Петрусниң 1-хети

5 Мәсиһ чәккән азапларниң гувачиси вә келәчәктә рошән болудиған шан-шәрәпниң иштракчиси һәм ақсақал сүпитидә мән — араңларда ақсақал болғанлардин илтимас қилимән: 2 силәргә ишинип тапшурулған Худаниң падисини мәҗбурий түрдә әмәс, бәлки пүткүл вуҗудуңлардин, һарам йол билән пайда көрүш үчүн әмәс, әксичә, ихлас билән беқиңлар, чүнки бу Худаға яқиду. 3 Рәббимизниң аманити үстидин һөкүмранлиқ қилмастин, падиға үлгә көрситиңлар. 4 Баш падичи рошән болғанда, силәр тозумайдиған шөһрәт таҗисини алисиләр.

5 Худди шуниңдәк силәр, яш бурадәрләр, чоңларға беқиниңлар. Барлиғиңлар бир-бириңларға муамилә қилишта мөмүн болуңлар, чүнки Худа чоңчиларға қаршилиқ көрситиду, мөмүнләргә болса, мол меһрини намайән қилиду.

6 Шуңлашқа Худаниң қудрәтлик қол астиға мулайимларчә бойсунуңлар, өз вақтида У силәрни көтириду. 7 Пүткүл ғәм-тәшвишлириңларни Униңға тапшуруңлар, чүнки У силәргә ғәмхорлуқ қилмақта. 8 Һошияр вә сағлампикирлик болуңлар! Дүшминиңлар Иблис бирәвни жутуветәй дәп, ширдәк ғарилдап, издәп жүриду. 9 Етиқатиңларда мустәһкәм болуп, униңға қарши туруңлар. Билип қоюңларки, дуниядики барчә етиқатдашлириңлар худди шундақ азапларға дучар болуватиду. 10 Пүткүл мол меһирликниң Худаси, Мәсиһ билән бирликтә болған силәрни мәңгү шан-шөһрәткә тәклип қилип, қисқа вақит азап тартқиниңлардин кейин, Өзи силәрниң үгинишиңларни ахириғичә йәткүзүп тамамлайду. У силәрни мустәһкәмләп, күчлүк һәм тәқабил қилиду. 11 Күч-қудрәт әбәттин-әбәткичә Униңкидур. Амин.

12 Мана, силәрни илһамландуруш үчүн вә Худаниң һәқиқий инайити һәққидә ихлас билән гува бериш үчүн, Рәббимизниң садиқ хизмәтчиси Силуанниң ярдими билән силәргә қисқичә яздим. Худаниң мол меһирлигидә мәккәм туруңлар. 13 Силәргә охшаш Бабилдики талланған ханим һәм шундақла оғлум Марк силәргә салам ейтиватиду. 14 Бир-бириңлар билән меһир-муһәббәтлик сөйүш арқилиқ саламлишиңлар.

Мәсиһ билән бирликтә болғанларға течлиқ-аманлиқ яр болсун!