Мәтта

27 Таң атқанда чоң роһанийларниң һәм хәлиқ ақсақаллириниң барлиғи Әйсани қандақ өлтүрүш һәққидә мәслиһәтләшти. 2 Уни бағлап, һаким Пилатқа апирип тапшурди.

3 Уни сатқан Йәһуда Әйса үстидин өлүм һөкүми чиқирилғанлиғини көрүп, виждан азавини тартип, чоң роһанийлар билән ақсақалларға 30 күмүч тәңгини қайтуруп бәрди. 4 У: «Мән һәққаний кишигә сатқунлуқ қилип, гуна өткүздүм»,— деди. Улар: «Бизниң немә каримиз? Өзәң қара!»— дейишти. 5 Шунда у күмүч тәңгиләрни мәркизий ибадәтханида чечиветип, чиқип кәтти. У берип, есиливалди. 6 Чоң роһанийлар күмүч пулни жиғивелип: «Буларни муқәддәс ғәзнигә ташлаш қанунсизлиқтур, чүнки бу қан баһаси»,— дейишти. 7 Мәслиһәтлишип, улар униңға чәтәлликләрни дәпин қилиш үчүн, хумданчиниң етизини сетивалди. 8 Шуңлашқа шу етиз мошу кәмгичә “Қан етизи” дәп аталмақта. 9 Шу чағда Йәрәмия пәйғәмбәр арқилиқ ейтилған мону сөзләр орунланди: «Исраил оғуллиридин болған инсанлар баһалап, бир кишиниң баһасини — 30 күмүч тәңгини алди 10 вә, маңа Йәһва буйриғандәк, уларни хумданчиниң етизи үчүн бәрди».

11 Әйса болса, һаким алдида туратти. Һаким униңдин: «Сән йәһудийларниң падишасиму?»— дәп сориди. Әйса җававән: «Сиз өзиңиз буни ейтиватисиз»,— деди. 12 Лекин чоң роһанийлар билән ақсақаллар уни әйиплигәндә, у уларға һечбир җавап бәрмиди. 13 Унда Пилат: «Саңа қарши қанчә көп гувалиқлар, аңлаватамсән?»— дәп сориди. 14 Бирақ у униңға бир еғиз сөзму җавап қайтурмиди вә һаким буниңға наһайити һәйран болди.

15 Һакимниң Песах мәйримигә қәдәр хәлиқ халиған бир мәһбусни азат қилиш адити бар еди. 16 Дәл шу вақитта зинданда Барабба исимлиқ атақлиқ бир җинайәтчи солақта еди. 17 Шуниң үчүн хәлиқ жиғилғанда, Пилат улардин: «Кимни силәргә азатлиққа чиқирай: Бараббаниму яки Мәсиһ аталмиш Әйсаниму?»— дәп сориди. 18 Чүнки у Әйсани көрәлмәсликтин беривәткәнлигини биләтти. 19 Қошумчә, у сот тәхтидә олтарғанда, униң аяли хәвәр қилип: «У һәққаний киши билән һечнемә қилмиғин, чүнки бүгүн чүшүмдә мән униң үчүн көп азапландим»,— деди. 20 Лекин чоң роһанийлар һәм ақсақаллар Бараббани азат қилип, Әйсани өлтүрүветишни сорашқа топни ишәндүрди. 21 «Иккисиниң қайсисини силәргә бошитишимни халайсиләр?»— дәп, йәнә сориди һаким. Улар: «Бараббани»,— дейишти. 22 Пилат: «Мәсиһ дәп атилидиған Әйса билән немә қилай?»— дәп сориди. Һәммәйлән: «Түврүктә өлтүргин!»— дейишти. 23 У: «Немә үчүн? У қандақ яманлиқ қипту?»— дәп сориди. Бирақ улар техиму қаттиқ вақиришип: «Түврүккә уни!»— дәп қайтилатти.

24 Һечнәрсә ярдәм қилмайватқинини, әксичә, нәпрәтниң өсүватқинини көргән Пилат, су билән хәлиқ алдида қолини жуйғач, мундақ деди: «Мән бу адәмниң қениға әйиплик әмәсмән. Җавапкәрлик силәрдә». 25 Пүткүл хәлиқ җававән: «Униң қени биздә һәм бизниң балилиримизда болсун»,— дейишти. 26 Шуниң билән Пилат уларға Бараббани чиқирип бәрди, Әйсани болса, қамчилашқа буйруп, андин түврүккә миқлаш үчүн тапшурди.

27 Һакимниң әскәрлири уни ордиға әкелип, униң қешиға пүткүл ләшкәрләр топини жиғди. 28 Әйсаниң кийимини йешип, улар униңға сөсүн рәңлик тонни кийдүрди, 29 тикәнлик өсүмлүкләрдин таҗ ясап, униң бешиға кийдүрди, оң қолиға таяқни тутқузди. Улар униң алдида тизлинип: «Йәһудийларниң Падишаси яшисун!»— дәп, униң үстидин күлүшти. 30 Улар униңға түкәрди һәм таяқни елип, бешиға урушти. 31 Мәсхирә қилишни тохтатқандин кейин, улар униңдин тонни йәшкүзүп, өз кийимини кийдүрүп, түврүктә өлтүрүш үчүн елип маңди.

32 Шәһәрдин чиқишиға әскәрләр Симун исимлиқ Кирена йезисиниң турғунини учратти. Улар бу адәмгә мәҗбурий һалда Әйсаниң түврүгини көтәргүзди. 33 Голгота, йәни Баш сүйәк, дәп аталмиш җайға кәлгәндә, 34 улар аччиқ нәрсә қошулған шарапни Әйсаға бәрди, бирақ у уни тетипла, ичишкә унумиди. 35 Улар уни түврүккә миқлиди, андин чәк ташлап, униң сиртқи кийимини бөлүвелишти, 36 вә олтиришип, уни күзәтти. 37 Бешиниң үстидики йәргә: «Йәһудийларниң Падишаси Әйса», дәп уни әйипләйдиған йезиқни есип қойди.

38 Униң йенида түврүкләрдә икки қарақчи миқланған еди: бири оң тәрипидә, йәнә бири сол тәрипидә. 39 У җайдин өткән адәмләр башлирини чайқап, 40 Әйсани һақарәтләп, мундақ дәтти: «Һәй, сән, һәрәмни бузуп, үч күндә қурғучи, өзәңни қутқузғин! Әгәр Худаниң Оғли болсаң, азап түврүгидин чүшүп баққина!» 41 Шуниңдәкла чоң роһанийлар ақсақаллар билән вә Тәврат устазлири униң үстидин күлүшүп: 42 «Башқиларни қутқузған, өзини қутқузулмайдикән! У Исраил падишасимиш, әнди азап түврүгидин чүшүп бақсунчу, шуниңдин кейин биз униңға ишинимиз. 43 У Худаға таянғанди, чүнки у: “Мән Худаниң Оғли”, дегән. Әгәр у Худаға әзиз болса, У уни һазир қутқузсун»,— дейишти. 44 Шундақла йенида түврүкләрдә есилған қарақчиларму уни һақарәтлиди.

45 Чүшкә йеқин пүткүл шу йәргә қараңғулуқ чүшти һәм күндүзи саат үчкичә давамлашти. 46 Саат үчтә Әйса: «Ели́, Ели́, лама́ савахфани?»— йәни: «Илаһим, Илаһим, немишкә мени ташлавәттиң?»— дәп қаттиқ вақириди. 47 Буни аңлап, шу җайда турғанларниң бирмунчилири: «Илияс пәйғәмбәрни чақириватиду»,— дейишти. 48 Уларниң бирси дәрһал жүгрәп берип, пахтини чүчүмәл шарапқа чилап, қомуч яғачқа қистирип, униңға ичкүзди. 49 Лекин қалғанлар униңға: «Тохтап тур! Қарап бақайли, Илияс уни қутқузушқа келәмдикин»,— дейишти. 50 Әйса қайта қаттиқ вақиридидә, шуниң билән җан үзди.

51 Бирдәмдә муқәддәс җайниң пәрдиси иккигә, жуқуридин төвәнгичә, жиртилип кәтти. Йәр силкинди һәм қорам ташлар йерилип кәтти. 52 Қәбирләр ечилип, нурғунлиған муқәддәс кишиләрниң җәсәтлири ташқириға ташланди 53 һәм уларни көплири көрди. (Әйса тирилгәндин кейин қәбирләрниң йенида болуп, буниң шаһидлири болғанлар қутлуқ шәһәргә кәлди). 54 Йүзбеши вә униң билән Әйсани күзәт қилғанлар йәр тәврәшни һәм йүз бәргән һәммә нәрсини көрүшүп, бәк қорқушуп: «Һәқиқәтән, бу Худаниң Оғли екән»,— дейишти.

55 Буниң һәммисини жирақтин байқап турған нурғунлиған аяллар бар еди, улар Әйсаға хизмәт қилғач, уни Җәлилийәдин башлап, әгәшкәнләр еди. 56 Уларниң арисида Мәрийәм Мәҗдала, Яқуп һәм Йосияларниң аниси Мәрийәм вә Зәбәдий оғуллириниң анисиму бар еди.

57 Кәчқурунға йеқин Йүсүп исимлиқ бир бай адәм Араматиядин кәлди, уму Әйсаниң шагирти болған еди. 58 Бу киши Пилатқа берип, Әйсаниң мурдини соравалди. Пилат униңға мурдини тапшурушқа буйруқ қилди. 59 Мурдини елип, Йүсүп уни сүпәтлик әң яхши зиғир рәхткә йөгиди 60 һәм өзиниң қияда ойдурулған йеңи қәбригә ятқузди. У қәбир ағзиға йоған ташни домулитип йепип, кетип қалди. 61 Мәрийәм Мәҗдала һәм башқа Мәрийәм қәбир алдида олтиришип қалди.

62 Тәйярлиқ күниниң әтиси чоң роһанийлар билән пәрисийләр Пилатниң алдиға жиғилип: 63 «Тәхсир, бу көрәңниң техи тирик вақтида: “Үч күндин кейин тирилимән”, дегәнлири есимизға кәлди. 64 Шу сәвәптин қәбирни үчинчи күнгичә күзәт қилишни әмир қилсиңиз. Чүнки униң шагиртлири келип, җәсәтни оғрилап кетип, хәлиққә: “У өлүмдин тирилди!”— демисун. Шу вақитта ахирқи алдамчилиқ дәсләпкидин яманирақ болиду»,— дейишти. 65 Пилат уларға: «Мана, күзәтчиләр. Бериңлардә һәм халиғиниңларчә күзитиңлар»,— деди. 66 Улар кетишип, қәбирни күзитиш үчүн, ташни тамғилиди һәм күзәтни қойди.