Тимотийға 2-хәт
4 Тәңриниң вә тирикләр билән өлгәнләрни сорақ қилидиған Мәсиһ Әйсаниң алдида униң ашкарә болушини вә униң Падишалиғиниң һөкүмранлиғи кәлгичә, саңа җиддийлиқ билән буйримән: 2 Худаниң сөзини вәз қил, буни тохтатмай қолайлиқ вә қолайсиз вақиттиму қилғин, ашкарила, тәнбиһлә, барчә сәвирлик вә үгитиш устилиғиң билән нәсиһәт қил. 3 Чүнки сағлам тәлимгә йол бәрмәйдиған вақит келиду вә һәвәслири бойичә өзлириниң қулиғиға хуш яқидиған сөзләрни ейтидиған устазларни улар издәйду. 4 Кишиләр һәқиқәтни тиңшашни тохтитиду һәм әпсанә-ривайәтләргә ишиниду. 5 Бирақ сән һәммә җәһәттин сәгәкликни сақла, явузлуққа чида, хуш хәвәрниң вәзилик иши билән шуғуллан, өзәңниң хизмитини толуқ мөлчәрдә атқур.
6 Мән болсам, ичимлик һәдийәсидәк қурбангаһқа төкүлүватимән вә мениң азатлиниш вақтим интайин йеқинлашти. 7 Мән шавкәтлик күрәш жүргүздүм, мусапини ахириғичә жүгридим, етиқатни сақлидим. 8 Мошу вақиттин башлап, һәққанийлиқ таҗиси мени күтмәктә. Униң билән шу күни мени вә пәқәт менила әмәс, бәлки униң ашкарилинишини тақәтсизлик билән күткән барлиғини Һакимдаримиз — һәққаний Сотчи мукапатлайду.
9 Маңа чапсанирақ келиш үчүн, бар мүмкинчиликләрни қилғин, 10 чүнки Димас мошу дунияға муһәббәт бағлап, мени ташлап Салоникаға кәтти. Крискент — Галатияға, Тит Далматияға кәтти. 11 Йенимда ялғуз Луқа бар. Маркни өзәң билән елип кәл, чүнки у маңа хизмәт үчүн пайдилиқтур. 12 Тихикни мән Әфәскә әвәтивәттим. 13 Келишиңдә, Троададики Карпта қалдурған йепинчамни вә түртәклиримни, болупму терә түртәклиримни, елип кәл.
14 Мискәр Искәндәр маңа көп зиянкәшлик қилди — Йәһва униң ишлириға лайиқ қайтуриду. 15 Сәнму униңдин пәхәс бол, чүнки у бизниң сөзлиримизгә һәддидин ташқири қаршилашти.
16 Мән биринчи қетим өзәмни һимайә қилғинимда, һечким мән тәрәптә болмиди, һәммиси мени ташлап кәтти. Худадин бу уларниң бойниға артилмисун. 17 Амма Һакимдарим йенимда болуп, мениң арқилиқ вәз толуғи билән әмәлгә ашурулуши һәм уни барлиқ хәлиқләр аңлиши үчүн, маңа күч бәрди. Шуңа мән шир еғизидин қутулдим. 18 Һакимдарим мени һәрқандақ зулумдин қутулдуруп, өзиниң асмандики Падишалиғи үчүн қутқузиду. Униңға әбәдий шан-шөһрәт болсун, амин!
19 Приска билән Акилаға вә Онисифорниң аилисидикиләргә мениңдин салам ейтип қой.
20 Ераст Коринтта қалди, Трофимни болса, ағрип қалғанлиғи сәвәвидин Милетта қалдурдум. 21 Қишқичә келивелиш үчүн тиришқин.
Евбул, Пуд, Лин, Клавдия вә барлиқ бурадәрләрдин саңа салам.
22 Һакимдаримиз көрситиватқан роһуң үчүн бәрикәтлигәй. Униң мол меһирлиги силәр билән болғай!