Титқа
3 Уларға буниңдин кейинму һөкүмәткә бойсунушни вә һоқуқдарларниң гепигә киришни, һәрқандақ яхши ишларни қилишқа тәйяр болушни әскә салғин. 2 Һечким тоғрилиқ һақарәтләйдиған сөз ейтмаслиққа, җедәлхор болмаслиққа, әксичә, пәм-парасәтлик болуп, һәммә кишиләргә мулайимлиқ билән қарашқа үгәт. 3 Сәвәви, бизму бир вақитларда әқилсиз, гәпкә кирмәйдиған, езиқтурулған, һәртүрлүк хаһишларниң вә һөзүрлинишләрниң қуллири едуқ, явузлуқта вә һәсәтхорлуқта яшап, жиркиничлик болуп, бир-биримизни өч көрәттуқ.
4 Амма бизниң Қутқузғучимиз Худаниң меһриванлиғи билән меһир-муһәббити аян болғанда, 5 бизниң қилған һәққаний ишлиримиз үчүн әмәс, бәлки Өзиниң рәһимдиллигидә жуюш арқилиқ бизгә һаятлиқ берип һәм муқәддәс роһ арқилиқ йеңилиниш берип, бизни қутқузди. 6 У бу роһни Ниҗаткаримиз Әйса Мәсиһ арқилиқ бизгә баяшәт төкти. 7 Униң инайити бойичә һәққаний җакалинип, мәңгүлүк һаят үмүтигә яриша биз мирасхор болдуқ.
8 Бу сөзләр һәқтур. Худаға ишәнгәнләрниң буниңдин кейинму өз ойлирини яхши ишларға муҗәссәмләштүрүши үчүн, мән бу сөзләрни ейтишиңни вә тәкитлишиңни өтүнимән. Бу инсанлар үчүн яхши һәм пайдилиқ.
9 Тәврат қануниға мунасивәтлик ахмиқанә соал-сорақлардин, нәсәбнамилардин, маҗралардин вә талаш-тартишлардин нери тур, чүнки булар пайдисиз вә мәнисиздур. 10 Мәзһәпчиликни тарқатқучиларни бир вә икки қетим агаһландурғандин кейин, рәт қилғин. 11 Шуни билгинки, мундақ адәм йолдин адашқан вә гуна қилғач, өз-өзини сотлимақта.
12 Сениң йениңға Артимасни яки Тихикни әвәткәндә, мениң йенимға Никопольға келиш үчүн бар имканийәттин пайдиланғин, чүнки мән қишни шу йәрдә өткүзүшни қарар қилдим. 13 Тәврат қанунини яхши билидиған Зенасни вә Аполлосни һечнәрсигә муһтаҗ болмаслиғи үчүн, йолға пухта тәйярла. 14 Бизниңкиләрму хизмәттә мевисиз болмаслиғи үчүн, кимгә чапсан ярдәм керәк болса, шуларға яхшилиқларни қилишқа үгәнсун.
15 Мениң йенимдикиләрниң барлиғи саңа салам йоллаватиду. Етиқатимиз бойичә бизни қәдирләйдиғанларниң һәммисигә мәндин салам ейтқин.
Барлиғиңлар билән инайәт болғай.