Филипиликләргә
1 Мәсиһ Әйсаниң қуллири Паул вә Тимотийдин — Филипида туруватқан Мәсиһ Әйса йолида болған барлиқ муқәддәсләргә, шундақла назарәтчиләр билән ярдәмчилиригә салам!
2 Атимиз Худадин һәм Һакимдаримиз Әйса Мәсиһтин силәргә мол меһирлик вә течлиқ-аманлиқ болсун!
3 Һәрқетим силәрни әслигинимдә мән Рәббимизгә шүкүр ейтип, 4 ялвуруш дуайимда һәммиңлар үчүн өтүнимән. Мән хурсәнлик билән қизғин дуаларни 5 хуш хәвәрни йәткүзүш үчүн, биринчи күндин тартип бүгүнгичә қиливатқиниңларға ейтиватимән. 6 Мән шуниңға ишинимәнки, силәрдә яхши ишни Башлиғучи уни Әйса Мәсиһниң күнигичә тамамлайду. 7 Мениң барлиғиңлар тоғрилиқ шундақ ойлашқа һәммә асаслирим бар, чүнки силәр қәлбимдә һәм мениң билән мол меһирликни бөлүшүватисиләр. Бу зинданда кишәнләнгинимдиму вә хуш хәвәрни һимайә қилип, қануний һалда тәстиқлигәндимму силәр маңа ярдәмләштиңлар.
8 Мениң Мәсиһ Әйсадәк назук сезимләр билән барлиғиңларни сеғинғинимға Худа Өзи Гувачидур. 9 Мән силәрниң меһир-муһәббитиңлар тоғра билимдә һәм толуқ чүшиништә бара-бара техиму өсүши үчүн, дайимий дуа қиливатимән. 10 Шундақла силәрниң муһимирақ нәрсигә көз йәткүзгәч, нуқсансиз болуп вә Мәсиһниң күнигичә башқилар үчүн путликашаң болмаслиғиңларни халаймән. 11 Шуниңдәкла Әйса Мәсиһ арқилиқ Худаниң алқишиға һәм шөһритигә һәққаний мевиләргә толушуңлар үчүн дуадимән.
12 Қериндашлар, билип қоюңларки, мениң җағдийим хуш хәвәрниң тарқилишиға қаршилиқ болмай, әксичә түрткә болди. 13 Шуңа мениң Мәсиһ үчүн қамилишим, ордидики барлиқ қаравулларға вә башқа һәммәйләнгә аян болди 14 вә Һакимдар йолидики қериндашларниң көпинчиси мениң кишәнлирим түпәйлидин ишәшлик болуп, улғайған җасурлуқ билән Худа сөзини зор қорқумсизлиқ билән ейтиватиду.
15 Дәрһәқиқәт, бәзилири Мәсиһни мерәзлик қилип һәм риқабәтлишип вәз қилса, бәзилири ақкөңүллүк билән җакалайду. 16 Кейинкилири Мәсиһ тоғрисида меһир-муһәббитидин җакалаватиду, улар шуни билидуки, мән хуш хәвәрни һимайә қилиш үчүн қоюлған едим. 17 Биринчилири болса таза нийәттин әмәс, бәлки талашқақлиғидин, мениң кишәнлиниш дәрдимни күчәйтишни ойлап, шундақ қилмақта. 18 Әнди немә? Һечнемә, лекин ясалма болсун яки һәқиқәтән болсун, Мәсиһ һәққидә қандақла болмисун җакалиниватиду һәм мән буниңға хошал. Кәлгүсидиму хошал болумән, 19 чүнки силәрниң қизғин дуалириңлар вә Әйса Мәсиһниң роһиниң қувәтлиши арқилиқ азатлинишим келиду. 20 Чүнки мениң һечнәрсидин уялмаслиғимни вә һәрдайим болғинидәк, һазирму сөзниң толуқ әркинлигидә Мәсиһ мениң теним билән һаят яки өлүм арқилиқ улуқлинидиғанлиғини мән тақәтсизлик билән күтимән вә үмүтлинимән.
21 Мениң үчүн һаят — бу Мәсиһ вә өлүм — бу үмүткә еришиштур. 22 Әгәр маңа йәнә тәндә яшаш несип болса, бу мениң үчүн үнүмлүк әмгәкни билдүриду. Шундиму немини әвзәл көрүшимни ейтмаймән. 23 Мән иккиниң арисида таллашлиқта қалдим, бирақ халайдиғиним — азатлиниш, Мәсиһ билән биллә болуш, чүнки, әлвәттә, бу хелила убданирақ. 24 Амма силәр үчүн тенимда қелишим керәгирәк. 25 Демәк, буниңға ишәшлик болуп қелишимни билимән һәм етиқатиңларға яр болудиған утуқлириңлар вә хошаллиғиңлар үчүн, силәр билән болумән. 26 Шуниң билән новәттики қетим силәрдә болушимға түпәйли, мениң арқилиқ силәрни Мәсиһ Әйсадики зор шат-хорамлиқ толтуриду.
27 Пәқәт Мәсиһ һәққидики хуш хәвәргә лайиқ иш қилиңлар, келимәнму һәм силәрни көримәнму яки кәлмәймәнму, мән силәр тоғрисида хуш хәвәр етиқати үчүн янму-ян күришип бирликтә, бир роһта чиң туруватқиниңларни аңлай. 28 Һәм һечнәрсидә дүшмәнләрдин корқмаңлар. Улар үчүн бу — һалакәтниң испати, силәр үчүн болса — қутқузулушниң һәм бу Худадин. 29 Сәвәви, силәргә Мәсиһкә ишинишла әмәс, бәлки униң үчүн азаплинишму һәдийә қилинғандур. 30 Чүнки силәр мениңда көргәндәкла күрәшни жүргүзүватисиләр вә аңлиғиниңлардәк, мән һазирму уни жүргүзүватимән.