Тарихнамә 1-язма
28 Давут падиша Йерусалимда Исраилда рәһбәрлик қилидиған барлиғини жиғди: қәбилиләрниң башлиқлирини, новәтләрниң башчилирини, падишаға хизмәт қилидиған миңбешиларни, йүзбешиларни, падишаниң һәм оғуллириниң падилириға вә пүткүл мал-мүлкигә қариғучиларни, шундақла әмәлдарларни, һәрбий кишиләрни вә батурлиғи билән мәшһур болған һәрқандақ пухраларни. 2 Падиша Давут путиға туруп, мундақ деди:
«Мени тиңшаңлар, бурадәрлирим һәм хәлқим мениң! Мениң жүригимдә Пәрвәрдигарим Йәһваниң келишим сандуғи үчүн арамгаһ вә Худаниң аяқ асти тириги болуши үчүн өй селиш арминим болған еди вә мән уни селишқа тәйяр едим. 3 Амма һәққаний Худа маңа: “Мениң намимға өйни салғучи болма, чүнки сән һәрбий адәм болуп, қан төктүң”,— деди. 4 Лекин Исраилниң Худаси Йәһва пүткүл атам өйидин Исраилниң үстидин мәңгү падиша болушқа мени таллавалди. У Йәһудани алий һөкүмран болушқа таллиди, Йәһуда өйидә болса, атамниң өйини, атамниң оғуллири арисида болса, мени пүткүл Исраилниң үстидин падиша қилип қоюшқа илтипатини көрсәтти. 5 Мениң оғуллиримдин болса (сәвәви Йәһва маңа көплигән оғулларни бәрди) У оғлум Сулайманни Йәһва падишалиғи тәхтидә Исраилниң үстидин олтиришқа тайинлиди.
6 У маңа: “Сениң оғлуң Сулайман Маңа өй вә һойлилиримни салиду, чүнки Мән уни Өзәмгә оғуллиққа таллидим һәм Мән униң Атиси болумән. 7 Әгәр у Мениң вәсийәтлиримни вә тохтамлиримни, ушбу күнгичә әмәл қилғандәк, қаттиқ тутса, Мән униң падишалиғини әбәдий узартимән”,— дәп агаһландурди. 8 Әнди пүткүл Исраилниң көзичә, Йәһваниң жиғини алдида вә Рәббим Йәһваниң нәзәридә силәргә дәймән: “Мошу яхши йәргә егә болуп, уни өзәңлардин кейин мәңгү мирасқа әвладиңларға қалдуруш үчүн, Худаниң барлиқ вәсийәтлирини есиңларда сақлап тутуңлар.
9 Сән, оғлум Сулайман, атаңниң Худасини тонуп-билгин вә Униңға пүтүн жүригиң вә яхши тиләктики җениң билән хизмәт қилғин, чүнки Йәһва һәммә жүрәкләрни вә һәрқандақ пикир тәрзини синақтин өткүзиду. Әгәр Уни издисәң, чоқум Уни тапалайсән, һә, әгәр Уни қалдурсаң, Уму сени мәңгүгә рәт қилиду! 10 Демәк, қариғин: Йәһва сени муқәддәс җай үчүн өйни қурушқа таллиғанлиғидин, мәккәм болуп иш қил!”»
11 Шуниң билән Давут оғли Сулайманға дәһлизниң һәм униң ханилириниң, амбарларниң, жуқарқи һоҗриларниң, ичкәрки арамгаһларниң вә муқәддәс сандуқ үчүн бөлминиң сизмилирини бәрди. 12 Шундақла у муқәддәс роһ илһамида алған Йәһва өйи һойлилириниң, әтрапидики ашханиларниң, Худа өйи ғәзнилириниң вә муқәддәс затлар ғәзнилириниң сизмилирини,
13 роһаний һәм ләвий новәтлириниң тизимлирини, Йәһва ибадәтханисида һәрхил хизмәтләрниң көрсәтмилирини вә Йәһва өйигә тәләп қилинған барлиқ қачиларни өткүзди: 14 алтунни һәрқандақ алтун затларға керәклик салмиғи билән, хилму-хил еһтияҗларға муһтаҗ қачиларни, һәрқандақ күмүч затларни уларниң салмиғини көрситип, 15 алтун шамданларни һәм уларниң алтун чирақлирини салмиғи билән, шуниңдәкла салмиғи бойичә күмүч шамданларни чирақлири билән һәрқандақ хизмәттә пайдилиниши үчүн. 16 Тәғдим нанлар үстәллири үчүн алтунниң салмиғи, һәрбир алтун үстәл вә күмүч үстәл үчүн алтун билән күмүчниң салмиғи көрситилди. 17 Арилар, җавурлар, сап алтундин болған алтун тавақлар һәм сиркайлар, һәрқайсиниң салмиғи көрситилди, шуниңдәкла күмүч қачиларниң, һәрқайсиниң салмиғи билән. 18 Хушпурақ исриғи үчүн қурбангаһқа қуйма алтунниң салмиғи, Йәһваниң келишим сандуғини қанатлири билән йепип турған алтун хурабинлар үчүн алтунниң салмиғи көрситилди. 19 «Мошуниң һәммисини мән Йәһваниң қол астида түзүлгән хәт түпәйли өткүзүватимән. У мени мошу сизмиларда бәлгүләнгән барлиқ иш-һәрикәтләрни чүшинишкә әқил бәрди»,— деди Давут.
20 Андин Давут падиша оғли Сулайманға: «Чиң туруп, ғәйрәтлик болғин һәм қорқмай, дәһшәткә чүшмәй оқәт қилғин, чүнки Худайиң Йәһва, мениң Рәббим, сән биләндур! У сениңдин һәргиз чәтнимәйду вә Йәһваниң өйи үчүн керәклик ишни пүтәрмигичә, У сени қалдурмайду. 21 Мана, һәқ Худа ибадәтханисида һәрқандақ хизмәтни атқуруш үчүн, роһанийлар биләр ләвийләрниң новәтлири қоюлди. Сениңда һәрхил ишни бәҗириләйдиған ишләмчан адәмләр бар, улар уста-маһирлардур. Һәм башлиқлар, һәм пүткүл хәлиқ сениң буйруқлириңни орунлашқа тәйяр»,— дәп илһамландурди.