Тарихнамә 1-язма

10 Филистийәликләр Исраил билән җәң қилди, исраиллиқлар филистийәликләрдин қечип, Гилбой теғида һалак болди. 2 Филистийәликләр Саул вә униң оғуллирини қоғлап, Саулниң оғуллири Йонатан, Аминадаб вә Мәлкишуани өлтүрди. 3 Саул падишаниң қешида бәк шиддәтлик җәң болувататти. Буни оқ-ядин атқучилар байқиди вә у улардин қорқуп кәтти. 4 Шуниң билән Саул өз қурал көтәргүчисигә: «Қиличиңни чиқирип, маңа санчиғин, чүнки мону хәтнисизләр келип, мени мәсхириләрчә қийнимисун»,— деди. Лекин униң ярдәмчиси буниңға келишмиди, сәвәви бу иштин қорқатти. Шунда Саул қилични чиқирип, униңға жиқилди. 5 Қурал көтәргүчиси болса Саул падишаниң өлгинини көрүп, өзиму қиличиға жиқилип өлди. 6 Шундақ қилип, Саул һәм униң үч оғли вә пүткүл өйи биргә ахириға кәлди. 7 Тәвәдә яшиған барлиқ исраиллиқлар әскәрләрниң қечишини көрүп вә Саул падишаниң оғуллири билән һалак болғинини аңлап, шәһәрлирини ташлап, һәр яққа таришип кәтти. Филистийәликләр болса уларниң орунлириға келип маканлашти.

8 Әтиси филистийәликләр өлгәнләрдин кийимлирини елишқа кәлди вә Саул һәм униң оғуллириниң Гилбой теғида һалак болғанлиғини тапти. 9 Улар падишаниң кийимлирини йешип, бешини кесип елип, шундақла униң қуралини Филистия йеригә әвәтип, ушбу вақиә һәққидә бутлириниң һәрәмлиридә вә хәлқиниң ичидә җакалашни буйриди. 10 Саулниң қуралини худалириниң бутханилирида қойди, баш сүйигини болса Дагон ибадәтханисиниң темиға қақти.

11 Гилиадтики Ябеш филистийәликләр Саул билән немә қилғинини аңлиди. 12 Уларниң арисида әң җасурлар туруп берип, Саулниң вә униң оғуллириниң җәсәтлирини елип, уларни Ябешқа әкелип, шу йәрдики йоған дәрәқниң түвигә сүйәклирини көмди. Андин улар йәттә күн роза тутти.

13 Шундақ қилип, Саул Йәһваниң алдида қилған қанунсизлиғи үчүн өлди: у Йәһваниң сөзлирини сақлимиди вә сораш үчүн әрваларни чақирғучини издиди. 14 У Йәһвадин җавап күтмиди, шуниң үчүн У уни йоқ қилди вә падишалиқни Йишайниң оғли Давутқа өткүзди.