Коринтлиқларға 1-хәт
3 Мән, қериндашлар, силәр билән роһий кишиләрдәк сөзлишәлмидим, әксичә, силәр билән җисманий кишиләрдәк, Мәсиһтики гөдәкләрдәк сөзләштим. 2 Мән силәрни сүт билән бақтим, чүнки силәр қаттиқ тамақни техи һәзим қилалматтиңлар. Һазирму силәр техи аҗиз, 3 силәр техичила мошу дунияниң адәмлиридәк. Чүнки, әгәр силәрниң араңларда көрәлмәслик һәм талаш-тартишлар болуватса, силәр дунияниң әмәсму вә шундақ инсанлардәк иш тутуватмамсиләр? 4 Бирси: «Мән Паулниң шагирти», йәнә бирси: «Мән Аполосниң шагирти» дәватса, адәттики адәмләр әмәсмусиләр?
5 У чағда Аполос ким? Паулму ким? Һакимдаримиз бизгә тапшурған ишни қиливатқан вә шу түпәйлидин силәр етиқатчилар болған хизмәтчиләрдур. 6 Мән тәргән, Аполос суғарған, амма өстүрүватқан Худа, 7 шуңа териғучиму һәм суғарғучиму һечнемә әмәс, пәқәт өстүрүватқан Худа Өзи һәммидур. 8 Демәк, териватқанму һәм суғуруватқанму — бир ишта, лекин һәрқайсиси өз мукапитини әмгигигә қарап алиду. 9 Биз — Худаниң һәмкардашлири. Силәр болсаңлар — Худаниң етизи, Худаниң қурулуши.
10 Маңа көрситилгән Рәббимниң мол меһирлиги бойичә ишларниң дана рәһбиридәк мән һулни салдим, башқиси болса униң үстидә қуруватиду. Лекин һәрким қандақ қуруватқанлиғиға диққәт қилсун. 11 Һечким селинған һулдин, йәни Әйса Мәсиһтин башқа һечқандақ һул салалмайду. 12 Әгәр кимду-ким мошу һулда алтунни, күмүчни, қиммәтлик ташларни, яғачни, чөпни, саманни ишлитип қурса, 13 һәркимниң иши кәлгүсидә рошән болиду. Уни ашкарә қилидиған күн келиду, чүнки у от арқилиқ һәркимниң әҗрини синайду. 14 Әгәр бу һулда селинған кимду-бирсиниң иши сақлинип қалса, у мукапат алиду. 15 Әгәр иши көйүп кәтсә, гәрчә өзи қутқузулсиму, у зиян тартиду вә оттин өткәндәк қутқузулиду.
16 Силәр өзәңларниң Худаниң һәрәми екәнлигиңларни вә Пәрвәрдигарниң роһи силәрдә яшаватқанлиғини билмәмсиләр? 17 Әгәр бирси Худаниң һәрәмини вәйран қилса, Худа уни вәйран қилиду, чүнки Худаниң ибадәтханиси муқәддәстур һәм силәр — мошу ибадәтханидур.
18 Һечким өзини алдимисун: әгәр араңлардики бирси өзини мошу дунияда данишмән дәп ойлиса, һәқиқәттән дана болуш үчүн, ахмақ болсун. 19 Чүнки бу дунияниң даналиғи Худа үчүн ахмақлиқтур, йезилғинидәк: «У данишмәнләрни өзлириниң һелигәрлигидә тутувалиду». 20 Йәнә: «Йәһва данишмәнләрниң ой-мулаһизилириниң бекар екәнлигини билиду». 21 Шуңлашқа һечким инсанлар билән көрәңлимисун, чүнки барлиғи силәрниңки: 22 мәйли Паул, мәйли Аполос, мәйли Кифа, яки дуния, яки һаят, яки өлүм, яки һазирқилар, яки кәлгүсидикиләр болсун — һәммәйлән силәргә мәнсүп. 23 Силәр болсаңлар — Мәсиһкә, Мәсиһ болса, Худаға мәнсүптур.