Коринтлиқларға 1-хәт
14 Меһир-муһәббәткә интилиңлар, һәмдә қизғинлиқ билән роһий һәдийәләрниму издәңлар, болупму бәшарәт ейтишни. 2 Башқа тилда сөзләйдиған киши адәмләр билән әмәс, бәлки Худа билән сөзлишиду: у роһ арқилиқ муқәддәс сирларни ейтқини билән, һечким униңдин аңлиғинини чүшәнмәйду. 3 Бәшарәт қилғучи өз сөзлири билән адәмләрни ғәйрәтләндүрүп, тәсәлли бериду. 4 Ғәйри тилда сөзлигүчи өзини мустәһкәмләйду, бәшарәт қилғучи болса, җамаәтни мустәһкәмләйду. 5 Мән һәммиңларниң һәрхил тилларда сөзлишиңларни халиған болар едим, гәрчә силәрниң бәшарәт қилишиңлар әвзәлирәк еди. Һә, бәшарәт қилғучи тилда сөзлигүчидин артуғирақ, пәқәт у җамаәтниң мустәһкәмлиниши үчүн, йәнә тәрҗимә қилған болса. 6 Қериндашлирим, әгәр мән келип, силәр билән һәрхил тилларда сөзлисәм, әгәр йә вәһийни, йә билимни, йә пәйғәмбәрликни, йә тәлимат бериш һәдийәсини қоллинип сөзлимисәм, силәргә қандақ пайда әкелимән?
7 Җансиз затларму, мәйли нәй болсун яки чилтар, зуван чиқириду. Бирақ әгәр униң аһаңлириниң пәрқи болмиса, униңдин чиққан сазниң немә билдүрүватқинини қандақ билгили болиду? 8 Һәқиқәтән, әгәр карнәй бәлгүлүк ениқ аһаң чиқармиса, кимму җәңгә тәйярлинар? 9 Шуниңдәкла, әгәр силәрму тилиңлар билән асан чүшәнмәйдиған сөзләрни қилсаңлар, немә демәкчи болғиниңларни ким чүшинәләйду? Силәр шамалға гәп қилғандәк болисиләр. 10 Дунияда шунчә көп тиллар бар, лекин уларниң һечқайсиси мәнасиз әмәс. 11 Әгәр мән ейтиливатқан гәп-сөзниң мәнасини чүшәнмисәм, сөзлигүчи үчүн мән чәтәллик болумән, сөзлигүчи мениң үчүнму чәтәлликтур. 12 Шуниңдәк, силәрму роһ һәдийәлирини қизғин издигәнликтин, җамаәтни мустәһкәмләш үчүн, уларға молчилиқта егә болушқа тиришиңлар.
13 Шуңа, башқа тилда сөзләйдиған киши тәрҗимә қилип берәлишини дуада сорисун. 14 Сәвәви, әгәр мән ғәйри тилда дуа қилсам, маңа һәдийә қилинған роһ дуа қилиду, әқлим болса мевисиз болиду. 15 Немә қилиш керәк? Һәдийә қилинған роһ биләнму дуа қилимән һәм өз әқлим биләнму дуа қилимән. Һәдийә қилинған роһум биләнму мәдһийиләймән һәм әқлим биләнму мәдһийиләймән. 16 Әгәр сән һәдийә қилинған роһ билән мәдһийә ейтсаң, беғишланмиған адәм сениң ейтиватқиниңни чүшәнмисә, сениң миннәтдарлиқ сөзлириңгә у қандақму «амин» дәйду? 17 Раст, миннәтдарлиқ дуасини яхши ейтисән, лекин башқисини бу мустәһкәмлимәйду. 18 Худаға шүкүр, мән һәммиңлардин қариғанда, көпирәк өзгә тилларда сөзләймән. 19 Амма җамаәттә силәргә нәсиһәт беришкә, башқа тилда 10 000 сөз ейтқандин көрә, өз әқлим билән бәш сөз ейтишни әвзәлирәк көримән.
20 Бурадәрләр, әқлиңлар билән балилардәк болмаңлар. Яманлиққа гөдәк болуңлар, чүшиниш қабилийитидә болса, чоңлардәк йетилиңлар. 21 Қанунда мундақ йезилған: «“Чәтәлликләрниң тиллири һәм ятларниң сөзлири билән бу хәлиққә сөзләймән, лекин шу чағдиму улар маңа қулақ салмайду”,— дәйду Йәһва». 22 Шуңа, тиллар — бу етиқатчилар үчүн әмәс, бәлки етиқатсизлар үчүн бәлгү, пәйғәмбәрлик болса — етиқатсизлар үчүн әмәс, бәлки етиқатчилар үчүн бәлгүдур. 23 Шуңлашқа, әгәр җамаәттә һәммиси өзгә тилларда сөзлисә, аддий яки беғишланмиған адәмләр кирип қалса, улар силәрни әқлидин адишип қапту, дейишмәмду? 24 Бирақ, әгәр һәммиңлар бәшарәт қилсаңлар вә етиқатсиз киши кирип қалса, у һәммиси билән паш қилиниду һәм өзини тәкшүрүшкә дәвәтлиниду. 25 Шу чағда униң қәлбиниң сирлири ашкарә болуп, у йәргә үз йеқип, Худаға тазим қилғач: «Һәқиқәтән, Худа силәрниң араңлардикән!»— дәп үндәйду.
26 Қериндашлирим, немә қилиш керәк? Силәр җәм болғиниңларда, бириңларда — зәбур нахшиси, йәнә бириңларда — тәлимат, кимду-бирсидә — вәһий, йәнә биридә — башқа тил, йәнә бирсидә тәрҗимә һәдийәси бар. Һәммә нәрсә мустәһкәмләш үчүн болсун. 27 Әгәр бирси ғәйри тилда сөзлисә, ундақлардин иккиси яки әң көпи үчи, новәт билән сөзлисун, кимду-бирси уларни тәрҗимә қилсун. 28 Әгәр тәрҗимә қилидиған һечким болмиса, җамаәттә үн чиқармай, өзигә вә Худаға ичидә сөзлисун. 29 Пәйғәмбәрләр болса, икки яки үчи сөзлисун, қалғанлар сөзлириниң мәнасиға чөксун. 30 Амма-лекин, шу йәрдә олтарған бирсигә вәһий берилсә, қалғанлар теч болсун. 31 Һәммәйлән үгиниши һәм илһамландурулуши үчүн, силәрниң барлиғиңларға новәт билән бәшарәт ейтишқа болиду. 32 Пәйғәмбәрләр берилгән роһниң һәдийәлирини тәртиплик ишләтсун, 33 чүнки Тәңри қалаймиқанчилиқниң әмәс, әксичә, течлиқниң Худасидур.
Муқәддәсләрниң барлиқ җамаәтлиридә бәлгүләнгәндәк, 34 аял кишиләр җамаәтләрдә үн чиқармисун, чүнки уларға сөзләшкә рухсәт қилинмайду. Қанун ейтқандәк, улар беқиништа болсун. 35 Әгәр улар бир нәрсини чүшәнмисә, өйлиридә өз әрлиридин сорисун, чүнки аял кишиниң җамаәттә сөзлиши налайиқ иштур.
36 Силәрдин Худаниң сөзи чиққанму яки пәқәт силәргила у йәткәнму?
37 Әгәр бирси өзини пәйғәмбәр яки униңға роһ һәдийә қилди, дәп ойлиса, мән силәргә язғинимни иқрар қилсун, чүнки бу Һакимдаримизниң вәсийити. 38 Бирақ бирси билмәсликтә қелишни халиса, у билмәсликтә һәм қалиду. 39 Демәк, қериндашлар, бәшарәт қилишқа интилиңлар, лекин өзгә тилларда сөзләшниму чәклимәңлар. 40 Пәқәт һәммә нәрсә тәртиплик һәм тәшкиллик һалда өтсун.