Яритилиш

6 Инсанлар йәр йүзидә көпийишкә башлиди вә уларниң қизлири туғулди. 2 Һәқиқий Худаниң оғуллири* инсан қизлириға сәп селишқа башлиди, уларниң чирайлиқлиғини көрүп, халиғиничә таллап, өзлиригә аяллиққа алди. 3 Шу чағда Йәһва: «Мениң роһум адәмни мәңгү чидавәрмәйду, чүнки у бари-йоқи пәқәт яратмидур. Хулләс, униңға 120 жил қалди»,— деди.

4 Шу күнләрдә вә улардин кейинму һәқиқий Худаниң оғуллири инсан қизлири билән йеқин болғанда һәм улар оғулларни туғуп бәргәндә, йәрдә нефилимлар пәйда болди. Улар қедимки заманда мәшһур вә күчлүк адәмләр еди.

5 Йәһва йәрдики инсанларниң әйипкә чөкүп вә қәлблириниң барлиқ ойлири дайим пәқәт зулумға қаритилғинини көрди. 6 Шунда Йәһва адәмләрни зиминда яратқиниға өкүнди вә жүригидә ағринди. 7 Шуңлашқа Йәһва: «Мән йәр йүзидин яратқан адәмләрниму, өй җаниварлириниму, явайи һайванларниму вә асмандики учарқанатларниму йоқ қилимән, чүнки Мән уларни яратқинимға пушайман қиливатимән»,— деди. 8 Нуһ болса Йәһваниң көзидә рәһимлиқ тапти.

9 Мана Нуһниң һаяти.

Нуһ һәққаний адәм еди. У замандашлириниң арисида әйипсиз киши болған. Нуһ һәқиқий Худа билән жүрәтти. 10 Нуһтин Сам, Һам вә Япәт дегән үч оғул туғулди. 11 Йәр-зимин Худаниң көзидә ярамсиз болди, у зулумлуққа толди. 12 Худа йәр йүзигә қариведи, униң ярамсиз екәнлигини көрди, чүнки барлиқ адәмзат өз йолини бурмилап кәткән еди.

13 Шу чағда Худа Нуһқа: «Алдимда һәрқандақ адәмниң ахири кәлди, чүнки уларниң кесиридин йәр зораванлиққа толди һәм Мән уларни йәрдики бар нәрсиләр билән қошуп һалак қилимән. 14 Өзәңгә девирқай дәриғиниң яғичидин кемә ясиғин. Кемидә бөлмиләрни қилип, униң ичи-тешини қара май билән суга. 15 Мана у мундақ болуши керәк: кеминиң узунлиғи 300 җәйнәк, кәңлиги 50 җәйнәк, егизлиги 30 җәйнәк болсун. 16 Торусниң тегидин бир җәйнәк төвән деризә яса. Кеминиң ишиги биқинидин болсун. Униңда төвәнки, иккинчи вә үчинчи қәвәтләрни ясиғин.

17 Мән асман тегидики һаятлиқ нәпәси бар һәрқандақ тирик җанни һалак қилиш үчүн, йәргә су топинини кәлтүримән. Йәрдики бар нәрсә һаятидин мәһрум болиду. 18 Лекин сән билән болса, Мениң келишимимни түзимән. Сән кемигә кирисән һәм сениң билән биллә оғуллириң, аялиң вә келинлириң кириду. 19 Сениң билән тирик қелиши үчүн, сән кемигә барлиқ тирик мәхлуқларниң җүплирини киргүзисән. Улар әркәк вә чиши болсун. 20 Учарқанатлардин уларниң түрлири бойичә, өй җаниварлиридин уларниң түрлири бойичә вә йәрдики барлиқ явайи һайванлардин уларниң түрлири бойичә — һәммисидин, тирик қелиши үчүн, җүпләп киргүзгин. 21 Сән өзәңгә озуқлуқ үчүн һәрхил йемәкликни жиғ вә у саңа, вә улар үчүн ғиза болиду»,— деди.

22 Нуһ һәммини Худа униңға буйриғандәк қилди. У нәқ шундақ қилди.