Римлиқларға
3 Ундақта, йәһудий болушниң алийлиғи немидә яки хәтнидин қандақ пайда бар? 2 Көп җәһәттин булар әһмийәтликтур. Сәвәви, һәммидин бурун Худаниң муқәддәс сөзлири йәһудийларға аманәт қилинған. 3 Бирақ бәзилири ишәнмиди. Әгәр бәзилири етиқат көрсәтмигән болса, уларниң етиқатсизлиғи Худаниң садиқлиғиниң күчини йоқиталамду? 4 Һәргиз! Амма шу мәлум болсунки, һәтта барлиқ кишиләр ялғанчи болуп чиқсиму, Худа растчилдур. У һәққидә Муқәддәс Язмиларда йезилғинидәк: «Сени әйиплигәндә Өз сөзлириңдә һәққаний болуп чиқисән һәм ғалибә қазинисән». 5 Бизниң һәққанийсизлиғимиз Худаниң һәққанийлиғини рошән қилса, немә дәймиз? Худа ғәзивини төкүватқанда, У адилсизму? (Мән инсанларчә сөзләватимән.) 6 Һәргиз! Болмиса, Худа аләмни қандақ сораққа тартиду?
7 Әгәр мениң ялғанчилиғимдин Худаниң һәқиқити Униң шан-шәрипигә техиму шөһрәт әкәлсә, у чағда немишкә гунакар, дәп әйиплинишим керәк? 8 Һәм бизгә төһмәт қилип, бирмунчилири тәкитләватқандәк, биз: «Келиңлар, яхшилиқ чиқиш үчүн, яманлиқ қилайли», дәватиптимиз. Мундақ адәмләрниң җазалиниши адаләтликтур.
9 Әндичу? Биз, йәһудийлар, яхширақ әһвалдиму? Һәргиз! Биз ениқ билимизки, һәм йәһудийлар, һәм греклар — һәммиси гуна илкидә.10 Йезилғинидәк: «Һәққаний киши йоқ, һәтта бириму, 11 чүшәнчиси бар бирму адәм йоқ, Худани издигән һечким йоқ. 12 Һәммиси йолдин чәтниди, барлиғи яримас болди, яхшилиқ қиливатқан йоқ, һәтта бириму». 13 «Уларниң гекитиги — ечилған қәбир, тилида пәқәт алдамчилиқ». «Сур иланниң зәһири уларниң ағзида». 14 «Уларниң еғизи қарғишларға һәм зәһәргә толған». 15 «Путлири қан төкүшкә алдирайду». 16 «Уларниң йоллирида һалакәт вә бәхитсизликләр 17 һәм течлиқниң йолини улар тонумиди». 18 «Көзлиридә Худадин қорқуш йоқтур».
19 Биз шуни билимизки, һәрқандақ еғиз йепилиши һәм барлиқ дуния Тәңриниң җазасиға учриши үчүн, Тәврат қанунида ейтилған сөзләр Қанун астидикиләргә қаритилған. 20 Шуңа һечким Қанун ишлири бойичә Худаниң алдида һәққаний, дәп елан қилинмайду, чүнки Қанун арқилиқ гуна һәққидә тоғра билим берилиду.
21 Бирақ әнди, Қанундин қәтъий нәзәр, Тәврат һәм Пәйғәмбәрләр китаплирида гувалиқ берилгәндәк, Худаниң һәққанийлиғи рошән болди. 22 Һә, етиқати барларниң һәммиси үчүн, чүнки буниңда хәлиқләр арисида пәриқ йоқ, Әйса Мәсиһкә болған етиқат арқилиқ Худаниң алдида һәрким һәққаний болалайду. 23 Һәммәйлән гуна қилди һәм Пәрвәрдигарниң шөһритидин мәһрум болди. 24 Лекин Униң соғиси шуниңдики, Униң инайити бойичә улар Әйса Мәсиһ бәргән төләмниң азатлиғи арқилиқ һәққанийлар дәп җакалиниду. 25 Худа Өзиниң адиллиғини көрситип, Әйсани униң қениға етиқат бағлиғанлар үчүн яраштуруш қурбанлиғиға бәрди, чүнки өтмүштә қилинған гуналарни кәчүрүп, Худа чидамлиқ көрсәткән еди. 26 Әйсаға ишәнгәнләрни һәққаний, дәп елан қилидиған чағдиму адил болуши үчүн, һазирқи вақитта Өзиниң һәққанийлиғини көрситиватиду.
27 Унда махтинидиған нәрсә қени? Йоқитилди. Қайси қанун билән? Тәврат қануниниң әмәллири биләнму? Яқ, етиқат қануни билән. 28 Бизчә, инсан Қанун әмәлийитидин қәтъий нәзәр, етиқатиға бенаән һәққаний дәп елан қилиниду. 29 Яки У йәһудийларниңла Худасиму? У башқа хәлиқләрниңму Худаси әмәсму? Һә, башқа хәлиқләр кишилириниңму Худасидур! 30 Худа һәқиқәтән йеганә болғанлиқтин, У хәтнә қилинғанларни вә хәтнисизләрни етиқати түпәйли һәққаний, дәп елан қилиду. 31 У чағда етиқатимиз билән Қанунни йоққа чиқармаймизму? Һәргиз! Әксичә, биз Қанунни тәстиқләймиз.