Пәнд-нәсиһәтләр
22 Яхши нам-атақ зор байлиқтин яхши.
Илтипат күмүч билән алтундин яхши.
2 Бай һәм гадай бир-бирини көриду,
Иккилисини Йәһва Худа яратти.
3 Парасәтлик киши ховупни көрүп,
Йошуруниду, һә, тәҗрибисизләр болса,
Сизиқтин өтүп, җазалиниду.
4 Мулайимлиқниң соғиси — Йәһвадин қорқуш,
Байлиқ, шәрәп һәм һаятлиқ.
5 Мунапиқ кишиниң йолида тикәнләр билән
Қармақлар өсиду, лекин ким җенини айиса,
У улардин нери болиду.
6 Балини кичигидин дурус йолға үгәт:
У қериғандиму шу йолдин чиқмайду.
7 Бай гадайниң үстидин һөкүм қилиду,
Қәриздар қәриз бәргүчиниң қули.
8 Яманлиқни тәргән дәртни жиғиду
Вә униң қәһрий һасиси суниду.
9 Мәрт-мәрданә киши бәрикәтлиниду,
Чүнки у кәмбәғәлләргә нан бериду.
10 Шаңхони қоғлавәт, шу чағда маҗра,
Җедәл вә талаш-тартиш түгәйду.
11 Ким жүрәк паклиғи вә еғиз майлиғини
Яхши көрсә, падиша униң достидур.
12 Йәһваниң назарити тәлимни күзитиду,
Чекингәнләр сөзлирини У бемәна қилиду.
13 Һорун жиғлайду: «Кочида шир жүриду,
Мәйдан мәркизидә мени өлтүриду!»
14 Паһишиләрниң еғизлири — чоңқур ора.
Кимгә Йәһваниң ғәзиви қайниса,
У ушбу орунға чүшүп кетиду.
15 Яш жигит қәлбигә наданлиқ қаттиқ чаплашти,
Лекин пәқәт тәлим тайиғи
Уни жирақлаштуралайду.
16 Гадайни өз пайдиси үчүн рәнҗиткән
Вә байларға һәдийәләрни беридиған киши
Өзи гадайлишип кетиду.
17 Қулиғиңни даналарниң гәплиригә сал,
Мән үгүтиватқан тәлимгә жүригиңни яқ,
18 Чүнки уларни қәлбиңдә сақлисаң,
Бәхитни һис қилисән вә улар дайим
Тәйяргәрлик билән еғизиңда болиду.
19 Йәһваға үмүтиңни бағлишиң үчүн,
Мән саңа бүгүн буларни ейтиватимән.
20 Мана, мән саңа нәсиһәтләр билән
Тәлимләрниң әң асасийлирини яздим,
21 Сени һәқиқәт сөзлириниң һәқлигигә үгитиш,
Әвәткүчиләрниң арзу-үмүтлирини
Ақлишиң үчүн йезилди.
22 Қәмбәғәлни у йоқсул сәвәвидин хапа қилма
Вә бечарини сот дәрвазилири
Алдида тәқиплигүчи болма.
23 Чүнки Йәһва уларниң ишиниң мәнасиға чөкүп,
Булаңчиларниң җенини алиду.
24 Териккәк адәм билән достлашма вә
Аччиғи яман билән муамилә қилма,
25 Сәвәви, униң қилиқлириға үгинип,
Җениңни қармаққа тутуп бәрисән.
26 Башқа бирсиниң қәризлири үчүн қол
Қисқанлардин болма, башқиси үчүн
Кепиллик бәриштин жирақ тур.
27 Әгәр сениңда уни төләйдиған нәрсәң болмиса,
Унда астиңдин орун-көрпәңни
Тартивелишқа ишни немишкә әкелисән?
28 Қедимий чегарә бәлгүлирини йөткимә,
Уни сениң әҗдатлириң ясиған еди.
29 Өз кәспидә уста кишини көргәндиңму?
Билгинки, ундақ киши аддий инсанларниң
Алдида әмәс, бәлки падишаларниң алдида
Туриду вә шуниңға лайиқ.