Петрусниң 1-хети
4 Мәсиһ инсан сүпитидә азап чәккән екән, демәк, силәрму ой-пикирлириңларни шундақ кәйпиятқа кәлтүрүңлар, чүнки азап чәккән киши гуна қилишни тохтитиду. 2 Әнди у қалған өмрини инсаний һәвәсләр үчүн әмәс, бәлки Худаниң ирадисини орунлаш үчүн яшайду. 3 Йетәр, өтмүштә силәр мәзкүр дунияниң кишилиридәк әхлақсиз қилиқларға, шәһванийлиққа, ичәрмәнликкә, әйши-ишрәткә вә жиркиничлик бутпәрәсликкә берилип яшиғанлиғиңлар. 4 Әнди силәр улар билән биллә оюн-тамашиларға башқа бармайдиғанлиғиңлар үчүн һәйран қелип, улар силәрни һақарәтлимәктә. 5 Амма мундақ адәмләр тирик вә өлүкләргә һөкүм чиқиришқа тәйяр болған сотчиниң алдида һесават бериду. 6 Шу мәхсәттә, Худаниң көзқаришида роһий җәһәттин яшиши үчүн, өлүкләргә хуш хәвәр елан қилинди, гәрчә инсанниң көзқариши бойичә улар барлиқ кишиләрдәк һазир һөкүм қилиниватсиму.
7 Һалбуки, барлиқ нәрсиниң ахири йеқинлашмақта. Шуңа сағлампикирлик вә дуалириңларда сәгәк болуңлар. 8 Әң авал бир-бириңларни қизғин сөйүңлар, чүнки меһир-муһәббәт көплигән гуналарни япиду. 9 Налә қилмай, өз ара меһмандост болуңлар. 10 Худаниң көпқирлиқ инайитиниң ибрәтлик башқурғучилиридәк, һәрбириңларға қабилийәт-һәдийә қандақ өлчәмдә берилгән болса, бир-бириңларға хизмәт қилғанда, шундақ өлчәмдә пайдилиниңлар. 11 Ким сөзлисә, Худаниң муқәддәс сөзлирини қилип, хәвәрни йәткүзсун. Ким хизмәт қилса, Худа бәргән күчкә тайинип, башқиларға хизмәт қилсун. Шу чағда Тәңримиз барлиқ нәрсидә Әйса Мәсиһ арқилиқ мәдһийилиниду. Шан-шөһрәт һәм күч-қудрәт әбәттин-әбәт Худаға мәнсүптур! Амин.
12 Әзиз бурадәрлирим, оттәк синақларға дуч келип, худди һәҗәплинәрлик бир нәрсә йүз бериватқандәк, һәйран болмаңлар. 13 Әксичә, Мәсиһниң азаплириға шерик болуватқанлиқтин хошал болуңлар, чүнки униң улуқлинидиған вақти рошән болғанда, хурсән болуп шатлинисиләр. 14 Әгәр силәрни Мәсиһниң нами үчүн әйипләватса, бәхитликсиләр, чүнки шөһрәт роһи — Худаниң роһи силәрдә болғанлиғи тәстиқлиниду.
15 Амма араңлардин бирси қатил яки оғри, яки җинайәтчи, яки башқиларниң ишлириға чепилғини үчүн, азап чәккинини халимаймән. 16 Әгәр мәсиһий сүпитидә азап чәксә, уялмисун, әксичә, бу нам билән Худани мәдһийилисун. 17 Сот үчүн бәлгүләнгән вақит кәлди һәм у Худаниң өйидин башланди. Әгәр у биздин башлиниватқан болса, Рәббниң хуш хәвиригә бойсунмайватқанларниң ахири немә болар? 18 «Һәм әгәр һәққаний киши аран қутулса, рәзил вә гунакар қандақму сотта пәйда болалисун?» 19 Ейтмақчи, ким Тәңриниң ирадисигә уйғун азап тартса, тохтатмай яхшилиқни қилип, өз җенини Яратқучиға тапшурсун.