Петрусниң 2-хети
1 Әйса Мәсиһниң қули вә әлчиси Симун Петрустин — Худайимизниң һәққанийлиғи вә Ниҗаткаримиз Әйса Мәсиһниң һәққанийлиғи түпәйлидин биз қатарида бебаһа етиқатқа муйәссәр болғанларға салам.
2 Худа вә йәнә Һакимдаримиз Әйса Мәсиһ һәққидики тоғра билим арқилиқ инайәт һәм течлиқ силәрдә техиму көпәйсун. 3 Сәвәви, Униң илаһий қудрити бизгә Тәңримизгә вапа болуп яшаш үчүн, һаҗәтлик һәммә нәрсә бәрди. Бу болса бизни Өзигә шөһрити вә меһрибанлиғи билән Чақирғучи тоғрилиқ алған ениқ билим арқилиқ мүмкин болди. 4 Дунияда шәһванийлиқ арқисида һөкүм сүрүватқан әхлақсизлиқтин азат болуп, илаһий тәбиәткә ортақлишишиңлар үчүн, У қиммәтбаһалиқ бүйүк вәдиләрни һәдийә қилди.
5 Мана мошу сәвәптин, өз тәрипиңлардин барчә тиришчанлиқ көрситип, етиқатиңларни һәққанийлиқ билән, һәққанийлиқни билим билән, 6 билимни өзини тутуш билән, өзини тутушни тәқабиллиқ билән, тәқабиллиқни Худаға вапалиқ билән, 7 Худаға вапалиқни қериндашлиқ сөйгү билән, қериндашлиқ сөйгүни һәммисигә меһир-муһәббәт билән толтуруңлар. 8 Әгәр буларниң һәммиси силәрдә болса һәм мол болса, у чағда Һакимдаримиз Әйса Мәсиһни тоғра тонушта паалийәтсиз қалмайсиләр вә көп мевиләрни әкелисиләр.
9 Бу хисләтләргә егә болмиған киши кор вә нурдин көзлирини жумувелип, авалқи гуналиридин тазиланғанлиғини унтуп қалғандур. 10 Шундақ екән, қериндашлар, чақирилишиңларға вә таллинишиңларға лайиқ болуп қелиш үчүн, техиму көпирәк күч чиқириңлар. Мошундақ қилсаңлар, йолдин һечқачан таймайсиләр вә етиқаттин чекинмәйсиләр. 11 Силәргә Һакимдаримиз вә Ниҗаткаримиз Әйса Мәсиһниң мәңгү Падишалиғиға кириш йоли кәң ечилиду.
12 Мана немишкә мән силәргә бу нәрсиләрни билишиңларға вә өзәңлар қобул қилған һәқиқәттә мәккәм турушуңларға қаримай, бу һәққидә дайим әслитип турмақчимән. 13 Һазирчә мошу инсаний тәндә* екәнмән, шуңлашқа әслитиш билән силәрни ойғитип турушни өз пәрзим дәп һесаплаймән. 14 Һакимдаримиз Әйса Мәсиһ маңа мәлум қилғандәк, йеқинда мошу тенимдин айрилишимни билимән. 15 Шуңлашқа, мән кәткәндин кейин бу сөзлиримни дайим әсләп турушуңлар үчүн, һазир қолумдин кәлгининиң барлиғини қилимән.
16 Силәргә Һакимдаримиз Әйса Мәсиһниң қудрити вә һазирлиниши һәққидә ейтип бәргәч, биз кишиләрниң маһиранә тоқулған әпсанилиригә асасланмидуқ. Биз өзүмиз униң улуқлинишиниң гувачиси болдуқ. 17 Шан-шөһрәтниң Пәрвәрдигари: «Бу Мән мақуллайдиған Мениң сөйүмлүк Оғлум», дегән сөзләрни ейтқанда, у Атиси Худадин шан-шәрәп вә шөһрәткә еришти. 18 Һә, асмандин яңриған бу сөзләрни, биз униң билән муқәддәс тағда турғинимизда аңлиған едуқ.
19 Әйнә шу сәвәптин, биз бәшарәтлик сөзгә техиму көпирәк ишинимиз. Күн йорумиғичә вә таң юлтузи чиқмиғичә, силәр қараңғу җайда — қәлбиңларда чирақтәк нур чечип турған шу сөзгә мураҗиәт қилип, тоғра қиливатисиләр. 20 Силәр әң авал шуни билисиләрки, Муқәддәс Язмилардики һечбир бәшарәт бирәвниң шәхсий изаһлиридин орунланмайду. 21 Чүнки бәшарәт һечқачан инсанниң ирадиси бойичә пәйда болмиған, әксичә, адәмләр муқәддәс роһниң башчилиғида Худаниң намидин сөзлигән.