Вәһий
1 Өзиниң қуллириға йеқинда немә болудиғанлиғини көрситиш үчүн, Йоһанға Худа бәргән Әйса Мәсиһниң аян қилиши. У өзиниң пәриштисини әвәтип, униң ватиситидә буни өзиниң қули Йоһанға рәмзләр арқилиқ көрсәтти. 2 Йоһан Худаниң сөзи һәм Әйса Мәсиһниң гувалиғи — һәммә көргән нәрсиләр тоғрисида баян қилди. 3 Ким үнлүк оқуп вә ким мошу бәшарәтликниң сөзлирини аңлап, униңда йезилғанларни орунлиса, бәхитликтур, чүнки бәлгүләнгән вақит йеқин.
4 Мән Йоһан — Асиядики* йәттә җамаәткә йезиватимән.
Һазир вә әзәлдин Бар Болғучи һәм Кәлгүчидин вә Униң тәхти алдидики йәттә роһтин, 5 шундақла Садиқ Гувачи, өлүкләрниң Тунҗиси һәм йәр падишалириниң Һөкүмрани Әйса Мәсиһтин силәргә мол меһирлик һәм течлиқ-аманлиқ болғай.
Бизни сөйгәнгә, бизни өз қени арқилиқ гуналиримиздин азат қилғучиға, 6 бизни өз Атисиниң һәм Худайиниң падишалири вә роһанийлири қилғанға — мәңгү шан-шөһрәт вә күч-қудрәт болғай. Амин!
7 Мана, у булутлар билән келиду вә һәммиси уни көриду, һәтта уни нәйзилигәнләрму. Шу чағда униң үчүн йәрдики барлиқ қәбилиләр дәрт-һәсрәттә мәйдилиригә уриду. Шундақ болғай, амин.
8 «Мән Альфа вә Омега — һазир вә әзәлдин Бар Болғучи һәм Кәлгүчи, Һәммигә Қадир,— дәйду Йәһва Худа».
9 Мән — бурадәриңлар Йоһан, Әйсаниң избасари, қийинчилиқларға вә Падишалиққа силәр билән ортақмән вә силәрдәк тәқабил туруватимән. Худа тоғрилиқ ейтқиним вә Әйса һәққидә гувалиқ қилғиним үчүн, Патмос дәп атилидиған аралға палландим. 10 Мән муқәддәс роһниң тәсири астида Һакимдарниң күнидә болдум вә кәйнимдин карнәйниң үнидәк күчлүк бир авазни аңлидим. 11 У маңа: «Көргиниңни түртәккә йезип, Әфәс, Смирна*, Пәргам, Тиятира, Сардис, Филаделфийә һәм Лаодикиядики йәттә җамаәткә әвәт»,— деди.
12 Мән мениң билән сөзләшкәнни көрүш үчүн кәйнимгә бурулғинимда, йәттә алтун чирақданни көрдүм, 13 чирақданларниң арисида болса, инсан Оғлиға охшаш кимду-бирси көрүнди. У узун тон кийгән вә көксигичә кәң алтун бәлбағ ориған еди. 14 Униң бешидики чечи аппақ жуң яки қардәк болған вә униң көзлири отлуқ ялқундәк еди. 15 Униң аяқлири очақта еритилгән таза мисқа охшатти, авази болса нурғун суларниң шавқунини әслитәтти. 16 Униң оң қолида йәттә юлтуз болған, еғизидин узун, өткүр вә иккибислиқ қилич чиқатти һәм униң үзи ярқин қуяштәк пақиратти. 17 Уни көргинимдә униң айиғиға өлүктәк жиқилдим.
Шу чағда у маңа оң қолини қоюп, мундақ деди: «Қорқмиғин. Мән биринчи һәм ахирқи 18 вә яшиғучимән. Мән өлгән едим, лекин әнди әбәттин-әбәткичә яшимақтимән һәм мениңда өлүм вә қәбирниң* ачқучлири бар. 19 Демәк, көргиниңни, көрүватқиниңни вә андин немә болудиғинини язғин. 20 Мениң оң қолумда көргән йәттә юлтузниң вә йәттә алтун чирақданниң муқәддәс сирини саңа ачай: йәттә юлтуз — бу йәттә җамаәтниң пәриштилири, йәттә чирақдан болса — бу йәттә җамаәттур.