Самуилниң 2-язмиси
21 Давутниң заманида үч жил уда, жилму-жил, ачарчилиқ болди вә Давут Йәһваниң илтипатини издиди. Йәһва униңға: «Бу Саул үчүн һәм униң қан гунайи бар өйи үчүн болмақта, чүнки у гибионлуқларни қиривәтти»,— дәп җавап бәрди. 2 Падиша гибионлуқларни чақирип, уларға сөзлиди. (Гибионлуқлар болса Исраил оғуллиридин әмәс, бәлки улар аморийларниң қалдуқ әвлади болған еди. Исраил оғуллири уларға вәдә бәргән болсиму, бирақ Саул уларни Исраил һәм Йәһуда әвладиға қизғинлиқ көрситип қиривәтти). 3 Давут гибионлуқлардин: «Мән силәргә немә қилип берәй? Йәнә силәр Йәһваниң мирасиға яхшилиқ тилишиңлар үчүн, немә қилип силәрниң қәлбиңларни юмшитай?»— дәп сориди. 4 Гибионлуқлар җававән:«Биз Саул һәм униң өйидин алтун билән күмүч соримаймиз вә исраиллиқлардин бирсиниң өлүминиму тәләп қилмаймиз»,— деди. Шу чағда Давут улардин: «Шундиму мән силәргә немә қилип беришимни ейтиңлар»,— деди. 5 Улар падишаға җавап қайтуруп:«Бизни қирған һәм пүтүнләй уҗуқтуруш үчүн хәлқимизгә қарши қара нийәт қилип, бизниң Исраил чәклиридә қелишимизни халимиған адәмниң 6 оғуллиридин йәттисини бизгә тапшуруп бериңлар. Биз уларни Йәһва таллиған Саулниң шәһири Гибада униң Пәрвәрдигари Йәһва алдида дарға есип қойимиз»,— деди. Падиша: «Тәливиңларни орунлап беримән!»— деди.
7 Амма Саулниң оғли Йонатанниң пәрзәнди Мефибошетни падиша айиди. Чүнки Давут билән Саулниң оғли Йонатанниң арисида Йәһваниң алдида қәсәм ичилгән сәвәвидин, у уни айрип қалди. 8 Шуниң билән падиша Саулниң дедиги, Айяһниң қизи Ризпаһниң икки оғли Армони билән Мемфибошетни вә Махоладин болған Верзилайниң оғли Адриилға Саулниң қизи Микал тәрбийиләп бәргән бәш оғлини бәрди. 9 Падиша уларни гибионлуқларниң қолиға тапшурди вә улар Саулниң әвладини Йәһваниң алдида тағда дарға есивәтти. Йәттә оғул арпиниң омиси башланғанда, оминиң дәсләпки күнлиридә өлтүрүлди. 10 Шу чағда Айяһниң қизи Ризпаһ тағда өзигә канапни селип, шу җайда оминиң бешидин тартип, асмандин ямғур яққичә олтарди. У җәсәтләргә қушларниң олтиришиға вә ахшими дала һайванлириниң уларни йейишигә рухсәт қилмиди.
11 Давутқа Саулниң дедиги, Айяһниң қизи Ризпаһ немә қиливатқини һәққидә хәвәр йәткүзүлди. 12 Шуниң билән Давут берип, Саулниң вә Йонатанниң гилиатлиқ Ябешниң турғунлири Бәйт-Шан мәйданидин оғрилап әкәлгән сүйәклирини елип кәлди. Филистиялиқлар Саул билән Йонатанни Гилбой теғида һалак қилғандин кейин шу йәрдә есивәткән еди. 13 Ушбу сүйәкләрни елип кәлгәндин кейин дарға есивәткәнләрниң сүйәклириму жиғилди. 14 Шундақ қилип, Саул һәм униң оғли Йонатанниң сүйәклири Бениамин зиминида, уларниң атиси Кишниң Зеладики қәбридә дәпин қилинди. Падиша әмир чүшәргән бойичә улар дәпин қилинди. Андин Худа өз зиминиға рәһим көрсәтти.
15 Филистиялиқларниң исраиллиқлар билән йәнә уруши башланди. Давут һәм қуллири униң билән берип, филистиялиқлар билән җәң қилди. Давут һерип қалди. 16 Шу вақитта Репайимниң әвладидин болған Йишби Давутни өлтүришни халиған еди. Униң нәйзисиниң еғирлиғи үч йерим килограммчә болуп, униң йеңи қиличи бар еди. 17 Лекин Зеруяниң оғли Абишай Давутқа ярдәмгә келип, филистиялиқни өлтүрди. Шу чағда Давутниң кишилири униңға ялвуруп: «Сиз биз билән башқа урушқа чиқмаң. Чүнки Исраилниң чириғи өчүп қалмисун!»— дәп, униңдин қәсәм беришни тәләп қилди.
18 Андин кейин Гобта филистиялиқлар билән болған урушта хушатлиқ Сибхай Репайимниң оғли Сатни уҗуқтурди.
19 Гобтики уруш вақтида бәйтләһәмлик Йаре-Оргимниң оғли Әлханан гатлиқ Голиатни һалак қилди. Униң нәйзисиниң яғач ғоли тоқумичиларниң асаслиқ тайиғидәк узун еди.
20 Шундақла Гатта уруш болди. Шу чағда репайимларниң әвладидин йәнә бир гәвдилик киши болди. Униң қоллирида һәм путлирида алтидин бармақлири, һәммиси болуп 24 бармиғи бар еди. 21 Бу киши Исраилни һақарәтлиди. Уни Давутниң Шимай исимлиқ акисиниң оғли Йонатан өлтүрди.
22 Мәзкүр төрт җәңчи Гаттин чиққан Репайимниң әвлади еди. Улар Давутниң һәм униң әскәрлириниң қолидин һалак болди.