Петрусниң 1-хети
1 Әйса Мәсиһниң әлчиси Петрустин — Понт, Галатия, Кападокия, Асия*, Битиния өлкилиридә тарқилип, йәр йүзидә вақитлиқ яшаватқан талланғанларға салам. 2 Итаәтлик болушиңлар вә силәргә Әйса Мәсиһниң қени сепилиши үчүн, Атимиз Худаниң алдин-ала орунлаштуруши бойичә таллинип, муқәддәс роһ билән силәр муқәддәсләндиңлар.
Илаһим силәргә мол меһирлик вә течлиқ-аманлиқни техиму көпәйтип бәрсун.
3 Һакимдаримиз Әйса Мәсиһниң Атиси һәм Худаси мубарәк болсун, У Өзиниң йүксәк рәһимдиллиги бойичә Мәсиһниң өлүмдин тирилиши арқилиқ бизниң йеңидин туғулушимизға сәвәп болуп, тирик үмүтни әта қилди. 4 Бизни чиримас, нуқсансиз вә солмас мирасқа егә қилди. Бу мирас силәр үчүн асманда сақлиниватиду. 5 Силәр ахирқи вақитта ашкарә болудиған ниҗатқа еришишиңлар үчүн, етиқатиңлар арқилиқ Пәрвәрдигарниң қудрити асасида сақлиниватисиләр. 6 Гәрчә аз вақит, керәк болса, түрлүк синақлардин қайғурсаңларму, силәр буниңға наһайити хурсән болуватисиләр. 7 Синалған етиқатиңлар Әйса Мәсиһниң аян болуш вақтида силәргә махташ, шөһрәт һәм шәрәп әкелиду. Мундақ етиқатниң қәдри от билән синалған, амма әһмийәтсиз болуп кетидиған алтундин әзиздур. 8 Мәсиһни һечқачан көрмигән болсаңларму, уни сөйисиләр. Һазирму көрмигиниңларға қаримай, униңға ишинип, сөз билән ипадиләп болмайдиған дәриҗидә зор хошаллиққа чөмүватисиләр. 9 Сәвәви, етиқатиңларниң нәтиҗиси — җанлириңларниң қутқузулуши.
10 Пәйғәмбәрләрниң тиришчанлиқ билән қилған издинишлири вә тәпсилий тәтқиқлири әйнә шу ниҗат билән бағлиқ еди. Силәрни күтүватқан мол меһирлик тоғрисида улар бәшарәтләрни ейтқан. 11 Улардики Худаниң роһи Мәсиһниң қачан вә қандақ вәзийәттә азап тартиши, кейинзә қандақ шәрәпкә еришиши тоғрисида гувалиқ бәргән. Шуниңдәк улар бу роһниң ярдимидә Мәсиһкә алақиси бар нәрсиләр қайси вақитқа тоғра келишини тинмай тәтқиқ қилған. 12 Һазир силәргә елан қилинған нәрсиләрни хәвәрлиши билән улар өзлиригә әмәс, силәргә хизмәт қилғини Рәббтин бу пәйғәмбәрләргә ечилған еди. Силәргә болса, бу нәрсиләрни асмандин әвәтилгән муқәддәс роһниң ярдими билән хуш хәвәрни тарқатқанлар җакалиди. Булар пәриштиләрму чүшинишкә бәк халиған нәрсиләрдур.
13 Шуңлашқа әқлиңларни ишқа селип, һәр нәрсидә сағлампикирликни сақлаңлар. Үмүтиңларни Әйса Мәсиһниң аян болуш вақтида силәргә көрситилинидиған инайәткә бағлаңлар. 14 Сөзгә киридиған балилардәк болуңлар, Худани билмигән вақтиңлардики һәвәслириңларға әнди берилмәңлар. 15 Лекин силәрни чақирған Муқәддәсниң үлгиси бойичә, силәрму барлиқ ишлириңларда муқәддәс болуңлар. 16 Сәвәви, Муқәддәс Язмиларда йезилған: «Муқәддәс болуңлар, чүнки Мән Муқәддәсмән».
17 Әгәр силәр һәркимниң ишлирини үз-хәтирсиз сотлайдиған Атиға мураҗиәт қилған екәнсиләр, мусапирлиқ дәвриңларда Униңдин қорқуп яшаңлар. 18 Чунки өзәңлар билисиләрки, ата-бовилириңлардин қалған бемәна һаят тәрзиниң қуллуғидин әркин болдуңлар, бу қиммитини йоқитидиған нәрсиләр — күмүч яки алтун билән әмәс, 19 бәлки нуқсансиз һәм булғанмиған Қоза болған Мәсиһниң бебаһа қени арқилиқ сетивелиндиңлар. 20 Һә, у һәққидә дунияниң асаси селиништин авал мәлум болғанди, бирақ у силәр үчүн вақитларниң ахирида рошән болди. 21 Силәр униңға бенаән Худаға ишиниватисиләр. Силәрдә Рәббимизгә етиқат вә үмүт болуши үчүн, У Мәсиһни өлүмдин тирилдүрүп, униңға шан-шөһрәт бәрди.
22 Әнди силәр һәқиқәткә қулақ селиш арқилиқ өзәңларни пак қилдиңлар, шуңа бир-бириңларни қериндашлардәк чин жүрәктин қизғин сөйүңлар. 23 Силәргә чирийдиған уруқтин әмәс, амма чиримайдиған уруқтин тирик вә мәңгү Худаниң сөзи арқилиқ йеңи туғулуш берилди. 24 Чүнки йезилғинидәк: «Барлиқ тән егилири от-чөптәк һәм уларниң шөһрити чөпниң гүлидәк. Чөп қуруп кетиду вә гүлму тозуп кетиду, 25 лекин Йәһваниң сөзи әбәт яшимақта». Һәм силәргә ейтилған хуш хәвәр — әйнә шу сөздур.