Йоһанниң 3-хети

1 Мән ақсақал — һәқиқәтән сөйүдиған қиммәтлик Гайға салам йоллаймән.

2 Қиммәтлик бурадәрим, сениң сағлам болуп, бурунқидәк һәммә җәһәттин утуқлуқ болушиңға дуа қилимән. 3 Бурадәрләрдин маңа кәлгинидә, сениң һәқиқәттә садиқ туруватқиниңни һәм һәқиқәттә меңишни давамлаштуруватқиниңни аңлап, наһайити хошал болдум. 4 Балилиримниң һәқиқәттә меңиватқинини аңлаштин башқа, мениң миннәтдар болушқа артуғирақ сәвәвим йоқ.

5 Сөйүмлүк достум, натонуш қериндашлар үчүн қилғанлириң сениң Худаға садиқлиғиңни ипадиләйду. 6 Улар пүтүн җамаәтниң алдида сениң меһир-муһәббитиң тоғрилиқ ейтип бәрди. Өтүнимән, уларни Худаға лайиқ һалда йолға салғин. 7 Улар башқа хәлиқләрниң кишилиридин һечнемә алмай, Униң исми үчүн йолға чиқти. 8 Шуңлашқа биз, һәқиқәтни тарқитишта һәмкарлар болушимиз үчүн, мундақ бурадәрләрни меһмандостлуқ билән қарши елишимиз шәрт.

9 Мән җамаәткә бәзибир нәрсиләрни язған едим, амма уларниң арисида биринчиликни яхши көрүдиған Диотреп биздин һечнемини һөрмәт билән қобул қилмайватиду. 10 Шуңлашқа, әгәр кәлсәм, униң биз тоғрилиқ әски гәпләрни тарқатқинини вә қилған яман ишлирини әскә салимән. Буни аз дегәндәк, у өзи қериндашларни һөрмәт билән қарши алмайду вә уларни қарши алғуси кәлгәнләргә тосалғу қилип, уларни җамаәттин қоғлашқа тиришмақта.

11 Әзиз бурадәрим, зулумлуқтин әмәс, меһрибанлиқтин үлгә ал. Меһрибанлиқ қилғучи — Рәббимизгә мәнсүп. Зулумлуқ қилғучи — Худани көрмигәндур. 12 Димитир тоғрилиқ ейтсам, у һәқиқәткә асаслинип яшаватқанлиғи һәққидә һәммиси яхши гувалиқ берип тәкитләватиду. Бизму шундақ гувалиқ беримиз һәм сән шуни билисәнки, бизниң гувалиғимиз дайим һәқтур.

13 Мениңдә саңа язидиғанлирим техи көп, бирақ қәләм вә сия билән башқа язғум йоқ. 14 Мениң сени пат арида көрүшкә үмүтүм бар вә биз үзму-үз сөзлишимиз.

Саңа течлиқ болсун!

Достлар саңа салам йоллаватиду. Сәнму мениңдин достлиримниң һәрбирсигә айрим салам ейтқин.