Вәһий

7 Андин мән йәрниң төрт булуңида һечқандақ шамал йә йәргә, йә деңизға, йә дәрәқкә урмаслиғи үчүн, йәрниң төрт шамилини мәккәм тутуп турған төрт пәриштини көрдүм. 2 Мән йәнә бир пәриштини көрдүм, у қуяш чиқидиған тәрәптин көтирилип, униң қолида тирик Худаниң мөһүри болған. У җараңлиқ авази билән йәргә вә деңизға зиян кәлтүрүшкә һоқуқ берилгән төрт пәриштигә: 3 «Пәрвәрдигаримизниң қуллириниң маңлийиға мөһүр басмиғичә йә йәргә, йә деңизға, йә дәрәқләргә зиян кәлтүрмәңлар»,— деди.

4 Мән мөһүр бесилғанларниң санини аңлидим, уларниң сани — 144 000. Мөһүр бесилғанлар Исраил оғуллириниң һәрбир қәбилисидин еди:

5 Йәһуданиң қәбилисидин мөһүр билән бәлгүләнгәнләр — 12000, Рувимниң қәбилисидин — 12000, Гадниң қәбилисидин — 12000, 6 Ашер қәбилисидин — 12000, Нәпталим қәбилисидин — 12000, Манассә қәбилисидин — 12000, 7 Шимон қәбилисидин — 12000, Ләвий қәбилисидин — 12000, Иссакар қәбилисидин — 12000, 8 Зәбулун қәбилисидин — 12000, Йүсүп қәбилисидин — 12000, Бениамин қәбилисидин 12000 киши мөһүр билән бәлгүләнгән еди.

9 Кейин мән қарисам, һечким саналмайдиған инсанлардин ибарәт бүйүк көпчиликни көрдүм. Бу кишиләр барлиқ милләтләрдин, қәбилиләрдин, хәлиқләрдин вә тиллардин болуп, тәхтниң вә Қозиниң алдида туратти. Улар узун ақ кийимгә кийингән вә уларниң қоллирида хорма шахлири болған еди. 10 Улар үнлүк аваз билән: «Ниҗатлиғимиз үчүн биз тәхттә олтарған Худайимизға һәм Қозиға қәриздармиз!»— дәп вақиришатти.

11 Барлиқ пәриштиләр тәхтниң, ақсақалларниң вә төрт тирик мәхлуқниң әтрапида туратти. Улар тәхтниң алдида йәргә баш қоюп Худаға тазим қилип, 12 мундақ деди: «Амин! Бизниң дана, күчлүк, қадир Худайимизға мубарәк, шан-шөһрәт, тәшәккүр вә шан-шәрәп әбәттин-әбәт болсун! Амин».

13 Шу чағда ақсақалларниң бири мениңдин: «Бу ақ кийимгә кийингән адәмләр ким вә қәйәрдин кәлди?»— дәп сориди. 14 Мән шу заман униңға җававән: «Тәхсир, сиз яхширақ билисиз»,— дедим. У маңа: «Булар бүйүк апәттин өткәнләр. Улар өз кийимлирини Қозиниң қенида жуюп ақартқанлар. 15 Шу сәвәптин улар кечә-күндүз Худа тәхтиниң алдида болуп, Униң һәрәмидә Униңға муқәддәс хизмәт атқуруватиду. Вә тәхттә Олтарғучи Өз чедирини уларниң үстидин яйиду. 16 Улар әнди йә ач қалмайду, йә уссимайду, уларни қуяш һәм һечқандақ аптап көйдүрмәйду, 17 чүнки тәхтниң йенидики Қоза уларни бақиду вә һаятлиқ сүйиниң булақлириға йетиләйду. Һәм Худа уларниң көзлиридики һәрқандақ яшни сүртиду»,— деди.