Филипиликләргә
3 Қериндашлирим, Пәрвәрдигаримизниң хизмитидә тохтимай шатлиниңлар. Буларни силәргә қайта йезиш мән үчүн аваричилиқ әмәс, бәлки силәрни бу ховупсизландуриду.
2 Иштлардин пәхәс болуңлар. Зиян кәлтүридиғанлардин пәхәс болуңлар. Хәтнә тәрәпдарлиридин пәхәс болуңлар. 3 һәқиқий хәтнә биздә, Худаниң роһи арқилиқ муқәддәс ибадәт қилғучиларда һәм тәнгә таянмай, Мәсиһ Әйса билән пәхирләнгәнләрдидур. 4 Гәрчә мениңму, башқилардин көрә, тәнгә тайинидиған асаслирим көп.
Әгәр кимду-бирси инсанлардәк ишинидиған асаслири бар дәп ойлиса, мәндә техиму шундақ: 5 туғулуп, сәккизинчи күни хәтнә қилиндим, Исраил хәлқидин, Бениамин қәбилисидин, ибранийлардин туғулған ибраниймән. Қанун тәрипидин — пәрисий, 6 қизғинлиққа кәлсәк, мән — җамаәтниң тәқиплигүчиси, Тәврат қануни арқилиқ йетишидиған һәққанийлиқта — әйипсиздим. 7 Шуларға аит еришкән муваппәқийәтлиримни Мәсиһ үчүн әһмийәтсиз нәрсә, дәп һесаплидим. 8 Раст, мән һәқиқәтән Һакимдарим Мәсиһ Әйса тоғрисидики бебаһа билим үчүн, һәммини бекар нәрсә, дәп һесаплаймән. Уни дәп, мән һәммә нәрсини йоқаттим вә Мәсиһкә еришишим үчүн, буларни әхләт, дәп санаймән. 9 Мәсиһ билән бирликтә болуш үчүн, Қанундин кәлгән өз һәққанийлиғим түпәйлидин әмәс, бәлки Мәсиһкә болған етиқат арқилиқ униңға интилимән. Ушбу етиқатта асасланған һәққанийлиқ Рәббимдин болған. 10 Әйсани вә униң тирилишиниң күчини вә униң өлүмигә охшайдиған өлүмгә өзәмни берип, униң азаплирида несивәмни елип, 11 шундақла, мүмкин болса, өлүмдин дәсләпки тирилишкә еришишимни көргүм келиду.
12 Мукапат алдим яки камаләткә йәттим демәкчи әмәсмән, лекин Мәсиһ Әйсаниң мени бир мәхсәт үчүн тапқиниға мәнму йетәләймәнму дәп, шуниңға тиришип интиливатимән. 13 Қериндашлар, мән өзәмни униңға йәттим дәп қаримаймән. Бир нәрсинила ейтай: өтмүшни унтуп, келәчәккә интилимән. 14 Мән Худаниң Мәсиһ Әйса арқилиқ асманға чақирилиш мукапитини елиш үчүн, шу мәхсәткә бар күчүмни селиватимән. 15 Келиңлар, ким роһий пишип-йетилгән болса, шундақ пикир жүргүзәйли. Әгәр башқичә ой-пикирдә болсаңлар, Худа дурус пикир тәрзини силәргә ечип бериду. 16 Қандақла болмисун, йетишкәнлиримизгә әгишип, кәлгүсидиму мошу орунлаштурулған тәртип бойичә қәдәм басайли.
17 Қериндашлар, маңа тәқлит қилиңлар вә биздә көргән үлгә бойичә иш тутуватқанларға беқиңлар. 18 Чүнки силәргә көп қетим ейтқинимдәк вә һазирму һәтта көз яшлирим билән қайтилаймәнки, нурғунлири Мәсиһниң азап түвригиниң дүшмәнлиридәк һәрикәт қилмақта. 19 Уларниң ахири — һалакәт, уларниң худаси — қарни, уларниң шөһрити — шәрмәндичиликтә вә улар йәрдикинила ойлайду. 20 Бизниң пухралиғимиз болса — асмандидур, биз дәл шу җайдин ниҗаткаримизниң, Һакимдаримиз Әйса Мәсиһниң келишини тақәтсизлик билән күтүватимиз. 21 У өз қудритиниң һәрикитигә бенаән һәммә нәрсини өзигә беқиндуралайдиған күчи билән бизниң пәсләштүрүлгән тәнлиримизни өзиниң шан-шәрәплик тенигә охшитип өзгәртиду.