥз, со ӧпкелись адямиос понна аслэсьтыз улонзэ мед сётоз шуыса. Христослэн курбонэзлы луыса Иегова милесьтым сьӧлыкъёсмес быдэсак простить карыны быгатэ (Ис. 1:18; Ап. уж. 3:19; Еф. 1:7). Та возьматэ, Иегова — туж гажась-жалясь Инмар шуыса!
6. Кыӵе милемлы пайда вае Иеговалэн гажась-жалясь луэмез? (Озьы ик учке суредэз.)
6 Кылъёс, кудъёсыз гожтэмын Исаиялэн 55:7, буйгатыны быгато соосты, кинъёсты возьытлыксы йырйыса возе. Куд-огъёсыз ӧпкелемзы бере но асьсэды пыкыло, тужгес но сьӧлыкаменызы сэрен шуг-секытъёсын пумиськыло ке. Нош ми ӧпкелимы ке но сьӧлыкмес выльысь лэсьтытэк улыны тыршимы ке, ми оскыны быгатомы, Иегова милемыз простить кариз шуыса. Куке Иегова сьӧлыкъёсмес простить каре, со соосты тодаз уг ни вайы. Милемлы но янгышъёсмы шоры со сямен учконо. (Ӵошатэ Иеремиялэсь 31:34.) Иегова уг учкы, кызьы ми асьмеды азьвыл возимы. Со чакла, кызьы ми асьмеды али возиськомы (Иез. 33:14—16). Ӝоген гажась-жалясь Инмармы быдтоз вань шуг-секытъёсты, кудъёсыз сьӧлыкаменымы сэрен кылдӥзы.
Иегова уг учкы, кызьы ми асьмеды азьвыл возимы. Со чакла, кызьы ми асьмеды али возиськомы. (Учке 6-тӥ абзацез.)
7. Мар милемлы юрттоз тӧроослы вазиськыны, ми сьӧлыкамы ке?
7 Нош мар кароно, милемыз возьытлыкмы йыръе ке, сьӧлыкмес ватэменымы сэрен? Библия милемыз ӧте тӧроослэсь юрттэт курыны (Иак. 5:14, 15). Со капчи ӧвӧл ке но, сюлмысь ӧпкелён милемлы юрттыны быгатэ. Озьы ик тодамы возёно, Иегова — гажась-жалясь Инмар шуыса. Соин ик тӧроос но милемлы яратонзэс но гажан-жалянзэс возьматозы. Тани кызьы тӧроос юрттӥзы А́ртурa агайлы. Со вера: «Быдэс ар пала мон порнография учки. Но, куке мон возьытлык сярысь одӥг речез кылӥ, мон ваньмыз сярысь кышноелы но тӧроослы верай. Собере мыным капчигес луиз. Возьытлыке монэ сокем ӧз йырйы ни. Озьы ке но сьӧлыкаменым сэрен мон асме урод шӧдӥсько на вал. Соку тӧроос тодам вайытӥзы, Иегова мынэсьтым ӧз палэнскы но солэн азьвыл сямен ик монэн эшъяськемез потэ шуыса. Со монэ кыл кутытэ, малы ке шуоно монэ яратэ. Тӧроослэн ӟеч кылъёссы сюлмам ик пыризы. Мон валай, Иегова монэ зэм но простить кариз шуыса». Али Артур пионер но кенешлы юрттӥсь луыса ужа-тырше. Ӧпкелимы ке, Иегова милемыз одно ик простить кароз! Та малпан милемыз туж буйгатэ.
ИЕГОВА МИЛЕМЛЫ ВУОНОЕЗЛЫ ОСКОН СЁТЭ
8. а) Вуоноезлы кыӵе оскон сётӥз Иегова пленэ сюрем еврейёслы? б) Исаиялэсь 40:29—31 лыдэ басьтыса, кыӵе пайда вайыны быгатэ вал вуоноезлы оскон ӧпкелись еврейёслы?
8 Еврейёс малпаны быгато вал, ас музъемазы ноку уз берытске ни шуыса, малы ке шуоно пленэ басьтэм адямиоссэ Вавилон бертыны ӧз лэзьылы (Ис. 14:17). Нош Иеговалэн син азяз Вавилон тузон выллем вал (Ис. 40:15). Пельтод но — со ӧвӧл ини! Иегова кылзэ сётӥз, аслэсьтыз калыксэ мозмытыны. Солы нокин люкетыны уг быгаты вал (Ис. 44:26; 55:12). Кыӵе пайда вайиз вуоноезлы оскон еврейёслы? Со соосты буйгатӥз. Со сяна, Исаия гожтӥз: «Кузё-Инмарлы оскиськыса улӥсьёс кужым басьтыса выльдӥськозы». (Лыдӟе Исаиялэсь 40:29—31.) Озьыен, вуоноезлы оскон еврейёслы выль кужым сётыны быгатэ вал. Соос, ӧрӟиос музэн, инмын лобасалзы.
9. Кызьы Иегова еврейёсты оскытӥз, соосты мозмытоз шуыса?
9 Калыкез мозмытыны кылзэ сётэм сяна, Иегова еврейёсты оскытӥз, сётэм кылызлы оскыны луэ шуыса. Кызьы? Азьпалзэ ивортонъёсты быдэстыса. Еврейёс тодо вал, Ассирия Израиль уйпал эксэйлыкез киултӥз но отын улӥсьёсты пленэ нуиз шуыса (Ис. 8:4). Еврейёс адӟизы, кызьы вавилон калык Иерусалимез куашкатӥз но калыкез пленэ нуиз (Ис. 39:5—7). Озьы ик соос адӟизы, кызьы Седекия эксэй синтэм кельтэмын но Вавилонэ нуэмын вал (Иер. 39:7; Иез. 12:12, 13). Иеговалэн вань сётэм кылъёсыз быдэсмизы (Ис. 42:9; 46:10). Та еврейёслэсь осконзэс юнматӥз, Иегова соосты мозмытоз шуыса.
10. Мар кароно, вуоноезлы осконмы юн мед луоз шуыса?
10 Малы ми дышетскиськомы? Секыт дыръя вуоноезлы оскон милемыз буйгатыны но юнматыны быгатэ. Ми секыт дыре улӥськомы. Милям кужмо тушмонъёсмы вань. Озьы ке но кимес лэзёно ӧвӧл. Иегова милемлы вуоноезлы паймымон оскон сётӥз — ми пырак дауръёс ӵоже кышкатэк но тупаса улыны быгатӥськомы. Милям потэ, вуоноезлы осконмы юн мед луоз шуыса. Со лябӟиз ке, ми кельшомы адямилы, кудӥз чебер инкуазь шоры кырсь укно пыр учке. Мар кароно, «укномы» чылкыт мед луоз шуыса? Ӵемгес син азямы пуктоно, макем умой улон луоз выль дуннеын. Выль дуннеын улон сярысь статьяосты лыдӟоно, видеороликъёсты учконо но кырӟанъёсты кылзоно. Озьы ик Иеговалы верано, мае милям адӟеммы потэ выль дуннеын.
11. Мар юрттэ одӥг сузэрлы шуг-секытъёссэ чиданы?
11 Тани кызьы вуоноезлы оскон буйгатэ но юнматэ Джой нимо сузэрез, кудӥзлэн секыт висёнэз вань. Со вера: «Куддыръя шуг-секытъёс вылысьтыз вылаз усё. Соку мон сюлмаськонъёсы сярысь Иеговалы верасько, малы ке шуоно со монэ умой вала. Иегова котьку но мыным „мертантэм бадӟым кужым“ сётэ» (2 Кор. 4:7). Озьы ик Джой син азяз пуктэ, кызьы со выль дуннеын улэ, кытын «одӥгез но уз шуы: „Мон висисько“» (Ис. 33:24). Ми но Иеговалы сюлэммес усьтӥмы ке но вуоноезлы осконмы сярысь малпаськимы ке, соку котькыӵе шуг-секытъёсты чиданы быгатомы.
12. Малы милям оскеммы луэ, Иеговалэн кылсётонъёсыз быдэсмозы шуыса? (Озьы ик учке суредэз.)
12 Еврейёс сямен, ми но оскыны быгатӥськомы, Иеговалэн кылсётонъёсыз быдэсмозы шуыса. Малпаське, кӧня азьпалзэ ивортонъёс милям син азямы быдэсмо! Кылсярысь, Даниил вераз, эксэйлык кылдоз шуыса, кудӥзлэн «оглюкетэз юн луоз, нош мукетыз шальтрамын луоз» (Дан. 2:42, 43). Ми со эксэйлык кивалтыку улӥськомы. Озьы ик ми кылӥськомы, пӧртэм интыосын музъем зурка шуыса. Со сяна, ми «вань калыкъёслы» ӟеч иворез вераськомы (Матф. 24:7, 14). Та но мукет азьпалзэ ивортонъёс осконмес юнмато, Иеговалэн вань сётэм кылъёсыз одно ик быдэсмозы шуыса.
Азьпалзэ ивортонъёс, кудъёсыз син азямы быдэсмо, осконмес юнмато, Иеговалэн мукет кылсётонъёсыз но быдэсмозы шуыса. (Учке 12-тӥ абзацез.)
ИЕГОВА МИЛЕМЛЫ ЮРТТЭ ВУОНОЕЗЛЭСЬ КЫШКАТЭК УЛЫНЫ
13. а) Кыӵе шуг-секытъёс возьмазы еврейёсты мозмытсконзы азьын? б) Кызьы Иегова буйгатӥз пленэ сюрем еврейёсты? (Исаия 41:10—13).
13 Иегова пленын улӥсьёслы вуоноезлы туж умой оскон сётӥз ке но, со тодэ вал, мозмытсконзы азьын соослы секыт луоз шуыса. Инмар вераз, пленысь потонзы азьын кужмо кивалтӥсь артысь калыкъёсты киултоз, нош собере Вавилон вылэ урдскоз шуыса (Ис. 41:2—5). Кулэ вал-а еврейёслы соин сэрен кышканы? Иегова азьло ик соосты буйгатӥз, таӵе кылъёс вераса: «Эн кышка, Мон — тонэн огазьын, эн кепыра, Мон — тынад Инмаред». (Лыдӟе Исаиялэсь 41:10—13.) Мар сярысь вераз Иегова, куке шуиз: «Мон — тынад Инмаред»? Еврейёс тодо вал, Иеговалы гинэ йыбыртъяно шуыса. Соин ик Иегова та сярысь ӧз вера. Та кылъёсты вераса, Иегова ужась-тыршисьёссэ оскытӥз, со котьку но соосын ӵош луоз но соослы юрттоз шуыса (Пс. 117:6).
14. Кызьы эшшо Иегова буйгатӥз пленэ сюрем еврейёсты?
14 Кызьы эшшо Иегова буйгатӥз пленэ сюрем еврейёсты? Со тодазы вайытӥз, солэн кужымез но визьмыз мертантэм бадӟым шуыса. Иегова еврейёсты куриз кизилиё инбам шоры учкыны. Инмар соослы вераз, со вань кизилиосты кылдытӥз, но котькудзэ нимызъя тодэ шуыса (Ис. 40:25—28). Уката но со котькуд ужась-тыршисезлэсь нимзэ тодэ! Иегова кизилиосты кылдытыны быгатӥз бере, со аслаз калыкезлы но юрттыны быгатоз. Озьыен, еврейёс сюлмаськытэк но кышкатэк улыны быгато вал.
15. Кыӵе курон-косон сётӥз Инмар пленэ сюрем еврейёслы, соос вуоно югдуръёслы дась мед луозы шуыса?
15 Озьы ик Иегова аслаз ужась-тыршисьёсызлы валэктӥз, мар соослы кароно мозмытсконзы азьын. Исаиялэн 26:20 гожтэмын Иеговалэн таӵе кылъёсыз: «Калыке, мын, шутэтскон интыосад пыр но ас бӧрсяд ӧсъёстэ ворса, огдырлы, вожпоттон дыр ортчытозьлы, ватӥськы». Куке Кир эксэй Вавилонэз киултӥз, еврейёс та курон-косонлэсь кылзӥськизы, луоз. Вашкала Грециысь история удысысь Ксенофо́нт тодосчилэн верамезъя, куке Кир Вавилонэ пыриз, со ожгарчиоссэ косӥз «виылыны котькинэ, кин урамын луоз». Малпалэ гинэ, макем кышказы Вавилонын улӥсьёс! Нош еврейёс ӧз кышкалэ, малы ке шуоно Иеговалэн курон-косонэзлэсь кылзӥськизы.
16. Малы милемлы азьпал улон сярысь мултэс сюлмаськоно ӧвӧл? (Озьы ик учке суредэз.)
16 Малы ми дышетскиськомы? Ӝоген бадӟым куректон вуоз. Адямиос кышкамын луозы. Нош Иеговалэн ужась-тыршисьёсыз уз кышкалэ, малы ке шуоно Иегова — милям Инмармы. Соин ик ми юн оскомы, со милемыз утёз шуыса (Лука 21:28). Соку но, куке ми вылэ калыкъёслэн огазеяськонзы урдскоз, ми Иеговалы оскиськомы. Инмар милемыз кылчинъёс пыр утёз но милемлы кивалтэт сётоз. Кызьы милемлы кивалтэт сётэмын луоз? Али ми сое ум тодӥське. Кенешъёс пыр, вылды. Кенешъёс — со, «шутэтскон интыос», дыр, кытын ми номырлэсь ум кышкалэ. Мар кароно, вуоно югдуръёслы дась луон понна? Милемлы агайёсын но сузэръёсын матысь кусыпъёс возёно, организацилэн кивалтэтэзлэсь дась луыса кылзӥськоно но юн осконо, организациен Иегова кивалтэ шуыса (Евр. 10:24, 25; 13:17).
Бадӟым куректон дыръя ми ум кышкалэ. Малы ке шуоно юн оскомы, Иегова милемыз утёз шуыса. (Учке 16-тӥ абзацез.)b
17. Мар кароно, Иеговалэсь буйгатскон басьтон понна?
17 Вавилон пленэ сюрем еврейёслэн улонзы капчи ӧй вал ке но, Иегова соосты буйгатӥз. Милям но оскеммы луэ, Иегова милемлы юрттоз шуыса. Соин ик, маин гинэ тӥ медад пумиське, Иеговалэсь буйгатскон утчалэ. Юн оске, со тӥледыз яратэ но гажа-жаля шуыса. Вуоноезлы юн осконэн улэ но тодады возе, Иегова — тӥляд Инмарды шуыса. Соин ик тӥледлы номырлэсь кышкано ӧвӧл.
3-ТӤ КЫРӞАН Тон милям утиськон интымы
a Куд-ог нимъёс воштэмын.
b СУРЕДЫН. Кӧня ке агайёс но сузэръёс одӥг коркан люкаськизы. Соос инбам шоры учко. Кизилиос соослы тодазы вайыто, кытын гинэ Иеговалэн ужась-тыршисьёсыз медам улэ, со соосты утьыны быгатэ шуыса.