Әстәр
3 Андин кейин шаһ Ахашверош агаглиқ Һамадатаниң оғли Һаманни көтирип, уни башқилиридин пәриқләндүрүп, мәнсивини өзидә болған барлиқ шәйхләрдин егиз қойди. 2 Шуниң билән шаһниң дәрвазилирида хизмәт атқуридиған әмәлдарлар Һаманға тазим қилип, униң алдида жиқилип һөрмәт көрситәтти, чүнки шаһ өзи буни қилишқа әмир бәрди. Пәқәт Мордикай униңға жиқилип, тазим қилматти. 3 Шундақ вақитларда дәрвазилар сақчилири Мордикайға: «Немә үчүн сән шаһниң пәрманиға бойсунмайсән?»— дәп соришатти. 4 Улар буни һәр күни дәтти, лекин у тиңшиматти. Нәтиҗидә улар бу ишни Һаманға йәткүзүп, Мордикайниң иши туруп қаламду дәп, униң тамашисини көргүси кәлди, чүнки у өзиниң йәһудий екәнлигини уларға аян қилғанди.
5 Һаман болса, униң алдида Мордикайниң жиқилип тазим қилмайватқинини көрүп, ғәзәпкә толди. 6 Шу чағда униң үчүн пәқәт бир Мордикайға қол селиш азлиқ қилатти, сәвәви униңға Мордикайниң қайси хәлиқтин екәнлиги уқтурулған еди. Шуңлашқа Һаман Ахашверошниң пүткүл шаһлиғида яшаватқан Мордикайниң хәлқини қириветишни ойлиди.
7 Биринчи айда, йәни нисан ейида, Ахашверошниң 12-жили Һаманниң йүзи алдида пур яки чәкни ташлиди. Униң арқилиқ күнни, айни билишкә болатти. Шундақ қилип, чәк 12-айға, йәни адар ейиға чүшти. 8 Һаман Ахашверош шаһқа: «Силиниң дөлитиңиздә бир хәлиқ бар. У барлиқ өлкилириңизниң хәлиқлири арисида чечилип яшайду. Уларниң қанун-қаидилири башқа хәлиқләрниң қаидилиридин пәриқлиниду һәм улар шаһниң қанунлирини орунлимайду. Шаһимизға бу ишни бундақ қалдуруш болмамдекин. 9 Шаһимизға уларни қириветишни тохтам қилиш лайиқ әмәсму? Мән болсам, бу ишни бәҗириш үчүн, шәхсән өзәмдин 10 000 талант күмүчни шаһқа берәттим»,— дәп шаһни қутратти.
10 Андин шаһ қолидики үзүгини чиқирип, йәһудийларниң дүшмини, агаглиқ Һамадатаниң оғли Һаманға тапшурди. 11 Шаһ Һаманға: «Күмүчни һәм хәлиқни, саңа яқидиған қандақ иш қилишни лайиқ көрсәң, шундақ һәрикәт қилғин!»— дәп илһамландурди. 12 Шундақ қилип, биринчи айниң он үчинчи күни шаһниң катиплири чақиртилип, Һаман буйриғандәк, һәрқайси өлкиләрниң һакимлириға, һәрбир хәлиқниң башчилириға уларниң тилида, уларниң йезиқлири билән пәрман әвәтилди. Бу пәрман шаһ Ахашверошниң намидин йезилип, шаһниң үзүги билән тамғиланди.
13 Мәзкүр хәтләр чапармәнләр арқилиқ шаһниң барлиқ өлкилиригә йәткүзүлди. Уларда йәһудийларни кичигидин тартип қерисиғичә, балиларни һәм аялларни бир күндә, 12-айниң 13-күни, адар ейида қирип-өлтүрүп, уларниң мүлкини талан-тараҗ қилиш буйрулғанди. 14 Әсли нусхиниң көчәрмилирини һәрқандақ өлкигә йәткүзүш қаралған еди. Бу тохтам барлиқ хәлиқләр үчүн очуқ елан қилинди, чүнки улар көрситилгән күнгә тәйяр болуши күтүләтти. 15 Чапармәнләр шаһниң пәрмани бойичә чапсан жүгриди. Шундақла пайтәхт шәһири Суздиму мошундақ тохтам елан қилинди. Шаһ билән Һаман көңүл ечишқа олтарди, Суз шәһири болса паракәндиликкә чүшти.