Коринтлиқларға 2-хәт
7 Демәк, қәдирданлирим, мошундақ вәдиләргә егә болған екәнмиз, келиңлар, Худа қорқунучида муқәддәсликни мукәммәлләштүрүп, тән билән роһни булғайдиған һәммә нәрсидин өзүмизни тазилайли.
2 Қәлбиңларда бизни сиғдуруңлар. Биз һечкимгә яманлиқ қилмидуқ, һечкимни әхлақсизлиққа үгәтмидуқ, һечкимни өз мәнпийәтлиримиз үчүн пайдиланмидуқ. 3 Буни силәрни әйипләш үчүн демәйватимән. Чүнки мән силәрниң биз билән өлүшиңлар һәм биз билән яшишиңлар үчүн, бизниң жүригимиздә екәнлигиңлар һәққидә бурун ейтқандим. 4 Силәрниң алдиңларда мениң сөз әркинлигим зор. Мән силәр билән көп махтинимән. Мән тәсәллигә толдум, барлиқ қайғуларда шатлиққа толуп-таштим.
5 Биз Македонийәгә кәлгәндә, җенимиз арам тапмиди, лекин биз авалқидәкла һәр тәрәптин қисилдуқ: сиртимизда — күрәш, ичимиздә — қорқунучлар. 6 Амма езилгәнләргә тәсәлли беридиған Худа, бизгиму Титниң һазирлиниши билән тәсәлли бәрди 7 һәм пәқәт униң һазирлиниши биләнла әмәс, бәлки уму силәр һәққидә аңлап тәсәлли апту. У бизгә силәрниң қайнақ хаһишиңлар, силәрниң һәсритиңлар, силәрниң мениң үчүн болған қизғинлиғиңлар тоғрилиқ хәвәр бәрди, шуниң билән мән техиму хошал болдум.
8 Шуңа, әгәр мән силәрни хетим билән хапа қилған болсамму, у тоғрисида өкүнмәймән. Һәтта әгәр бешида өкүнгән болсамму (у хәт силәрни хапа қилған болсиму, гәрчә қисқа вақитқила), 9 әнди болса, хошал болуватимән. Бирақ силәрниң хапа болғиниңларға әмәс, бәлки силәр товва қилишқа хапа болдуңлар; бизни дәп силәр һечнәрсидә зиян тартмаслиғиңлар үчүн, Худаға яқидиғандәк қайғурдиңлар. 10 Тәңригә яқидиған қайғу қутқузулушқа апиридиған пушайманни бәрпа қилиду, униң һәққидә өкүнмәслик керәк. Әксичә, бу дунияниң қайғуси өлүмни туғдуриду. 11 Қараңлара: силәрниң Худаға яқидиған қайғулириңлар силәрдә қандақ ихласни, қандақ тазилинишни, қандақ ғәзәпни, қандақ қорқунучни, қандақ хаһишни, қандақ түзитишни һасил қилди! Һәммидә силәр өзәңларни мошу ишта пак көрсәттиңлар. 12 Һәм буни мән явузлуқ қилғучи һәм явузлуқтин азап чәккүчи үчүн язмидим, әксичә, араңларда силәрниң биз үчүн ихласиңлар Худаниң алдида рошән болуши үчүн яздим. 13 Шу сәвәптин биз тәсәлли таптуқ.
Һалбуки, тәссәллимиздин ташқири, биз Титниң хошаллиғини көрүп, чүнки силәр униң роһини ғәйрәтләндүргиниңлар үчүн, биз техиму хошал болдуқ. 14 Әгәр мән қандақту-бир униң алдида силәр билән махтанған болсам, уятта қалмидим, лекин биз силәргә ейтқан һәммә нәрсә һәқ болғинидәк, Титниң алдида пәхирлинишимизму һәқ болди. 15 У силәрниң униңға қулақ салғиниңларни һәм уни қорқунуч вә әйминиш билән қарши алғиниңларни әслигинидә, униң силәргә болған назук сезимлири техиму күчәйди. 16 Мән силәр түпәйли өзәмниң илһам алғинимға шатлинимән.