Марк
11 Улар Йерусалим шәһиригә, Зәйтун теғидики Бәйтпаҗи вә Бәйтания йезилириға йеқинлашқанда, Әйса алдидин икки шагиртини әвәтип, 2 уларға: «Алдиңлардики йезиға бериңлар. Униңға киргәндила адәмләрдин һечким минмигән бағлақлиқ хотәкни көрисиләр. Уни йешип, маңа елип келиңлар. 3 Әгәрдә бирси силәрдин: “Немишкә буни қиливатисиләр?”— дәп сориса,— “У Һакимдаримизға керәк болуп қалди, лекин кейин у дәрру қайтуруп бериду”, дәңлар»,— деди. 4 Шагиртлири берип, йол дохмушида бир өйниң ишиги йенида бағланған хотәкни көрди. Улар уни йәшти. 5 Бирақ әшу йәрдә турған бәзи кишиләр: «Силәр немә қиливатисиләр? Немә үчүн хотәкни йешиватисиләр?»— дәп сорашти. 6 Шагиртлар, уларға Әйса үгәткәндәк, деди вә кишиләр уларни тосумиди.
7 Улар хотәкни Әйсаниң алдиға әкелип, униң үстигә өзлириниң чапанлирини япти һәм Әйса униңға минди. 8 Нурғунлиған адәмләр йолға өзлириниң чапанлирини, йәнә бирлири далаларда кәскән йешил шахларни йейишқа башлиди. 9 Алдида һәм арқисида маңғанлар тохтимай: «Саңа ялвуримиз, қутқузғина! Йәһваниң исмини дәп маңғучи мубарәк болсун! 10 Әҗдадимиз Давутниң йеқинлишиватқан Падишалиғи мубарәк болсун! Әрштики Саңа ялвуримиз, уни қутқузғина!»— дәп вақирашти. 11 Әйса Йерусалимға келип, мәркизий ибадәтханиға кирди. У әтрапиға көз жүгәртти вә вақит кәч болғанлиқтин, у 12 шагирти билән Бәйтанияға кәтти.
12 Әтиси Бәйтаниядин чиққанда униң қосиғи ачти. 13 Жирақтин йопурмақлири бар әнҗирни байқап, у униңда мевә бармекин дәп, йениға барди. Бирақ йеқинлашқанда, униңда йопурмақлардин башқа һечнәрсә тапалмиди, сәвәви, техи әнҗир мевилирини жиғидиған вақит әмәс еди. 14 Шу чағда у әнҗиргә: «Әнди сениңдин һечким мевә йемигәй»,— деди. Шагиртлири буни аңлиди.
15 Андин улар Йерусалимға кәлди. Мәркизий ибадәтханиға кирип, Әйса шу җайдин елим-сетим қиливатқанларни қоғлашқа башлиди. У пул алмаштурғучиларниң үстәллирини һәм кәптәр сатқучиларниң бәлдиңлирини өрүп ташлиди 16 вә һечкимгә һечнәрсини һәрәм арқилиқ елип өтүшкә рухсәт қилмиди. 17 У шундақла хәлиқкә тәлим берип: «Муқәддәс Язмиларда: “Мениң өйүм барлиқ хәлиқләр үчүн дуа өйи дәп атилиду”, дейилмигәнму? Силәр болсаңлар уни қарақчиларниң маканиға айландурупсиләр!»— деди. 18 Буни чоң роһанийлар һәм Тәврат устазлириму аңлиди вә Әйсани өлтүрүшниң пурситини издәшкә башлиди. Улар униңдин қорқушатти, чүнки барлиқ хәлиқ униң тәлиматиға һәйран болушуп, кизиқатти.
19 Кәчқурунлуғи улар, адәттикидәк, шәһәрдин чиқип кәтти. 20 Әтиси таң сәһәрдә әнҗирниң йенидин өтүветип, униң һәтта йилтизиғичә қуруп кәткәнлигини көрди. 21 Шуниң билән Петрус есиға елип, Әйсаға: «Устаз, қариғина! Сән қарғиған әнҗир қуруп кетипту»,— деди. 22 Әйса җававән: «Пәрвәрдигарға етиқатиңлар болсун. 23 Силәргә һәқни ейтиватимәнки, әгәр кимду-бирси мону таққа: “Қозғилип, деңизға ташлан”, дәп ейтқиниға гуман қилмай ишәнсә, шундақ болиду. 24 Шуңлашка силәргә дәймәнки, немә тоғрисида сорисаңлар һәм дуа қилсаңлар, шуни алдим дәп ишиниңлар — һәм у силәрдә болиду. 25 Вә силәр туруп дуа қилғанда, асмандики Атаңлар силәрниң қилмишлириңларни кәчүрүши үчүн, силәрму башқиларға наразилиғиңлар болса, һәммини кәчүрүңлар»,— деди. 26 *——
27 Буниңдин кейин улар яңливаштин Йерусалимға кәлди. Әйса һәрәмдә жүргәндә, униң қешиға чоң роһанийлар билән Тәврат устазлири һәм ақсақаллар келишип, 28 униңдин: «Қандақ һоқуқ билән сән бу ишларни қиливатисән? Һәм ким саңа бу һоқуқни бәрди?»— дәп сориди. 29 Әйса уларға: «Мәнму силәргә бир соал қояй. Әгәр җавап бәрсәңлар, мәнму силәргә буларни қандақ һоқуқ билән қиливатқинимни ейтип беримән. 30 Йәһияниң чөмдүрүш һоқуқи асмандин болдиму яки адәмләрдинму? Ейтиңлара маңа»,— деди. 31 Улар өзара муназирә қилишип: «Әгәр “Асмандин”, десәк, у: “Немишкә униңға ишәнмидиңлар?” — дәйду. 32 Әгәр: “Адәмләрдин” десәкчу?...» Амма улар хәлиқтин қорқатти, чүнки барлиғи Йәһияни һәқиқий пәйғәмбәр дәп санатти. 33 Буниң билән улар Әйсаға: «Билмәймиз»,— деди. Әйса уларға җававән: «Ундақ болса, мәнму силәргә бу ишларни қандақ һоқуқ билән қиливатқинимни ейтмаймән»,— деди.