Йоһан
18 Бу сөзләрдин кейин Әйса шагиртлири билән Кидрон вадиси тәрипидики баққа кирди. 2 Сатқун Йәһудаму бу җайни биләтти, чүнки Әйса шагиртлири билән у йәрдә пат-пат учришип туратти. 3 Шуңлашқа Йәһуда чоң роһанийлар вә пәрисийләр бөлүп бәргән бир топ ләшкәрләр һәм күзәтчиләрни елип, мәшъәлләр, чирақлар вә қураллар билән шу йәргә кәлди. 4 Әйса бешиға келидиған һәммә нәрсини билгәч, алдиға чиқип, улардин: «Кимни издәватисиләр?»— дәп сориди. 5 Улар: «Насирәлик Әйсани»,— дәп җавап беришти. Әйса: «Бу мән»,— деди. Униңға сатқунлуқ қилған Йәһудаму уларниң қатарида туратти.
6 Әйса: «Бу мән» дейишиғила, улар арқисиға чекинип, йәргә жиқилишти. 7 Әйса улардин йәнә бир қетим: «Кимни издәватисиләр?»— дәп сориди. «Насирәлик Әйсани»,— дейишти улар. 8 Әйса җававән: «Силәргә ейттимғу: бу мән. Әгәр менила издигән болсаңлар, қалғанларни қоюветиңлар»,— деди. 9 Униң илгири: «Һечбирини йоқатмай, уларни сақлап қалдим», дегән сөзи орунланди.
10 Шу чағда қиличи болған Симун Петрус уни чиқардидә, башроһанийниң қулини уруп, оң қулиғини чепивәтти. Қулниң исми Малх еди. 11 Лекин Әйса Петрусқа мундақ деди: «Қиличиңни ғилапқа сал! Маңа Атам бәргән қәдәһни ичмәймәнму?»
12 Шуниң билән ләшкәр топи, сәрдари һәм йәһудийлар әвәткән күзәтчиләр Әйсани тутуп бағлашти. 13 Уни авал шу жили башроһаний болған Қаяпаниң қейинатиси Һананниң алдиға елип беришти. 14 Йәһудийларға хәлиқ үчүн бирла кишиниң өлүши яхширақ, дәп мәслиһәт бәргән нәқ шу Қаяпа еди.
15 Симун Петрус билән йәнә бир шагирт Әйсаниң кәйнидин маңған еди. Бу шагирт башроһанийға тонуш болуп, у Әйса билән башроһанийниң һойлисиға кирди. 16 Петрус болса дәрвазиниң сиртида қалди. Кейинирәк башроһанийға тонуш шагирт ташқириға чиқип, дәрвазини күзитиватқан аял билән сөзлишип, Петрусни ичкиригә башлап кирди. 17 Дәрвазини күзитиватқан аял Петрустин: «Сизму Әйсаниң шагиртлиридин әмәсму?»— дәп сориди. У: «Яқ»,— дәп җавап бәрди. 18 Һава соғ болғанлиқтин, қуллар вә күзәтчиләр гүлхан йеқип, иссинип турушатти. Петрусму улар билән иссинип турди.
19 Шу мәзгилдә чоң роһаний Әйсани шагиртлири вә униң тәлимлири һәққидә сораштурувататти. 20 Әйса җававән: «Мән дунияға очуқ сөзлидим. Һәрдайим йәһудийлар жиғилидиған мәркизий ибадәтханида вә башқа ибадәтханиларда тәлим берип жүрдүм, һеч йошурун сөз ейтмидим. 21 Немишкә сиз мәндин сорайсиз? Сөзлиримни аңлиғанлардин сораң, улар немә һәққидә дегәнлигимни билиду»,— деди. 22 Әйса бу сөзләрни қилғанда, йенида турған күзәтчиләрниң бирси качитиға уруп: «Чоң роһанийға қандақ җавап бериватисән?»— деди. 23 Әйса униңға: «Әгәр хата гәп қилған болсам, хата дәп гувалиқ бәргин. Әгәр ейтқанлирим тоғра болса, мени немишкә урусән?»— деди. 24 Буниң билән Һанан уни бағлақлиқ түридә башроһаний Қаяпаға әвәтти.
25 Симун Петрус иссинип туруватқанда, униңдин: «Сәнму униң шагиртлириниң бири әмәсму?»— дәп сорашти. У буни рәт қилип: «Яқ»,— деди. 26 Башроһанийниң бир қули, йәни Петрус қулиғини чепип ташлиған адәмниң туққини, униңға: «Сени бағда униң билән биллә көрмидимму?»— деди. 27 Амма Петрус йәнә танди. Дәл шу чағда ғораз қичқарди.
28 Әйсани Қаяпадин һөкүмдар сарийиға елип кәлди. Таң атқан еди. Лекин уни елип кәлгәнләр һөкүмдар сарийиға напак болуп қалмаслиғи үчүн кирмиди, чүнки Песах мәйриминиң тамиғини истимал қилиши керәк еди. 29 Шуңа Пилат өзи ташқириға чиқип: «Бу адәмгә қарши қандақ әйип қоймақчисиләр?»— дәп сориди. 30 Улар униңға җававән: «Әгәр у җинайәтчи болмиса, уни силиригә тапшурмас едуқ»,— деди. 31 Пилат: «Уни өзәңлар елип, өз Қануниңлар бойичә сотлаңлар»,— деди. Йәһудийлар: «Қанун бойичә бирсини өлтүрүшкә биздә һоқуқ йоқ»,— дейишти. 32 Әйса өзиниң қандақ өлүдиғанлиғи тоғрисида алдин ейтқан сөзлириниң әмәлгә ашурулуши үчүн, бу ишлар йүз бәрди.
33 Шу чағда Пилат йәнә сарийиға кирип, Әйсани чақиртип, униңдин: «Йәһудийларниң падишаси сәнму?»— дәп сориди. 34 Әйса униңдин: «Бу соални өзиңиз қоюватамсиз яки башқилар мән тоғрилиқ сизгә ейттиму?»— дәп сориди. 35 Пилат: «Мән йәһудиймидим? Сениң хәлқиң вә чоң роһанийлар сени маңа тапшурди. Сән немә иш қилдиң?»— деди. 36 Әйса җававән: «Мениң Падишалиғим бу дуниядин әмәс. Әгәр Падишалиғим бу дунияға мәнсүп болған болса, хизмәтчилирим йәһудийларниң қолиға чүшмәслигим үчүн күришәтти. Амма, мениң Падишалиғим бу дуниядин әмәс»,— деди. 37 Шунда Пилат: «Демәк, сән Падиша екәнсәндә?»— деди. Әйса җававән: «Падиша екәнлигимни өзиңиз ейттиңиз. Һәқиқәт тоғрисида гувалиқ бериш үчүн, мән туғулуп дунияға кәлдим. Һәқиқәт тәрипидә турған һәр киши мениң авазимни тиңшайду»,— деди. 38 Пилат униңға: «Һәқиқәт дегән у немә?»— деди.
Буни ейттидә, йәнә ташқириға чиқип, йәһудийларға: «Мән униңдин һеч әйип тапалмидим. 39 Йәнә силәрниң бир адитиңлар барғу: Песах байримигә мән силәргә бир мәһбусни азат қилип берәттим. Силәр үчүн йәһудийларниң падишасини азат қилип беришимни халамсиләр?»— деди. 40 Шу вақитта улар җақиришип: «Уни әмәс, Бараббани!»— дейишти. Барабба болса қарақчи еди.