Тарихнамә 2-язма
11 Реһабам Йерусалимға келип, Йәһуда һәм Бениамин өйидин 180 000 илғар ләшкәрни Исраил билән уруш қилишқа жиғди. Мәхсити — Реһабамға пүтүн падишалиқни қайтуруш еди. 2 Ушбу чағда Йәһваниң сөзи Худа адими Шемаяға болди: 3 «Йәһуданиң падишаси, Сулайманниң оғли Реһабамға вә Йәһуда һәм Бениамин қәбилилиридин тәркип тапқан Исраилға ейтқин: 4 “Йәһва Пәрвәрдигар мундақ дәйду: “Бармаңлар һәм бурадәрлириңлар билән урушни башлимаңлар, һәрқайсиң өз өйүңгә қайтқин, чүнки Мән буни қилдим!”» Улар Йәһваниң сөзигә қулақ селип, Йеробоамға қарши чиққан һәрбий сәпиридин қайтти.
5 Реһабам Йерусалимда истиқамәт қилип, Йәһудияда қорған-шәһәрләрни салди. 6 У Бәйтләһәм, Етам, Пекоя, 7 Бәйт-Зур, Сохо, Адуллам, 8 Гат, Марәша, Зиф, 9 Адораим, Лакиш, Азека, 10 Сора, Айялон вә Һибронни мустәһкәмлиди. Ушбу шәһәрләр Йәһуда билән Бениаминниң қәбилилиридә қорған-шәһәрләр болди. 11 Падиша мәзкүр қорғанларни яхши мәккәмләп, уларниң үстидин башлиқларни бәлгүләп, нанниң, зәйтун мейиниң, шарапниң жиғиндисини топлиди. 12 Шундақла һәрбир шәһәрниң қалқанлири билән нәйзилири болди. У уларни бәк яхши чиңайтти. Униңға мәнсүп болуп, пәқәт Йәһуда билән Бениамин қалди.
13 Пүткүл Исраил зиминида яшиған роһанийлар билән ләвийләр униңға өз өлкилиридин кәлди. 14 Һәтта ләвийләр шәһәрләрниң әтрапидики уларға тәәллуқ егиликлирини ташлап, Йәһуда билән Йерусалимға жиғилишти, чүнки Йеробоам өз әвлади билән уларни Йәһваниң роһанийлиқ хизмитидин мәһрум қилди. 15 У өзидә егизликләргә, өзи ясиған текиләр билән буқиларға каһинларни қойди. 16 Роһанийлар билән ләвийләрниң кәйнидин барлиқ Исраил қәбилилиридин өз жүригини Исраилниң Тәңри Йәһваға бәргәнләр Йерусалимға келишип, қурбанлиқлирини әҗдатлириниң Худаси Йәһваға әкеләтти. 17 Шундақ қилип, улар Йәһуда падишалиғини мустәһкәмләп, Сулайманниң оғли Реһабамни үч жил қоллиди, чүнки ушбу үч жилда улар Давут билән Сулайманниң йолида жүргән еди.
18 Реһабам өзигә Давутниң оғли Йеримотниң қизи Махалатани вә Йишайниң оғли Елиабниң қизи Абихаилни хотунлуққа алди. 19 У униңға оғулларни туғуп бәрди: Йеусни, Шемарияни вә Загамни. 20 Андин у Абсаламниң нәвриси Маахани алди. У униңға Абияни, Аттайни, Зизани вә Шеломитни туғуп бәрди. 21 Абсаламниң нәвриси Маахани Реһабам барлиқ аяллири һәм дедәклиридин артуқ сөйәтти гәрчә униң 18 аяли вә 60 дедигидин 28 оғли бар болсиму. 22 Мааханиң оғли Абияни Реһабам қериндашлириниң арисида башлиқ тунҗидәк қойди, сәвәви, у бу оғлини падиша қилидиған мәхсити бар еди. 23 У бу җәһәттин пәм-парасәтлик иш тутуп, барлиқ оғуллирини Йәһуда билән Бениаминниң йәрлиригә әвәтивәтти. Уларни барлиқ мустәһкәмләнгән шәһәрләргә башчи қилип, уларға мол тәминат бәлгүләп, нурғунлиған аялларни тепип бәрди.