Коринтлиқларға 1-хәт

16 Муқәддәсләр үчүн жиғилидиған ианиләр тоғрилиқ сөзгә кәлсәк, Галатиядики җамаәтләргә көрсәтмә бәргинимдәк, силәрму шундақ қилиңлар. 2 Мән кәлгәндә ианиләрни жиғмаслиқ үчүн, һәптиниң биринчи күнидә һәрбириңлар һалиңларға қарап, ианә жиғип қоюңлар. 3 Кәлгинимдә, силәр хәтлириңларда мақуллиған адәмләрни һәдийәлириңларни Йерусалимға апиришқа әвәтимән. 4 Әгәр мениңму шу йәргә беришим керәк болса, улар мениң билән бариду.

5 Силәргә Македонийәдин өткәндин кейин келимән, чүнки мән Македонийә арқилиқ өтүмән. 6 Бәлким, мениң өтмәкчи болған җайимға бираз узитип қоюшуңлар үчүн, силәрдә бираз тохтаймән яки һәтта қишлаймән. 7 Силәр билән һазир йол үстидила үзә көрүшишни халимаймән, бәлки әгәр Йәһва мақул көрсә, бирнәччә вақит силәрдә қелишни үмүт қилимән. 8 Әфәстә Әллигинчи күни мәйримигичә болумән, 9 чүнки алдимда йоған ишик ечилди һәм униң билән паалийәткә имканийәт, лекин қаршилашқучилар көп.

10 Әгәр Тимотий кәлсә, униң араңларда қорқмай жүрүшигә шараит яритиңлар, чүнки у мениңдәкла Йәһваниң ишини қиливатмақта. 11 Шуңлашқа һечким уни камситмисун. У маңа келиши үчүн, чүнки мән уни бурадәрләр билән күтмәктимән, уни течлиқта узитип қоюңлар.

12 Бурадәримиз Аполосқа кәлсәк, мән униңдин силәргә бурадәрләр билән беришини интайин өтүндүм, лекин у һазир беришқа унимиди, у мүмкинчилик болғанда, бариду.

13 Һошияр болуңлар, етиқатта чиң туруңлар, җасурлуқта мустәһкәмлиниңлар. 14 Һәммә нәрсә силәрдә меһир-муһәббәт билән қилинсун.

15 Қериндашлар, силәргә нәсиһәт берәй: силәр билисиләрки, Истипанниң өйидикиләр — Ахаяниң дәсләпки мевилири һәм улар муқәддәсләргә болған хизмәткә өзлирини беғишлиди. 16 Силәрму мошундақ адәмләргә һәм биз билән һәрқандақ хизмәтдашқа һәмкарлишиңлар вә беқиниңлар. 17 Мән болсам Истипанниң, Фортунатниң һәм Ахаикниң йенимда болушиға хошалмән, чүнки улар силәрниң йоқлуғиңларни билиндүрмиди. 18 Улар мениң һәм силәрниң роһуңларни илһамландурди. Шуңа мошундақ кишиләрни әтивалап жүрүңлар.

19 Асиядики җамаәтләр силәргә салимини йоллаватиду. Силәргә Акила вә Приска һәм уларниң өйидики җамаәт қизғин салам йоллаватиду. 20 Барлиқ қериндашлар силәргә салам ейтиватиду. Бир-бириңларни муқәддәс сөйүш билән қарши елиңлар.

21 Мана, мәнки Паул өз қолум билән силәргә салам йезиватимән.

22 Ким Һакимдаримизни сөймисә, ләнәткә учрисун! Һәй, Һакимдаримиз, кәлгәйсән! 23 Һакимдаримиз Әйсаниң мол меһирлиги силәр билән болғай. 24 Мениң меһир-муһәббитим Мәсиһ Әйса билән бирликтә болған силәр һәммиңлар билән болсун.