Мәтта
13 Шу күни Әйса өйдин чиқип, деңиз бойида олтиратти. 2 Униң йениға көплигән хәлиқ жиғилди, шуңлашқа у қолваққа чүшүп олтарди, пүткүл хәлиқ болса қирғақта туратти. 3 У уларға мисал кәлтүрүп, көп нәрсиләрни сөзләшкә башлиди: «Уруқ чачқучи териш үчүн чиқти. 4 У чачқанда, бәзи уруқлар йолға чүшти. Қушлар учуп келип, уларни йәвәтти. 5 Бәзи уруқлар ташлиқ җайларға чүшти, тописи аз һәм чоңқур әмәс болғанлиқтин, улар шу заман өсүп чиқти. 6 Бирақ күн чиқип, уларниң шуңлирини көйдүрүвәтти вә улар чоңқур йилтиз тартмиғачқа, қуруп кәтти. 7 Бирмунчилири болса, тикәнлик өсүмлүкләр арисиға чүшти. Тикәнләр өсүп, уларни бесивалди. 8 Бирмунчилири болса, яхши топилиқ йәргә чүшти һәм мевиләрни беришкә башлиди: бирлири — 100, йәнә бирлири — 60, үчинчилири — 30 һәссә артуқ. 9 Қулиғи бар, тиңшисун».
10 Шунда шагиртлири йениға келип: «Немишкә сән улар билән мисал кәлтүрүп сөзләйсән?»— дәп сориди. 11 У җававән: «Асмандики Падишалиқниң муқәддәс сирлирини чүшиниш силәргә берилгән, уларға болса, берилмигән. 12 Кимдә бар болса, униңға көпирәк берилиду һәм униңда молчилиқ болиду, лекин кимдә болмиса, һәтта униңда бар нәрсисиму тартип елиниду. 13 Шуниң үчүн мән улар билән тәмсил кәлтүрүп сөзлишимән. Чүнки улар қарисиму көрмәйду, тиңшисиму аңлимайду һәм мәнасини чүшәнмәйду. 14 Уларда Йәшаяниң бәшарити орунлиниду: “Тиңшаветип, чүшәнмәйсиләр вә қараветип, көрәлмәйсиләр. 15 Чүнки бу хәлиқниң жүриги қопаллишип кәтти, улар аңлайду, лекин үн қатмайду; көрмәс үчүн көзлирини жумувалди, аңлимас үчүн қулақлирини йепивалди вә мәнасини қәлблири билән чүшинәлмиди һәм мән уларни сақайтмишим үчүн, қайтмиди”.
16 Һә, силәрниң көзлириңлар һәм қулақлириңлар бәхитлик, чүнки көриду вә аңлайду. 17 Силәргә һәқни ейтиватимәнки: көплигән пәйғәмбәрләр вә һәққанийлар силәр көрүватқан нәрсиләрни көргүси келәтти, лекин көрмиди һәм силәр аңлаватқан нәрсиләрни аңлиғуси келәтти, лекин аңлимиди.
18 Әнди уруқ чачқучи һәққидики тәмсилни тиңшап көрүңлар. 19 Падишалиқ тоғрисидики сөзни аңлап, амма униң мәнасини чүшәнмигән адәмгә Явуз келип, жүригидә терилғанни оғрилап кетиду. Бу — йолға терилған уруқтур. 20 Ташлиқ йәргә терилған — бу сөзни аңлап һәм дәрһал уни хошаллиқ билән қобул қилған адәм. 21 У һәтта һәқиқәттә бирмунчә вақит қалсиму, амма өзидә йилтизи йоқтур. Сөз үчүн апәтләр яки тәқипләр башланғанда, у шу заман тохтап қалиду. 22 Тикәнлик арисида терилған дегән — у сөзни аңлиған адәм, лекин мошу қурулумниң ғәм-әндишилири һәм алдамчи байлиғи униңдики сөзни бесивалиду вә у мевисиз болуп қалиду. 23 Яхши йәргә терилған болса — у сөзни аңлаватқан һәм униң мәнасини чүшиниватқан адәм. У мевиләрни әкелиду: бирси — 100 һәссә, йәнә бирси — 60, үчинчиси — 30 һәссә артуқ».
24 Әйса уларға башқа мисал кәлтүрүп, мундақ деди: «Асман Падишалиғи өз етизида яхши уруқларни тәргән адәмгә охшайду. 25 Лекин кишиләр ухлаватқанда, униң дүшмини келип, буғдайниң арисиға явайи чөп уруқлирини чечиветип кетиду. 26 Буғдай майсилири чиқип, башақланғанда, явайи чөпләрму пәйда болди. 27 Өй ғоҗайининиң қуллири униңға берип: “Ғоҗайин, сиз етизиңизға яхши уруқларни чачқандиңизғу, явайи чөпләр нәдин пәйда болди?”— дәп сорапту. 28 У уларға җававән: “Буни дүшмән қилди”. — “Халисиңиз, биз берип, уларни жулуветәйлиму?”— дәп сорапту қуллири. 29 У болса: “Яқ, чүнки явайи чөпни жулғанда, байқимай, буғдайниму жулуп қоймаңлар. 30 Мәйли, омиғичә биллә өссүн, бирақ ома вақтида мән омичиларға мундақ дәймән: “Көйдүрүветиш үчүн дәсләп явайи чөпләрни жиғип, уларни бағлаңлар, андин кейин буғдийимни амбарлиримға жиғиңлар”,— дәпту».
31 У уларға йәнә бир мисал кәлтүрүп: «Асман Падишалиғи адәм беғида тәргән қича уруғиға охшайду. 32 У уруқларниң арисидики әң кичиги, амма өсүп чиққанда, бағдики өсүмлүкләр арисида әң йоғини болиду вә һәқиқий дәрәқкә айлиниду. Шуңлашқа қушларму учуп келип, униң шахлирида угилайду»,— деди.
33 Әйса уларға йәнә бир мисални кәлтүрди: «Асман Падишалиғи аял киши үч йоған өлчәм унға арилаштуруп, пүтүнләй хемирни болдурған хемиртуручқа охшайду».
34 Мошуниң барлиғини Әйса хәлиқкә мисалларни кәлтүрүп, ейтти. Мисалсиз улар билән сөзлимәтти, 35 чүнки пәйғәмбәр арқилиқ: «Еғизимни тәмсилләрни кәлтүрүп ачимән, дуния асасланғандин башлап йошурунған нәрсиләрни җакалаймән», дегән сөзләр орунлиниши үчүндур.
36 У хәлиқни қоюветип, өйгә кирди. Шагиртлири йениға келип: «Етиздики явайи чөпләр мисали һәққидә бизгә чүшәндүрүп бәргинә»,— дейишти. 37 У җававән мундақ деди: «Яхши уруқларни чачқучи — бу инсан Оғли, 38 етиз — ушбу дуния, яхши уруқлар — Падишалиқниң оғуллири, явайи чөпләр болса — бу Явузниң оғуллири, 39 уларни тәргән дүшмән — бу Иблис. Ома — мошу қурулумниң ахири, омичилар болса — пәриштиләр. 40 Явайи чөпләрни жиғип, от қойғандәк, мошу дунияниң ахиридиму шундақ болиду. 41 Инсан Оғли пәриштилирини әвәтиду һәм улар униң Падишалиғидики гунаға аздуридиған барлиқ нәрсиләрни вә қанунсиз иш қилғанларни жиғип, 42 отлуқ очаққа ташлайду. У йәрдә улар қаттиқ жиғлайду һәм чишлирини ғучурлитиду. 43 Һәққаний адәмләр у вақитта Атисиниң Падишалиғида қуяштәк чақнайду. Қулиғи бар, тиңшисун!
44 Асман Падишалиғи етизда йошурулған вә бир адәм тепивелип, қайтидин көмүп қойған ғәзнигә охшайду. Хошаллиғидин у киши бар нәрсисини сетиветип, әшу етизни сетивалди.
45 Асман Падишалиғи йәнә есил мәрвайит издәп жүргән содигәргә охшайду. 46 Интайин қиммәтбаһалиқ бир мәрвайитни тапқанда, у барлиқ нәрсисини сетиветип, шу мәрвайитни сетивалди.
47 Асман Падишалиғи йәнә деңизға ташланған һәм һәрхил белиқларни тутидиған торға охшайду. 48 У толғанда, адәмләр уни қирғаққа чиқирип, яхши белиқларни илғап, қачиларға селип, яримас белиқларни ташлаветиду. 49 Дунияниң ахиридиму дәл мошундақ болиду: пәриштиләр чиқип, явуз кишиләрни һәққанийлардин айриду 50 вә отлуқ очаққа ташлайду. У йәрдә улар жиғлайду һәм чишлирини ғучурлитиду».
51 Андин Әйса улардин: «Силәр буниң һәммисиниң мәнасини чүшәндиңларму?»— дәп сориди. «Һә-ә»,— деди шагиртлири. 52 У давамлаштуруп: «Шуни билиңларки, асман Падишалиғи тоғрилиқ тәлимат алған һәрқандақ устаз өз ғәзнисидин йеңи һәм кона нәрсиләрни елип чиқиватқан өй ғоҗайиниға охшайду»,— деди.
53 Әйса мәзқүр мисалларни кәлтүрүшни аяқлаштурғанда, йолини давамлаштурди. 54 Өз жутиға келип, кишиләрни ибадәтханида үгитишкә башлиди. Улар һәйран болуп: «Буниңда шунчивала даналиқ һәм қудрәтлик ишларни қилиш қабилийити нәдинду? 55 У яғашчиниң оғли әмәсму? Униң аниси Мәрийәм, инилири Яқуп, Йүсүп, Симун һәм Йәһудағу. 56 Һәм униң сиңиллириму аримизда. Буниң һәммисини нәдин биливалғанду?»— дәп, 57 путликашаң болушти вә уни рәт қилди. Әйса уларға: «Пәйғәмбәрни өз вәтинидин һәм өйидин башқа барлиқ йәрләрдә һөрмәтләйду»,— деди. 58 Һәм уларниң ишәнмәслигигә нисбәтән у шу йәрдә аз мөҗүзини көрсәтти.