Йәшая
7 Йәһудия падишаси Уззияниң оғли, Йофамниң оғли Ахазниң күнлиридә Сирияниң шаһи Резин Ремалияниң оғли, Исраилниң падишаси Пеқаһ билән Йерусалимға қарши уруш ачти, бирақ улар уни йеңәлмиди. 2 Давутниң падиша өйигә мундақ дәп йәткүзүлди: «Сирия Әпрайим билән күчлирини бирләштүрди».
Ахазниң һәм униң хәлқиниң жүрәклири орманда дәрәқләр шамалдин титригәндәк, титрәп кәтти.
3 Шу чағда Йәһва Йәшаяға: «Сән оғлуң Шеар-Яшуб билән Ахазниң алдиға чиққин. У һазир кир жуйғучилар даласиға апиридиған кәң йолниң қешида болған жуқарқи көлчәкниң бойида туриду. 4 Униңға мону сөзләрни йәткүз: “Өзәңгә қара, хатирҗәмликни сақла, қорқма вә әву икки ислишиватқан чоғларниң: сириялиқ Резин вә Ремалияниң оғлиниң ғәзивидин чүшкүнлүккә кәлмә”. 5 Арам Әпрайим билән саңа қарши явузлуқ нийәт қиливатиду: 6 “Йәһудияға берип, уни паракәндиликкә кәлтүрүп, өзара бөлүвалимиз. Униңда падиша қилип, Табәилниң оғлини қоюмиз”».
7 Шундақ дәйду Илаһий Пәрвәрдигар Йәһва:
«Бу нәрсә һәргиз болмайду вә уларниң
Ойлиғини әмәлгә ашмайду.
8 Арамниң беши — Дәмәшқ,
Дәмәшқниң беши — Резин. 65 жил өтмәй,
Әпрайим ғулап, хәлиқләр санидин йоқайду.
9 Әпраимниң беши — Самарийә,
Самарийәниң беши — Ремалияниң оғли.
Әгәр силәрдә қаттиқ ишәнч болмиса,
Силәр туруп қалалмайсиләр».
10 Андин Йәһва Ахазға сөзини давам қилип, мундақ деди: 11 «Тәңриң Йәһвадин өзәңгә бәлгү сора. Һәтта у бәлгү йәрниң тегидидә яки егиз асманда болсиму». 12 Лекин Ахаз: «Яқ, һечнәрсә соримаймән вә Йәһвани синимаймән»,— деди.
13 Шу вақитта Йәшая пәйғәмбәр: «Тиңша, Давутниң өйи! Силәргә адәмләрниң чидамини синап тойғузғанлиғиңлар азму, әнди Худаниң чидаминиму синаватамсиләр? 14 Шуңлашқа Йәһва Өзи силәргә бәлгү бериду: мана, қиз һамилдар болуп, оғул туғиду һәм уни Иммануил* дәп атайду. 15 У яхшини таллап, яманни рәт қилишқа йәткичә, май һәм һәсәл билән озуқлиниду. 16 Чүнки ушбу бала яхши билән яманни айришқа үгәнгичә, мошу сән қорқуватқан икки һөкүмранниң йәрлири чөлдәрәп кетиду. 17 Йәһваниң ирадиси бойичә саңа, хәлқиңгә вә атаңниң өйигә шундақ күнләр келидуки, Әпрайим Йәһудадин бөлүнгән вақиттин башлап кәлмигән күнләр йүз бериду. У Ассур шаһини саңа һуҗум қилишқа дәвәт қилиду.
18 Шу күни Йәһва Мисир чивинлирини ушқетип чақириду. Улар Нилниң еқинлиридин болиду вә Ассурдин һәриләр учуп келиду. 19 Улар һәммиси учуп келип, вадиларда вә қияташларниң өңкүрлиридә, тикәнликләрдә һәм яйлақларда қониду.
20 Ушбу күни Йәһва Ассур шаһини, Фират өлкисидин иҗаригә алған устирини елип, сениң бешиңни, путлириңни, һәтта сақилиңни қирип чүшириветиду.
21 Ушбу күндә өзидә бир кала билән икки қойни сақлап қалған киши, 22 сүтиниң моллиғидин қаймақ йәйду, чүнки мошу йәрдә қалғанларниң барлиғи мәшкә яғ билән явайи һәсәл йәйду.
23 Шу күндә авал 1000 шекәл күмүч туридиған 1000 үзүм ғоли өскән җай тикәнликкә айлиниду. 24 Шу йәргә оқ-ялар билән баридиған болиду, чүнки барлиқ зимин лойла кокат билән тикәнликкә айлиниду. 25 Авал кәтмән билән отиған тағларниң һечқайсиға, сән түрлүк тикәнниң қоюқ өскәнлигидин баралмайсән. У йәрләрдә пәқәт буқилар билән ушшақ мал отлайду».