Тимотийға 2-хәт
1 Худаниң ирадиси билән Мәсиһ Әйсадики һаятлиқ вәдисигә бенаән, Мәсиһниң әлчиси болған Паулдин — 2 сөйүмлүк оғлум Тимотийға салам.
Атимиз Рәббтин вә Һакимдаримиз Мәсиһ Әйсадин саңа инсан лайиқ әмәс инайәт, рәһимлик вә течлиқ болсун!
3 Мәнму әҗдатлиримдәк муқәддәс хизмәтни пак виждан билән қиливатқинимға Пәрвәрдигарға миннәтдармән вә кечә-күндүз ялвурушлиримда сени тилға алимән. 4 Көз яшлириңни әстә тутуп, хошаллиққа толуш үчүн, сени көрүшни қизғин арман қилимән. 5 Сениң сәмимий етиқатиңни әсләп, авал момаң Лоидә билән анаң Евникидә болған етиқат сениңдиму барлиғиға ишәшликмән.
6 Шу сәвәптин Худаниң соғисини оттәк көйдүрүшкә әскәртиватимән, у сениңда мениң қоллиримниң қоюлуши арқилиқ моҗут. 7 Чүнки Рәббимиз бизгә жүрәксизлик роһини әмәс, әксичә күч, меһир-муһәббәт һәм сағлампикирликниң роһини бәрди. 8 Шуниң үчүн Һакимдаримиз тоғрилиқ гувадин, йә униң үчүн мәһбус — мениңдин номус қилма, бәлки хуш хәвәр үчүн сениң несивиңгә чүшүватқан явузлуқни Худаниң күчи билән чидашқа тәйяр бол. 9 У бизни қутқузуп, муқәддәс болушқа таллиди. Ишлиримиз үчүн әмәс, бәлки Өз нийити һәм талай заман бурун Мәсиһ Әйсада бизгә билдүрүлгән мол меһирлиги бойичә бизни тәклип қилди. 10 Әнди болса ушбу инайәт өлүмни йоқ қилған вә һаятлиққа һәм чиримаслиққа йол көрсәткән хуш хәвәр арқилиқ Қутқузғучимиз Мәсиһ Әйсаниң пәйда болуши түпәйлидин рошән болди. 11 Мәзкүр хуш хәвәр үчүн мән вәзичи, әлчи вә устаз болуп тайинландим.
12 Шу сәвәптин мән мошундақ азапларни тартиватимән, бирақ уялмаймән, чүнки кимгә ишәнгинимни билимән вә сот күнигичә униңға тапшурғинимни у һимайә қилишқа қабил екәнлигини билимән. 13 Мәсиһ Әйсада болған сағлам сөзләрниң үлгисини тутқин, уларни сән мәндин аңлидиң вә етиқат һәм меһир-муһәббәтни риваҗландурғин. 14 Саңа аманәт қилинған шу әҗайип яхшилиқни биздә яшаватқан муқәддәс роһниң ярдими билән сақлиғин.
15 Асиядә* һәммисиниң мениңдин үз өргинини сән билисән. Уларниң арисида Пигел билән Ермоген бар. 16 Онисифорниң өйдикилиригә Рәббимиз рәһимлик қилғай, чүнки у мениң үчүн тәскинлик болди вә мениң кишәнлиримдин номус қилмиди. 17 Әксичә, Римда болғинида, у мени ихлас билән издәп тапти. 18 Униңға сот күни Һөкүмран Йәһва рәһимлигигә еришишқа яр бәргәй. У Әфәстә көрсәткән мол ярдими тоғрисида сән өзәңму яхши билисән.