Самуилниң 2-язмиси
24 Йәһваниң ғәзиви Исраилға йәнә қайниди, чүнки бирси Давутни исраиллиқларға қарши қоюп: «Бар, Исраил билән Йәһудани санап чиқ!»— дәп дәвәт қилди 2 Шуниң билән падиша униңда болған сәрдар Йоабқа: «Дандин тартип Бәршәбағичә болған Исраилниң барлиқ қәбилилирини өтүп, хәлиқниң һесавини елип чиқ! Маңа хәлиқниң санини билиш керәк»,— дәп буйриди. 3 Йоаб җававән: «Худайиңиз Йәһва хәлқиңизни йүз һәссә көпәйтсун! Буни тәхсирим падиша өз көзи билән көрсун. Амма немә үчүн тәхсирим падиша бу ишни қилғуси кәлмәктә?»— деди.
4 Лекин падишаниң сөзи Йоабтин вә әскириниң башчилириниң сөзидин ешип чүшүп, Йоаб башчилар билән Исраил хәлқиниң тизимға елинишини падиша намидин қилишқа маңди. 5 Улар Йордандин өтүп, Ароерда, Йазерниң қешидики Гад вадисиниң оттурида болған шәһәрниң оң тәрипидә қараргаһ билән тохтиди. 6 Улар Гилиатқа, Тахтим зиминиға вә Дан-Яанғичә һәм Сидонғичә барди. 7 Улар шундақла яхши қамдалған Тир шәһиригичә вә евейларниң һәм қананлиқларниң барлиқ шәһәрлиригә берип, Йәһуданиң җәнуп қисми Бәршәбағичә йәтти. 8 Шундақ қилип, улар пүткүл зиминни арилап, тоққуз ай вә жигирмә күн өткәндин кейин Йерусалимға қайтип кәлди. 9 Йоаб падишаға һесапланған хәлиқниң санини бәрди. Шундақ қилип, исраиллиқларниң қилич көтиридиған кишилириниң сани 800 000ни, йәһудийларниң болса 500 000 кишини көрсәтти.
10 Буниңдин кейин Давутниң жүриги хәлиқни санап чиққанлиғи үчүн ағришқа башлиди. Шуниң билән Давут Йәһваға илтиҗа қилип: «Мән бу ишни қилип, бәк еғир гуна өткүздүм. Йәһва Худа, қулуңниң бу әйивини кәчүргәйсән, чүнки мән интайин зор әқилсизлик қилдим!»— дәп ялвурди. 11 Давут әтигәнлиги турғанда, Йәһваниң сөзи Давутниң вәлийи Гад пәйғәмбәргә болди: 12 «Берип, Давутқа мундақ дегин: “Йәһва саңа сөз қилди. Мән саңа үч җазани тәклип қилимән. Өзәңгә бирини талавал, шундақ җазалаймән”». 13 Гад бу сөзләрни Давутқа җакалиди: «Йериңгә йәттә жил бойи ачарчилиқ кәлсунму яки дүшмәнлириңдин үч ай қачамсән вә улар сени қоғлайду, яки зиминиңда үч күн давамида елиң өлүм апитигә дучар болсунму? Әнди яхширақ ойлан, мени Әвәткүчигә қандақ җавап қайтуридиғиниң һәққидә». 14 Давут Гадқа җававән: «Мән зор қистаңлиқта, лекин биз Йәһваниң қолиға чүшкинимиз әвзәлдур, чүнки Униң рәһим-шәпқити бүйүк! Мән инсанниң қолидин өлмәй!»— деди.
15 Шуниң билән Йәһва җазани Исраилға кәлтүрди. Сәһәрликтин башлап бәлгүләнгән вақитқичә Дандин тартип Бәршәбағичә 70 000 адәм өлүп кәтти. 16 Пәриштә қолини Йерусалимға уни қириветишкә созғанда, Йәһва бу зулум тоғрилиқ қайғуруп, хәлиқни қириватқан пәриштигә: «Йетәрлик! Әнди қолуңни тартқин!»— деди. Шу вақитта Йәһваниң пәриштиси йәвусийлиқ Аравнаниң хаманида болған еди.
17 Давут хәлиқни қирғинчилиққа тутуватқан пәриштини көргинидә, Йәһваға: «Мана мән, мән гуна қилдим, бу қойларниң гунаси немидә? Демәкчим, Сениң қолуң мәндә һәм атамниң өйидә болсунчу!»— дәп ялвурди.
18 Шуниң билән мәзкүр күни Давутқа Гад келип: « Җүгә, йәвусийлиқ Аравнаниң хаманида Йәһваға қурбангаһ қойғин!»— деди. 19 Давут Гадниң сөзи бойичә берип, Йәһва униңға буйриғандәк, һәммә нәрсини қилди. 20 Аравна қариса, униңға падиша һәм униң қуллири келиватқинини көрди. Аравна алдиға чиқип, падишаға тизлинип тазим қилди. 21 Аравна: «Немишкә тәхсирим падиша өз қулиға кәлди?»— дәп сориди. Давут җавап бәргәч:«Хәлиқниң қирилишини тохтитиш үчүн, Йәһваға қурбангаһ ясашқа сиздин мошу хаманни сетивелишқа келиватимән»,— деди. 22 Аравна Давутқа: «Тәхсирим падиша өзигә керәк һәммә нәрсини елип, қурбанлиқ қилсун. Мана, буқилар көйдүрмә үчүн вә дан езидиған чанилар билән мал һайдайдиған таяқлар отунға ярайду. 23 Мана буниң барлиғини, падиша, Аравна сизгә бериду. Йәһва, сизниң Пәрвәрдигариңиз, сизгә шәпқәт көрсәткәй!»— деди.
24 Аравнаниң мошу гепигә падиша җававән: «Яқ, мән сиздин буниң һәммисини сетивалимән. Мән Пәрвәрдигарим Йәһваға бекарға һечбир көйдүрмә қурбанлиқ әкәлмәймән»,— дәп унимиди. Шундақ қилип, Давут хаманни вә буқиларни 50 шекәл күмүчкә сетивалди. 25 Шу җайда Давут Йәһваға қурбангаһни ясап, униңда көйдүрмини вә течлиқ қурбанлиқларни әкәлди. Шуниң билән Йәһва хәлиқкә рәһимлик көрситип, Исраилниң қирғинчилиғини тохтатти.