Петрусниң 2-хети
3 Әзизлирим, бу силәргә йезиватқан иккинчи хетим. Биринчи хетимдикидәк әсләтмиләр арқилиқ силәрниң сағлам пикир жүргүзүш қабилийитиңларни ойғатмақчимән. 2 Муқәддәс пәйғәмбәрләр ейтқан сөзләр һәм араңлардики әлчиләр арқилиқ Һакимдаримиз вә Ниҗаткаримизниң берилгән вәсийити ядиңларда болсун. 3 Һәммидин авал, ахирқи күнләрдә мәсхирә сөзләрни қилип, өз һәвәслиригә бенаән йол тутудиған мәсхиривазлар пәйда болушини билишиңлар керәк. 4 Улар: «Униң вәдиләнгән һазирлиниши қени? Чүнки дуния яритилғандин бери, ата-бовилиримиз өлүм уйқисиға кәткәндин башлап таки һазирғичә һәммә нәрсә шундақла туридиғу»,— дейишиду.
5 Лекин улар өзлири халиғинини тәстиқләп, һәтта қедимда асманниң пәйда болғанлиғиға вә Худаниң сөзи бойичә, йәр қуруқлиғиниң суниң оттурида жиғинчақ һаләттә чиқип турғанлиғиға көз жумиду. 6 Шуңлашқа сулар арқилиқ қедимки дуния су астида қелип, һалак болған еди. 7 Һазирқи асман вә йәр, әшу сөз бойичә, өрт үчүн сақлиниватиду вә рәзил инсанлар һалак қилинидиған қиямәт күни үчүн күзитиливатиду.
8 Һалбуки, әзизлирим, бир нәрсә есиңлардин чәттә қалмисун: Йәһва үчүн бир күн миң жилдәк вә миң жил бир күндәк. 9 Бәзилиригә кечиктүрүлүватқандәк туюлсиму, Йәһва бәргән вәдисини әмәлгә ашурушни кечиктүрмәйду, лекин силәргә сәвирлик қилмақта. У һечкимниң һалак болушини халимайду, амма һәммисиниң товва қилишини халайду. 10 Йәһваниң күни худди оғридәк келиду. Шу күни асман қаттиқ ушқатқандәк өтүп кетиду, асман һәм йәрниң тәркивий қисимлири болса, қизип көйүп, пүтүнләй гумран болиду. Йәр вә униңдики ишлар паш қилиниду.
11 Буларниң һәммиси мошундақ вәйран болса, у чағда силәрниң муқәддәс жүрүш-турушуңлар вә Рәббимизгә вападарлиғиңлар нәқәдәр болуши лазимдур! 12 Шуниң үчүн, Йәһваниң күниниң һазирлинишини күтүп, йәни көйүватқан асман вәйран болуп һәм йәрниң қизиған қурамлиқ қисимлири ерип кетишини есиңларда мәккәм тутуңлар. 13 Һалбуки, биз Униң вәдисигә бенаән, һәққанийлиқ һөкүм сүридиған йеңи асман билән йеңи йәрни күтүватимиз.
14 Шу сәвәптин, әзизлирим, буларни күтүветип, нәтиҗидә У силәрни дағланмиған, әйипсиз вә течлиқта яшаватқан инсанлар, дәп тепиши үчүн барчә имканийәт билән тиришиңлар. 15 Униңдин ташқири, Пәрвәрдигарниң сәвирчанлиғини қутқузулуш мүмкинчилиги дәп билиңлар. Қәдирдан бурадәримиз Паулму, униңға берилгән даналиқ билән силәргә бу һәққидә язған. 16 Бу тоғрилиқ у барлиқ хәтлиридә ейтиватиду. Амма шу хәтләрдә чүшинишкә қийин болған нәрсиләр бар, шуңа надан вә роһий җәһәттин аҗиз кишиләр Муқәддәс Язмиларниң башқа қисимлирини бурмилиғандәк, буларниму бурмилап, өзлирини һалакәткә учритиватиду.
17 Шуңа, әзизлирим, буларни алдин билгән екәнсиләр, өзлирини Худа қанунидин артуқ көргән адәмләр силәрни адаштурмаслиғи вә нәтиҗидә, дурус йолни йоқатмаслиғиңлар үчүн, еһтиятчан болуңлар. 18 Әксичә, Һакимдаримиз вә Ниҗаткаримиз Әйса Мәсиһ тоғрисида билимиңларни чоңқурлитиңлар вә униң мол меһирлиги силәрдә йәниму көпәйсун. Униңға һазир вә әбәдил-әбәт шан-шәрәп болсун! Амин.