Чиқиш
31 Йәһва Муса билән гепини давам қилип: 2 «Қара, Мән Йәһуда қәбилидин Хурниң оғли, Урияниң оғли Весилиилни исмидин атаватимән. 3 Униңда данишмәнлик, чүшәнчә, билимләр вә маһирлик һәрқандақ ишта болуши үчүн, Мән уни роһум билән толтуримән: 4 буни униң нийәтләрни әмәлгә ашуруши, алтун, күмүч һәм мис билән ишлиши 5 вә есил ташларни көзлүкләргә селиши үчүн уларни кесиш вә яғачтин һәрхил буюмларни ясап, униң үстидин ишлиши үчүндур. 6 Шундақла униңға ярдәмчи болушқа Мән Дан қәбилидин Ахисамах оғли Аголиавни бәлгүлидим вә барлиқ дана жүрәкликләрниң Мән әмир қилған һәммә нәрсиләрни қилалиши үчүн, қәлблиригә данишмәнликни салимән: 7 жиғин чедирини, гува сандуғини вә униңдики қапқини, чедирниң барлиқ затлирини, 8 үстәлни вә униң затлирини, таза алтундин шамданни вә униң затлирини, исриқ көйдүридиған қурбангаһни, 9 көйдүрмиләр үчүн қурбангаһни вә униң затлирини, дасни вә униң астидики қойғучни, 10 Һарун оғуллири билән роһанийлиқ хизмәтни атқуруши үчүн нәпис кийимни, йәни баш роһанийниң вә униң оғуллириниң муқәддәс кийимлирини, 11 Майлайдиған майни вә муқәддәс җай үчүн хушпурақлиқ исриқни. Улар барлиқ нәрсини, Мән саңа буйруғандәк, қилиду»,— деди.
12 Йәһва Мусаға: 13 «Сән Исраил оғуллириға мундақ ейтқин: “Чоқум Мениң шәнбилиримни орунлаңлар, чүнки Мән Йәһва силәрни муқәддәсләватқинимни билишиңлар үчүн, бу карамәт Мениң һәм силәрниң араңларда әвлаттин әвлатқичә болиду. 14 Шәнбигә әмәл қилиңлар, чүнки бу силәр үчүн муқәддәсликтур. Кимду-ким шәнбини булғиса, чоқум өлүмгә тартилсун. Бу күни ишләйдиған һәрқандақ җан өз хәлқидин уҗуқтурилиду. 15 Алтә күн ишләшкә болиду, йәттинчи күни болса — бу пүтүнләй дәм елишниң шәнбиси. Бу Йәһва үчүн муқәддәсликтур. Шәнбидә ишлигән һәрқандақ киши җәзмән өлүмгә тартилиду. 16 Исраил оғуллири шәнбини сақлисун, уни әвлаттин әвлатқа орунлисун. У келишим мәңгүгә. 17 Бу Мениң билән Исраил оғуллириниң мәңгүгә карамити, чунки алтә күн ичидә Йәһва асман билән йәрни яратти, йәттинчи күни болса ишини тохтитип, дәм елишқа башлиди”»,— деди.
18 Синай теғида Муса билән сөзләшни түгитип, Худа униңға Шаһадәтнаминиң икки япилақ ташни, Рәбниң қоли билән йезилған япилақ ташларни бәрди.